ដំណើរនៃការស្នើសុំការធានាឥណទាន BRGS
គម្រោងធានាឥណទានដើម្បីស្តារអាជីវកម្ម
គម្រោងធានាឥណទានដើម្បីស្តារអាជីវកម្ម (BRGS) គឺជាគម្រោងធានាឥណទានដំបូងបង្អស់ ដែលផ្តល់ដោយសាជីវកម្មធានាឥណទានកម្ពុជា (ស.ធ.ក.)។
BRGS មានគោលដៅគាំទ្រអាជីវកម្ម ទាំងអាជីវកម្មខ្នាតមីក្រូ សហគ្រាសខ្នាតតូចនិងមធ្យម និងសហគ្រាសខ្នាតធំ ក្នុងការពង្រីកលទ្ធភាពទទួលបានហិរញ្ញប្បទានពីគ្រឹះស្ថានហិរញ្ញវត្ថុចូលរួម (PFIs) សម្រាប់ការកៀរគរទុនបង្វិល, វិនិយោគ, និងការពង្រីកអាជីវកម្ម។ គំនិតផ្តួចផ្តើមនេះ ស្របនឹងគោលនយោបាយរបស់រាជរដ្ឋាភិបាល ក្នុងការគាំទ្រនិរន្តភាព និងការងើបឡើងវិញនៃសេដ្ឋកិច្ច ក្នុងអំឡុងពេលវិបត្តិជំងឺកូវីដ-១៩។
BRGS នឹងដើរតួជាទ្រព្យបញ្ចាំចាប់ពី ៧០% ដល់ ៨០% នៃទំហំកម្ចីដែលផ្តល់ដោយ PFIs ដូច្នេះនឹងជួយកាត់បន្ថយតម្រូវការទ្រព្យបញ្ចាំពីអាជីវកម្មដែលស្នើកម្ចី។
ចុចទីនេះ ដើម្បីទាញយក ៖ គោលការណ៍ណែនាំផ្លូវការអំពីគម្រោងធានាឥណទានដើម្បីស្តារអាជីវកម្ម
លក្ខខណ្ឌនៃ BRGS
អាជីវកម្មដែលមានគុណវឌ្ឍិ
ដើម្បីអាចទទួលបានការធានាឥណទានពី ស.ធ.ក. អាជីវកម្មដែលស្នើសុំកម្ចីត្រូវតែជា៖
- អាជីវកម្មដែលមានម្ចាស់ភាគហ៊ុនជាសញ្ជាតិខ្មែរ (កាន់កាប់ភាគហ៊ុនលើសពី ៥០%)
- អាជីវកម្មដែលបានចុះបញ្ជីជាមួយអាជ្ញាធរពាក់ព័ន្ធ
- អាជីវកម្មដែលមិនទាន់បានចុះបញ្ជី ត្រូវតែចុះបញ្ជី បន្ទាប់ពីទទួលបានការធានាឥណទាន។ ប្រសិនបើអាជីវកម្មនោះនៅតែមិនទាន់ចុះបញ្ជី កម្រៃ ធានាឥណទានប្រចាំឆ្នាំ នឹងត្រូវបូកបន្ថែម ០,៥% នៃទំហំធានាឥណទានជារៀងរាល់ឆ្នាំ
- អាជីវកម្មដែលមានលទ្ធភាពសង
វិធីនៃការស្នើសុំការធានាឥណទាន BRGS
១. អាជីវកម្មខ្នាតមីក្រូ សហគ្រាសខ្នាតតូចនិងមធ្យម និងសហគ្រាសខ្នាតធំ ត្រូវដាក់ពាក្យស្នើសុំកម្ចីពីគ្រឹះស្ថានហិរញ្ញវត្ថុចូលរួម (PFIs) ណាមួយរបស់សាជីវកម្មធានាឥណទានកម្ពុជា។
២. បន្ទាប់ពីវាយតម្លៃ និងអនុម័តសំណើសុំកម្ចីនោះ PFIs ត្រូវដាក់ពាក្យស្នើសុំការធានាឥណទានលើកម្ចីនោះ មកសាជីវកម្មធានាឥណទានកម្ពុជា។ PFIs មិនត្រូវផ្តល់កម្ចីទៅឱ្យអ្នកខ្ចី មុនពេលសំណើសុំការធានាឥណទាន ត្រូវបានអនុម័តដោយសាជីវកម្មធានាឥណទានកម្ពុជានោះទេ។
៣. សាជីវកម្មធានាឥណទានកម្ពុជា នឹងវាយតម្លៃលើសំណើសុំការធានាឥណទានរបស់ PFIs។ ប្រសិនបើសំណើសុំការធានាឥណទាននោះ ត្រូវបានអនុម័ត សាជីវកម្មធានាឥណទានកម្ពុជា នឹងផ្តល់ជូននូវលិខិតធានាឥណទានជូនទៅ PFIs។
៤. បន្ទាប់ពីទទួលបានលិខិតធានាឥណទាន PFIs ត្រូវផ្តល់កម្ចីដែលមានការធានានោះជូនទៅឱ្យអ្នកខ្ចី។
វិស័យអាទិភាព
វិស័យកសិកម្ម
- ការដាំដុះដំណាំ
- ការចិញ្ចឹមសត្វ
- វារីវប្បកម្ម
វិស័យឧស្សាហកម្ម
- ការកែច្នៃកសិផល
- ការផលិត និងកែច្នៃអាហារ
- ការផលិតទំនិញប្រើប្រាស់ក្នុងតំបន់
- ការកែច្នៃកាកសំនល់
- ផលិតកម្មទំនិញសម្រាប់វិស័យទេសចរណ៍
- ការផលិតផលិតផលសំរេច គ្រឿងបន្លាស់ រឺគ្រឿងផ្គុំ
- ការផលិតផលិតផលឱសថ ឧបករណ៍/ផលិតផលវេជ្ជសាស្រ្ត។
វិស័យសេវាកម្ម
- ឌីជីថល និងអាយស៊ីធី ដែលរាប់បញ្ចូលទាំងការស្រាវជ្រាវ និងអភិវឌ្ឍន៍ ឬការផ្គត់ផ្គង់សេវាកម្មផ្អែកលើអាយស៊ីធី
- ទេសចរណ៍ (សណ្ឋាគារ ផ្ទះសំណាក់ ភោជនីយដ្ឋាន និងភ្នាក់ងារទេសចរណ៍)
- ការធ្វើដំណើរ និងដឹកជញ្ចូន
- ការអប់រំ (ការបណ្តុះបណ្តាលវិជ្ជាជីវៈនិងការបណ្តុះបណ្តាលជំនាញ រួមបញ្ចូលផ្នែកឌីជីថល)
ចំណាំ:
* វិស័យមិនមែនអាទិភាព គឺជារិស័យទាំងឡាយណាដែលមិនមាននៅក្នុងតារាងខាងលើ។ វិស័យមិនមែនអាទិភាព ក៏អាចទទួលបាននៅគម្រោងធានាឥណទានដើម្បីស្តារអាជីវកម្មផងដែរ។
អត្ថប្រយោជន៍នៃ BRGS
- ១. គាំទ្រការងើបឡើងវិញរបស់អាជីវកម្ម និងការស្តារសេដ្ឋកិច្ចក្នុងអំឡុងពេលវិបត្តិជំងឺកូវីដ-១៩ ស្របតាមគោលនយោបាយរបស់រាជរដ្ឋាភិបាល
- ២. ដើរតួជាទ្រព្យបញ្ចាំចាប់ពី ៧០% ដល់ ៨០% នៃទំហំកម្ចីដែលផ្តល់ដោយ PFIs ដូច្នេះនឹងជួយកាត់បន្ថយតម្រូវការទ្រព្យបញ្ចាំពីអាជីវកម្មដែលស្នើកម្ចី
- ៣. ជួយឱ្យអាជីវកម្មមានលទ្ធភាពទទួលបានហិរញ្ញប្បទាន និងបង្កើនបរិយាបន្នហិរញ្ញវត្ថុនៅកម្ពុជា
- ៤. ជួយទ្រទ្រង់ដំណើរការអាជីវកម្មក្នុងអំឡុងពេលវិបត្តិជំងឺកូវីដ-១៩ និងផ្តល់ទុនវិនិយោគសម្រាប់ការពង្រីកអាជីវកម្ម
- ៥. ដើរតួជាឧបករណ៍គោលនយោបាយ ដើម្បីលើកកម្ពស់ការអភិវឌ្ឍ សហគ្រាសខ្នាតតូចនិងមធ្យម
- ៦. ធ្វើពិពិធកម្ម និងចែករំលែកហានិភ័យជាមួយ PFIs ដែលអាចបង្កើនទំហំកម្ចីដែលផ្តល់ឱ្យសហគ្រាសខ្នាតតូច និងមធ្យម
លក្ខណៈសហគ្រាស
BRGS មានគោលដៅគាំទ្រអាជីវកម្ម ទាំងអាជីវកម្មខ្នាតមីក្រូ សហគ្រាសខ្នាតតូចនិងមធ្យម និងសហគ្រាសខ្នាតធំ ក្នុងការពង្រីកលទ្ធភាពទទួលបានហិរញ្ញប្បទានពីគ្រឹះស្ថានហិរញ្ញវត្ថុចូលរួម (PFIs) សម្រាប់ការកៀរគរទុនបង្វិល, វិនិយោគ, និងការពង្រីកអាជីវកម្ម។
