គម្រោងធានាឥណទានសម្រាប់សហហិរញ្ញប្បទាន សម្រាប់វិស័យទេសចរណ៍

១. សហគ្រាសខ្នាតតូចនិងមធ្យម ត្រូវដាក់ពាក្យស្នើសុំកម្ចីពីគ្រឹះស្ថានហិរញ្ញវត្ថុចូលរួម (PFIs) ណាមួយ ដែលជា PFIs រួមគ្នា របស់សាជីវកម្មធានាឥណទានកម្ពុជាផង និងធនាគារសហគ្រាសធុនតូច និងមធ្យមកម្ពុជាផង។

២. បន្ទាប់ពីវាយតម្លៃ និងអនុម័តសំណើសុំកម្ចីនោះ PFIs ត្រូវដាក់ពាក្យស្នើសុំការធានាឥណទានលើកម្ចីនោះ ពីសាជីវកម្មធានាឥណទានកម្ពុជា ក្នុងរយៈពេល ៦០ថ្ងៃ ចាប់ពីថ្ងៃអនុម័តកម្ចី។

៣. សាជីវកម្មធានាឥណទានកម្ពុជា នឹងវាយតម្លៃលើសំណើសុំការធានាឥណទាន របស់PFIs។ ប្រសិនបើសំណើសុំការធានាឥណទាននោះ ត្រូវបានអនុម័ត សាជីវកម្មធានាឥណទានកម្ពុជានឹងផ្តល់ជូននូវលិខិតធានាឥណទាន និងវិក្កយបត្រជូនទៅ PFIs។

៤. PFIs អាចផ្តល់កម្ចីដែលមានការធានានោះ ជូនទៅអោយអ្នកខ្ចីបាន លុះត្រាតែ PFIs ទទួលបានលិខិតធានាឥណទានពីសាជីវកម្មធានាឥណទានកម្ពុជា និងលិខិតអនុម័តសហហិរញ្ញប្បទានស្តារ និងជំរុញកំណើនក្នុងវិស័យទេសចរណ៍ របស់ធនាគារសហគ្រាសធុនតូច និងមធ្យមកម្ពុជា។ ក្នុងករណីសហហិរញ្ញប្បទានស្តារ និងជំរុញកំណើនក្នុងវិស័យទេសចរណ៍ ត្រូវបានបដិសេដដោយធនាគារសហគ្រាសធុនតូច និងមធ្យមកម្ពុជា លិខិតធានាឥណទាន ដែលចេញដោយសាជីវកម្មធានាឥណទានកម្ពុជា នឹងត្រូវចាត់ទុកជាមោឃៈ។