សំណួរ-ចម្លើយសំខាន់ៗ

បច្ចុប្បន្ន CGCC ផ្តល់ការធានាលើកម្ចី ដែលបញ្ចេញដោយធនាគារ/គ្រឹះស្ថានមីក្រូហិរញ្ញវត្ថុដៃគូរបស់ CGCC (PFIs) ទៅកាន់ក្រុមហ៊ុនអាជីវកម្ម ជាពិសេស សហគ្រាសខ្នាតតូច និងមធ្យម ដែលខ្វះទ្រព្យបញ្ចាំ នៅពេលស្នើសុំកម្ចី។ និយាយឱ្យស្រួលស្តាប់ទៅ CGCC ដើរតួជាផ្នែកមួយនៃទ្រព្យបញ្ចាំ រហូតដល់៨០% នៃទំហំកម្ចី ដូច្នេះនឹងជួយកាត់បន្ថយតម្រូវការទ្រព្យបញ្ចាំពីក្រុមហ៊ុនអាជីវកម្ម ដែលស្នើកម្ចីទៅធនាគារ។

• ចុចទីនេះ៖ ស្វែងយល់អំពីការធានាឥណទាន 
• ចុចទីនេះ៖ អ្វីទៅជាការធានាឥណទាន?

CGCC មិនផ្តល់កម្ចីដោយផ្ទាល់ ដល់ក្រុមហ៊ុនអាជីវកម្មទេ។ CGCC មិនមែនជាធនាគារ/គ្រឹះស្ថានមីក្រូហិរញ្ញវត្ថុ ដែលអាចផ្តល់កម្ចីជូនលោកអ្នកបានទេ។ CGCC ជាសហគ្រាសសាធារណៈ ដែលផ្តល់ការធានាឥណទាន លើកម្ចីដែលបញ្ចេញដោយធនាគារ/គ្រឹះស្ថានមីក្រូហិរញ្ញវត្ថុដៃគូរបស់ CGCC (PFIs) ទៅកាន់ក្រុមហ៊ុនអាជីវកម្ម ជាពិសេសសហគ្រាសខ្នាតតូច និងមធ្យម ដែលខ្វះទ្រព្យបញ្ចាំ នៅពេលស្នើសុំកម្ចី។ ក្រុមហ៊ុនអាជីវកម្ម អាចស្នើសុំកម្ចីដែលមានការធានាពី CGCC តាមរយៈ PFIs របស់ CGCC បាន។

ដើម្បីស្វែងរក PFIs របស់ CGCC សូមចុច៖  https://bit.ly/3LkYuo7

ពិតណាស់! គម្រោងធានាឥណទានរបស់ CGCC មានគោលដៅគាំទ្រដល់ក្រុមហ៊ុនអាជីវកម្ម ទាំងអាជីវកម្មខ្នាតមីក្រូ សហគ្រាសខ្នាតតូចនិងមធ្យម និងសហគ្រាសខ្នាតធំ ក្នុងការពង្រីកលទ្ធភាពទទួលបានហិរញ្ញប្បទាន (កម្ចី) ពីធនាគារ/គ្រឹះស្ថានមីក្រូហិរញ្ញវត្ថុដៃគូ ឬហៅថា PFIs របស់ CGCC សម្រាប់ការកៀរគរទុនបង្វិល និងការពង្រីកអាជីវកម្ម។

នៅពេល CGCC ផ្តល់ការធានាឥណទានទៅកាន់ PFIs ក្រុមហ៊ុនអាជីវកម្មដែលជាអ្នកខ្ចីនឹងមានលទ្ធភាពខ្ពស់ជាងមុនក្នុងការទទួលបានកម្ចី។ ក្រុមហ៊ុនអាជីវកម្មអាចទទួលបានកម្ចីច្រើនជាងមុនពី PFIs ព្រោះ PFIs មានលទ្ធភាពផ្តល់កម្ចីច្រើនជាងមុន ដោយមិនចាំបាច់មានទ្រព្យបញ្ចាំ។ ដូច្នេះ ក្រុមហ៊ុនអាជីវកម្មដែលខ្វះទ្រព្យបញ្ចាំ អាចទៅរក PFIs របស់ CGCC ដើម្បីស្នើសុំកម្ចីដែលមានការធានាពី CGCC។

ការធានាឥណទានជួយបង្កើនលទ្ធភាពទទួលបានកម្ចីរបស់អ្នកខ្ចី។ ការធានាឥណទានជួយអ្នកខ្ចី ឱ្យទទួលបានកម្ចីទោះបីគ្មានទ្រព្យបញ្ចាំ និងជួយអ្នកខ្ចីឱ្យទទួលបានកម្ចីច្រើនជាងមុន ជាងការខ្ចីដោយគ្មានការធានាឥណទាន។

ឧទាហរណ៍ ប្រសិនបើគ្មានការធានាឥណទាន អ្នកខ្ចីដែលគ្មានទ្រព្យបញ្ចាំទាល់តែសោះ មិនអាចទទួលបានកម្ចីពីធនាគារនោះទេ ទោះបីអ្នកខ្ចីនោះមានលទ្ធភាពសងក៏ដោយ។ ប្រសិនមានការធានាឥណទាន អ្នកខ្ចីដែលគ្មានទ្រព្យបញ្ចាំទាល់តែសោះ អាចទទួលបានកម្ចីពីធនាគារ ដែលមានការធានាពី CGCC ដែលដើរតួជំនួសទ្រព្យបញ្ចាំរបស់អ្នកខ្ចី។

ម្យ៉ាងវិញទៀត ប្រសិនអ្នកខ្ចីមានទ្រព្យបញ្ចាំ ១០០.០០០ដុល្លារ ជាទូទៅ ធនាគារអាចផ្តល់កម្ចីក្នុងរង្វង់ ៧០.០០០ដុល្លារ។ ប្រសិនមានការធានាឥណទាន ជាមួយនឹងទ្រព្យបញ្ចាំ ១០០.០០០ដុល្លារ​ដូចគ្នា ធនាគារអាចផ្តល់កម្ចីរហូតដល់ ១០០.០០០ដុល្លារ ឬលើសពីនេះ ដល់អ្នកខ្ចី។

លក្ខខណ្ឌសម្រាប់អ្នកខ្ចី៖

១. អាជីវកម្មដែលមានម្ចាស់ភាគហ៊ុនសញ្ជាតិខ្មែរ (កាន់កាប់ភាគហ៊ុនលើសពី ៥០%)

២. អាជីវកម្មដែលបានចុះបញ្ជីជាមួយអាជ្ញាធរពាក់ព័ន្ធ (អាជីវកម្មដែលមិនទាន់បានចុះបញ្ជី ត្រូវធ្វើការចុះបញ្ចីបន្ទាប់ពីទទួលបានកម្ចីដែលមានការធានា)

៣. អាជីវកម្មដែលមានលទ្ធភាពសង (PFIs ត្រូវអនុម័តកម្ចីជាមុន មុនស្នើសុំការធានឥណទានពី CGCC)

ដើម្បីស្វែងរកព័ត៌មានអំពីវឌ្ឍនភាពការធានាឥណទានដែលបានធ្វើបច្ចុប្បន្នភាព សូមចុច៖ https://bit.ly/3m9t1cX

៥ជំហាន ដើម្បីស្នើសុំកម្ចី ដែលមានការធានាឥណទានពី CGCC៖

1. ជំហានទី១៖ អ្នកខ្ចី ត្រូវស្នើសុំកម្ចីទៅកាន់គ្រឹះស្ថានហិរញ្ញវត្ថុចូលរួម (PFIs) របស់ CGCC (ដើម្បីស្វែងរក PFIs របស់ CGCC សូមចុច https://bit.ly/3LkYuo7)។
2. ជំហានទី២៖ បន្ទាប់ពីទទួលបានសំណើសុំកម្ចី PFI នឹងវាយតម្លៃសំណើសុំកម្ចីនោះ ទៅតាមនីតិវិធី និងលក្ខខណ្ឌតម្រូវរបស់ PFIs នីមួយៗ។
3. ជំហានទី៣៖ នៅពេលសំណើកម្ចីនោះបំពេញគ្រប់លក្ខខណ្ឌតម្រូវ PFI នឹងស្នើសុំការធានាឥណទានមកកាន់ CGCC៕
4. ជំហានទី៤ ៖ CGCC នឹងវាយតម្លៃសំណើសុំធានាឥណទាននោះ រួចចេញលិខិតធានាទៅកាន់ PFIs ក្នុងរយៈពេលចន្លោះពី ៣ ទៅ ៥ថ្ងៃ។
5. ជំហានចុងក្រោយ៖ PFIs នឹងបញ្ចេញកម្ចី ដែលមានការធានាពី CGCC ជូនអ្នកខ្ចី។

CGCC បានចុះបញ្ជីជាផ្លូវការនៅខែវិច្ឆិកា ឆ្នាំ២០២០ ហើយគិតមកដល់សព្វថ្ងៃនេះ CGCC បានដាក់ចេញនូវគម្រោងធានាឥណទានចំនួន៣ រួមមាន៖

“គម្រោងធានាឥណទានដើម្បីស្តារអាជីវកម្ម (BRGS)” ជាគម្រោងធានាឥណទានដំបូងគេ ដាក់ឱ្យដំណើរការនាខែមីនា ឆ្នាំ២០២១។ គម្រោងនេះមានគោលដៅគាំទ្រដល់អាជីវកម្ម រួមទាំងខ្នាតតូច មធ្យម និងខ្នាតធំ ក្នុងការពង្រីកលទ្ធភាពទទួលបានហិរញ្ញប្បទានសម្រាប់ជាទុនបង្វិល និងពង្រីកអាជីវកម្ម។

• ចុចទីនេះ៖ ព័ត៌មានទាំងស្រុងនៃគម្រោង BRGS 
• ចុចទីនេះ៖ ខិត្តបណ្ណព័ត៌មាននៃគម្រោង

“គម្រោងធានាឥណទានសម្រាប់សហហិរញ្ញប្បទាន (CFGS)” ដែលជាគម្រោងធានាឥណទានទី២ ត្រូវបានដាក់ដំណើរការក្នុងខែកញ្ញា ឆ្នាំ២០២១ មានគោលដៅធានាដល់ឥណទានដែលបញ្ចេញដោយ PFIs របស់ CGCC ក្រោមគម្រោងសហហិរញ្ញប្បទាន ជំហានទី២ របស់ធនាគារសហគ្រាសធុនតូច និងមធ្យមកម្ពុជា។

• ចុចទីនេះ៖ ព័ត៌មានទាំងស្រុងនៃគម្រោង CFGS
• ចុចទីនេះ៖ ឯកសារគោលការណ៍ណែនាំនៃគម្រោង CFGS 

“គម្រោងធានាឥណទានសម្រាប់សហគ្រិនស្រ្តី” គឺជាគម្រោងឥណទានទី៣ ដែលបានដាក់ចេញនៅក្នុងខែមេសា ឆ្នាំ២០២២ ក្នុងគោលបំណងបង្កើនការគាំទ្រដល់សហគ្រិនស្ត្រី និងអាជីវកម្មដែលគ្រប់គ្រង និងដឹកនាំដោយស្ត្រីឱ្យទទួលបានហិរញ្ញប្បទានផ្លូវការ តាមរយៈការធានាឥណទានរបស់ CGCC លើកម្ចី រហូតដល់ ៨០% នៃទំហំកម្ចីសម្រាប់គ្រប់វិស័យ ជាមួយនឹងលក្ខខណ្ឌអនុគ្រោះផ្សេងៗទៀត។

• ចុចទីនេះ៖ ព័ត៌មានទាំងស្រុងនៃគម្រោង WEGS
• ចុចទីនេះ៖ ឯកសារគោលការណ៍ណែនាំនៃគម្រោង WEGS 

“គម្រោងធានាឥណទានសម្រាប់សហហិរញ្ញប្បទាន សម្រាប់វិស័យទេសចរណ៍ (CFGS-TR)” ដែលជាគម្រោងធានាឥណទាននៅក្រោមគម្រោង CFGS របស់ CGCC ដែលផ្តល់ដល់អាជីវកម្មផ្សេងៗនៅក្នុងវិស័យទេសចរណ៍ តាមរយៈគម្រោងសហហិរញ្ញប្បទានស្តារ និងជំរុញកំណើនក្នុងវិស័យទេសចរណ៍ របស់ធនាគារសហគ្រាសធុនតូច និងមធ្យមកម្ពុជា។

• ចុចទីនេះ៖ ព័ត៌មានទាំងស្រុងនៃគម្រោង CFGS-TR
• ចុចទីនេះ៖ ឯកសារគោលការណ៍ណែនាំនៃគម្រោង CFGS 

ការធានាឥណទានចំនួន ៨០% លើប្រាក់ដើមនៃកម្ចី មានន័យថា CGCC រ៉ាប់រងលើហានិភ័យចំនួន ៨០% ដែលអាចកើតមានឡើងនៅពេលធនាគារផ្តល់កម្ចីជូនទៅក្រុមហ៊ុនអាជីវកម្ម។

ការធានាឥណទាននេះ ដើរតួដូចគ្នានឹងទ្រព្យបញ្ចាំដែរ។ ករណីកម្ចីមានទ្រព្យបញ្ចាំ នៅពេលកម្ចីខូច ធនាគារអាចរឹបអូសយកទ្រព្យបញ្ចាំរបស់អ្នកខ្ចី មកទូទាត់ប្រាក់ដើមនៃកម្ចី។ ដោយឡែក ចំពោះករណីកម្ចីមានការធានាឥណទានពី CGCC នៅពេលកម្ចីខូច ធនាគារអាចទាមទារសំណងពី CGCC មកទូទាត់ប្រាក់ដើមនៃកម្ចី។

ដូច្នេះ ការធានាឥណទាន អាចជួយសម្រាលបន្ទុករបស់អ្នកខ្ចី ក្នុងការផ្តល់ទ្រព្យបញ្ចាំទៅធនាគារ នៅពេលស្នើសុំកម្ចី។ ទន្ទឹមនេះ ធនាគារក៏អាចចាប់យកអតិថិជនច្រើនបន្ថែមទៀត ដែលខ្វះទ្រព្យបញ្ចាំ ដើម្បីផ្តល់កម្ចី ដែលមានការធានាពី CGCC។
យ៉ាងណាក៏ដោយ ទោះបីជាកម្ចីមានទ្រព្យបញ្ចាំក្តី ឬកម្ចីមានការធានាឥណទានក្តី អ្នកខ្ចីនៅតែមានកាតព្វកិច្ចសង ទៅកាន់ធនាគារ។

សូមអរគុណចំពោះការចាប់អារម្មណ៍លើការធានាឥណទាន។ លោកអ្នកអាចទំនាក់ទំនងមកប្រឹក្សាយោបល់ជាមួយ CGCC បានតាមរយៈ៖

• លេខទូរសព្ទ៖ 023 722 123
• អ៊ីម៉េល៖ [email protected]
• ទំព័រហ្វេសប៊ុក៖ https://www.facebook.com/officialcgcc  
• តេឡេក្រាម៖ https://t.me/CGCCCambodia