ព័ត៌មានថ្មីៗ Archives

គម្រោងធានាឥណទានសហគ្រិនស្ត្រីមានប្រមាណ ៤០ភាគរយ ទទួលបានការធានាពីសាជីវកម្មធានាឥណទានកម្ពុជា

Posted on ខែសីហា 19, 2024ខែសីហា 22, 2024 by Sorn Chhorvyvatey

ជាង៤០ ភាគរយនៃប្រាក់កម្ចីទាំងអស់ដែលធានាដោយសាជីវកម្មធានាឥណទានកម្ពុជា (CGCC) ត្រូវបានផ្តល់ទៅឱ្យសហគ្រិនស្ត្រី នេះបើតាមលោក KL Wong អគ្គនាយកនៃសាជីវកម្មធានាឥណទានកម្ពុជា (CGCC) ក្នុងបទសម្ភាសន៍ជាមួយកាសែតខ្មែរថាមស៍។

បច្ចុប្បន្ន CGCC បានធានាឥណទានចំនួន ២០០លានដុល្លារដល់ ២.៣៦៦ គណនីសហគ្រាសធុនតូច និងមធ្យម ដូចដែលបានកំណត់រយៈពេលបីឆ្នាំនៃប្រតិបត្តិការ។ CGCC បានអោយដឹងថា ដោយបានចាប់ផ្តើមក្នុងអំឡុងពេលជំងឺ Covid-19 ដើម្បីជួយទ្រទ្រង់ដំណើរអាជីវកម្ម ឥឡូវនេះស្ថាប័នបានធានាឥណទានចំនួន ១២៩ លានដុល្លារ និងចំនួនទឹកប្រាក់ធានា ៩៤ លានដុល្លារពីការផ្តល់ប្រាក់កម្ចីដល់អាជីវកម្មសហគ្រាសធុនមីក្រូ តូច និងមធ្យម ដែលបានផ្តល់ការងារដល់ជាង ៥២.០០០កន្លែងដល់ប្រជាជនកម្ពុជា។

នៅក្រោមគម្រោងធានាឥណទានរបស់សហគ្រិនស្ត្រី (WEGS) មានអត្ថប្រយោជន៍ជាច្រើនសម្រាប់ស្ត្រីដែលទទួលយកឥណទានដែលធានាដោយ CGCC ។ លោក Wong បាននិយាយថា ក្នុងចំណោមអត្ថប្រយោជន៍នានាគឺអត្រាការប្រាក់ទាបជាមួយធនាគារ ថ្លៃធានាទាបសម្រាប់ឆ្នាំដំបូង និងការធានារ៉ាប់រងលើប្រាក់កម្ចីខ្ពស់ជាង។

លោកបានបន្តថា ការធានាសម្រាប់សហគ្រាសធុនតូច និងមធ្យមក្រោមគម្រោងធានាការស្ដារអាជីវកម្មរបស់ CGCC (BRGS) គឺ ១ ភាគរយ។ ប៉ុន្តែសម្រាប់សហគ្រិនស្ត្រី ថ្លៃសេវានេះត្រូវបានកាត់បន្ថយមកត្រឹម ០,៥ ភាគរយសម្រាប់ឆ្នាំដំបូងនៃឥណទាន។ ក្រៅពីនោះ សម្រាប់សហគ្រាសធុនតូច និងមធ្យមក្រោមគម្រោង BRGS ប្រហែល ៧០ ភាគរយនៃឥណទានត្រូវបានធានាដោយ CGCC ។ ចំណែកគម្រោងសហគ្រិនស្ត្រីខ្ពស់រហូតដល់ ៨០ ភាគរយនៃឥណទានត្រូវបានធានាដោយ CGCC។

រហូតមកដល់ពេលនេះ CGCC បានគាំទ្រសហគ្រិនស្ត្រីជាច្រើននៅក្នុងវិស័យចម្រុះ។ អ្នកទទួលផលមួយក្នុងចំណោមអ្នកទទួលផលពីគម្រោងរបស់ខ្លួនគឺក្រុមហ៊ុនឬទ្ធិពល ដែលមានអ្នកស្រី Bopha Pen ជាស្ថាបនិក និងជាអគ្គនាយក។ នៅឆ្នាំ២០២០ អ្នកស្រីបានជួបវិបត្តហិរញ្ញវត្ថុ ហើយត្រូវការដើមទុនសម្រាប់ប្រតិបត្តិការប្រចាំថ្ងៃ អ្នកស្រីបានស្វែងរកប្រាក់កម្ចីពីធនាគារ។ ប៉ុន្តែ អ្នកស្រីមិនមានវត្ថុបញ្ចាំគ្រប់គ្រាន់ រហូតដល់ CGCC បានធានាប្រាក់កម្ចីរបស់អ្នកស្រីជាមួយស្ថាប័នហិរញ្ញវត្ថុដែលជាដៃគូរបស់ខ្លួនគឺ CAMMA មីក្រូហិរញ្ញវត្ថុ។

បច្ចុប្បន្ននេះ អ្នកស្រី Bopha ដំណើរការក្រុមហ៊ុនឬទ្ធិពល និងបានបើកដំណើរការមជ្ឈមណ្ឌលបណ្តុះបណ្តាល និងបង្កើតកម្មវិធីទូរស័ព្ទ fintech Kotluy ។ សហគ្រិនស្ត្រីម្នាក់ទៀតដែលទទួលបានអត្ថប្រយោជន៍ពីការធានាឥណទានរបស់ CGCC គឺក្រុមហ៊ុន SOGE របស់អ្នកស្រី ខៀវ ធីតា។ SOGE (Solar Green Energy (Cambodia) Co) ជាក្រុមហ៊ុនផលិតគ្រឿងអេឡិចត្រូនិកថាមពលកកើតឡើងវិញ ដែលខ្វះដើមទុនសម្រាប់ការពង្រីក។

លោក K L Wong បាននិយាយថា រដ្ឋាភិបាលផ្តល់អាទិភាពដល់អាជីវកម្មដែលដឹកនាំដោយស្ត្រី។ នៅពេលដែលបានចាប់ផ្តើមដំបូងនៅឆ្នាំ២០២១ ប្រហែល២៣ភាគរយនៃអ្នកខ្ចីសរុបរបស់ខ្លួនគឺជាស្ត្រី។ ចំនួននេះបានកើនឡើងដល់៣៥ ភាគរយនៃអ្នកខ្ចីសរុបក្នុងឆ្នាំ២០២២។ នៅចុងឆ្នាំ២០២៣ ខ្ពស់រហូតដល់៤២ ភាគរយនៃផលប័ត្រធានាឥណទានសរុបរបស់ CGCC គឺសម្រាប់ស្ត្រី។

លោកបានបន្ថែមថា “យើងមានមោទនភាពចំពោះភាពចម្រុះនៅក្នុងផលប័ត្ររបស់យើង”។ បច្ចុប្បន្ន CGCC មានគម្រោងធានាឥណទានចំនួនប្រាំ។ ក្រៅពីគម្រោង WEGS និង BRGS CGCC ក៏មានគម្រោងការធានាឥណទានសម្រាប់សហហិរញ្ញប្បទាន (CFGS) គម្រោងធានាឥណទានសម្រាប់សហហិរញ្ញប្បទានសម្រាប់វិស័យទេសចរណ៍ (CFGS-TR) និងគម្រោងការធានាឥណទានជាកញ្ចប់ (PGS)។

លោកបានលើកឡើងទៀតថា គម្រោងរបស់ពួកគេគឺត្រូវបានកែសម្រួលសម្រាប់សហគ្រាសធុនតូច និងមធ្យម ដែលជាផ្នែកមួយដ៏សំខាន់នៃសេដ្ឋកិច្ចរបស់កម្ពុជា។ សហគ្រាសធុនតូច និងមធ្យមតំណាងឱ្យ ៧០ ភាគរយនៃឱកាសការងារនៅក្នុងប្រទេស និងរួមចំណែក ៥៨ ភាគរយដល់ផលិតផលសរុបក្នុងស្រុករបស់ប្រទេស។ CGCC បានអោយដឹងថា ខ្លួនកំពុងគាំទ្រសហគ្រាសធុនតូច និងមធ្យមពីវិស័យចម្រុះ ដូចជា កសិកម្ម សេវាកម្ម ឧស្សាហកម្ម និងសេវាកម្ម។

លោកបានបន្ថែមថា គម្រោង WEGS មានកម្រិតសម្រាប់អត្រាការប្រាក់នៃឥណទាន។ សម្រាប់អត្រាការប្រាក់ឆ្នាំដំបូង រួមទាំងថ្លៃធានាឆ្នាំដំបូងគឺ ៨ ភាគរយសម្រាប់ឥណទានជាប្រាក់រៀល និង ៩ ភាគរយសម្រាប់ឥណទានជាប្រាក់ដុល្លារ។ ហើយសម្រាប់គ្រឹះស្ថានមីក្រូហិរញ្ញវត្ថុ (MFIs) និងស្ថាប័នទទួលប្រាក់បញ្ញើ (MDIs) ស្ត្រីអាចទទួលបានឥណទានដែលមានអត្រាការប្រាក់ ១០ ភាគរយសម្រាប់កម្ចីជាប្រាក់រៀល និង ១១ ភាគរយសម្រាប់កម្ចីជាប្រាក់ដុល្លារ។

លោកបានមានប្រសាសន៍ថា អាជីវកម្មដែលដឹកនាំដោយស្ត្រីមានសិទ្ធិទទួលបានកម្ចីគ្រប់ប្រភេទ រួមទាំងកម្ចីមានរយៈកាល សម្ភារៈហិរញ្ញប្បទានពាណិជ្ជកម្ម។ល។

ជាមួយគ្នានេះ ក៏មានជម្រើសមិនត្រឹមតែសម្រាប់កម្ចីថ្មីប៉ុណ្ណោះទេ ប៉ុន្តែថែមទាំងផ្តល់កម្ចីចាស់ឡើងវិញផងដែរ។ CGCC បាននិយាយថា បច្ចុប្បន្ន ខ្លួនកំពុងធានាទាំងប្រាក់កម្ចីដែលមានការធានា និងមិនមានការធានា។ ចំនួនប្រាក់កម្ចីអតិបរមាសម្រាប់កម្ចីដើមទុនគឺ ៣០០.០០០ដុល្លារ ហើយចំនួនអតិបរមាសម្រាប់គម្រោងវិនិយោគ និងពង្រីកអាជីវកម្មគឺ ៥០០.០០០ដុល្លារ។

Credit to: Khmer Times, Published on 16 August 2024

CGCC, GuarantCo និង PIDG សហការគ្នាបង្កើនបរិយាបន្នហិរញ្ញវត្ថុ និងការវិនិយោគលើហេដ្ឋារចនាសម្ព័ន្ធប្រកបដោយនិរន្តរភាព នៅកម្ពុជា

Posted on ខែសីហា 7, 2024ខែសីហា 8, 2024 by Sorn Chhorvyvatey

(ភ្នំពេញ)៖ សាជីវកម្មធានាឥណទានកម្ពុជា (CGCC) និង ក្រុមហ៊ុន GuarantCo, នៃសម្ព័ន្ធអភិវឌ្ឍន៍ហេដ្ឋារចនាសម្ព័ន្ធឯកជន (Private Infrastructure Development Group-PIDG) បានចុះអនុស្សរណៈនៃការយោគយល់គ្នា (MoU) ក្នុងគោលគោលបំណងបង្កើនបរិយាបន្នហិរញ្ញវត្ថុប្រកបដោយចីរភាព និងឱកាសវិនិយោគនៅកម្ពុជា។ កិច្ចសហប្រតិបត្តិការនេះ នឹងបង្កើនសមត្ថភាពនៃការធានាឥណទានរបស់ CGCC តាមរយៈការចូលរួមរបស់ CGCC ក្នុងប្រតិបត្តិការធានាឥណទាន ជាមួយក្រុមហ៊ុន GuarantCo និងការទទួលបានជំនួយបច្ចេកទេសពី PIDG។

ជាមួយនឹងបទពិសោធន៍ធានាលើការបោះផ្សាយសញ្ញាបណ្ណចំនួនបី នៅកម្ពុជា ក្រុមហ៊ុន GuarantCo កំពុង សិក្សាលើការជួយអភិវឌ្ឍសមត្ថភាពធានារបស់ CGCC នៅក្នុងទីផ្សារមូលធន តាមរយៈកម្មវិធី PIDG Credit Enhancement Facility។

កម្មវិធីនេះមានគោលបំណងបង្កើនលទ្ធភាពធានាលើរូបិយប័ណ្ណក្នុងស្រុក នៅក្នុងទីផ្សារគោលដៅ តាមរយៈការចាប់ដៃគូជាមួយស្ថាប័នក្នុងស្រុក និងការប្រើប្រាស់ធនធានពី PIDG Group ពោលគឺ ការផ្តល់ការធានាបន្ត (Re-Guarantee) ដោយ GuarantCo និងជំនួយបច្ចេកទេសពី PIDG។

អនុស្សរណៈនៃការយោគយល់គ្នានេះ គឺជាជំហានដំបូង របស់ភាគីទាំងពីរ ក្នុងការឆ្ពោះទៅរកការរៀបចំក្របខណ្ឌនៃកិច្ចព្រមព្រៀងភាពជាដៃគូទូលំទូលាយមួយ ដែលភាគីទាំងពីរសង្ឃឹមថានឹងអាចចាប់ផ្តើមនៅក្នុងឆ្នាំនេះ ដោយរួមមាន ការផ្ទេរអ៊ិចស្ប៉ូស័រនៃការធានាទៅវិញទៅមក រវាង CGCC និង GuarantCo ក៏ដូចជា ជំនួយបច្ចេកទេសផងដែរ។

កម្មវិធីជំនួយបច្ចេកទេសរបស់ PIDG នឹងគាំទ្រ CGCC ក្នុងការរៀបចំឯកសារសំខាន់ៗ សម្រាប់ការធានាលើការបោះផ្សាយសញ្ញាបណ្ណ និងផ្តល់អ្នកប្រឹក្សាយោបល់លើប្រតិបត្តិការធានាឥណទាន ក៏ដូចជាផ្តល់ការគាំទ្រដល់ការកសាងសមត្ថភាព លើដំណើរការគ្រប់គ្រងឥណទាន ការវិនិយោគ និងការអភិវឌ្ឍប្រកបដោយចីរភាព។

លោក Philippe Valahu នាយកប្រតិបត្តិរបស់ PIDG បានមានប្រសាសន៍ថា៖ «ដំណោះស្រាយហិរញ្ញប្បទានក្នុងតំបន់ គឺជាផ្នែកដ៏សំខាន់មួយនៃយុទ្ធសាស្ត្រឆ្នាំ២០៣០ របស់យើង ហើយការបង្កើតឱ្យមានជំនួយសម្រាប់លើកកម្ពស់ឥណទាននៅក្នុងប្រទេស គឺជាគោលដៅសំខាន់មួយ ដើម្បីជួយអភិវឌ្ឍទីផ្សារក្នុងស្រុក។ ការចុះហត្ថលេខាលើអនុស្សរណៈនៃការយោគយល់ជាមួយ CGCC នឹងជួយពន្លឿនការងារនេះ»។

លោក Layth Al-Falaki នាយកប្រតិបត្តិក្រុមហ៊ុន GuarantCo បានមានប្រសាសន៍ថា៖ «យើងមានមោទនភាពដែលបានចុះហត្ថលេខាលើអនុស្សរណៈនៃការយោគយល់គ្នានេះ ជាមួយសាជីវកម្មធានាឥណទានកម្ពុជា និងអាចប្រើប្រាស់លទ្ធភាពធានាដើម្បីគាំទ្រដល់ CGCC ក្នុងការពង្រីកប្រតិបត្តិការរបស់ខ្លួនសម្រាប់ការផ្តល់ហិរញ្ញប្បទានប្រកបដោយចីរភាព តាមរយៈទីផ្សារមូលធនក្នុងស្រុក ស្របតាមផែនការយុទ្ធសាស្ត្ររបស់ PIDG និង GuarantCo។ វត្តមានរបស់ក្រុមហ៊ុន GuarantCo នៅកម្ពុជាបានចាប់ផ្តើមនៅឆ្នាំ២០២២ តាមរយៈការធានាលើការបោះផ្សាយសញ្ញាប័ណ្ណរបស់ក្រុមហ៊ុន First Finance, Royal Railway និងក្រុមហ៊ុន Cellcard នៅឆ្នាំ២០២៣។ តាមរយៈអនុស្សរណៈនៃការយោគយល់ជាមួយ CGCC នេះ យើងនឹងបន្តសន្ទុះការងាររបស់យើងនៅក្នុងប្រទេសកម្ពុជា ដើម្បីផ្តល់ផលប្រយោជន៍ដល់ប្រជាជនកម្ពុជា នូវការអភិវឌ្ឍហេដ្ឋារចនាសម្ព័ន្ធដែលមានលក្ខណៈកាន់តែប្រសើរឡើង»។

លោក Wong Keet Loong អគ្គនាយកសាជីវកម្មធានាឥណទានកម្ពុជា បានមានប្រសាសន៍ថា៖ «យើងមានកិត្តិយសជាខ្លាំងដែលមានឱកាសសហការជាមួយក្រុមហ៊ុន GuarantCo ដែលជាក្រុមហ៊ុនផ្តល់ការធានាលំដាប់អន្តរជាតិ ទទួលបានទុនពីរដ្ឋាភិបាលចំនួន ៧នៃក្រុមប្រទេស G12 រួមមាន ចក្រភពអង់គ្លេស ស្វីស ស៊ុយអែត អូស្ត្រាលី ហូឡង់ កាណាដា និងបារាំង។ CGCC នឹងទទួលបានអត្ថប្រយោជន៍ពីជំនាញឯកទេស ក្នុងដំណើរការធានាលើការបោះផ្សាយសញ្ញាបណ្ណរបស់យើង។ យើងពិតជាមានសេចក្តីរំភើបជាខ្លាំងចំពោះកិច្ចសហប្រតិបត្តិការនេះ ហើយរំពឹងថានឹងទទួលបានការគាំទ្រដ៏រឹងមាំ ដែលអាចពង្រីកសមត្ថភាពធានារបស់យើង»។

អំពី GuarantCo

GuarantCo កៀរគរការវិនិយោគរូបិយប័ណ្ណ ក្នុងស្រុកពីវិស័យឯកជនសម្រាប់គម្រោងហេដ្ឋារចនាសម្ព័ន្ធ និងគាំទ្រដល់ការអភិវឌ្ឍទីផ្សារហិរញ្ញវត្ថុនៅក្នុងប្រទេសដែលមានប្រាក់ចំណូលទាបនៅទូទាំងទ្វីបអាហ្វ្រិក និងអាស៊ី។ GuarantCo គឺជាផ្នែកមួយនៃ PIDG និងទទួលមូលនិធិពីរដ្ឋាភិបាលនៃចក្រភពអង់គ្លេស ស្វីស អូស្ត្រាលី និងស៊ុយអែត តាមរយៈ PIDG Trust ពីប្រទេសហូឡង់ តាមរយៈ FMO និង PIDG Trust ពីប្រទេសបារាំង តាមរយៈមណ្ឌលប្រចាំការ និង Global Affairs ពីប្រទេសកាណាដា តាមរយៈជំនួយដែលផ្តល់សំណងវិញបាន។ GuarantCo ទទួលបានចំណាត់ថ្នាក់ឥណទាន កម្រិត AA ពីក្រុមហ៊ុនវាយតម្លៃ Fitch និងកម្រិត A1 ពីក្រុមហ៊ុនវាយតម្លៃ Moody’s។ ចាប់តាំងពីឆ្នាំ ២០០៥ មក ក្រុមហ៊ុន GuarantCo បានគាំទ្រដល់ការកៀរគរប្រាក់វិនិយោគសរុបចំនួន ៦,៨ ពាន់លានដុល្លារ និងការវិនិយោគពីវិស័យឯកជនចំនួន ៥,៧ ពាន់លានដុល្លារ ដោយផ្តល់អត្ថប្រយោជន៍ពីការវិនិយោគលើហេដ្ឋារចនាសម្ព័ន្ធ ដល់ប្រជាជនចំនួន ៤៤,៧ លាននាក់ និងបង្កើតការងារប្រមាណ ២៤៣.០០០។ សកម្មភាពរបស់ GuarantCo ស្ថិតក្រោមការគ្រប់គ្រងរបស់ក្រុមហ៊ុន GuarantCo Management Company ដែលជាផ្នែកមួយនៃស្ថាប័ន Cardano Development www.guarantco.com

អំពី PIDG

ក្រុមអភិវឌ្ឍន៍ហេដ្ឋារចនាសម្ព័ន្ធឯកជន (PIDG) គឺជាក្រុមហ៊ុនអភិវឌ្ឍគម្រោងហេដ្ឋារចនាសម្ព័ន្ធប្រកបដោយនវានុវត្តន៍ និងជាក្រុមហ៊ុនវិនិយោគ ដែលកៀរគរការវិនិយោគឯកជនសម្រាប់ហេដ្ឋារចនាសម្ព័ន្ធប្រកបដោយនិរន្តភាព និងបរិយាបន្នកម្មក្នុងអនុតំបន់សាហារ៉ានៃទ្វីប អាហ្វ្រិក និងនៅអាស៊ីខាងត្បូង និងអាស៊ីអាគ្នេយ៍។ ការវិនិយោគរបស់ PIDG ជំរុញដល់ការអភិវឌ្ឍសេដ្ឋកិច្ចសង្គម ក្នុងការឆ្ពោះទៅរកការបំភាយឧស្ម័នសូន្យ ការប្រយុទ្ធប្រឆាំងនឹងភាពក្រីក្រ និងរួមចំណែកដល់គោលដៅអភិវឌ្ឍន៍ប្រកបដោយចីរភាព (SDG)។ PIDG សម្រេចបាននូវមហិច្ឆិតារបស់ខ្លួន ស្របតាមគុណតម្លៃរបស់ក្រុមហ៊ុនក្នុងការច្នៃប្រឌិតថ្មី ភាពជាដៃគូ សុវត្ថិភាព បរិយាបន្ន និងភាពបន្ទាន់។

PIDG ផ្តល់ជំនួយបច្ចេកទេសសម្រាប់សកម្មភាពក្នុងដំណាក់កាលដំបូង និងដើមទុនសម្បទាន។ ក្រុមហ៊ុន បុត្រសម្ព័ន្ធរបស់ PIDG ដែលផ្តោតលើការអភិវឌ្ឍគម្រោង រួមមាន InfraCo Africa និង InfraCo Asia ធ្វើការវិនិយោគលើការអភិវឌ្ឍគម្រោងក្នុងដំណាក់កាលដំបូង និងការវិនិយោគលើភាគហ៊ុនកម្មសិទ្ធិរបស់សាជីវកម្មនានា។ ដំណោះស្រាយឥណទានរបស់ PIDG រួមមាន EAIF (មូលនិធិហេដ្ឋារចនាសម្ព័ន្ធអាហ្វ្រិកដែលកំពុងរីកចម្រើន) ជាមូលនិធិបំណុលចម្រុះដំបូងគេ និងទទួលបានជោគជ័យ នៅក្នុងទីផ្សារនៃប្រទេសដែលមានប្រាក់ចំណូលទាប ខណៈដែល GuarantCo ដែលជាស្ថាប័នធានាឥណទាន និងជាបុត្រសម្ព័ន្ធរបស់ PIDG ផ្តល់ការលើកកម្ពស់ឥណទាន និងដំណោះស្រាយរូបិយប័ណ្ណក្នុងស្រុកតាមរយៈការកាត់បន្ថយហានិភ័យរបស់គម្រោង និងបង្កើនការធានាលើឥណទានក្នុងស្រុក ដែលអនុញ្ញាតឱ្យមានការផ្តល់ហិរញ្ញប្បទានដល់ការអភិវឌ្ឍហេដ្ឋារចនាសម្ព័ន្ធ។

ចាប់តាំងពីឆ្នាំ ២០០២ មក PIDG បានគាំទ្រដល់គម្រោងហេដ្ឋារចនាសម្ព័ន្ធចំនួន២៣៣ ដោយបានផ្តល់ជូននូវលទ្ធភាពប្រើប្រាស់ហេដ្ឋារចនាសម្ព័ន្ធថ្មី ឬប្រសើរជាងមុន ដល់ប្រជាជនប្រមាណជា ២២៨ លាននាក់។ PIDG ទទួលបានមូលនិធិពីរដ្ឋាភិបាលនៃចក្រភពអង់គ្លេស ហូឡង់ ស្វីស អូស្ត្រាលី ស៊ុយអែត ក្រសួងកិច្ចការសកលនៃប្រទេសកាណាដា អាល្លឺម៉ង់ និង IFC។ pidg.org

អំពីសាជីវកម្មធានាឥណទានកម្ពុជា

សាជីវកម្មធានាឥណទានកម្ពុជា (CGCC) គឺជាក្រុមហ៊ុនធានាឥណទានមុនដំបូងបង្អស់នៅកម្ពុជា ដែលត្រូវបានសម្រេចបង្កើតឡើងដោយ សម្តេចអគ្គមហាសេនាបតីតេជោ ហ៊ុន សែន ជាសហគ្រាសសាធារណៈ ក្រោមអាណាព្យាបាលបច្ចេកទេស និងហិរញ្ញវត្ថុ របស់ក្រសួងសេដ្ឋកិច្ច និងហិរញ្ញវត្ថុ។ បេសកកម្មចម្បងរបស់សាជីវកម្មធានាឥណទានកម្ពុជា គឺផ្តល់នូវការធានាឥណទាន ដើម្បីលើកកម្ពស់បរិយាបន្នហិរញ្ញវត្ថុ និងគាំទ្រការអភិវឌ្ឍសហគ្រាសធុនតូច និងមធ្យមនៅកម្ពុជា។ នៅថ្ងៃទី៣១ ខែមករា ឆ្នាំ ២០២៤ CGCC បានប្រកាសជាផ្លូវការនូវការក្លាយខ្លួនជាបុគ្គលធានាលើការបោះផ្សាយសញ្ញាបណ្ណដំបូងគេរបស់កម្ពុជា បន្ទាប់ពីទទួលបានការទទួលស្គាល់ពីនិយ័តករមូលបត្រកម្ពុជា (SERC) និងទទួលបានចំណាត់ថ្នាក់ឥណទាន khAAA ដែលជាចំណាត់ថ្នាក់ខ្ពស់បំផុតក្នុងស្រុក ពីក្រុមហ៊ុន រ៉េតធីង អេជេនស៊ី អហ្វ ខេមបូឌា។ CGCC មានគោលបំណងផ្តល់ការធានាលើការបោះផ្សាយសញ្ញាបណ្ណរបស់សាជីវកម្មក្នុងស្រុក នៅក្នុងទីផ្សារមូលបត្រកម្ពុជា (CSX) ដើម្បីគាំទ្រដល់ក្រុមហ៊ុនក្នុងស្រុក ក្នុងការកៀរគរទុន និងដើម្បីអភិវឌ្ឍវិស័យមូលបត្រនៅប្រទេសកម្ពុជា។ គិតត្រឹមបំណាច់ខែមិថុនា ឆ្នាំ២០២៤ CGCC បានផ្តល់ការធានាលើឥណទានប្រមាណ ២០០លានដុល្លារ ដល់សហគ្រាសខ្នាតតូច និងមធ្យម ជាង ២.៣០០ អាជីវកម្ម។ www.cgcc.com.kh

Credit to: Fresh News, Publish on 07 August 2024

ឯកសារទស្សនទានសម្រាប់អនុវត្តកំណែទម្រង់កសិកម្ម

Posted on ខែកក្កដា 8, 2024ខែកក្កដា 11, 2024 by Sorn Chhorvyvatey

កាលពីថ្ងៃអង្គារ ក្រសួងកសិកម្ម រុក្ខាប្រមាញ់ និងនេសាទ បានដឹកនាំក្រុមការងារ និងមន្ត្រីជំនាញ ជួបពិភាក្សាជាមួយអ្នកឯកទេសផ្នែកធនធានធម្មជាតិ និងកសិកម្ម និងជាតំណាងធនាគារអភិវឌ្ឍន៍អាស៊ី (ADB) ដើម្បីរៀបចំឯកសារទស្សនទានសម្រាប់រៀបចំគម្រោង “ពន្លឿនការកែទម្រង់វិស័យកសិកម្ម” ហើយកិច្ចពិភាក្សានោះក៏មានការចូលរួមពីមន្ត្រីនៃសាជីវកម្មធានាឥណទានកម្ពុជា (CGCC) ផងដែរ ដោយប្រើប្រាស់ហិរញ្ញប្បទានសម្បទានពី ADB ចំនួន ១០០លានដុល្លារ។

លោក មាស ពិសិដ្ឋ អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានដឹកនាំកិច្ចប្រជុំជាមួយភាគីពាក់ព័ន្ធ ដើម្បីរៀបចំឯកសារទស្សនទានសម្រាប់ការរៀបចំគម្រោងពន្លឿនការកែទម្រង់វិស័យកសិកម្ម។ កំណែទម្រង់នេះមានគោលបំណងរួមចំណែកដល់ការសម្រេចបាននូវគោលនយោបាយអាទិភាពរបស់រាជរដ្ឋាភិបាលនីតិកាលទី៧ និងក្រសួងកសិកម្ម តាមរយៈការប្រមូល និងពង្រឹងសមត្ថភាពសហគមន៍កសិកម្មទំនើបទាំងផ្នែកផលិតកម្ម និងការតភ្ជាប់ទីផ្សារ។

វាក៏នឹងរក្សាបានកំណើនសេដ្ឋកិច្ច និងភាពធន់នឹងការប្រែប្រួលអាកាសធាតុ ការរក្សាបានតុល្យភាពរវាងតម្រូវការនិងការផ្គត់ផ្គង់ ទាំងទីផ្សារក្នុងស្រុក ទីផ្សារនាំចេញ ការគាំទ្របច្ចេកទេសនិងមធ្យោបាយដល់មន្ត្រីកសិកម្មឃុំ ដែលត្រូវបានជ្រើសរើសបម្រើសេវាបច្ចេកទេស និងទីផ្សារដល់សហគមន៍ជនបទ។

លោកបានបន្តថា គម្រោងនេះ ត្រូវអនុវត្តន៍ក្នុងរយៈពេល៦ឆ្នាំ ចាប់ពីឆ្នាំ២០២៦ តទៅ ដោយប្រើប្រាស់ហិរញ្ញប្បទានសម្បទានពីធនាគារអភិវឌ្ឍន៍អាស៊ីចំនួន ១០០លានដុល្លារអាមេរិក ក្រោមការគ្រប់គ្រង និងអនុវត្តរបស់ក្រសួងកសិកម្ម រុក្ខាប្រមាញ់ និងនេសាទ ដោយសហការជាមួយក្រសួងនិងស្ថាប័នរដ្ឋមួយចំនួនទៀត។

លោកបានលើកឡើងទៀតថា គម្រោងនេះនឹងគ្រោងអនុវត្តនៅតំបន់ប៉ូលសេដ្ឋកិច្ចទី៤ រួមមានខេត្តពោធិ៍សាត់ បាត់ដំបង ប៉ៃលិន និងខេត្តបន្ទាយមានជ័យ ដោយផ្តោតលើកសិផលដែលមានតម្លៃខ្ពស់មួយចំនួនដូចជា អង្ករក្រអូប ស្វាយ មៀនប៉ៃលិន ស្វាយចន្ទី និងជលផលជាដើម ដើម្បីឱ្យស្របនឹងគោលការណ៍របស់ Rice-Fish Economic corridorផងដែរ។

កាលពីថ្ងៃចន្ទ ក្នុងពិធីទិវាមច្ឆជាតិ” លើកទី១៩ ដែលបានរៀបចំឡើងនៅស្រុកព្រៃឈរ ខេត្តកំពង់ចាម លោកនាយករដ្ឋមន្ត្រី ហ៊ុន ម៉ាណែត បានមានប្រសាសន៍ថា រាជរដ្ឋាភិបាលកម្ពុជា ប្តេជ្ញាធ្វើទំនើបកម្មវិស័យកសិកម្ម ដោយសារវាមានសារៈសំខាន់ក្នុងការធានាសន្តិសុខស្បៀង និង ជីវភាពរស់នៅរបស់ប្រជាពលរដ្ឋ។

លោកបានបន្តថា ដើម្បីលើកស្ទួយវិស័យនេះ ទាមទារឱ្យមានការប្រើប្រាស់បច្ចេកវិទ្យាថ្មីៗ ការស្រាវជ្រាវ និងការអភិវឌ្ឍនៃយន្តការ ក៏ដូចជាការបង្កើនសមត្ថភាពប្រព័ន្ធធារាសាស្ត្រ ដើម្បីបង្កើនផលិតភាព និងពិពិធកម្មដំណាំ និងទីផ្សារដែលមានសក្តានុពល។

លោកបានបន្ថែមថា៖ «វិស័យកសិកម្មសព្វថ្ងៃខុសពី ៣០ ឬ ៤០ ឆ្នាំមុន ដោយសារបច្ចុប្បន្នកម្លាំងពលកម្មសម្រាប់កសិកម្មបានធ្លាក់ចុះមកនៅត្រឹម ៣៦ ភាគរយដោយសារពួកគេភាគច្រើនងាកមកធ្វើការក្នុងវិស័យឧស្សាហកម្ម។ ខណៈដែលចំនួនប្រជាជនកើនឡើងមានអ្នកហូបច្រើន អ្នកផលិតថយ។ នោះជាស្ថានភាពនៅពេលនេះ ហើយនោះហើយជាមូលហេតុដែលយើងត្រូវតែដាក់គោលនយោបាយគ្រប់គ្រាន់ដើម្បីជំរុញឲ្យមានទំនើបកម្មក្នុងវិស័យកសិកម្ម»។

លោកបានបញ្ជាក់ទៀតថា ក្រសួងកសិកម្មបាននឹងកំពុងរៀបចំសហគមន៍កសិកម្មទំនើបនៅតាមខេត្ត ដើម្បីរួមគ្នាថែរក្សា អភិវឌ្ឍ និងបង្កើនប្រាក់ចំណូល។

គួរកត់សម្គាល់ថា កាលពីខែសីហា ឆ្នាំមុន រដ្ឋាភិបាលបានបម្រុងថវិការប្រមាណ ១០០លានដុល្លារសម្រាប់ជំរុញវិស័យកសិកម្មរបស់ប្រទេស។

លោកបានបន្តថា៖ «យើងបានត្រៀមថវិកា ១០០លានដុល្លារដើម្បីអន្តរាគមន៍លើផលិតផលកសិកម្មដូចជា ស្រូវ អង្ករ និងបន្លែ»។

លោកបណ្ឌិត ជ័យ តិច អ្នកជំនាញអភិវឌ្ឍន៍សង្គម និងសេដ្ឋកិច្ច បានប្រាប់កាសែតខ្មែរថាមស៍ថា កំណែទម្រង់វិវិស័យកសិកម្ម ក៏ដូចជាការពង្រាយមន្ត្រីកសិកម្មនៅគ្រប់ឃុំទូទាំងប្រទេស និងការបង្កើតសហគមន៍កសិកម្មទំនើប ពិតជាបានរួមចំណែកលើកកម្ពស់វិស័យកសិកម្មនៅកម្ពុជា។

លោកបានបន្ថែម“កសិកម្ម គឺជាវិស័យសំខាន់មួយក្នុងប្រទេសកម្ពុជា ក្នុងចំណោមវិស័យសំខាន់ៗចំនួនបី ដើម្បីជំរុញកំណើនសេដ្ឋកិច្ចជាតិ រួមមាន ឧស្សាហកម្ម សេវាកម្ម និងកសិកម្ម។ ផ្អែកលើតួលេខសេដ្ឋកិច្ច យើងឃើញថាវិស័យកសិកម្មបានរួមចំណែកដល់ទៅ២២ ភាគរយនៃផលិតផលក្នុងស្រុកសរុបរបស់កម្ពុជា»។

លោកបានបន្តទៀតថា ក្រៅពីពង្រាយមន្ត្រីកសិកម្មនៅតាមឃុំ និងពង្រីកសហគមន៍កសិកម្មទំនើប រាជរដ្ឋាភិបាលត្រូវពង្រឹងជំនាញកសិកម្មបន្ថែមទៀតដល់កសិករ ជាពិសេសការធ្វើកសិកម្មបែបទំនើប ដើម្បីតាមទាន់បរិបទក្នុងតំបន់ និងពិភពលោក។

Credit to: Khmer Times, Published on 04 July 2024

កម្មវិធីហិរញ្ញវត្ថុគាំទ្រការវិនិយោគ (ISF) នឹងជួយពង្រីកទុនវិនិយោគម្ចាស់អាជីវកម្មកែច្នៃជលផល រហូតដល់៩ដងនៃទុនដើម

Posted on ខែឧសភា 30, 2024ខែឧសភា 30, 2024 by Sorn Chhorvyvatey

(ភ្នំពេញ)៖ លោក ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានថ្លែងថា តាមរយៈការដាក់ឱ្យដំណើរការនៃកម្មវិធីហិរញ្ញវត្ថុគាំទ្រការវិនិយោគ (ISF) នឹងជួយដល់ម្ចាស់អាជីវកម្មកែច្នៃផលិតផលជលផលមានលទ្ធភាពពង្រីកទុនវិនិយោគរបស់ខ្លួនរហូតដល់៩នៃដើមទុនដែលមានបច្ចុប្បន្ន ដើម្បីជំរុញឱ្យការផលិតកាន់តែមានស្តង់ដារគុណភាព។

លោក ឌិត ទីណា ថ្លែងបែបនេះ ធ្វើឡើងក្នុងពិធីដាក់ឱ្យដំណើរការ នៃកម្មវិធីហិរញ្ញវត្ថុគាំទ្រការវិនិយោគ (Investment Support Facility-ISF) នាថ្ងៃទី២៩ ខែឧសភា ឆ្នាំ២០២៤នេះ នៅសណ្ឋាគារសូហ្វីតែល ភ្នំពេញភូគីត្រា។

លោកបានគូសបញ្ជាក់ថា តាមរយៈគម្រោងនេះ សហគ្រាសកែច្នៃ នឹងទទួលបានកម្ចី៥ដងលើទុនសរុបដែលខ្លួនមានបច្ចុប្បន្ន ដើម្បីយកទៅពង្រីកអាជីវកម្ម។ ពោលគឺប្រសិនបើសហគ្រាសមួយបច្ចុប្បន្នមានទុន៥ពាន់ដុល្លារ នឹងអាចខ្ចីបានរហូត២ម៉ឺន៥ពាន់ដុល្លារ ហើយគម្រោងនឹងជួយបន្ថែមប្រមាណ៤០%ពីលើនេះ ដែលនឹងធ្វើឱ្យម្ចាស់អាជីវកម្មអាចទទួលបានការវិនិយោគទុនបន្ថែមរហូតដល់៤៥០០០ដុល្លារ។ហេតុដូច្នេះហើយ ម្ចាស់អាជីវកម្មដែលមានដើមទុនដើម៥ពាន់ដុល្លារ និងអាចពង្រីករហូត៥ម៉ឺនដុល្លារ។

លោកបានពន្យល់ថា សហគ្រាសដែលនឹងទទួលបានការគាំទ្រ គឺតម្រូវឱ្យសហគ្រាសនីមួយៗត្រូវមានទុនផ្ទាល់ខ្លួន១០% ពោលគឺជាសហគ្រាសដែលមានទីតាំងសម្រាប់ប្រកបអាជីវកម្មខ្លួនឯងស្រាប់ និងបានដំណើរការអាជីវកម្ម ហើយចង់ពង្រីកអាជីវកម្មបន្ថែម។

លោកបានបញ្ជាក់ថា កម្ចីនេះនឹងត្រូវបានធានាដោយ សាជីវកម្មធានាឥណទានកម្ពុជា (CGCC) រហូតដល់៨០%។ លោកសុទិដ្ឋនិយមថា ការដាក់ដំណើរការនូវគម្រោងនេះ គឺជាការដាក់ចេញចំទិសដៅ ឆ្លើយតបទៅនឹងអ្វីដែលម្ចាស់សហគ្រាស់បានជួបប្រទះ ក្នុងការកែច្នៃផលិតផលជលផល ព្រមទាំងបានជះផលជាវិជ្ជមានដល់អ្នកទទួលផលផងដែរ។

លោកបានថ្លែងថា «អ៊ីចឹងគឺជាឱកាសមួយដ៏ធំណាស់សម្រាប់ឱ្យអ្នកដែលមានគំនិត អ្នកដែលតស៊ូ ខំប្រឹងប្រែង គឺអាចទៅដល់ការស្រម៉ៃរបស់ខ្លួនហើយចាប់យកភាពជោគជ័យ។ អ៊ីចឹងការរៀបចំគឺការគិតគូរល្អិត ហើយកម្ចីក៏មិនមែនជាកម្ចីដែលការប្រាក់ខ្ពស់។»

សូមជម្រាបថា កម្មវិធីហិរញ្ញវត្ថុគាំទ្រការវិនិយោគ (ISF) ត្រូវបានដាក់ឱ្យដំណើរការដោយអង្គការ UNIDO រដ្ឋបាលជលផល និងសាជីវកម្មធានាឥណទានកម្ពុជា ដើម្បីជំរុញកំណើនក្នុងវិស័យជលផលក្រោយប្រមូលផល។ តាមរយៈកម្មវិធីជំរុញកំណើនវិស័យជលផលប្រកបដោយចីរភាព គម្រោងអភិវឌ្ឍន៍ជលផលក្រោយប្រមូលផល (CAPFISH-Capture) គាំទ្រថវិកាដោយ សហភាពអឺរ៉ុប (EU) សាជីវកម្មធានាឥណទានកម្ពុជា (CGCC) រដ្ឋបាលជលផល (FiA) និងអង្គការសហប្រជាជាតិ ដើម្បីអភិវឌ្ឍន៍ឧស្សាហកម្ម (UNIDO) រួមគ្នាសម្ភោធដាក់ឲ្យដំណើរការកម្មវិធីហិរញ្ញវត្ថុគាំទ្រការវិនិយោគ (ISF) ដែលមានគោលដៅជំរុញកំណើន ក្នុងវិស័យជលផលក្រោយប្រមូលផលនៅកម្ពុជា។

CGCC មានតួនាទីជាអង្គភាពគ្រប់គ្រង ISF ដោយធ្វើការជាមួយធនាគារពាណិជ្ជ និងគ្រឹះស្ថានហិរញ្ញវត្ថុនៅកម្ពុជា។

លោកបណ្ឌិត ម៉ី វ៉ាន់ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ (MEF) និងជាសមាជិកក្រុមប្រឹក្សាភិបាលរបស់ CGCC មានប្រសាសន៍ថា «ISF ពិតជាមានសារៈសំខាន់ និងអត្ថប្រយោជន៍យ៉ាងខ្លាំងចំពោះវិស័យជលផលនៅកម្ពុជា។ តាមរយៈគម្រោងនេះ ប្រតិបត្តិករពាក់ព័ន្ធ ក្នុងវិស័យជលផលក្រោយប្រមូលផល នឹងមានលទ្ធភាពទទួលបាននូវការគាំទ្រជំនួយបច្ចេកទេស ការសាងសមត្ថភាព និងជំនួយហិរញ្ញប្បទាន ដែលរួមមាន ជំនួយឥតសំណង និងឥណទានដែលមានការធានា ក្នុងលក្ខខណ្ឌអនុគ្រោះជាច្រើន។ គម្រោង ISF នឹងចូលរួមជំរុញកំណើនសេដ្ឋកិច្ច និងលើកកម្ពស់ការអភិវឌ្ឍវិស័យកសិកម្ម ដែលជាអាទិភាពចម្បងរបស់រាជរដ្ឋាភិបាលនីតិកាលទី៧ នៃរដ្ឋសភា តាមរយៈការធ្វើទំនើបកម្ម ការបង្កើនផលិតភាពនៃវិស័យកសិកម្ម ជាមួយការរក្សាបាននូវគុណភាពនៃផលិតផលកសិកម្ម និងកសាងបាននូវភាពធន់នៃវិស័យនេះ ដើម្បីធានាបាននូវសន្តិសុខ និងសុវត្ថិភាពស្បៀង ក៏ដូចជាការបង្កើនបាននូវតម្លៃបន្ថែមកាន់តែខ្ពស់ និងភាពប្រកួតប្រជែង ទាំងតម្លៃ និងគុណភាព»។

លោក ដឺជេន តេហ្សេរ៉ា នាយកផ្នែកអភិវឌ្ឍន៍ហេដ្ឋារចនាសម្ព័ន្ធ និងកសិពាណិជ្ជកម្មរបស់អង្គការ UNIDO លើកឡើងថា «អង្គការ UNIDO ពិតជាមានមោទនភាពក្នុងការដាក់ចេញនូវកម្មវិធី ISF សម្រាប់បម្រើឱ្យវិស័យនេះ។ តាមរយៈបទពិសោធន៍ដ៏រឹងមាំរបស់ UNIDO លើការអភិវឌ្ឍខ្សែច្រវាក់តម្លៃ និងហិរញ្ញវត្ថុប្រកបដោយនវានុវត្តន៍ យើងមានជំនឿយ៉ាងមុតមាំថាគម្រូកម្មវិធី ISFនេះ ពិតជាអាចរួមចំណែកបង្កើនគុណតម្លៃ និងបរិមាណនៃផល ផលិតផលជលផលដែលប្រកបដោយគុណភាព និងសុវត្ថិភាព ជួយឱ្យសហគ្រាសកែច្នៃផល ផលិតផលជលផលទទួលបានជោគជ័យនៅក្នុងទីផ្សារសកល»៕

Credit to: Fresh News, Published on 29 May 2024

CGCC ចាប់ផ្តើមដំណើរការកម្មវិធីកសាងសមត្ថភាពសហគ្រិនវគ្គទី១នៃឆ្នាំ២០២៤ ដល់សហគ្រិន២០រូប

Posted on ខែឧសភា 29, 2024ខែមិថុនា 20, 2024 by Sorn Chhorvyvatey

(ភ្នំពេញ)៖ សាជីវកម្មធានាឥណទានកម្ពុជា (CGCC) សហការជាមួយនឹងធនាគារ អេស៊ីលីដា បានរៀបចំនូវកម្មវិធីកសាងសមត្ថភាពសហគ្រិនរបស់ CGCC ដែលហៅថា Entrepreneurship Program Initiative of CGCC (EPIC) វគ្គទី១ នៃឆ្នាំ២០២៤ ស្តីអំពី «គន្លឹះក្នុងការរៀបចំផែនការអាជីវកម្ម និងយុទ្ធសាស្រ្តទទួលបានហិរញ្ញប្បទានផ្លូវការ»។

កម្មវិធីកសាងសមត្ថភាពសហគ្រិនរបស់ CGCC នេះ បានរៀបចំឡើង កាលពីថ្ងៃទី២៥ ខែឧសភា ឆ្នាំ២០២៤ នៅឯមជ្ឈមណ្ឌលអភិវឌ្ឍធុរកិច្ច ដោយមានការចូលរួមពីសិក្ខាកាមចំនួន២០រូប ដែលជាម្ចាស់អាជីវកម្មសហគ្រាសខ្នាតមីក្រូ តូច និងមធ្យម មកពីរាជធានីភ្នំពេញ និងខេត្តក្រុងចំនួន៥។

EPIC គឺជាកម្មវិធីបណ្តុះបណ្តាល និងលើកកម្ពស់សមត្ថភាពសហគ្រាសខ្នាតមីក្រូ តូច និងមធ្យមរយៈពេលវែងមួយរបស់ CGCC ដែលត្រូវបានដាក់ឱ្យដំណើរការជាផ្លូវការចាប់ពីឆ្នាំ២០២៤តទៅ និងផ្តោតលើការបណ្តុះបណ្តាលចំណេះដឹងហិរញ្ញវត្ថុ សហគ្រិនភាព ការធានាឥណទាន និងការប្រើប្រាស់កម្ចីប្រកបដោយប្រសិទ្ធភាព និងការទទួលខុសត្រូវ។

តាមរយៈ EPIC វគ្គទី១ នៃឆ្នាំ២០២៤នេះ សិក្ខាកាមទាំងអស់បានស្វែងយល់លើប្រធានបទបណ្តុះបណ្តាលគោលស្តីអំពី «គន្លឹះក្នុងការរៀបចំផែនការអាជីវកម្ម និងយុទ្ធសាស្រ្តទទួលបានហិរញ្ញប្បទានផ្លូវការ» ដែលប្រធានបទនេះផ្តល់ឱ្យសិក្ខាកាមបានស្វែងយល់ពីសារៈសំខាន់នៃផែនការអាជីវកម្ម និងជាពិសេសសម្រាប់ដាក់ស្នើកម្ចីទៅធនាគារ ឬគ្រឹះស្ថានមីក្រូហិរញវត្ថុ និងទទួលបានឱកាសអនុវត្តជាក់ស្តែងលើការរៀបចំផែនការអាជីវកម្ម នៅក្នុងថ្នាក់រៀនផ្ទាល់ផងដែរ។

បន្ថែមពីនេះ សិក្ខាកាមក៏ទទួលបាននូវព័ត៌មានទាក់ទងនឹងយន្តការធានាឥណទានរបស់ CGCC ក្នុងការគាំទ្រលទ្ធភាពទទួលបានហិរញ្ញប្បទានរបស់ SMEs និងផលិតផលឥណទានដែលមានការធានា និងនីតិវិធីនៃការអនុម័តកម្ចីរបស់ធនាគារ អេស៊ីលីដាផងដែរ។

ការកសាងសមត្ថភាពសហគ្រិនគឺជាការងារអាទិភាពមួយរបស់CGCC ក្នុងបេសកកម្មបង្កើនបរិយាបន្នហិរញ្ញវត្ថុ និងអភិវឌ្ឍសហគ្រាសខ្នាតតូច និងមធ្យម នៅកម្ពុជា។ EPIC គឺជាកម្មវិធីកសាងសមត្ថភាពសហគ្រិនជាអាទិភាពមួយរបស់ CGCC ដែលនឹងនាំមកនូវប្រធានបទពាក់ព័ន្ធ ដោយផ្អែកលើស្ថានភាពជាក់ស្តែងតាមរយៈវគ្គបណ្តុះបណ្តាលនីមួយៗ នាពេលបន្តបន្ទាប់ ក្រោមកិច្ចសហការជាមួយស្ថាប័នពាក់ព័ន្ធ/គ្រឹះស្ថានហិរញ្ញវត្ថុចូលរួម ដែលមានឆន្ទៈក្នុងការផ្តល់នូវការអភិវឌ្ឍសមត្ថភាពរយៈពេលវែងជូនដល់សហគ្រាសខ្នាតតូច និងមធ្យម។

សហគ្រិនដែលមានចំណាប់អារម្មណ៍ចង់ចូលរួមវគ្គបណ្តុះបណ្តាល EPIC វគ្គបន្ទាប់ៗទៀត សូមតាមដានការចែករំលែកនៅលើទំព័រហ្វេសប៊ុករបស់ CGCC ៖ https://www.facebook.com/officialcgcc ៕

Credit to: Fresh News Plus, Published on 28 May 2024

អ្នកជំនួញស្រូវអង្ករកាន់តែងាយទទួលបានឥណនទាន ដែលអាចខ្ចីបានរហូត ៣លានដុល្លារ សម្រាប់ជាទុនទិញស្រូវស្តុកទុក និងកែច្នៃ

Posted on ខែឧសភា 13, 2024ខែឧសភា 15, 2024 by Sorn Chhorvyvatey

(ភ្នំពេញ)៖ កន្លងមកអ្នករកស៊ីក្នុងវិស័យស្រូវអង្ករ តែងតែលើកឡើងពីបញ្ហាខ្វះទុន និងការពិបាកក្នុងការទទួលបានឥណទាន ដែលធ្វើឱ្យពួកគេមិនមានលទ្ធភាពគ្រប់គ្រាន់ ក្នុងការប្រមូលទិញស្រូវសម្រាប់ស្តុកទុក និងកែច្នៃជាអង្ករសម្រាប់នាំចេញ។

ដើម្បីជំរុញឱ្យការទទួលបានឥណទាន របស់អ្នករកស៊ីក្នុងវិស័យស្រូវអង្ករកាន់តែងាយស្រួល និងមានទំហំសមល្មម សាជីវកម្មធានាឥណទានកម្ពុជា (CGCC) បានដាក់នូវគម្រោងធានាឥណទាន សម្រាប់ការនាំចេញអង្ករ (REGS) ដើម្បីជួយឱ្យម្ចាស់រោងម៉ាស៊ីនកិនស្រូវ មានលទ្ធភាពពង្រីកវិសាលភាពរបស់ខ្លួន ក្នុងការប្រមូលស្រូវស្តុកសំរាប់កិនកែច្នៃនាំចេញ បង្កើត និងបង្កើននូវផលិតផលតម្លៃបន្ថែម នៅក្នុងស្រុក។

លោក រស់ សីលវ៉ា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានថ្លែងថា ការផ្តល់នូវការធានាឥណទាន សម្រាប់វិស័យស្រូវអង្ករ គឺពិតជាមានសារៈសំខាន់ ព្រោះវិស័យស្រូវអង្ករ គឺជាវិស័យដ៏មានសក្តានុពលរបស់កម្ពុជា ដែលទទួលបានការយកចិត្តទុកដាក់ពីរាជរដ្ឋាភិបាល ហើយការដាក់ចេញនូវគម្រោងនេះ គឺជាការបើកផ្លូវសម្រាប់អ្នកជំនួញក្នុងវិស័យនេះ ឱ្យងាយទទួលបានហិរញ្ញប្បទាន។

លោកមានប្រសាសន៍ថា ដោយសារហានិភ័យក្នុងវិស័យស្រូវអង្ករ បានធ្វើឱ្យធនាគារពាណិជ្ជមួយចំនួនមិនហ៊ានសម្រេចចិត្ត ក្នុងការផ្តល់ឥណទាន ដល់អ្នករកស៊ីក្នុងវិស័យស្រូវអង្ករនោះទេ។ តែយ៉ាងនេះក្តី តាមរយៈគម្រោងដែលមានការសហការជាមួយនឹងគ្រឹះស្ថានហិរញ្ញវត្ថុចំនួន៧ នឹងអាចស្វែងរកដំណោះស្រាយបាន។

លោកលើកឡើងថា បើតាមការសិក្សារបស់សហព័ន្ធស្រូវអង្ករកម្ពុជា តម្រូវការហិរញ្ញប្បទានបន្ថែម សម្រាប់ការគាំទ្រដល់ការនាំចេញអង្ករ យ៉ាងហោចណាស់ប្រមាណជា ១២០លានដុល្លារ។ តែយ៉ាងណាក្នុងដំណាក់កាលទី១នេះ គម្រោងធានាឥណទានសម្រាប់ការនាំចេញស្រូវអង្ករ មានទំហំទឹកប្រាក់សរុប ៣០លានដុល្លារ។ លោកថា ពិតណាស់គម្រោង ៣០លានដុល្លារនេះនៅតូច ខណៈតម្រូវការធំរហូតដល់ ១២០លានដុល្លារ ដូច្នេះក្រសួងសេដ្ឋកិច្ច និងហិរញ្ញវត្ថុ នឹងបន្តគាំទ្រដល់គម្រោងពង្រីកវិសាលភាពនៃធានាឥណទាននេះបន្តទៀត ផ្អែកលើតម្រូវការជាក់ស្តែង និងសមត្ថភាពស្រូបទៅលើសមាជិករបស់សហព័ន្ធស្រូវអង្ករកម្ពុជា។

បើតាមលោករដ្ឋលេខាធិការ សម្រាប់ក្រុមហ៊ុនកែច្នៃនាំចេញអង្ករ និងម្ចាស់រោងម៉ាស៊ីន អាចមានលទ្ធភាពខ្ចីអតិបរមារហូតដល់ ៣លានដុល្លារ ដោយ CGCC នឹងផ្តល់ការធានា ៨០%នៃទំហំកម្ចីសរុប។

លោកគូសបញ្ជាក់ថា ទំហំកម្ចីអតិបរមា ៣លានដុល្លារនេះ គឺជាទំហំសមស្របសម្រាប់ក្រុមហ៊ុនកែច្នៃនាំចេញ និងម្ចាស់រោងម៉ាស៊ីនយកទៅពង្រីកវិសាលភាពអាជីវកម្មរបស់ខ្លួន។ លោកសង្ឃឹមថា កិច្ចការនេះនឹងរួមចំណែកដល់ការសម្រេចគោលដៅ នៃគោលនយោបាយនាំចេញស្រូវអង្ករ ១លានតោនរបស់រាជរដ្ឋាភិបាល ។

លោកជំរុញលើកទឹកចិត្តដល់ការបញ្ចេញថវិកា ៣០លាននេះឱ្យបានលឿន និងជំរុញឱ្យក្រុមហ៊ុននាំចេញអង្ករ និងរោងម៉ាស៊ីនកិនស្រូវ ប្រើប្រាស់ឥណទាននេះ ឱ្យមានប្រសិទ្ធភាព និងការទទួលខុសត្រូវ ហើយត្រូវប្រើប្រាស់ឱ្យចំទិសដៅជាទុនបង្វិលក្នុងរយៈពេលខ្លី ក្នុងការប្រមូលទិញស្រូវ សម្រាប់ផលិតអង្ករនាំចេញ ដើម្បីផ្តល់ផលប្រយោជន៍ដល់ការនាំចេញអង្ករ។

លោកស្រី សាន សុខរីណា ប្រធានការិយាល័យអភិវឌ្ឍន៍ផលិតផល និងសហប្រតិបត្តិការរបស់ CGCC បានឱ្យដឹងថា សម្រាប់អ្នកដែលទទួលឥណទាន ដោយមានការធានានេះ គឺប្រភេទអាជីវកម្មដែលមានម្ចាស់ភាគហ៊ុនជាសញ្ញាតិខ្មែរ ៥០% ជាក្រុមហ៊ុននាំចេញអង្ករ និងរោងម៉ាស៊ីនកិនស្រូវ ព្រមទាំងជាសមាជិករបស់សហព័ន្ធស្រូវអង្ករកម្ពុជា។ ហើយក្រុមហ៊ុនទាំងនោះ ត្រូវមានប្រតិបត្តិការអាជីវកម្មយ៉ាងតិចណាស់៣ឆ្នាំ និងមានបទពិសោធន៍នាំចេញអង្ករ យ៉ាងហោចណាស់មួយឆ្នាំ។ ជាមួយគ្នានេះ ក្រុមហ៊ុននិងរោងម៉ាស៊ីនកិនស្រូវ ត្រូវមានប្រាក់ចំណូលប្រចាំឆ្នាំយ៉ាង ២.៥លានដុល្លារ និងមានផែនការអាជីវកម្មច្បាស់លាស់ មានកិច្ចសន្យាបញ្ជាទិញ ព្រមទាំងមានផែនការអាជីវកម្មនៃការនាំចេញអង្ករ ឬកិនអង្ករយ៉ាងតិច៥០០០តោន គិតត្រឹមឆ្នាំ២០២៥។

លោកស្រី សេង លាភ ម្ចាស់រោងម៉ាស៊ីនកិនស្រូវ សេកមាស ខេត្តកំពង់ចាម ដែលដំណើរការអាជីវកម្ម ក្នុងវិស័យនេះប្រមាណ៣០ឆ្នាំ បានប្រាប់បណ្តាញព័ត៌មាន Fresh News ថា គម្រោងធានាឥណទាន សម្រាប់វិស័យស្រូវអង្ករ គឺការបើកផ្លូវមួយដ៏ល្អសម្រាប់រោងម៉ាស៊ីនកិន និងក្រុមហ៊ុននាំចេញអង្ករ ដើម្បីងាយទទួលបានទុនបន្ថែម ក្នុងការប្រមូលទិញស្រូវនៅរដូវប្រមូលផល ដែលធ្វើឱ្យលោកស្រី ក៏ដូចម្ចាស់រោងម៉ាស៊ីនផ្សេងទៀតមានលទ្ធភាពពង្រីកការទិញស្រូវសម្រាប់ស្តុកទុក។

លោកស្រីបានឱ្យដឹងថា កន្លងមកការទទួលបានកម្ចីពីធានាគារ ហាក់មិនសូវងាយស្រួលនោះទេ ហើយសុទ្ធតែតម្រូវឱ្យមានទ្រព្យបញ្ចាំ ប៉ុន្តែតាមរយៈគម្រោងនេះ គឺសិក្សាផែនការអាជីវកម្មជាក់ស្តែងប៉ុណ្ណោះ ដែលកាន់តែងាយស្រួលសម្រាប់អ្នក ដែលមានផែនការអាជីវកម្មច្បាស់លាស់។

ក្នុងនាមជាក្រុមហ៊ុនដែលនាំចេញអង្ករផង និងប្រមូលទិញស្រូវសម្រាប់កិន ផ្គត់ផ្គង់ក្នុងស្រុកផង លោកស្រីយល់ថា តាមរយៈគម្រោងធានាឥណទាននេះ នឹងជួយធ្វើឱ្យដំណើរការអាជីវកម្ម របស់លោកស្រីកាន់តែរីកធំជាងមុន។

សូមជម្រាបថា សម្រាប់ក្រុមហ៊ុននាំចេញអង្ករ និងរោងម៉ាស៊ីនកិនស្រូវ ដែលមានបំណងទទួលបានឥណទាន ដោយមានការធានាពី CGCC អាចទាក់ទងទៅសហព័ន្ធស្រូវអង្ករកម្ពុជា ដើម្បីស្នើសុំលិខិតបញ្ជាក់ និងស្វែងគ្រឹះស្ថានហិរញ្ញវត្ថុចូលរួម (PFIs) ចំនួន៧ ស្ថាប័ន ដែលចូលរួមអនុវត្តគម្រោង REGSនេះដើម្បីស្នើសុំឥណទាន។ គ្រឹះស្ថានហិរញ្ញវត្ថុចូលរួម រួមមាន គ្រឹះស្ថានមីក្រូហិរញ្ញវត្ថុ អេ អឹម ខេ, ធនាគារកាណាឌីយ៉ា, ធនាគារពាណិជ្ជក្រៅប្រទេស នៃកម្ពុជា (FTB), ធនាគារមេយប៊ែង (ខេមបូឌា), ធនាគារព្រីនស៍, ធនាគារស្ថាបនា, និងធនាគារវីង (ខេមបូឌា)៕

Credit to: Fresh News, Published on 12 May 2024

ពាណិជ្ជករក្នុងវិស័យស្រូវអង្ករ នឹងទទួលបានការធានាឥណទាន ងាយទទួលបានកម្ចីពង្រីកវិសាលភាពទិញស្រូវ និងកែច្នៃនាំចេញ

Posted on ខែឧសភា 10, 2024ខែឧសភា 13, 2024 by Sorn Chhorvyvatey

(ភ្នំពេញ)៖ សាជីវកម្មធានាឥណទានកម្ពុជា (CGCC) និងសហព័ន្ធស្រូវអង្ករកម្ពុជា ព្រមទាំងគ្រឹះស្ថានហិរញ្ញវត្ថុចូលរួមចំនួន៧ បានចុះអនុស្សរណៈនៃការយោគយល់គ្នាលើកិច្ចព្រមព្រៀង គម្រោងធានាឥណទានសម្រាប់ការនាំចេញអង្ករ ដើម្បីជួយឱ្យម្ចាស់រោងម៉ាស៊ីនកិនស្រូវមានលទ្ធភាពពង្រីកវិសាលភាពរបស់ខ្លួន ក្នុងការប្រមូលស្រូវស្តុកសំរាប់កិនកែច្នៃនាំចេញ បង្កើត និងបង្កើននូវផលិតផលតម្លៃបន្ថែមនៅក្នុងស្រុក។

ពិធីចុះគ្នាអនុស្សរណៈនៃការយោគយល់គ្នា បានរៀបចំឡើងនៅព្រឹក ថ្ងៃទី១០ ខែឧសភា ឆ្នាំ២០២៤ ក្រោមអធិបតីភាពរបស់លោក រស់ សីលវ៉ា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងវត្តមានជាកិត្តិយសរបស់ក្រុមប្រឹក្សាភិបាលរបស់ CGCC, ថ្នាក់ដឹកនាំ និងសមាជិករបស់សហព័ន្ធស្រូវអង្ករកម្ពុជា, ថ្នាក់ដឹកនាំ និងបុគ្គលិករបស់គ្រឹះស្ថានហិរញ្ញវត្ថុចូលរួម (PFIs) និង CGCC សរុបប្រមាណជាង៧០រូប។

បន្ទាប់ពីទទួលបានការឯកភាពពី អគ្គបណ្ឌិតសភាចារ្យ អូន ព័ន្នមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ CGCC បានដាក់ឱ្យដំណើរការគម្រោង REGS ដែលជាគម្រោងធានាឥណទានជាកញ្ចប់មានទំហំសរុប ៣០លានដុល្លារ សម្រាប់ជំហានទី១ ដោយមានគ្រឹះស្ថានហិរញ្ញវត្ថុចូលរួម (PFIs) ចំនួន៧ ស្ថាប័ន ចូលរួមអនុវត្តគម្រោង REGSនេះ រួមមាន គ្រឹះស្ថានមីក្រូហិរញ្ញវត្ថុ អេ អឹម ខេ, ធនាគារកាណាឌីយ៉ា, ធនាគារពាណិជ្ជកម្មក្រៅប្រទេសនៃកម្ពុជា (FTB), ធនាគារមេយប៊ែង (ខេមបូឌា), ធនាគារព្រីនស៍, ធនាគារស្ថាបនា, និងធនាគារវីង (ខេមបូឌា)។

លោក រស់ សីលវ៉ា មានប្រសាសន៍ថាការដាក់ចេញនូវគម្រោង REGS ដែលមានទំហំ ៣០លានដុល្លារនេះ គឺជាការឆ្លុះបញ្ចាំងពីការគាំទ្ររបស់រាជរដ្ឋាភិបាល ក្នុងការជំរុញការផលិត និងនាំចេញអង្ករកម្ពុជា តាមរយៈយន្តការធានាឥណទានរបស់រាជរដ្ឋាភិបាល ដែលមាន CGCC ជាប្រតិបត្តិករ ដោយផ្តល់ការធានារហូតដល់ ៨០% លើកម្ចីអតិបរមារហូតដល់ ៣លានដុល្លារ។ គម្រោង REGS នេះនឹងគាំទ្រដល់ការទទួលបានហិរញ្ញប្បទានរបស់ក្រុមហ៊ុននាំចេញអង្ករ និងរោងម៉ាស៊ីនកិនស្រូវ ក្នុងការប្រមូលទិញស្រូវពីកសិករ សម្រាប់ការផលិតអង្ករនាំចេញ ដើម្បីគាំទ្រដល់គោលនយោបាយនាំចេញអង្កររបស់រាជរដ្ឋាភិបាលកម្ពុជា»។

ឧកញ៉ា ចាន់ សុឃាំង ប្រធានសហព័ន្ធស្រូវអង្ករកម្ពុជា ក៏បានថ្លែងឱ្យដឹងដែរថា កញ្ចប់ធានាឥណទានលើវិស័យស្រូវអង្ករដំណាក់កាលទីមួយនាពេលនេះ នឹងជួយដល់រោងម៉ាស៊ីនកិនស្រូវពង្រីកវិសាលភាពរបស់ខ្លួនក្នុងការប្រមូលស្រូវស្តុកសំរាប់កិនកែច្នៃនាំចេញ បង្កើត និងបង្កើននូវផលិតផលតម្លៃបន្ថែមនៅក្នុងស្រុក ដែលកើតចេញពី

លោកបន្តថា «អនុផលនៃការកិនស្រូវទាំងអស់ដល់វិស័យផ្សេងទៀតដូចជាវិស័យវារីវប្បកម្ម ការចិញ្ចឹមសត្វ។ល។ កញ្ចប់ធានានេះក៏ជាកត្តាលីករបន្ថែមទៀត នៃការចូលរួមលើការអនុវត្តនូវគោលនយោបាយផលិតកម្មស្រូវ និងការជំរុញការនាំចេញឱ្យបាន១លានតោនក្នុងមួយឆ្នាំ ដែលបានដាក់ចេញដោយ រាជរដ្ឋាភិបាល ហើយយើងជឿជាក់ថា ផែនការនេះ នឹងសម្រេចបាននៅក្នុងឆ្នាំ ២០២៥ដ៏ខ្លីខាងមុខ»។

លោក Wong Keet Loong អគ្គនាយក CGCC បានគូសបញ្ជាក់ថា «CGCC បានដាក់ឱ្យដំណើរការគម្រោងធានាឥណទានថ្មី ដែលជាគម្រោងធានាឥណទានសម្រាប់ការនាំចេញអង្ករ (REGS) ដែលមានទំហំ៣០លានដុល្លារ ដើម្បីគាំទ្រជាទុនបង្វិល សម្រាប់រោងម៉ាស៊ីនកិនស្រូវ ក្នុងការកិនកែច្នៃស្រូវសម្រាប់ការនាំចេញអង្ករ។ គ្រឹះស្ថានហិរញ្ញវត្ថុចំនួន៧ស្ថាប័ន បានប្តេជ្ញាចិត្តក្នុងការផ្តល់កម្ចីដែលមានការធានាពី CGCC សម្រាប់រោងម៉ាស៊ីនកិនស្រូវ ដើម្បីបង្កើនសមត្ថភាពក្នុងការនាំចេញអង្ករ។ គម្រោងនេះផ្តល់ជូននូវលក្ខខណ្ឌពិសេស ដូចជាកម្រៃធានាឥណទានទាប វិសាលភាពនៃការធានាខ្ពស់ និងអត្រាការប្រាក់មិនលើសពី១១%។ យើងគាំទ្រនូវឆន្ទៈរបស់រាជរដ្ឋាភិបាលកម្ពុជា ក្នុងការនាំចេញអង្ករឱ្យបាន១លានតោន នៅឆ្នាំ២០២៥។ នេះគឺជាជំហានទីមួយនៃគម្រោង ដោយយើងនឹងស្នើបង្កើនទំហំគម្រោង ប្រសិនបើមានតម្រូវការខ្ពស់សម្រាប់ការធានាឥណទាន»។

គម្រោង REGS របស់ CGCC ត្រូវបានដាក់ឱ្យដំណើរការដើម្បីសម្រួលដល់តម្រូវការហិរញ្ញប្បទាន និងឆ្លើយតបនឹងបញ្ហាប្រឈមរបស់ក្រុមហ៊ុននាំចេញអង្ករ និងរោងម៉ាស៊ីនកិនស្រូវ ដែលប្រឈមនឹងបញ្ហាខ្វះទ្រព្យធានាដើម្បីដាក់ស្នើកម្ចីទៅគ្រឹះស្ថានហិរញ្ញវត្ថុ ជាពិសេសនៅក្នុងរដូវកាលប្រមូលផល។ ក្រុមហ៊ុននាំចេញអង្ករ និងរោងម៉ាស៊ីនកិនស្រូវដែលជាសមាជិកសកម្មរបស់ CRF និងដែលមានតម្រូវការហិរញ្ញប្បទានសម្រាប់ជាទុនបង្វិល និងពង្រីកអាជីវកម្ម ជាពិសេសសម្រាប់ទិញស្រូវ កិនកែច្នៃ ក្នុងការនាំចេញអង្ករទៅក្រៅប្រទេស៕

Credit to: Fresh News, Published on 10 May 2024

CGCC និងធនាគារប្រ៊ីដ ចុះកិច្ចព្រមព្រៀងលើការធានាឥណទាន ដើម្បីគាំទ្រដល់អាជីវកម្មឱ្យទទួលបានកម្ចីមានការធានា

Posted on ខែកុម្ភៈ 9, 2024ខែកុម្ភៈ 9, 2024 by Sorn Chhorvyvatey

(ភ្នំពេញ)៖ សាជីវកម្មធានាឥណទានកម្ពុជា (CGCC) និងធនាគារប្រ៊ីដ នៅថ្ងៃទី០៧ ខែកុម្ភៈ ឆ្នាំ២០២៤ បានប្រកាសកិច្ចសហការជាផ្លូវការ ដែលធ្វើឡើងនៅក្នុងពិធីចុះហត្ថលេខាលើកិច្ចព្រមព្រៀងធានាឥណទាន ដើម្បីសម្រួលដល់លទ្ធភាពទទួលបានកម្ចីចាំបាច់ សម្រាប់ការអភិវឌ្ឍអាជីវកម្មរបស់សហគ្រាសខ្នាតមីក្រូ តូចនិងមធ្យម (MSMEs) ក៏ដូចជាសហគ្រាសខ្នាតធំផងដែរ។

កិច្ចសហការរវាង CGCC ដែលជាសហគ្រាសសាធារណៈ ក្រោមអាណាព្យាបាលបច្ចេកទេស និងហិរញ្ញវត្ថុរបស់ក្រសួងសេដ្ឋកិច្ច និងហិរញ្ញវត្ថុ ជាមួយនឹងធនាគារប្រ៊ីដ ដែលជាធនាគារពាណិជ្ជមានការប្តេជ្ញាចិត្តខ្ពស់ក្នុងការគាំទ្រដល់ MSMEs ក្នុងស្រុកនេះ នឹងបង្កើនឱកាសដល់ធនាគារប្រ៊ីដ ឱ្យមានទំនុកចិត្តបញ្ចេញកម្ចីដែលមានការធានាពី CGCCដល់ក្រុមហ៊ុនអាជីវកម្មដែលមានសក្តានុពល ប៉ុន្តែខ្វះទ្រព្យធានាដើម្បីដាក់តម្កល់នៅពេលស្នើសុំកម្ចីពីធនាគារ។

លោក Wong Keet Loong អគ្គនាយក CGCC មានប្រសាសន៍ថា៖ «ភាពជាដៃគូជាមួយធនាគារប្រ៊ីដនេះ នឹងបើកផ្លូវថ្មីមួយទៀតដល់យើងក្នុងការគាំទ្រដល់ SMEs របស់ធនាគារក្នុងការទទួលបានកម្ចី នៅពេលដែលពួកគេប្រឈមនឹងបញ្ហាខ្វះទ្រព្យធានា។ គ្រឹះស្ថានហិរញ្ញវត្ថុចូលរួម (PFIs) របស់យើងនឹងវាយតម្លៃលើលទ្ធភាពរបស់ SMEs សម្រាប់កម្ចីមានការធានា ដោយសារតែ PFIs ដឹងពីតម្រូវការហិរញ្ញវត្ថុ និងលទ្ធភាពបង់សងរបស់អតិថិជនរបស់ពួកគេ។ ការធានាឥណទានរបស់ពួកយើងមានសារៈសំខាន់ ក្នុងការធានានូវការបន្តផ្តល់នូវឥណទាន នៅក្នុងទីផ្សារ ដើម្បីគាំទ្រកំណើនសកម្មភាពសេដ្ឋកិច្ច»។

លោក Richard Liew នាយកប្រតិបត្តិ ធនាគារប្រ៊ីដ មានប្រសាសន៍ថា៖ «សហគ្រាសធុនតូច និងមធ្យម គឺជាឆ្អឹងខ្នងនៃសេដ្ឋកិច្ចកម្ពុជា ដែលរួមចំណែកយ៉ាងសំខាន់ដល់កំណើនទំហំផលិតផលក្នុងស្រុកសរុប ក៏ដូចជាការផ្តល់ឱកាសការងារដល់ប្រជាជនកម្ពុជាជាច្រើន។ ទោះជាយ៉ាងណាក៏ដោយអាជីវកម្មមួយចំនួនតែងតែជួបប្រទះបញ្ហាប្រឈមលើលទ្ធភាពទទួលបានសេវាឥណទាន (កម្ចី) ដើម្បីគាំទ្រដល់ការពង្រីកអាជីវកម្មរបស់ពួកគាត់។ ហើយដែលកិច្ចសហការវាងធនាគារប្រ៊ីដ និង CGCC នឹងចូលមក ចូលរួមចំណែកដោះស្រាយលើបញ្ហាមួយនេះ។ តាមរយៈកិច្ចព្រមព្រៀងនេះ យើងសង្ឃឹមថានឹងផ្តល់ឱ្យសហគ្រាសខ្នាតមីក្រូ តូច និងមធ្យម (MSMEs) នូវលទ្ធភាពទទួលបានកម្ចីសម្រាប់អាជីវកម្មកាន់តែងាយស្រួល តាមរយៈការធានាឥណទានរបស់ CGCC ដែលនឹងជួយកាត់បន្ថយហានិភ័យនៃការបាត់បង់របស់កម្ចី និងសម្រួលឱ្យធនាគារប្រ៊ីដអាចផ្តល់នូវភាពប្រកួតប្រជែងនៃកម្ចីកាន់តែខ្ពស់ជាងមុន ដែលនឹងបង្កើនដល់លទ្ធភាពទទួលបានកម្ចីសម្រាប់ MSMEs»។

តាមរយៈកិច្ចព្រមព្រៀងនេះ ធនាគារប្រ៊ីដ បានក្លាយជាគ្រឹះស្ថានហិរញ្ញវត្ថុចូលរួម (PFIs) មួយក្នុងចំណោម PFIs សរុប២៨ស្ថាប័ន របស់ CGCC ក្នុងការប្តេជ្ញាចិត្តគាំទ្រដល់អាជីវកម្មក្នុងស្រុក ស្របតាមទិសដៅរបស់រាជរដ្ឋាភិបាល ក្នុងការគាំទ្រដល់ MSMEs។ CGCC និងធនាគារប្រ៊ីដ ជឿជាក់ថា កិច្ចសហការនេះនឹងអាចចូលរួមជួយដោះស្រាយបញ្ហាគម្លាតហិរញ្ញវត្ថុរបស់ MSMEs ជាច្រើននៅក្នុងប្រទេសកម្ពុជា និងរួមចំណែកដល់កំណើន និងការអភិវឌ្ឍសេដ្ឋកិច្ចជាតិ៕

Credit to: Fresh News Plus, Published on 07 February 2024

CGCC និងសាខាធនាគារកសិកន ផាប់ប្ល៊ីក ខមភេនី លីមីធីត ចុះកិច្ចព្រមព្រៀងធានាឥណទាន គាំទ្រការទទួលបានកម្ចីដែលមានការធានា ដល់ SME នៅកម្ពុជា

Posted on ខែតុលា 3, 2023ខែតុលា 5, 2023 by Sorn Chhorvyvatey

(ភ្នំពេញ)៖ សាជីវកម្មធានាឥណទានកម្ពុជា (CGCC) និងសាខាធនាគារកសិកន ផាប់ប្ល៊ីក ខមភេនី លីមីធីត (ភ្នំពេញ) បានចុះហត្ថលេខាលើកិច្ចព្រមព្រៀងធានាឥណទាន។

ពិធីចុះហត្ថលេខាកាលពីថ្ងៃទី២៩ ខែកញ្ញា ឆ្នាំ២០២៣ ត្រូវបានប្រារព្ធឡើងជាផ្លូវការនៅការិយាល័យរបស់ CGCC ក្រោមវត្តមានរបស់លោក រស់ សីលវ៉ា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាភិបាល CGCC , លោក ឈើតកៀត អត្ថាករ ឯកអគ្គរាជទូតព្រះរាជាណាចក្រថៃ ប្រចាំនៅព្រះរាជាណាចក្រកម្ពុជា និង លោក Suwat Techawatanawana, អគ្គនាយកប្រតិបត្តិរងធនាគារកសិកនប្រទេសថៃ។

CGCC និងសាខាធនាគារកសិកន ផាប់ប្ល៊ីក ខមភេនី លីមីធីត ចុះកិច្ចព្រមព្រៀងធានាឥណទាន គាំទ្រការទទួលបានកម្ចីដែលមានការធានា ដល់ SME នៅកម្ពុជា

លោក Wong Keet Loong អគ្គនាយក CGCC បានមានប្រសាសន៍ថា «យើងមានកិត្តិយសខ្លាំងណាស់ ដែលបានចាប់ជាដៃគូជាមួយធនាគារឈានមុខគេ នៅក្នុងព្រះរាជាណាចក្រថៃ ក្នុងការផ្តល់ការធានាឥណទាន ដើម្បីគាំទ្រលទ្ធភាពទទួលបានហិរញ្ញប្បទាន សម្រាប់សហគ្រាសខ្នាតមីក្រូ តូច និងមធ្យម នៅកម្ពុជា។ សាខាធនាគារកសិកននៅទីនេះ នាំយកបទពិសោធន៍ពីប្រទេសថៃ ដែលវិស័យធនាគារនៅទីនោះមានការអភិវឌ្ឍខ្លាំង ក្នុងការផ្តល់កម្ចីដែលមានការធានា។ តាមរយៈបទពិសោធន៍ទាំងនេះ យើងសង្ឃឹមថាធនាគារកសិកន នៅកម្ពុជានឹងពង្រីកការផ្តល់ហិរញ្ញប្បទាន ដែលមានការធានា ជូនដល់ម្ចាស់អាជីវកម្ម នៅក្នុងប្រទេសកម្ពុជា»។

លោកក៏បានបន្តទៀតថា «កិច្ចសហការនេះក៏នឹងបើកឱកាសសម្រាប់ CGCC ដើម្បីស្វែងយល់បន្ថែមពីការធានាឥណទានឆ្លងព្រំដែន រវាងធុរកិច្ចក្នុងព្រះរាជាណាចក្រថៃ និងព្រះរាជាណាចក្រកម្ពុជា។ នៅចុងឆ្នាំនេះ យើងក៏មានគម្រោងសិក្សា និងសហការជាមួយសាជីវកម្មធានាឥណទានប្រទេសថៃ ដែលមានបទពិសោធន៍ជាង៣០ឆ្នាំផងដែរ»។

លោក រិទ្ធិវុទ្ធ វឌ្ឍនាឆៃ ប្រធានចាត់ការទូទៅនៃសាខាធនាគារកសិកន (ភ្នំពេញ) បានមានប្រសាសន៍ឱ្យដឹងដែរថា «ប្រទេសកម្ពុជាគឺជាចំណុចកណ្តាលនៃយុទ្ធសាស្ត្រ ការពង្រីកខ្លួនរបស់ធនាគារកសិកន ប្រចាំតំបន់ ។ គំនិតផ្តួចផ្តើមនេះ ស្របតាមផែនការអាជីវកម្មរបស់យើង សម្រាប់ប៉ុន្មានឆ្នាំខាងមុខ ដែលក្នុងនោះយើងមានគោលបំណង បង្កើនបទពិសោធន៍របស់យើង ក្នុងការគាំទ្រអាជីវកម្មខ្នាតតូច និងមធ្យមនៅក្នុងប្រទេសថៃ និងទាញយកគំរូស្រដៀងគ្នានេះ ដើម្បីបម្រើដល់សហគ្រាសធុនតូច និងមធ្យមនៅកម្ពុជា។ ភាពជាដៃគូជាមួយ CGCC នឹងក្លាយជាកត្តាជំរុញដ៏សំខាន់សម្រាប់យើងក្នុងការពង្រីកវិសាលភាពទៅកាន់សហគ្រិនឱ្យបានកាន់តែច្រើនជាងមុន ស្របពេលជាមួយការបង្កើន សមត្ថភាពសេវាកម្មរបស់យើងផងដែរ។ លើសពីនេះ ភាពជាដៃគូនេះបង្ហាញពីការប្តេជ្ញាចិត្តរបស់យើង ក្នុងការគាំទ្រចក្ខុវិស័យរបស់រាជរដ្ឋាភិបាល ក្នុងការអភិវឌ្ឍសហគ្រាសធុនតូច និងមធ្យម»។

CGCC ផ្តោតលើការបង្កើនបរិយាបន្នហិរញ្ញវត្ថុ និងអភិវឌ្ឍសហគ្រាសធុនតូច និងមធ្យម តាមរយៈបេសកកម្មចម្បងនៃការផ្តល់ការធានា លើកម្ចីអាជីវកម្មដែលផ្តល់ឱ្យតាមរយៈគ្រឹះស្ថានហិរញ្ញវត្ថុ ចូលរួម (PFIs) ដល់ MSMEs។

ស្របជាមួយគ្នានេះ សាខាធនាគារ កសិកន (ភ្នំពេញ) គឺជាសាខារបស់ ធនាគារ កសិកន ផាប់ប្ល៊ីក ខមភេនី លីមីធីត ដែលជាគ្រឹះស្ថានហិរញ្ញវត្ថុឈានមុខគេមួយ របស់ព្រះរាជាណាចក្រថៃ ដែលក៏មានគោលបំណងជួយគាំទ្រដល់អាជីវកម្មក្នុងស្រុករបស់កម្ពុជា តាមរយៈការផ្តល់សេវាហិរញ្ញវត្ថុ និងដំណោះស្រាយយ៉ាងទូលំទូលាយដល់ម្ចាស់អាជីវកម្ម និងក្រុមហ៊ុនផងដែរ។
ជាមួយនឹងវត្តមានដ៏រឹងមាំនៅក្នុងប្រទេសកម្ពុជា សាខារបស់ធនាគារ កសិកន (ភ្នំពេញ) ឥឡូវនេះបានក្លាយជាគ្រឹះស្ថានហិរញ្ញវត្ថុចូលរួម (PFIs) មួយក្នុងចំណោម PFIs សរុប២៧ស្ថាប័ន របស់ CGCC ក្នុងការប្តេជ្ញាចិត្តគាំទ្រដល់អាជីវកម្មក្នុងស្រុក ស្របតាមទិសដៅរបស់រាជរដ្ឋាភិបាល ក្នុងការគាំទ្រដល់ MSMEs។ CGCC និងសាខាធនាគារ កសិកន (ភ្នំពេញ) ជឿជាក់ថា កិច្ចសហការនេះនឹងជួយដោះស្រាយបញ្ហាហិរញ្ញវត្ថុរបស់ MSMEs ជាច្រើននៅក្នុងប្រទេសកម្ពុជា និងរួមចំណែកដល់កំណើន និងការអភិវឌ្ឍសេដ្ឋកិច្ចជាតិ។

អំពី CGCC

CGCC គឺជាសាជីវកម្មធានាឥណទានតែមួយគត់នៅកម្ពុជា ដែលត្រូវបានសម្រេចបង្កើតឡើង សម្តេចអគ្គមហាសេនាបតីតេជោ ហ៊ុន សែន ជាសហគ្រាសសាធារណៈ ដែលស្ថិតក្រោមអាណាព្យាបាលបច្ចេកទេស និងហិរញ្ញវត្ថុ របស់ក្រសួងសេដ្ឋកិច្ច និងហិរញ្ញវត្ថុ។ បេសកកម្មចម្បងរបស់ CGCC គឺផ្តល់ការធានាឥណទានលើកម្ចីដែលផ្តល់ឱ្យអាជីវកម្ម ដើម្បីចែករំលែកហានិភ័យជាមួយស្ថាប័នផ្តល់កម្ចី និងបង្កើនបរិយាបន្នហិរញ្ញវត្ថុនៅក្នុងប្រទេស។

អំពីសាខាធនាគារកសិកន (ភ្នំពេញ)

សាខាធនាគារ កសិកន ផាប់ប្ល៊ីក ខមភេនី លីមីធីត (ភ្នំពេញ) ទទួលបានអាជ្ញាប័ណ្ណធនាគារពាណិជ្ជ ពីធនាគារជាតិនៃកម្ពុជា នៅខែវិច្ឆិកា ឆ្នាំ២០១៦ ជាមួយនឹងដើមទុនចុះបញ្ជីដំបូង៥០លានដុល្លារសហរដ្ឋអាមេរិក ហើយត្រូវបានបង្កើនដល់៨០លានដុល្លារសហរដ្ឋអាមេរិក គិតត្រឹមឆ្នាំ២០២៣នេះ។

ក្នុងនាមជាសមាហរណកម្មរបស់ធនាគារកសិកន សាខានៅកម្ពុជានេះមានគោលបំណងផ្តល់នូវផលិតផល និងសេវាកម្មហិរញ្ញវត្ថុដ៏ល្អបំផុត ដល់អាជីវកម្មទាំងក្នុងស្រុក និងបរទេសនៅក្នុងប្រទេសកម្ពុជា។ ដោយធនាគារកសិកមានវត្តមានសាខានៅក្នុងប្រទេសចិន ឥណ្ឌូនេស៊ី វៀតណាម ឡាវ និងថៃ សាខានៅកម្ពុជានេះ ក៏ផ្តោតលើការតភ្ជាប់អតិថិជនពីទូទាំងតំបន់ទាំងនោះផងដែរ៕

Credit to: Fresh News, Published on 02 October 2023

ធនាគារ វីង ស្ថាប័ន CGCC និងសម្ព័ន្ធសមាគម FASMEC សហការផ្តល់ការធានាឥណទាន និងឱកាសទីផ្សារទៅដល់សហគ្រាសខ្នាតតូច និងមធ្យម

Posted on ខែសីហា 26, 2023ខែតុលា 18, 2023 by Sorn Chhorvyvatey

(ភ្នំពេញ)៖ ធនាគារ វីង (ខេមបូឌា) ម.ក សាជីវកម្មធានាឥណទានកម្ពុជា (CGCC) និងសម្ព័ន្ធសមាគមសហគ្រាសធុនតូច និងមធ្យមកម្ពុជា (FASMEC) បានបង្កើតភាពជាដៃគូយុទ្ធសាស្ត្រដ៏មានសារៈសំខាន់ ដែលមានចក្ខុវិស័យសំដៅជំរុញការរីកចម្រើនសហគ្រាសខ្នាតតូច និងមធ្យម (SMEs) នៅកម្ពុជា។

ធនាគារ វីង ស្ថាប័ន CGCC និងសម្ព័ន្ធសមាគម FASMEC សហការផ្តល់ការធានាឥណទាន និងឱកាសទីផ្សារទៅដល់សហគ្រាសខ្នាតតូច និងមធ្យម

កិច្ចសហការនេះ គឺជាកិច្ចខិតខំប្រឹងប្រែងរួមគ្នាមួយ ដើម្បីផ្តល់ជាដំណោះស្រាយទៅដល់ SMEs ដែលមានបញ្ហាប្រឈមជាមួយនឹងកង្វះខាតទ្រព្យធានានៅពេលស្នើឥណទានពីគ្រឹះស្ថានធនាគារ ក៏ដូចជាលើកកម្ពស់ចំណេះដឹងផ្នែកហិរញ្ញវត្ថុក្នុងចំណោម SMEs ជាពិសេសសម្រាប់សមាជិក FASMEC នៅទូទាំងប្រទេសនៅកម្ពុជា។
កិច្ចសហការនេះ អាចសម្រេចទៅបានតាមរយៈការផ្តល់ដំណោះស្រាយហិរញ្ញវត្ថុដោយធនាគារ វីង ដែលមិនតម្រូវឲ្យមានទ្រព្យធានា ជាមួយនឹងការធានាឥណទានពី CGCC ដែលជាស្ថាប័នគ្រប់គ្រងដោយរដ្ឋ។

លោក Wong Keet Loong អគ្គនាយក CGCC បានថ្លែងថា «យើងខ្ញុំមានសេចក្តីសោមនស្សរីករាយក្នុងការចាប់ដៃគូតាមរយៈអនុស្សរណៈនៃការយោគយល់គ្នាជាមួយធនាគារ វីង និង FASMEC ក្នុងឆ្នាំនេះ ដើម្បីបង្កើនការគាំទ្រដល់សមាជិករបស់ FASMEC ឲ្យទទួលបានកម្ចីដែលមានការធានាពី CGCC តាមរយៈធនាគារ វីង ឲ្យកាន់តែទូលំទូលាយជាងមុន។ យើងខ្ញុំជឿជាក់ថា តាមរយៈកិច្ចសហប្រតិបត្តិការនេះ នឹងអាចឲ្យ CGCC ជួយដល់ SMEs ជាច្រើនទៀតក្នុងអំឡុងពេលនៃកម្មវិធីផ្សព្វផ្សាយនានារបស់យើងខ្ញុំ ជាពិសេសការរៀបចំសិក្ខាសាលាផ្សព្វផ្សាយស្តីពី ការអភិវឌ្ឍសហគ្រាសខ្នាតតូច និងមធ្យម (SMEs) នៅទូទាំងខេត្ត-ក្រុង ដែលជាផ្នែកមួយនៃគោលដៅរយៈពេលវែងរបស់ CGCC ដើម្បីជំរុញការអភិវឌ្ឍទៅដល់ SMEs»។

CGCC ដែលជាស្ថាប័នធានាឥណទានគ្រប់គ្រងដោយរដ្ឋដំបូងគេនៅកម្ពុជា ប្រតិបត្តិការក្រោមការគ្រប់គ្រងដោយក្រសួងសេដ្ឋកិច្ច និងហិរញ្ញវត្ថុ មានគោលបំណងជំរុញអាជីវកម្មក្នុងស្រុក ដោយផ្តល់ការគាំទ្រឥណទានទាន់ពេលវេលា។ គិតត្រឹមខែកក្កដា ឆ្នាំ២០២៣ CGCC បានផ្តល់ការធានាឥណទានដោយជោគជ័យទៅដល់ ១,៦៤៨ សហគ្រាសជាមួយនឹងទំហំឥណទាន ១៣៩.៥ លានដុល្លារអាមេរិក។ ក្នុងចំណោមនោះ មានប្រមាណ ៩២ ភាគរយ គឺជាសហគ្រាសខ្នាតមីក្រូ តូច និងមធ្យម (MSMEs) ហើយមាន ៨ ភាគរយគឺជាសហគ្រាសខ្នាតធំ។

លោក ហាន ប៉េងក្វាង អគ្គនាយកធនាគារ វីង បានថ្លែងថា «តាមរយៈដំណោះស្រាយហិរញ្ញវត្ថុប្រកបដោយភាពច្នៃប្រឌិត ក៏ដូចជាភាពជាដៃគូសហការជាមួយ CGCC និង FASMEC យើងខ្ញុំមានការតាំងចិត្តជួយសម្រួលទៅដល់ SMEs ដើម្បីអាចទទួលបានហិរញ្ញវត្ថុកាន់តែប្រសើរជាងមុន»។

លោក ហាន ប៉េងក្វាង បានបន្តថា «តាមរយៈការផ្តល់សេវាធនាគារដែលមានភាពបត់បែន និងការគាំទ្រផ្នែកឥណទានដ៏ល្អប្រសើរ យើងនឹងអាចជួយទៅដល់ SMEs ក្នុងការចាប់យកាលានុវត្តភាពរីកលូតលាស់ នវានុវត្តន៍ភាព និងរួមចំណែកដល់វិបុលទាំងមូលនៅក្នុងប្រទេសកម្ពុជា»។

SMEs ដែលជាសមាជិករបស់ FASMEC មិនត្រឹមតែអាចទទួលបានការគាំទ្រផ្នែកហិរញ្ញវត្ថុពីធនាគារ វីង ដោយមានការធានាដោយ CGCC ប៉ុណ្ណោះទេ ថែមទាំងអាចទទួលបានឱកាសផ្សារភ្ជាប់ កាន់តែទូលំទូលាយជាមួយអតិថិជនសក្តានុពល អ្នកលក់ និងអ្នកផ្គត់ផ្គង់ផងដែរ នោះគឺមានការជួយសម្រួលតាមរយៈប្រព័ន្ធអ៉ីកូឡូស៊ីរបស់ វីង។

ធនាគារ វីង ផ្តល់នូវដំណោះស្រាយងាយស្រួលទៅដល់វិស័យលក់រាយ តាមរយៈថ្នាលឌីជីថលរបស់ខ្លួនគឺ WingPay ដែលជួយសម្រួលប្រតិបត្តិការទៅដល់ប្រព័ន្ធអ៉ីកូឡូស៊ីរបស់ វីង មានដូចជា៖ Wingmarket, WingAgri និង Wingmall ដែលថ្នាលឌីជីថលទាំងនេះអាចជួយផ្សារភ្ជាប់រវាងអាជីវកម្មជាមួយនឹងអាជីវកម្ម (B2B) និងរវាងអាជីវកម្មជាមួយអ្នកទិញ (B2C) បានយ៉ាងងាយស្រួល។

ថ្នាលឌីជីថល Wingmarket ផ្តល់ដំណោះស្រាយខ្សែចង្វាក់ផ្គត់ផ្គង់ ពោលគឺជួយសម្រួលការគ្រប់គ្រងខ្សែចង្វាក់ផ្គត់ផ្គង់នៃដំណើរការសហគ្រាសខ្នាតតូច និងមធ្យម ក៏ដូចជាសាជីវកម្មនានាឲ្យបានកាន់តែល្អប្រសើរ។ ចំពោះថ្នាលឌីជីល WingAgri វិញគឺជាទីផ្សារពាណិជ្ជកម្មអនឡាញដោយផ្តោតលើផលិតផលកសិកម្មដែលអាចទុកចិត្តបាន ដើម្បីជួយផ្សារភ្ជាប់កសិករ និងអ្នកទិញតាមរយៈផ្សារឌីជីថល។ ចំណែកឯ ថ្នាលឌីជីល Wingmall គឺជាទីផ្សារទំនិញតាមអនឡាញដែលមានការគាំំទ្រ និងឈានមុខគេមួយ មានចំនួនហាងលក់ទំនិញ ក៏ដូចជាអាហារដ្ឋានយ៉ាងច្រើនសន្ធឹកសន្ធាប់កំពុងប្រើប្រាស់ ដើម្បីសម្រួលប្រតិបត្តិការទិញ-លក់ប្រកបដោយភាពរលូន ហើយថែមទាំងអាចធ្វើឲ្យបទពិសោធន៍អ្នកប្រើប្រាស់កាន់តែងាយស្រួល។

ភាពជាដៃគូយុទ្ធសាស្ត្ររវាង CGCC, FASMEC, និងធនាគារ វីង គឺត្រៀមខ្លួនជាស្រេចដើម្បីជំរុញបរិយាកាសគាំទ្រ ក្នុងការទទួលបានហិរញ្ញវត្ថុ ហើយថែមទាំងផ្តល់ជាដំណោះស្រាយដ៏មានប្រសិទ្ធភាពជួយដល់ SMEs អាចទទួលសេវាហិរញ្ញវត្ថុ ក៏ដូចជាជួយដោះស្រាយបញ្ហាប្រឈមទៅដល់ SMEs ងាយស្រួលទទួលបានឥណទាន ហើយថែមទាំងបង្កើនលទ្ធភាពលក់ផលិតផលទៅក្នុងទីផ្សារបានកាន់តែទូលំទូលាយ។

ឧកញ៉ា តែ តាំងប៉ ប្រធានក្រុមប្រឹក្សាភិបាល FASMEC បានថ្លែងថា៖ “យើងពិតជាសប្បាយរីករាយក្នុងការចាប់ដៃគូជាមួយនឹងធនាគារ វីង និងសាជីវកម្មធានាឥណទានកម្ពុជា ព្រោះវាជាការផ្តល់ឱកាស ដល់សហគ្រាសខ្នាតតូចនិងមធ្យម ជាសមាជិកសមារបស់ FASMEC ដែលកំពុងមានបញ្ហាប្រឈមកង្វះទ្រព្យធានា ដើម្បីអាចទទួលបាននូវហិរញ្ញវត្ថុសម្រាប់ពង្រីកអាជីវកម្មរបស់ពួកគេឲ្យបានកាន់តែរីកចម្រើន”។

យោងតាមការចេញផ្សាយសារព័ត៌មានក្នុងស្រុកបានបង្ហាញថា គិតត្រឹមឆ្នាំ២០២២ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានផ្តល់ការចុះបញ្ចីចំនួន ៤៣.៩៧៤ សហគ្រាសខ្នាតតូច និងមធ្យម។ សហគ្រាសទាំងនេះបានបង្កើតឱកាសការងារទៅដល់ពលរដ្ឋកម្ពុជាជាង ៤៤៤.៥០៤នាក់។ សហគ្រាសខ្នាតតូច និងមធ្យមមានប្រហែល ៩០ ភាគរយ នៃសហគ្រាសទាំងអស់ដែលរួមចំណែក ៥៨ ភាគរយនៃផលិតផលក្នុងស្រុកសរុប និងផ្តល់ការងារជាង ៧០ ភាគរយនៃកម្លាំងពលកម្មទាំងមូល។

សមាជិក FASMEC អាចអញ្ជើញមកកាន់គ្រប់សាខាធនាគារ វីង ដើម្បីស្នើសុំឥណទាន ដែលបុគ្គលិកជំនាញបានត្រៀមខ្លួនរួចជាស្រេចក្នុងការជួយសម្រួល ដើម្បីបំពេញតម្រូវការហិរញ្ញវត្ថុរបស់អតិថិជន។ បន្ថែមលើនេះ សមាជិក FASMEC ក៏អាចធ្វើការទំនាក់ទំនងជាមួយបុគ្គលិករបស់ធនាគារ វីង ក្នុងអំឡុងពេលកម្មវិធីវគ្គបណ្តុះបណ្តាលដែល នឹងរៀបចំដោយ FASMEC នៅទូទាំងប្រទេសកម្ពុជា៕

Credit to: Business Cambodia & Fresh News, ២៨ សីហា ២០២៣

Category: ព័ត៌មានថ្មីៗ

គម្រោងធានាឥណទានសហគ្រិនស្ត្រីមានប្រមាណ ៤០ភាគរយ ទទួលបានការធានាពីសាជីវកម្មធានាឥណទានកម្ពុជា

ឯកសារទស្សនទានសម្រាប់អនុវត្តកំណែទម្រង់កសិកម្ម

CGCC ចាប់ផ្តើមដំណើរការកម្មវិធីកសាងសមត្ថភាពសហគ្រិនវគ្គទី១នៃឆ្នាំ២០២៤ ដល់សហគ្រិន២០រូប

CGCC និងធនាគារប្រ៊ីដ ចុះកិច្ចព្រមព្រៀងលើការធានាឥណទាន ដើម្បីគាំទ្រដល់អាជីវកម្មឱ្យទទួលបានកម្ចីមានការធានា

ទំនាក់ទំនង

បណ្តាញសង្គម

តំណភ្ជាប់រហ័ស