Category: ព្រឹត្តិការណ៍ និងសកម្មភាព
សាជីវកម្មធានាឥណទានកម្ពុជា និងធនាគារ វីង សហការគ្នាជួយដល់ការស្តារឡើងវិញនូវប្រតិបត្តិការអាជីវកម្មនានា
សាជីវកម្មធានាឥណទានកម្ពុជា (ស.ធ.ក.) និង ធនាគារ វីង (ខេមបូឌា) ម.ក បានរៀបចំនូវកិច្ចសហការជាផ្លូវការ ជាមួយនឹងការចុះកិច្ចព្រមព្រៀងធានាឥណទាន ដើម្បីសហការគ្នាលើការផ្តល់ប្រាក់កម្ចីដល់ប្រតិបត្តិករអាជីវកម្មនៅកម្ពុជា ដែលអាចប្រឈមនឹងការលំបាកក្នុងការទទួលបានប្រាក់កម្ចីដោយសារកង្វះខាតទ្រព្យបញ្ចាំគ្រប់គ្រាន់។
ភាពជាដៃគូនេះនឹងបញ្ចូលធនាគារវីង ក្នុងគម្រោងធានាឥណទាន នៃសាជីវកម្មធានាឥណទានកម្ពុជា ដើម្បីជួយដល់អាជីវកម្មនានាដែលរងផលប៉ះពាល់ខណៈមានជំងឺរាតត្បាតកូវីដ ១៩ រួមមាន៖ អាជីវកម្មខ្នាតមីក្រូ សហគ្រាសខ្នាតតូចនិងមធ្យម និងសហគ្រាសខ្នាតធំ ក្នុងការសម្រួលដល់ការទទួលបានហិរញ្ញប្បទានពី សម្រាប់ការកៀរគរទុនបង្វិល វិនិយោគ និងការពង្រីកអាជីវកម្មជាដើម។
លោក ហាន ប៉េងក្វាង អគ្គនាយកនៃធនាគារវីង បានមានប្រសាសន៍ថា៖ “ខ្ញុំមានសេចក្តីសោមនស្សរីករាយយ៉ាងខ្លាំង ដែលឥឡូវនេះយើងអាចបង្កើនការគាំទ្រផ្នែកហិរញ្ញវត្ថុរបស់យើងដល់ម្ចាស់អាជីវកម្មកាន់តែច្រើនជាងមុនតាមរយៈការសហការជាមួយសាជីវកម្មធានាឥណទានកម្ពុជា។ យើងបានបង្កើតផលិតផល និងសេវាកម្មហិរញ្ញវត្ថុយ៉ាងយ៉ាងសម្បូរបែបដើម្បីជួយម្ចាស់អាជីវកម្មនានានៅកម្ពុជា។ ភាពជាដៃគូនៅថ្ងៃនេះ នឹងក្លាយជាកត្តាជំរុញមួយទៀតជួយឲ្យយើងខិតកាន់តែជិតដល់មា្ចស់អាជីវកម្មទាំងនោះ។”
សាជីវកម្មធានាឥណទានកម្ពុជា នឹងគាំទ្រធនាគារវីងក្នុងការធានាប្រាក់កម្ចីដល់ម្ចាស់អាជីវកម្មដែលត្រូវបានចាត់ទុកថាមានលទ្ធភាពសង ប៉ុន្តែខ្វះខាតនូវទ្រព្យបញ្ចាំ ដោយផ្តល់នូវការធានាឥណទាន ដែលជាការពារបន្ថែមមួយទៀត ដូច្នេះនឹងជួយកាត់បន្ថយតម្រូវការទ្រព្យបញ្ចាំពីអាជីវកម្មដែលស្នើកម្ចី។
បន្ទាប់ពីសម្ពោធជាផ្លូវការជាធនាគារពាណិជ្ជក្នុងខែមេសា ឆ្នាំ២០២១ ធនាគារ វីង បានបង្កើតឲ្យមានផលិតផល និងសេវាកម្មហិរញ្ញវត្ថុជាច្រើន ដើម្បីបំពេញតម្រូវការរបស់អតិថិជនរូបវន្តបុគ្គល និងម្ចាស់អាជីវកម្មនានា។ អតិថិជនអាចទទួលបានផលិតផល និងសេវាកម្មហិរញ្ញវត្ថុទាំងនោះបានតាមរយៈការិយាល័យកណ្តាលនៃធនាគារវីង កម្មវិធីស្មាតហ្វូនវីង និងភ្នាក់ងារវីងដែលមានជាង១ម៉ឺនកន្លែងនៅទូទាំងប្រទេសកម្ពុជា។
ជាមួយនឹងកិច្ចព្រមព្រៀងភាពជាដៃគូនេះ ធនាគារវីង នឹងក្លាយជាស្ថាប័នហិរញ្ញវត្ថុមួយ ក្នុងចំណោមស្ថាប័នហិរញ្ញវត្ថុចូលរួមចំនួន ២០ របស់ស.ធ.ក. ក្នុងការផ្តល់ប្រាក់កម្ចីប្រកបដោយប្រសិទ្ធភាព ដល់អាជីវកម្ម រួមទាំងសហគ្រាសធុនតូច និងមធ្យម ដែលខ្វះទ្រព្យបញ្ចាំសម្រាប់ជាទុនបង្វិល និងការពង្រីកអាជីវកម្មរបស់ពួកគេ។
លោក Wong Keet Loong អគ្គនាយក ស.ធ.ក. បានមានប្រសាសន៍ថា “ភាពជាដៃគូរបស់យើងជាមួយធនាគារវីង គឺជាយុទ្ធសាស្រ្តមួយសម្រាប់ ស.ធ.ក ក្នុងការប្រើប្រាស់បណ្តាញគ្របដណ្តប់យ៉ាងទូលំទូលាយនៃផលិតផលហិរញ្ញវត្ថុប្រកបដោយភាពច្នៃប្រឌិតរបស់ធនាគារវីង តាមរយៈបណ្តាញឌីជីថលដែលធនាគារមានរួចជាស្រេច។ វាក៏នឹងជំរុញឱ្យ ស.ធ.ក. បញ្រ្ជាបខ្លួន ចូលទៅក្នុងប្រព័ន្ធហិរញ្ញវត្ថុឌីជីថល តាមរយៈការផ្តល់ការធានាឥណទានលើកម្ចីអាជីវកម្ម នៅក្នុងប្រព័ន្ធអេកូឌីជីថលរបស់ធនាគារវីង។”
ត្រូវបានបង្កើតឡើងក្នុងឆ្នាំ ២០២០ សាជីវកម្មធានាឥណទានកម្ពុជា មានគោលបំណងបង្កើនបរិយាបន្នហិរញ្ញវត្ថុ និងអភិវឌ្ឍសហគ្រាសខ្នាតតូចនិងមធ្យម តាមរយៈផ្តល់ការធានាឥណទានលើកម្ចីដែលផ្តល់ឲ្យអាជីវកម្ម ដើម្បីចែករំលែកហានិភ័យជាមួយស្ថាប័នផ្តល់កម្ចី ដោយផ្អែកលើស្តង់ដារអន្តរជាតិ។
ម្ចាស់អាជីវកម្មដែលមានសញ្ជាតិកម្ពុជា ហើយកាន់កាប់ភាគហ៊ុនលើសពី៥០% ឥឡូវនេះអាចទាក់ទងធនាគារ វីង សម្រាប់គម្រោងធានារបស់សាជីវកម្មធានាឥណទានកម្ពុជា ឬទាក់ទងដោយផ្ទាល់តាមរយៈគេហទំព័រ www.cgcc.com.kh សម្រាប់ព័ត៌មានបន្ថែម។
អំពី ស.ធ.ក.
ស.ធ.ក. គឺជាសាជីវកម្មធានាឥណទានដំបូងគេនៅក្នុងប្រទេសកម្ពុជា ត្រូវបានបង្កើតឡើងជាជាសហគ្រាសសាធារណៈមួយ ស្ថិតនៅក្រោមអាណាព្យាបាលបច្ចេកទេស និងហិរញ្ញវត្ថុ របស់ក្រសួងសេដ្ឋកិច្ច និងហិរញ្ញវត្ថុ។ បេសកកម្មចម្បងរបស់ ស.ធ.ក. គឺផ្តល់នូវការធានាឥណទានជូនដល់គ្រឹះស្ថានហិរញ្ញវត្ថុចូលរួម ដើម្បីផ្តល់ការគាំទ្រលើអាជីវកម្ម ដែលមានលទ្ធភាពលើការរកចំណូល ប៉ុន្តែខ្វះទ្រព្យបញ្ចាំ ក្នុងការដាក់ស្នើសុំកម្ចី។
ស.ធ.ក. បានដាក់ឱ្យដំណើរការជាផ្លូវការនូវគម្រោងធានាឥណទានចំនួនពីរ ទីមួយគឺ “ “គម្រោងធានាឥណទានដើម្បីស្តារអាជីវកម្ម-BRGS” ដែលបានដាក់ឱ្យដំណើរការ នៅក្នុងខែមីនា ឆ្នាំ២០២១ និងទីពីរ គឺ “គម្រោងធានាឥណទានសម្រាប់សហហិរញ្ញប្បទាន-CFGS” ដែលត្រូវបានដាក់ឱ្យដំណើរការនៅក្នុងខែកញ្ញា ឆ្នាំ២០២១ កន្លងមកថ្មីៗនេះ ដើម្បីពង្រីកនូវការគាំទ្របន្ថែមទៅដល់ SMEs ក្រោមគម្រោងសហហិរញ្ញប្បទានទ្រទ្រង់សហគ្រាសធុនតូច និងមធ្យម ជំហានទី២ (SCFS II) របស់ធនាគារសហគ្រាសធុនតូច និងមធ្យមកម្ពុជា (SME Bank of Cambodia)។
គួរបញ្ជាក់ផងដែរថា គិតត្រឹមថ្ងៃទី១២ ខែវិច្ឆិកា ឆ្នាំ២០២១នេះ ស.ធ.ក បានផ្តល់ការធានាលើកម្ចីរបស់អាជីវកម្ចចំនួន១៣៣ អាជីវកម្ម រួចមកហើយ ដែលគិតជាទឹកប្រាក់ប្រមាណ ១៦.៥ លានដុល្លារសហរដ្ឋអាមេរិក។ ក្នុងនោះផងដែរ ការធានាលើកម្ចីអាជីវកម្មភាគច្រើនបំផុត ត្រូវបានផ្តល់ជូនទៅសហគ្រាសធុនតូចនិងមធ្យម ស្មើនឹង ៩៤% នៃចំនួនអាជីវកម្មសរុបដែលទទួលបានការធានាពី ស.ធ.ក.។
ព័ត៌មានបន្ថែមអំពីការធានាឥណទាន សូមចូលទៅកាន់ ៖ www.cgcc.com.kh
អំពីធនាគារ វីង (ខេមបូឌា) ម.ក
ធនាគារ វីង (ខេមបូឌា) ម.ក ជាធនាគារសម្រាប់ប្រជាជនកម្ពុជាគ្រប់រូប ត្រូវបានជំរុញដោយចក្ខុវិស័យដើម្បីផ្តល់ឱ្យប្រជាជនកម្ពុជាគ្រប់រូបនូវភាពងាយស្រួលក្នុងការទទួលបានសេវាកម្មហិរញ្ញវត្ថុដែលចាំបាច់ និង ធ្វើឱ្យប្រសើរឡើងនូវការរស់នៅប្រចាំថ្ងៃរបស់ពួកគេ។
ធនាគារវីងបានកែប្រែវិធីដែលប្រជាជនកម្ពុជាគ្រប់រូបទទួលបានសេវាហិរញ្ញវត្ថុដោយណែនាំការផ្ទេរប្រាក់តាមរយៈទូរស័ព្ទចល័តរហ័ស មានសុវត្ថិភាព និងងាយស្រួល ចាប់តាំងពីថ្ងៃទី ១៨ ខែសីហាឆ្នាំ ២០០៨ មកម្ល៉េះ។
សព្វថ្ងៃនេះ ធនាគារវីងបម្រើប្រជាជនកម្ពុជាទាំងមូល ដោយគ្របដណ្តប់១០០% នៃស្រុកនានាក្នុងប្រទេសកម្ពុជា តាមរយៈកម្មវិធីស្មាតហ្វូនវីងប្រកបដោយភាពច្នៃប្រឌិតថ្មីៗ ភ្នាក់ងារវីងដែលមានជាង ១០.០០០ កន្លែង ដៃគូអាជីវកម្មដែលមានជាង ៥៥.០០០ និងការសហការជាមួយក្រុមហ៊ុនយក្សជាច្រើនក្នុងឧស្សាហកម្មដូចជា៖ Mastercard, MoneyGram, AliPay, WeChat Pay, Western Union, Visa, និង Ria ជាដើម ។
ធនាគារវីងផ្តល់ជូននូវផលិតផល និងសេវាកម្មហិរញ្ញវត្ថុនាំមុខគេជាច្រើន សម្រាប់អតិថិជនជារូបវន្តបុគ្គល និងសាជីវកម្មនានា។ ផលិតផលទាំងនេះរួមមាន៖ សេវាប្រាក់កម្ចី សេវាប្រាក់បញ្ញើ សេវាសន្សំខ្នាតតូច សេវាណែនាំឥណទាន សេវាផ្ទេរប្រាក់ ការទូទាត់ថ្លៃទឹកភ្លើង និងធានារ៉ាប់រង ព្រមទាំងការបញ្ចូលទឹកប្រាក់ទូរស័ព្ទ។ លើសពីនេះ ធនាគារវីងផ្តល់ជូនការទូទាត់រាយតាមរយៈ“WingPay” ហើយថែមទាំងមានវេទិកាពាណិជ្ជកម្មអេឡិចត្រូនិច “ វីងម៉ល” ផងដែរ។
មានទាំងក្រុមហ៊ុនខ្នាតតូចនិងក្រុមហ៊ុនខ្នាតធំ កំពុងប្រើសេវាកម្មបើកប្រាក់បៀវត្សនិងសេវាទូទាត់ប្រាក់របស់វីងដែលបង្កើនល្បឿនទូទាត់លឿនជាងមុន។ មានភ្នាក់ងារវីងជាង ៨០ ភាគរយ និងអតិថិជន ៥០ ភាគរយជាស្ត្រីដែលធ្វើឱ្យវីងក្លាយជាឧទាហរណ៍ដ៏ល្អនៃបរិយាបន្នយេនឌ័រនៅក្នុងតំបន់។
ធនាគារវីងប្តេជ្ញាផ្តល់នូវបរិយាបន្នហិរញ្ញវត្ថុ យេនឌ័រ និងឌីជីថលដល់អ្នកមិនមានគណនីធនាគារ និងមិនស្ថិតក្នុងបណ្តាញធនាគារដែលអនុញ្ញាតឱ្យប្រជាជនកម្ពុជាគ្រប់រូបទទួលបាននូវភាពងាយស្រួលនិងសុវត្ថិភាពនៅពេលទទួលបានសេវាកម្មហិរញ្ញវត្ថុ៕
CGCC ចាប់ដៃគូជាមួយ ធនាគារ ABA ដើម្បីផ្ដល់ការគាំទ្រកម្ចីបន្ថែមដល់បណ្ដាអាជីវកម្ម
សាជីវកម្មធានាឥណទានកម្ពុជា(CGCC) ជាសហគ្រាសសាធារណៈរបស់រាជរដ្ឋាភិបាលកម្ពុជា និង ធនាគារ ABA ជាធនាគារពាណិជ្ជឈានមុខក្នុងប្រទេសកម្ពុជា បានរៀបចំពិធីចុះហត្ថលេខាជាផ្លូវការ លើកិច្ចព្រមព្រៀងធានាឥណទានកាលពីថ្ងៃទី១១ ខែវិច្ឆិកា ឆ្នាំ២០២១។ ក្រោមកិច្ចព្រមព្រៀងនេះ ធនាគារ ABA នឹងផ្ដល់ប្រាក់កម្ចីដែលធានាដោយ CGCC ដើម្បីគាំទ្រដល់បណ្ដាសហគ្រាសមីក្រូ, សហគ្រាសធុនតូច និងមធ្យម និងសាជីវកម្មធំៗក្នុងប្រទេសកម្ពុជាក្នុងការពង្រីកអាជីវកម្ម ការវិនិយោគ និងសម្រាប់ជាទុនបង្វិល។
ភាពជាដៃគូនេះ អាចឲ្យធនាគារ ABA គាំទ្រ និងជួយដល់អាជីវកម្មដែលមានលទ្ធភាពបង់សង តែខ្វះទ្រព្យតម្កល់នៅពេលស្នើសុំប្រាក់កម្ចី ដោយប្រើប្រាស់គម្រោងធានាឥណទានរបស់ CGCC។ តាមរយៈកិច្ចព្រមព្រៀងនេះ ធនាគារ ABA អាចជួយអាជីវកម្មជាច្រើន ជាពិសេសអាជីវកម្មខ្នាតតូច និងមធ្យម ដោយផ្ដល់ជូនពួកគេនូវកម្មវិធីដែលអាចទទួលបាន និងកាន់តែរហ័ស ថែមទាំងទទួលបានកម្ចីខ្ពស់ទៅលើវិស័យដែលជាអាទិភាព។
លោក Askhat Azhikhanov នាយកប្រតិបត្តិធនាគារ ABA មានប្រសាសន៍ថា៖ “សហគ្រាសធុនតូច និងមធ្យមដើរតួនាទីយ៉ាងសំខាន់នៅក្នុងសេដ្ឋកិច្ចជាតិ និងជាគោលដៅរបស់គ្រឹះស្ថានហិរញ្ញវត្ថុកម្ពុជា។ ដោយសារការគ្រប់គ្រងបទប្បញ្ញត្តិ និងហានិភ័យ ធនាគារតម្រូវឲ្យអ្នកដែលមានបំណងខ្ចីប្រាក់ត្រូវគោរពតាមបញ្ជីលក្ខណវិនិច្ឆ័យ រួមមានប្រវត្តិឥណទាន ស្ថានភាពហិរញ្ញវត្ថុ និងទ្រព្យតម្កល់។មិនមែនគ្រប់អាជីវកម្ម សុទ្ធតែអាចបំពេញតាមលក្ខណវិនិច្ឆ័យទាំងនេះទេ ខណៈដែលការរីករាលដាលជាសកលនៃជំងឺកូវីដ 19 បានធ្វើឲ្យប៉ះពាល់ដល់អាជីវកម្មកាន់តែច្រើន។ គម្រោងធានាឥណទាន ត្រូវបានផ្ដួចផ្ដើមឡើងដោយរាជរដ្ឋាភិបាលកម្ពុជាក្នុងការផ្ដល់ជាយន្ដការចែករំលែកហានិភ័យរវាងធនាគារ ABA និង CGCC ដែលបណ្ដាអាជីវកម្មមិនគ្រប់លក្ខណវិនិច្ឆ័យក្នុងការខ្ចីប្រាក់ នៅតែអាចស្នើសុំខ្ចីបានពីធនាគារ ABA បាន។ ធនាគារនឹងពិចារណាលើសំណើទាំងនោះដោយផ្អែកលើគោលនយោបាយឥណទាន របស់ខ្លួន និងការវាយតម្លៃសំណើកម្ចី ខណៈដែលយើងផ្ដល់អាទិភាពចម្បងលើវិស័យកសិកម្ម ឧស្សាហកម្ម និងសេវាកម្ម។”
លោកបន្ថែមទៀតថា៖ “យើងខ្ញុំ នៅធនាគារ ABA ចាប់ដៃគូជាមួយ CGCC ក្នុងការផ្តល់ជូនបណ្ដាអាជីវកម្មធុនតូច និងមធ្យមជាមួយនឹងការស្នើសុំកម្ចីកាន់តែងាយស្រួលជាងមុន និងដើម្បីបញ្ជាក់ជាថ្មីពីការប្ដេជ្ញាចិត្តរបស់យើងខ្ញុំ ក្នុងការផ្ដល់អត្ថប្រយោជន៍ដល់ប្រទេសកម្ពុជា និងប្រជាជនកម្ពុជាដែលស្របនឹងបេសកកម្ម និងគុណតម្លៃសាជីវកម្មរបស់យើង។”
លោក Wong Keet Loong នាយកប្រតិបត្តិ CGCC បានបញ្ជាក់ថា៖ “CGCC ត្រូវបានបង្កើតឡើងក្នុង គោលបំណងបង្កើនកំណើនប្រាក់កម្ចីក្នុងវិស័យធនាគារ។ ជាមួយគម្រោងធានាឥណទាន គ្រឹះស្ថានហិរញ្ញវត្ថុអាចផ្ដល់កម្ចីកម្រិតខ្ពស់ជាងមុន។ ខណៈដែលសេដ្ឋកិច្ចកំពុងបើកដំណើរការឡើងវិញម្ដងទៀត តម្រូវការប្រាក់កម្ចីពីសហគ្រាសធុនតូច និងមធ្យមដើម្បីពង្រីកអាជីវកម្មកាន់តែមានការកើនឡើង។”
លោកបន្ថែមទៀតថា៖ “សេវាធានាឥណទានរបស់ CGCC នឹងដើរតួជាផ្នែកមួយនៃទ្រព្យតម្កល់សម្រាប់កម្ចី ធនាគារ ដូច្នេះវាជួយកាត់បន្ថយទ្រព្យតម្កល់ដែលតម្រូវពីអ្នកខ្ចី។ ធនាគារ ABA ដែលជាធនាគារ លំដាប់កំពូលមួយ មានកំណើនកម្ចីរឹងមាំ និងមានបណ្ដាញសាខាទូលំទូលាយ នឹងក្លាយជាយុទ្ធសាស្រ្ដ របស់យើងក្នុងការសម្រេចគោលបំណងនេះ។ យើងសង្ឃឹមថា ភាពជាដៃគូនេះនឹងជួយដល់សហគ្រាស ធុនតូច និងមធ្យមជាច្រើនបន្ថែមទៀត។”
ក្នុងខែ មីនា ឆ្នាំ 2021 CGCC បានដាក់ឲ្យដំណើរការគម្រោងឥណទានទី 1 ហៅថា គម្រោងធានា ឥណទានដើម្បីស្ដារអាជីវកម្ម (BRGS) ដែលមានទឹកប្រាក់សរុប 200 លានដុល្លារអាមេរិក ដើម្បីទ្រទ្រង់ ដល់គ្រប់អាជីវកម្ម រួមមាន អាជីវកម្មខ្នាតមីក្រូ ខ្នាតតូច និងមធ្យម និងសាជីវកម្មធំៗ ក្នុងការដំណើរការ ស្នើសុំកម្ចីកាន់តែងាយស្រួល ពីស្ថាប័នហិរញ្ញវត្ថុចូលរួម (PFIs)។ ដើម្បីពង្រីកការគាំទ្រដល់សហគ្រាស ធុនតូច និងមធ្យម គម្រោងធានាឥណទានសម្រាប់សហហិរញ្ញប្បទាន(CFGS) ដែលជាគម្រោងធានា ឥណទានទី 2 ត្រូវបានដាក់ដំណើរការក្នុងខែ កញ្ញា ឆ្នាំ 2021 សម្រាប់ធានាដល់ឥណទានកម្រោងគម្រោងសហហិរញ្ញប្បទាន ជំហានទី 2។ ក្រោមកិច្ចព្រមព្រៀងនេះ ធនាគារ ABA ក្លាយជាគ្រឹះស្ថានមួយក្នុងចំណោមគ្រឹះស្ថានហិរញ្ញវត្ថុចូលរួមទាំង២០ ដែលបានប្ដេជ្ញាផ្ដល់ភាពងាយស្រួលដល់ដំណើរការទទួលកម្ចី សម្រាប់អាជីវកម្មដែលរងផលប៉ះពាល់ខ្លាំងដោយមេរោគកូវីដ 19។
សម្រាប់ព័ត៌មានបន្ថែមទាក់ទងនឹងសេវាកម្មដែលផ្ដល់ជូនដោយ CGCC និង ABA សូមទូរស័ព្ទមកកាន់ 023 722 123 សម្រាប់ CGCC ឬ 023 225 333 សម្រាប់ ABA។
អំពី CGCC
CGCC គឺជាសាជីវកម្មធានាឥណទានដំបូងបង្អស់របស់កម្ពុជា និងជាសហគ្រាសសាធារណៈ ស្ថិតនៅក្រោមអាណាព្យាបាលបច្ចេកទេស និងហិរញ្ញវត្ថុ របស់ក្រសួងសេដ្ឋកិច្ច និងហិរញ្ញវត្ថុ។ បេសកកម្មចម្បងរបស់ CGCC គឺផ្ដល់ការធានាឥណទានដល់ស្ថាប័នហិរញ្ញវត្ថុចូលរួម (PFIs) ដើម្បីគាំទ្រ និងទ្រទ្រង់ដល់អាជីវកម្មដែលមានលទ្ធភាពសង តែខ្វះទ្រព្យតម្កល់ពេលស្នើសុំប្រាក់កម្ចី។
ម្ចាស់អាជីវកម្មដែលមានសញ្ជាតិខ្មែរ (កាន់កាប់ភាគហ៊ុនលើសពី 50%) រួមទាំងសហគ្រាសធុនតូច និងមធ្យម ត្រូវបានលើកទឹកចិត្តក្នុងការដាក់ស្នើកម្ចីមានការធានាពីធនាគារ ABA ដោយចូលទៅកាន់ www.ababank.com ឬ www.cgcc.com.kh សម្រាប់ព័ត៌មានបន្ថែម។
គួរបញ្ជាក់ផងដែរថា គិតត្រឹមថ្ងៃទី០៨ ខែវិច្ឆិកា ឆ្នាំ២០២១ CGCC បានផ្ដល់ការធានាលើកម្ចីដល់អាជីវកម្មចំនួន១២៦ ដែលគិតជាទឹកប្រាក់ជិត ១៦ លានដុល្លារសហរដ្ឋអាមេរិក។ ក្នុងនោះផងដែរ ការធានាលើកម្ចីភាគច្រើនបំផុត ត្រូវបានផ្ដល់ជូនទៅសហគ្រាសធុនតូន និងមធ្យម ស្មើនឹង៩៤% នៃចំនួនអាជីវកម្មសរុបដែលបានទទួលការ ធានាពី CGCC។
អំពីធនាគារ ABA
ធនាគារ ABA គឺជាគ្រឹះស្ថានហិរញ្ញវត្ថុឯកជនឈានមុខមួយនៅកម្ពុជា។ គិតត្រឹមថ្ងៃទី 30 ខែ កញ្ញា 2021 ធនាគារមានទ្រព្យសកម្មជាង 7.5 ប៊ីលានដុល្លារ។ ជាមួយសាខា 79 ម៉ាស៊ីនស្វ័យសេវាជាង 600 ទូទាំងប្រទេស ជាមួយសេវាធនាគារអនឡាញឈានមុខ និងសេវាធនាគារតាមទូរស័ព្ទ ធនាគារ ABA ផ្តល់សេវា ជូនអតិថិជនជាច្រើនជាមួយបណ្ដាសេវាសម្បូរបែបរបស់ខ្លួន។ សម្រាប់ព័ត៌មានបន្ថែម សូមចូលទៅកាន់វិបសាយ៖ www.ababank.com
ABA គឺជាបុត្រសម្ពន្ធរបស់ធនាគារជាតិកាណាដា ដែលជាគ្រឹះស្ថានហិរញ្ញវត្ថុ មានទ្រព្យសកម្មជាង 283 ប៊ីលានដុល្លារ គិតត្រឹមថ្ងៃទី 31 ខែកក្កដា 2021។ ដោយមានស្នាក់ការកណ្តាលស្ថិតនៅទីក្រុងម៉ុងរ៉េអាល់ ធនាគារជាតិកាណាដាបានពង្រីកសាខានៅស្ទើរតែគ្រប់ខេត្ត នៃប្រទេសជាមួយនឹងអតិថិជនក្នុងដៃ 2.7 លាននាក់។ ជាគ្រឹះស្ថានហិរញ្ញវត្ថុធំជាងគេលំដាប់ទី 6 ក្នុងប្រទេសកាណាដា និងនាំមុខគេនៅកេប៊ិច ធនាគារជាតិកាណាដា ជាជម្រើសនៃបណ្ដាសហគ្រាសធុនតុច និងមធ្យមនានានៅទីនោះ។ សម្រាប់ព័ត៌មានបន្ថែម សូមចូលទៅកាន់វិបសាយ៖ www.nbc.ca។
ពិធីចុះហត្ថលេខា លើកិច្ចព្រមព្រៀងធានាឥណទានរវាង សាជីវកម្មធានាឥណទានកម្ពុជា និង គ្រឹះស្ថានមីក្រូហិរញ្ញវត្ថុចម្រើន
សាជីវកម្មធានាឥណទានកម្ពុជា (ស.ធ.ក.) មានក្តីសោមនស្សរីករាយ ក្នុងការស្វាគមន៍ជាផ្លូវការ នូវភាពជាដៃគូជាមួយ គ្រឹះស្ថានមីក្រូហិរញ្ញវត្ថុចម្រើន ដោយភាគីទាំងពីរបានប្រារព្ធពិធីចុះហត្ថលេខាលើកិច្ចព្រមព្រៀងធានាឥណទាន នាថ្ងៃទី២២ ខែតុលា ឆ្នាំ២០២១ នេះ នៅទីស្នាក់ការកណ្តាលរបស់គ្រឹះស្ថានមីក្រូហិរញ្ញវត្ថុចម្រើន។
កិច្ចព្រមព្រៀងធានាឥណទានរវាងសាជីវកម្មធានាឥណទានកម្ពុជា និង គ្រឹះស្ថានមីក្រូហិរញ្ញវត្ថុចម្រើន គឺជាការបើកផ្លូវមួយក្នុងការគាំទ្រដល់សហគ្រាសធុនតូចនិងមធ្យម ជាពិសេសក្នុង់វិស័យកសិកម្ម ដែលខ្វះទ្រព្យបញ្ចាំ ដើម្បីអាចឱ្យម្ចាស់អាជីវកម្មមានលទ្ធភាពក្នុងការទទួលបានហិរញ្ញប្បទានច្រើនជាងមុន សម្រាប់ការទ្រទ្រង់អាជីវកម្ម និងវិនិយោគឬពង្រីកអាជីវកម្មជាដើម។
លោក Wong Keet Loong នាយកប្រតិបត្តិសាជីវកម្មធានាឥណទានកម្ពុជា ថ្លែងការស្វាគមន៍យ៉ាងកក់ក្តៅជូនចំពោះ គ្រឹះស្ថានមីក្រូហិរញ្ញវត្ថុចម្រើន ដែលចូលរួមជា “គ្រឹះស្ថានហិរញ្ញវត្ថុចូលរួម (PFI)” មួយរបស់ CGCC ចាប់ពីថ្ងៃនេះតទៅ។
លោកនាយកប្រតិបត្តិរបស់ CGCC មានប្រសាសន៍នៅក្នុងពិធីចុះហត្ថលេខានាថ្ងៃនេះថា ៖ “កិច្ចសហប្រតិបត្តិការជាមួយគ្រឹះស្ថានមីក្រូហិរញ្ញវត្ថុចម្រើន នឹងអាចឱ្យ CGCC បង្កើនការគាំទ្រដល់ សហគ្រាសធុនតូចនិងមធ្យម ក្នុងវិស័យកសិកម្ម នៅតំបន់ជនបទ ដែលពិបាកក្នុងការទទួលបានហិរញ្ញប្បទានផ្លូវការពីគ្រឹះស្ថានហិរញ្ញវត្ថុ។ គ្រឹះស្ថានមីក្រូហិរញ្ញវត្ថុចម្រើន នឹងអាចផ្តល់ហិរញ្ញប្បទានទៅកាន់ទាំង សហគ្រិននៃអាជីវកម្មខ្នាតមីក្រូ ខ្នាតតូច និងមធ្យម (MSMEs) ដែលគ្មានទ្រព្យបញ្ចាំ ឬមានទ្រព្យបញ្ចាំមិនគ្រប់គ្រាន់ សម្រាប់ការស្នើសុំកម្ចី។ ជាមួយនឹងការទទួលបានហិរញ្ញប្បទាននេះ យើងសង្ឃឹមថា MSMEs នឹងអាចបង្កើនចំណូលដល់ជីវភាពរស់នៅរបស់ពួកគេ ក៏ដូចជាកាត់បន្ថយនូវភាពក្រីក្រផងដែរ។”
លោក Yannick Nicolas MILEV នាយកប្រតិបត្តិគ្រឹះស្ថានមីក្រូហិរញ្ញវត្ថុចម្រើន បានសម្តែងក្តីរីករាយ និងលើកឡើងថា “ការផ្តួចផ្តើមរបស់ CGCC ពិតជាសំខាន់សម្រាប់ជួយទៅដល់សេដ្ឋកិច្ចនៅតំបន់ជនបទ និងប្រព័ន្ធទីផ្សារ។ សហគ្រាសខ្នាតតូចនិងមធ្យមក្នុងវិស័យកសិកម្មនៅតាមតំបន់ជនបទ ច្រើនតែជួបការលំបាកក្នុងការទទួលបានកម្ចីផ្លូវការ ដោយសារតែលទ្ធភាពរបស់ SMEs នៅក្នុងវិស័យកសិកម្ម មិនអាចឆ្លើយតបនឹងលក្ខខណ្ឌតម្រូវរបស់អ្នកផ្តល់កម្ចីនៅក្នុងវិស័យហិរញ្ញវត្ថុ។ គម្រោងធានាឥណទាន នឹងចូលរួមដោះស្រាយបញ្ហានេះ ដែលជាលទ្ធផលនឹងពង្រឹងបរិយាបន្នហិរញ្ញវត្ថុ និងការអភិវឌ្ឍអាជីវកម្ម។”
ម្ចាស់អាជីវកម្ម ដែលមានសញ្ជាតិខ្មែរ (កាន់កាប់ភាគហ៊ុនលើសពី៥០%) រួមទាំងសហគ្រាសធុនតូចនិងមធ្យមផងដែរ សូមទំនាក់ទំនងទៅកាន់គ្រឹះស្ថានមីក្រូហិរញ្ញវត្ថុចម្រើន ដើម្បីទទួលបានការធានាឥណទានលើកម្ចីអាជីវកម្មរបស់លោកអ្នក។ លោកអ្នកអាចចូលទៅកាន់គេហទំព័ររបស់គ្រឹះស្ថានមីក្រូហិរញ្ញវត្ថុចម្រើន សម្រាប់ព័ត៌មានបន្ថែម ៖ https://www.chamroeun.com/
គួរបញ្ជាក់ផងដែរថា គិតត្រឹមថ្ងៃទី២០ ខែតុលា ឆ្នាំ២០២១នេះ CGCC បានផ្តល់ការធានា លើកម្ចីរបស់អាជីវកម្ចចំនួន១០៥ អាជីវកម្មរួចមកហើយ ដែលគិតជាទឹកប្រាក់មានទំហំស្មើនឹងជាង ១៤លានដុល្លារសហរដ្ឋអាមេរិក។ ក្នុងនោះផងដែរ ការធានាលើកម្ចីអាជីវកម្មភាគច្រើនបំផុត ត្រូវបានផ្តល់ជូនទៅសហគ្រាសធុនតូចនិងមធ្យម ស្មើនឹង ៩៤% នៃចំនួនអាជីវកម្មសរុបដែលទទួលបានការធានាពី CGCC។
អត្ថបទគួរចាប់អារម្មណ៍ សិក្ខាសាលាស្តីពី “សេវាធានាឥណទាន៖ អត្ថប្រយោជន៍ និងឱកាស ដើម្បីគាំទ្រដល់ការអភិវឌ្ឍសហគ្រាសធុនតូច និងមធ្យម”
កិច្ចពិភាក្សាស្វែងយល់លទ្ធភាពសហការ លើការធានាឥណទានដល់វិស័យស្រូវអង្ករ
នាថ្ងៃរសៀលថ្ងៃសុក្រ ទី០១ ខែតុលា ឆ្នាំ២០២១ សាជីវកម្មធានាឥណទានកម្ពុជា (CGCC) និង សហព័ន្ធស្រូវអង្ករកម្ពុជា (CRF) បានជួបពិភាក្សាតាមរយៈអនឡាញ ដើម្បីស្វែងយល់អំពីលទ្ធភាពក្នុងការសហការ និងគាំទ្រលើការធានាឥណទានដល់កម្ចីរបស់សមាជិកសហព័ន្ធស្រូវអង្ករកម្ពុជា ដែលជាអ្នកនាំចេញ រោងម៉ាស៊ីនកិនស្រូវ និងជាពិសេសគឺសហគមន៍កសិកម្ម ដែលខ្វះទ្រព្យបញ្ចាំ ឬទ្រព្យបញ្ចាំមិនគ្រប់គ្រាន់ ក្នុងការខ្ចីពីស្ថាប័នហិរញ្ញវត្ថុនានា សម្រាប់ជាដើមទុនបង្វិល ឬពង្រីកអាជីវកម្ម។
កិច្ចប្រជុំពិភាក្សានេះ មានការចូលរួមពីលោក Wong Keet Loong អគ្គនាយក CGCC លោក ណូ លីដា អគ្គនាយករង CGCC រួមជាមួយសហការី នៃ CGCC រីឯ CRF មានការចូលរួមពី ឧកញ៉ា ចាន់ សុឃាំង អនុប្រធាន CRF លោក យ៉ន សុវណ្ណ សមាជិកក្រុមប្រឹក្សាភិបាល CRF និងលោក លន់ យ៉េង អគ្គលេខាធិការ CRF។
CGCC យល់ច្បាស់អំពីសារសំខាន់នៃវិស័យកសិកម្ម សម្រាប់ការការអភិវឌ្ឍសេដ្ឋកិច្ចកម្ពុជា ដែលក្នុងនោះគឺ វិស័យស្រូវអង្ករ ដែលជាផ្នែកមួយដ៏សំខាន់ ស្របជាមួយគោលការណ៍នៃការធានាឥណទានរបស់ CGCC ដែលផ្តល់ដល់វិស័យកសិកម្ម ជាវិស័យអាទិភាពមួយ។ កិច្ចប្រជុំពិភាក្សានាថ្ងៃនោះ បានបើកផ្លូវឱ្យ CGCC និង CRF ស្វែងយល់កាន់តែច្បាស់អំពីសារសំខាន់នៃការធានាឥណទាន ដើម្បីដោះស្រាយបញ្ហាប្រឈមក្នុងការទទួលបានឥណទានរបស់វិស័យស្រូវអង្ករ និងជាពិសេសលើកម្ចីដែលខ្វះទ្រព្យបញ្ចាំ ឬទ្រព្យបញ្ចាំមិនគ្រប់គ្រាន់។
បន្ទាប់ពីបញ្ចប់ការពិភាក្សានាថ្ងៃនោះ CGCC និង CRF នឹងបន្តសិក្សាលើលទ្ធភាពនៃកិច្ចសហប្រតិបត្តិការនេះ ដែលផ្តល់ការគាំទ្រដល់វិស័យស្រូវអង្ករកម្ពុជា ដោយមានការចូលរួមពីភាគីពាក់ព័ន្ធ ក៏ដូចជាស្ថាប័នហិរញ្ញវត្ថុផងដែរ ។
អត្ថបទគួរចាប់អារម្មណ៍ CGCC ចូលរួមផ្សព្វផ្សាយ និងលើកកម្ពស់ការយល់ដឹងអំពីការទទួលបានឥណទាន សម្រាប់SMEs និងសហគ្រិនស្រ្