នាថ្ងៃទី៦ ខែមិថុនា ឆ្នាំ២០២៣ នៅទីស្នាក់ការនៃលេខាធិការដ្ឋានសហព័ន្ធស្រូវអង្ករកម្ពុជា លោក Wong Keet Loong អគ្គនាយក CGCC និងសហការីចំនួនពីររូបទៀត បានចូលជួបប្រជុំជាមួយ ឧកញ៉ា ចាន់ សុឃាំង ប្រធានសហព័ន្ធស្រូវអង្ករកម្ពុជា ដើម្បីពិភាក្សាពីលទ្ធភាពនៃការសហការ ដើម្បីលើកស្ទួយដល់វិស័យស្រូវអង្ករកម្ពុជា។
នៅក្នុងកិច្ចប្រជុំនេះ ភាគីទាំងពីរបានចែករំលែកអំពីវិស័យស្រូវអង្ករ ក៏ដូចជាពិភាក្សាអំពីគម្រោងនៃការផ្ដល់ការធានាឥណទាន លើហិរញ្ញប្បទានមកលើវិស័យស្រូវអង្ករកម្ពុជា។
នាថ្ងៃសុក្រ ទី១២ ខែឧសភា ឆ្នាំ២០២៣ នៅទីស្តីការធនាគារជាតិនៃកម្ពុជា (NBC) លោក Wong Keet Loong អគ្គនាយក CGCC បានដឹកនាំសហការី ចូលជួបសម្តែងការគួរសម និងពិភាក្សាការងារជាមួយ ឯកឧត្តម រ័ត្ន សុវណ្ណនរៈ ឧបការីទេសាភិបាល និងជាអគ្គនាយកត្រួតពិនិត្យ NBC រួមជាមួយនឹងសហការី។
លោកអគ្គនាយក CGCC បានសម្តែងក្តីសោមនស្ស ចំពោះការស្វាគមន៍ដ៏កក់ក្តៅរបស់ឯកឧត្តមឧបការីទេសាភិបាល និងបានជម្រាបជូន អំពីវឌ្ឍនភាពការងាររបស់ CGCC ក្នុងការផ្តល់ការធានាឥណទាននារយៈកាលកន្លងមក ក៏ដូចជាផែនការយុទ្ធសាស្រ្តរបស់ CGCC ដែលចាំបាច់ត្រូវការការសហការ និងការគាំទ្រពី NBC។
ជាកិច្ចឆ្លើយតប ឯកឧត្តមឧបការីទេសាភិបាល បានកោតសរសើរចំពោះវឌ្ឍនភាពការងាររបស់ CGCC និងបានបង្ហាញការគាំទ្រដល់បេសកកម្មរបស់ CGCC ក្នុងការផ្តល់ការធានាឥណទានលើកម្ចី ដែលបញ្ចេញដោយធនាគារ និងគ្រឹះស្ថានមីក្រូហិរញ្ញវត្ថុ ដល់ក្រុមហ៊ុនអាជីវកម្ម ដែលខ្វះទ្រព្យធានា ជាពិសេសសហគ្រាសធុនតូចនិងមធ្យម ដែលជាឆ្អឹងខ្នងដ៏សំខាន់នៃការអភិវឌ្ឍសេដ្ឋកិច្ចជាតិ និងការលើកកម្ពស់ចំណេះដឹងផ្នែកហិរញ្ញវត្ថុដល់សហគ្រាសទាំងនោះ។
អង្គប្រជុំក៏បានផ្លាស់ប្តូរយោបល់គ្នាអំពីវឌ្ឍនភាពសំខាន់ៗក្នុងវិស័យធនាគារ និងក្របខ័ណ្ឌបទប្បញ្ញត្តិថ្មីៗរបស់ NBC ព្រមទាំងអនុសាសន៍នានា ដើម្បីបង្កើនកិច្ចសហប្រតិបត្តិការ ឈរលើស្មារតីរួម គឺបង្កើនបរិយាបន្នហិរញ្ញវត្ថុ និងពង្រីកលទ្ធភាពទទួលបានហិរញ្ញប្បទាន ប្រកបដោយប្រសិទ្ធភាព៕
ភ្នំពេញ ថ្ងៃទី២៦ ខែមេសា ឆ្នាំ២០២៣៖ សាជីវកម្មធានាឥណទានកម្ពុជា (CGCC) និងសភាពាណិជ្ជកម្មកម្ពុជា (CCC) បានប្រកាសភាពជាដៃគូយុទ្ធសាស្រ្ត តាមរយៈពិធីចុះហត្ថលេខាជាផ្លូវការលើអនុស្សរណៈនៃការយោគយល់គ្នា នៅទីស្នាក់ការកណ្តាលសភាពាណិជ្ជកម្មកម្ពុជា ក្នុងគោលបំណងលើកស្ទួយដល់លទ្ធភាពទទួលបានកម្ចីដែលមានការធានា សម្រាប់ការអភិវឌ្ឍសហគ្រាសខ្នាតមីក្រូ តូចនិងមធ្យម (MSMEs) នៅកម្ពុជា។ កិច្ចសហប្រតិបត្តិការនេះនឹងផ្តល់ការគាំទ្រជាពិសេសដល់សមាជិកសមាជិកាសភាពាណិជ្ជកម្មកម្ពុជា សម្រាប់ការបង្កើនលទ្ធភាពទទួលហិរញ្ញប្បទាន ឆ្លើយតបទៅនឹងបញ្ហាខ្វះទ្រព្យធានា និងជាពិសេសចូលរួមលើកស្ទួយចំណេះដឹងហិរញ្ញវត្ថុ រួមជាមួយនឹងការធានាឥណទាន ទៅកាន់សមាជិកសមាជិការបស់សភាពាណិជ្ជកម្មកម្ពុជានៅទូទាំងប្រទេស។
លោក Wong Keet Loong អគ្គនាយក CGCC បានគូសបញ្ជាក់ឱ្យដឹងដែរថា “ការចុះអនុស្សរណៈនៃការយោគយល់គ្នាជាមួយនឹងសភាពាណិជ្ជកម្មកម្ពុជា គឺជាសមិទ្ធផលដ៏សំខាន់មួយរបស់ CGCC ក្នុងការផ្តល់នូវលទ្ធភាព ដើម្បីផ្តល់ព័ត៌មានអំពី CGCC ទៅកាន់សមាជិកសមាជិការបស់ សភាពាណិជ្ជកម្មកម្ពុជានៅទូទាំងប្រទេស។ សភាពាណិជ្ជកម្មកម្ពុជា ក្នុងនាមជាស្ថាប័នដែលប្រមូលផ្តុំនូវសមាជិកដែលជាធុរជន ក៏ដូចជាសហគ្រាសធុនតូច និងមធ្យមជាច្រើន នឹងក្លាយជាដៃគូដ៏សំខាន់របស់ CGCC ក្នុងការលើកស្ទួយដល់ការជ្រួតជ្រាបអំពីអត្ថប្រយោជន៍នៃការធានាឥណទានទៅកាន់សមាជិកសមាជិការបស់ CCC។ CGCC និង CCC នឹងរួមគ្នាគាំទ្រដល់ការអភិវឌ្ឍរបស់សហគ្រាសធុនតូចនិងមធ្យមនៅកម្ពុជា ដោយបង្កើនបរិយាបន្នហិរញ្ញវត្ថុ និងចំណេះដឹងហិរញ្ញវត្ថុ”។
លោកឧកញ៉ា ងួន ម៉េងតិច អគ្គនាយកសភាពាណិជ្ជកម្មកម្ពុជា មានប្រសាសន៍ថា “សហគ្រាសខ្នាតមីក្រូ តូច និងមធ្យម ដើរតួនាទីយ៉ាងសំខាន់ក្នុងការអភិវឌ្ឍន៍សេដ្ឋកិច្ច ប៉ុន្តែនៅតែជួបបញ្ហាប្រឈមជាច្រើន ជាពិសេសឧបសគ្គផ្នែកហិរញ្ញវត្ថុ។ ក្នុងន័យនេះ ការចុះអនុស្សរណៈរវាង CCC និង CGCC នាថ្ងៃនេះ មានគោលដៅជាចម្បងក្នុងការជំរុញការអភិវឌ្ឍសហគ្រាសខ្នាតមីក្រូ តូចនិងមធ្យម តាមរយៈការផ្តល់ឥណទានធានា។ បន្ថែមពីលើនេះ ការចុះអនុស្សរណៈយោគយល់នេះ គឺជាសញ្ញាវិជ្ជមានមួយ ដែលនឹងជួយលើកកម្ពស់ និងធ្វើឲ្យកាន់តែស៊ីជម្រៅនូវកិច្ចសហប្រតិបត្តិការរវាងស្ថាប័នទាំងពីរ។”
ភាពជាដៃគូរវាង CGCC និង CCC នេះបង្ហាញពីការប្តេជ្ញាចិត្តរួមគ្នាក្នុងការលើកកម្ពស់ការអភិវឌ្ឍកំណើនសេដ្ឋកិច្ច នៅកម្ពុជា។ តាមរយៈស្មារតីរួមគ្នានេះ ស្ថាប័នទាំងពីរនឹងសម្រួលដល់ក្រុមហ៊ុន/អាជីវកម្ម ដោយដោះស្រាយនូវបញ្ហាប្រឈមផ្នែកហិរញ្ញប្បទាន និងបើកបង្ហាញពីសក្តានុពលរបស់ពួកគេ ដើម្បីជំរុញកំណើនសេដ្ឋកិច្ចក្នុងប្រទេសផងដែរ។
ចុចទីនេះស្វែងយល់បន្ថែម: សាជីវកម្មធានាឥណទានកម្ពុជា និង ធនាគារ CIMB ចាប់ដៃគូសហការផ្តល់កម្ចីមានការធានា ដល់អាជីវកម្មដែលខ្វះទ្រព្យធានា
កាលពីថ្ងៃទី២០ ដល់ ថ្ងៃទី២១ ខែមេសា ឆ្នាំ២០២៣ កន្លងទៅនេះ លោក អាំង សុវណ្ណរ៉ា ប្រធាននាយកដ្ឋានគ្រប់គ្រងហានិភ័យ និងអនុលោមភាព តំណាងឱ្យ CGCC បានចូលរួមសិក្ខាសាលាស្ដីពី (Strengthening Responsible Inclusive Finance in Cambodia) ដែលរៀបចំឡើងដោយ សមាគមមីក្រូហិរញ្ញវត្ថុកម្ពុជា (CMA) និង CERISE+SPTF។
សិក្ខាសាលានេះមានគោលបំណងប្រមូលផ្តុំភាគីពាក់ព័ន្ធ រួមមាន ធនាជាតិនៃកម្ពុជា (NBC), សមាគមមីក្រូហិរញ្ញវត្ថុកម្ពុជា (CMA), សមាគមធានាគារនៅកម្ពុជា (ABC) និងសមាគម Fintech និងស្ថាប័នគាំទ្រលើផ្នែកហិរញ្ញវត្ថុដូចជា សាជីវកម្មធានាឥណទានកម្ពុជា (CGCC), ក្រេឌីត ប្យួរ៉ូ (ខេមបូឌា) (CBC), និង វិទ្យាស្ថានធនាគារ និងហិរញ្ញវត្ថុ (IBF) ដើម្បីពិភាក្សា និងស្វែងរកវិធីកែលម្អការរួមបញ្ចូលផ្នែកហិរញ្ញវត្ថុប្រកបដោយការទទួលខុសត្រូវនៅកម្ពុជា។ ជាពិសេស CGCC ក្នុងនាមជាអ្នកផ្តល់ការធានាឥណទាន អាចជួយកែលម្អលទ្ធភាពទទួលបានហិរញ្ញវត្ថុសម្រាប់សហគ្រាសធុនតូច និងមធ្យម ក៏ដូចជារួមចំណែកក្នុងគោលបំណងនៃការបង្កើនបរិយាបន្នហិរញ្ញវត្ថុប្រកបដោយការទទួលខុសត្រូវនៅក្នុងប្រទេសកម្ពុជា។
Click here to read more: សិក្ខាសាលាផ្សព្វផ្សាយ ស្តីពី “កម្ចីដែលមានការធានា ដើម្បីគាំទ្រដល់ការអភិវឌ្ឍសហគ្រាសធុនតូច និងមធ្យម” នៅខេត្តស្វាយរៀង
នៅរសៀលថ្ងៃទី២០ ខែមេសា ឆ្នាំ២០២៣ CGCC ដឹកនាំដោយលោក Wong Keet Loongបានជួបពិភាក្សាការងារជាមួយ UN Women និង United Nations Environment Programme (UNEP) អំពីលទ្ធភាពនៃកិច្ចសហប្រតិបត្តិការលើគម្រោង “EmPower-Il: Women for Climate-Resilient Societies”។
នាថ្ងៃទី០៣ ខែមេសា ឆ្នាំ២០២៣ សាជីវកម្មធានាឥណទានកម្ពុជា (CGCC) បានរៀបចំនូវកិច្ចប្រជុំបុគ្គលិកប្រចាំឆ្នាំ២០២៣ ដើម្បីធ្វើរបាយការណ៍វឌ្ឍនភាពជូនគណៈកម្មាធិការប្រតិបត្តិរបស់ CGCC និងចែករំលែកជូនបុគ្គលិកទាំងអស់អំពីវឌ្ឍនភាពការងារប្រចាំឆ្នាំ២០២២ និងត្រីមាសទី១ ឆ្នាំ២០២៣ និងជាពិសេស ទៅលើផែនការយុទ្ធសាស្រ្តរបស់នាយកដ្ឋាននីមួយៗសម្រាប់ឆ្នាំ២០២៣។
កិច្ចប្រជុំប្រចាំឆ្នាំនេះ មានការចូលរួមពីគ្រប់បុគ្គលិកទាំងអស់របស់ CGCC ដែលមិនមែនត្រឹមតែជាវេទិកាដើម្បីធ្វើបទបង្ហាញពីនាយកដ្ឋានពាក់ព័ន្ធទាំងអស់នោះទេ តែជាឱកាសក្នុងការជួបពិភាក្សា ក៏ដូចជាទទួលនូវអនុសាសន៍ ស្របជាមួយទិសដៅដើម្បីអភិវឌ្ឍ CGCC លើប្រតិបត្តិការការងារ និងចូលរួមចំណែកសម្រេចចក្ខុវិស័យរួមរបស់ CGCC ក្នុងការបង្កើនបរិយាបន្នហិរញ្ញវត្ថុ និងអភិវឌ្ឍសហគ្រាសខ្នាតតូច និងមធ្យម នៅកម្ពុជា។
ក្នុងរយៈពេលជាង២ឆ្នាំនៃប្រតិបត្តិការរបស់ CGCC ក្រោមការយកចិត្តទុកដាក់របស់រាជរដ្ឋាភិបាល ជាពិសេស ក្រសួងសេដ្ឋកិច្ច និងហិរញ្ញវត្ថុដែលជាអាណាព្យាបាល និងការដឹកនាំពីថ្នាក់គ្រប់គ្រង ដែលមានបទពិសោធនៅក្នុងវិស័យសេដ្ឋកិច្ច ធនាគារ និងហិរញ្ញវត្ថុ CGCC បានរីកចម្រើនជាលំដាប់ ដោយគិតត្រឹមចុងត្រីមាសទី១ ឆ្នាំ២០២៣នេះ CGCC មាននូវបុគ្គលិកជាង៤០នាក់ ដែលបម្រើការងារ ប្រកបដោយស្មារតីសាមគ្គី ដើម្បីរួមគ្នាសម្រេចចក្ខុវិស័យរួមរបស់ CGCC៕
នាថ្ងៃទី៣១ ខែមីនា ឆ្នាំ២០២៣ សាជីវកម្មធានាឥណទានកម្ពុជា (CGCC) បានរៀបចំសិក្ខាសាលាផ្សព្វផ្សាយស្តីពី “កម្ចីដែលមានការធានា ដើម្បីគាំទ្រដល់ការអភិវឌ្ឍសហគ្រាសធុនតូច និងមធ្យម” នៅឯខេត្តស្វាយរៀង ក្រោមកិច្ចសហការពីសភាពាណិជកម្មខេត្តស្វាយរៀង និងមានការចូលរួមពីសំណាក់ថ្នាក់ដឹកនាំ និងបុគ្គលិកនៃគ្រឹះស្ថានហិរញ្ញវត្ថុចូលរួម (PFIs) មួយចំនួន និងបណ្តាសហគ្រិនដែលជាម្ចាស់អាជីវកម្មខ្នាតតូចនិងមធ្យម នៅក្នុងខេត្តស្វាយរៀង ជាង៥០នាក់។ សិក្ខាសាលាផ្សព្វផ្សាយនេះ ទទួលបានការអញ្ជើញចូលរួមជាអធិបតីដោយ លោកឧកញ៉ា សុក រ៉ាដូ ប្រធានសភាពាណិជ្ជកម្មខេត្តស្វាយរៀង និង លោក ណូ លីដា អគ្គនាយករង CGCC ។
តាមរយៈសិក្ខាសាលាផ្សព្វផ្សាយនេះ សហគ្រិននៃអាជីវកម្មខ្នាតតូចនិងមធ្យម បានជ្រាបអំពីព័ត៌មាននៃអត្ថប្រយោជន៍ពីកម្ចីដែលមានការធានាតាមរយៈគ្រឹះស្ថានហិរញ្ញវត្ថុចូលរួមរបស់ CGCC ឆ្លើយតបនឹងបញ្ហាខ្វះទ្រព្យធានាពេលស្នើសុំកម្ចី សម្រាប់ពង្រីក និងស្តារអាជីវកម្មរបស់ខ្លួន។
ចុចទីនេះស្វែងយល់បន្ថែមពី: សាជីវកម្មធានាឥណទានកម្ពុជា និង ធនាគារអូរៀនថល ប្រកាសនូវភាពជាដៃគូ ក្នុងការផ្តល់កម្ចីដែលមានការធានា ដល់អាជីវកម្មដែលខ្វះទ្រព្យធានា
កាលពីថ្ងៃទី២៨ ខែមីនា ដល់ថ្ងៃទី៣០ ខែមីនា ឆ្នាំ២០២៣ សាជីវកម្មធានាឥណទានកម្ពុជា (CGCC) ដឹកនាំដោយ លោក ណូ លីដា អគ្គនាយករង បានជួបពិភាក្សាស្វែងយល់អំពីការអនុវត្តគម្រោងធានាឥណទាន និងផ្សព្វផ្សាយបន្ថែមអំពីគម្រោងធានាឥណទានរបស់ CGCC ដោយផ្ទាល់ជាមួយថ្នាក់ដឹកនាំ និងបុគ្គលិករបស់សាខានៃគ្រឹះស្ថានហិរញ្ញវត្ថុចូលរួម (PFIs) មួយចំនួនរបស់ CGCC រួមមាន៖
កិច្ចពិភាក្សាជាមួយ PFIs របស់ CGCC នៅខេត្តទាំងបី ដែលជាខេត្តមានសក្តានុពលនៃអាជីវកម្មរបស់សហគ្រាសខ្នាតតូចនិងមធ្យម គឺជាឱកាសមួយដ៏ពិសេសសម្រាប់ទាំង CGCC និង PFIs ស្វែងយល់អំពីភាពចាំបាច់នៃការធានាឥណទាន និងឱកាសដែល PFIs អាចបង្កើនការផ្តល់កម្ចីជូនទៅដល់ក្រុមហ៊ុនអាជីវកម្ម ដែលមានតម្រូវការកម្ចីតែខ្វះទ្រព្យធានា។
តាមរយៈកិច្ចពិភាក្សាដោយផ្ទាល់ជាមួយ PFIs របស់ CGCC នៅបណ្តាខេត្តទាំងបីនេះ CGCC បានស្វែងយល់អំពីស្ថានភាពនៃការអនុវត្តគម្រោងធានាឥណទាន នៅតាមបណ្តាខេត្ត រួមទាំងមតិយោបល់ដ៏មានសារៈសំខាន់នានាទៅលើគម្រោងធានាឥណទានរបស់ CGCC។ CGCC និង PFIs នឹងបន្តបង្កើនការសហការលើការផ្តល់កម្ចីដែលមានការធានាជូនដល់ក្រុមហ៊ុនអាជីវកម្ម ដែលមានតម្រូវការកម្ចីសម្រាប់អភិវឌ្ឍអាជីវកម្ម តែប្រឈមនឹងបញ្ហាខ្វះទ្រព្យធានា។
(ភ្នំពេញ ថ្ងៃទី២៧ ខែមីនា ឆ្នាំ២០២៣)៖ សាជីវកម្មធានាឥណទានកម្ពុជា (CGCC) និងធនាគារ អូរៀន ថល ម.ក បានប្រកាសជាផ្លូវការនូវភាពជាដៃគូ លើកិច្ចព្រមព្រៀងធានាឥណទាន ដើម្បីផ្តល់ការធានាលើកម្ចីអាជីវកម្មដែលខ្វះទ្រព្យធានា។ កិច្ចសហការនេះ នឹងផ្តល់ការគាំទ្រផ្នែកហិរញ្ញវត្ថុដ៏ចម្បង សម្រួលដល់អាជីវកម្ម ជាពិសេសសហគ្រាសខ្នាតតូច និងមធ្យម ដែលប្រឈមនឹងបញ្ហាខ្វះទ្រព្យធានាសម្រាប់តម្កល់នៅធនាគារ ដើម្បទទួលបានកម្ចីជាទុនបង្វិល និងពង្រីកអាជីវកម្ម។
CGCC ផ្តោតលើការបង្កើនបរិយាបន្នហិរញ្ញវត្ថុ និងអភិវឌ្ឍសហគ្រាសខ្នាតតូច និងមធ្យម តាមរយៈបេសកកម្មផ្តល់ការធានាឥណទានលើកម្ចីអាជីវកម្ម ដែលផ្តល់ឱ្យតាមរយៈគ្រឹះស្ថានហិរញ្ញវត្ថុចូលរួម សមស្របនឹងធនាគារ អូរៀន ថល ម.ក ក្នុងនាមជាធនាគារពាណិជ្ជមួយដែលមានទស្សនវិស័យស្រដៀងគ្នានឹង CGCC ក្នុងការគាំទ្រក្រុមហ៊ុនអាជីវកម្មតាមរយៈការផ្តល់នូវសេវានិងផលិតផលហិរញ្ញវត្ថុ ដែលមានតម្លៃបន្ថែមដល់អតិថិជន និងសេដ្ឋកិច្ចជាតិ។ កិច្ចសហការរវាង CGCC និង ធនាគារ អូរៀន ថល ម.ក នឹងក្លាយជាកាលានុវត្តភាពមួយផ្តល់លទ្ធភាពដល់សហគ្រិន ជាពិសេសសហគ្រាសខ្នាតតូច និងមធ្យម ក្នុងការទទួលបានកម្ចីដោយមិនចាំបាច់ដាក់ទ្រព្យបញ្ចាំ ឬទ្រព្យបញ្ចាំដែលមានតម្លៃមិនគ្រប់គ្រាន់សម្រាប់ទំហំកម្ចី ដែលភាគច្រើនជាបញ្ហាប្រឈមចម្បងដែលសហគ្រិននៅកម្ពុជាបាននិងកំពុងបន្តជួបប្រទះ។
លោក Wong Keet Loong អគ្គនាយក CGCC បានបង្ហាញការសាទរ និងរីករាយចំពោះភាពជាដៃគូនេះថា៖ “កិច្ចសហការភាពជាដៃគូជាមួយនឹងធនាគារអូរៀនថល នឹងបង្កើនចំនួនគ្រឹះស្ថានហិរញ្ញវត្ថុចូលរួមរបស់ CGCC ក្នុងការផ្តល់កម្ចីដែលមានការធានា សរុបចំនួន២៦ស្ថាប័ន។ ទោះបីជាធនាគារអូរៀនថល ជាធនាគារថ្មីមួយនៅកម្ពុជា តែធនាគារនេះមានថ្នាក់ដឹកនាំដែលមានជំនាញ និងបទពិសោធន៍ផ្នែកធនាគាររហូតដល់ជាង២៥ឆ្នាំនៅកម្ពុជា ជាមួយនឹងការជ្រួតជ្រាបយ៉ាងរឹងមាំពីតម្រូវផ្នែកហិរញ្ញប្បទានរបស់សហគ្រាសធុនតូចនិងមធ្យម”។
លោកអគ្គនាយកក៏បានបន្តទៀតថា ៖ “ក្នុងត្រីមាសដំបូង នៃឆ្នាំ២០២៣នេះ CGCC បានផ្តល់ការធានាឥណទានប្រហាក់ប្រហែល ២៥០ ក្រុមហ៊ុន/អាជីវកម្ម ក្នុងរង្វង់ទឹកប្រាក់ប្រហែល២០លានដុល្លារសហរដ្ឋអាមេរិក។ យើងឃើញថានេះជា ការចាប់ផ្តើមមួយដ៏ល្អសម្រាប់ឆ្នាំនេះ ហើយយើងជឿជាក់ថា របត់មួយនេះនឹងនៅតែបន្តទៅមុខ ដើម្បីគាំទ្រដល់ក្រុមហ៊ុន/អាជីវកម្មក្នុងការទទួលបានកម្ចី”។
Datuk Phan Ying Tong នាយកគ្រប់គ្រងរួម/នាយកប្រតិបត្តិ នៃធនាគារអូរៀនថល មានប្រសាសន៍ឱ្យដឹងថា៖ “យើងមានសេចក្តីរំភើបរីករាយក្នុងការធ្វើជាដៃគូជាមួយ CGCC ដើម្បីគាំទ្រដល់សហគ្រាសធុនតូច និងមធ្យមនៅកម្ពុជា។ ភាពជាដៃគូនេះគឺជាព្រឹត្តិការណ៍ដ៏សំខាន់មួយសម្រាប់យើង វាបើកឱកាសថ្មីសម្រាប់យើង ហើយវាបង្ហាញពីការប្តេជ្ញាចិត្តរបស់យើងក្នុងការជំរុញការដាក់បញ្ចូលហិរញ្ញវត្ថុ (Financial inclusion) និងការលើកកម្ពស់កំណើនសេដ្ឋកិច្ចនៅក្នុងប្រទេស។ ការផ្តល់ជូនចុងក្រោយនេះ គឺស្របជាមួយនឹងបេសកកម្មសាជីវកម្មរបស់យើង ដែលនឹងទៅជា ”ធនាគារដែលលើសពីធនាគារធម្មតា”។ យើងខិតខំដើម្បីរីកចម្រើនជាមួយសហគមន៍ និង MSMEs របស់យើង ហើយជួយអតិថិជនតាមគ្រប់មធ្យោបាយដែលយើងអាចធ្វើបាន។ ភាពជាដៃគូជាមួយ CGCC បានអនុញ្ញាតឱ្យសហគ្រាសធុនតូច និងមធ្យមទទួលបាននូវហិរញ្ញប្បទានពីធនាគារ អូរៀន ថល ម.ក ក្នុងអត្រាប្រកួតប្រជែងដោយមិនចាំបាច់មានវត្ថុបញ្ចាំ។ កិច្ចសហការណ៍មួយនេះក៏បញ្ជាក់ជាថ្មីពីការប្តេជ្ញាចិត្តរបស់ធនាគារ អូរៀន ថល ម.ក ក្នុងការគាំទ្រដល់ការអភិវឌ្ឍន៍អាជីវកម្មខ្នាតតូច និងមធ្យម ដែលជាឆ្អឹងខ្នងនៃសេដ្ឋកិច្ចកម្ពុជា”។
ឥឡូវនេះធនាគារ អូរៀន ថល ម.ក បានក្លាយជាស្ថាប័នហិរញ្ញវត្ថុមួយក្នុងចំណោមស្ថាប័នហិរញ្ញវត្ថុដែលចូលរួមចំនួន 26 (PFIs) របស់ CGCC ដែលបានប្តេជ្ញាចិត្តក្នុងការជួយក្រុមហ៊ុនអាជីវកម្មស្របតាមទិសដៅរបស់រដ្ឋាភិបាលក្នុងការគាំទ្រសហគ្រាសធុនតូច និងមធ្យម។ CGCC និងធនាគារ អូរៀន ថល ម.ក មានទំនុកចិត្តថាភាពជាដៃគូនេះនឹងជួយដោះស្រាយគម្លាតហិរញ្ញប្បទានដែលប្រឈមមុខដោយ MSMEs ជាច្រើននៅក្នុងប្រទេសកម្ពុជា និងរួមចំណែកដល់លើកកម្ពស់ និងការអភិវឌ្ឍន៍សេដ្ឋកិច្ចរបស់ប្រទេស។
ក្រោមកិច្ចព្រមព្រៀងធានាឥណទាននេះ ធនាគារអូរៀនថល បានក្លាយជាគ្រឹះស្ថានហិរញ្ញវត្ថុចូលរួម (PFIs) មួយ ក្នុងចំណោម PFIs សរុប២៦ ស្ថាប័នរបស់ CGCC ក្នុងការប្តេជ្ញាចិត្តគាំទ្រដល់ក្រុមហ៊ុនអាជីវកម្មក្នុងការទទួលបានហិរញ្ញប្បទានស្របទៅនឹងយុទ្ធសាស្ត្ររបស់រាជរដ្ឋាភិបាលក្នុងការគាំទ្រ MSMEs តាមរយៈយន្តការធានាឥណទាន។ CGCC និងធនាគារអូរៀនថល ជឿជាក់យ៉ាងមុតមាំថា កិច្ចសហការនេះ នឹងអាចសម្រួលក្នុងការដោះស្រាយគម្លាតហិរញ្ញវត្ថុ ដែលជាបញ្ហាប្រឈមរបស់ MSMEs នៅកម្ពុជា និងចូលរួមចំណែកដល់ការរីកចម្រើន និងការអភិវឌ្ឍសេដ្ឋកិច្ចជាតិ។
អំពី CGCC
CGCC គឺជាសហគ្រាសសាធារណៈដែលបង្កើតឡើងដោយអនុក្រឹត្យរបស់រាជរដ្ឋាភិបាលចុះថ្ងៃទី០១ ខែកញ្ញា ឆ្នាំ២០២០។ CGCC ស្ថិតក្រោមអាណាព្យាបាលបច្ចេកទេសនិងហិរញ្ញវត្ថុពីក្រសួងសេដ្ឋកិច្ចនិងហិរញ្ញវត្ថុ ជាមួយនឹងបេសកកម្មផ្តល់ការធានាឥណទានលើកម្ចីដែលផ្តល់ឱ្យអាជីវកម្ម ដើម្បីចែករំលែកហានិភ័យជាមួយស្ថាប័នផ្តល់កម្ចី និងបង្កើនបរិយាបន្នហិរញ្ញវត្ថុ។
គិតត្រឹមចុងខែកុម្ភៈ ឆ្នាំ២០២៣ CGCC បានផ្តល់ការធានាឥណទាន ដល់ក្រុមហ៊ុន/អាជីវកម្ម សរុបចំនួន ១១៩៥ ក្នុងរង្វង់ទឹកប្រាក់ប្រហាក់ប្រហែល៨៥.៧៣ លានដុល្លារ ដែលក្នុងនោះ ៩៥% នៃចំនួនក្រុមហ៊ុន/អាជីវកម្មដែលទទួលការធានាសរុប បានផ្តល់ជូនទៅសហគ្រាសធុនតូចនិងមធ្យម (SMEs)។
អំពីធនាគារអូរៀនថល
ធនាគារ អូរៀន ថល ម.ក គឺជាធនាគារពាណិជ្ជថ្មី និងរីកចម្រើនយ៉ាងឆាប់រហ័សដែលបើកសម្ភោធជាផ្លូវការនៅថ្ងៃទី២២ ខែកុម្ភៈ ឆ្នាំ២០២២ នឹងបើកសាខាទី៣ របស់ខ្លួននៅដើមខែមេសា ឆ្នាំ២០២៣ ខាងមុននេះ។ ធនាគារ អូរៀន ថល ម.ក មានការយកចិត្តទុកដាក់យ៉ាងខ្លាំងក្នុងការផ្តល់នូវបទពិសោធន៍សេវាកម្មអតិថិជនដ៏ល្អបំផុត មិនត្រឹមតែការផ្តល់សេវាកម្មជាមួយអតិថិជនផ្ទាល់ ប៉ុន្តែក៏ត្រូវបានមើលឃើញផងដែរនៅក្នុងការរចនាដែលផ្តោតលើការផ្តល់សេវាឌីជីថល ដែលធនាគារ អូរៀន ថល ម.ក មានកម្មវិធីធនាគារចល័តរបស់ខ្លួនផ្ទាល់ ។
កិច្ចសហប្រតិបត្តិការនេះនឹងអនុញ្ញាតឱ្យធនាគារ អូរៀន ថល ម.ក ផ្តល់ការគាំទ្រកាន់តែច្រើនដល់សហគ្រាសធុនតូច និងមធ្យម ដោយជួយគាំទ្រអតិថិជនឱ្យទទួលបានជម្រើសហិរញ្ញប្បទានដែលមានតម្លៃសមរម្យ និងបត់បែនដែលអតិថិជនត្រូវការដើម្បីទទួលបានជោគជ័យ។ តាមរយៈការធ្វើដូច្នេះ ធនាគារ អូរៀន ថល ម.ក ក៏កំពុងកំណត់ទីតាំងខ្លួនឯងសម្រាប់ភាពជោគជ័យកាន់តែច្រើនផងដែរ ដោយសារធនាគារនៅតែបន្តរីកចម្រើន និងពង្រីកការផ្តល់អាជីវកម្មរបស់ខ្លួន៕
Click here: ទឹកប្រាក់ជាង ១០០ លានដុល្លារ ត្រូវផ្តល់ដល់ SME តាម CGCC
នៅថ្ងៃទី២៣ ខែមីនា ឆ្នាំ២០២២ វេលាម៉ោង ២:០០នាទីរសៀល សាជីវកម្មធានាឥណទានកម្ពុជា (CGCC) បានរៀបចំកិច្ចប្រជុំក្រុមប្រឹក្សាភិបាលអាណត្តិទី១ លើកទី១៣ នៅការិយាល័យកណ្តាលរបស់ CGCC ក្រោមវត្តមានដ៏ខ្ពង់ខ្ពស់របស់ ឯកឧត្តម រស់ សីលវ៉ា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាភិបាលរបស់ CGCC ដោយមានការចូលរួមពី សមាជិកក្រុមប្រឹក្សាភិបាល និងមន្ត្រីត្រួតពិនិត្យរដ្ឋ។
របៀបវារៈនៃកិច្ចប្រជុំក្រុមប្រឹក្សាភិបាលលើកទី១៣ នេះ រួមមាន (១) របាយការណ៍ស្តីពីវឌ្ឍនភាពការងាររបស់ CGCC, (២) ពាក្យស្នើសុំធ្វើជាស្ថាប័នហិរញ្ញវត្ថុចូលរួម (PFIs), (៣) ក្របខណ្ឌនៃការធានាឥណទានលើការបោះផ្សាយសញ្ញាបណ្ណ, (៤) របាយការហិរញ្ញវត្ថុដែលធ្វើសវនកម្មសម្រាប់ឆ្នាំ ២០២២ (៥) ផែនការនិរន្ដភាពអាជីវកម្ម និងក្របខណ្ឌគ្រប់គ្រងវិបត្តិ, និង (៦) ផ្សេងៗ។
កិច្ចប្រជុំក្រុមប្រឹក្សាភិបាលរបស់ CGCC តែងតែត្រូវបានរៀបចំឡើងជាទៀងទាត់ ដើម្បីពិនិត្យ វាយតម្លៃ និងផ្តល់អនុសាសន៍ដល់ CGCC ក៏ដូចជាផ្តល់ការសម្រេចនានា ទៅលើសកម្មភាពការងារ ជាពិសេសទៅលើកិច្ចការងារអភិវឌ្ឍស្ថាប័ន ដើម្បីធានានូវតម្លាភាព និងប្រសិទ្ធភាពរបស់ CGCC។
