ការធានាឥណទាន Archives - Page 6 of 6

នីតិវិធីសងត្រឡប់នៃកម្ចីដែលមានការធានា របស់សាជីវកម្មធានាឥណទានកម្ពុជា

Posted on ខែវិច្ឆិកា 29, 2022ខែកក្កដា 8, 2024 by Sorn Chhorvyvatey

ចុចអាននិងទាញយកជា PDF ៖ នីតិវិធីសងត្រឡប់នៃកម្ចីដែលមានការធានា របស់ CGCC

គោលការណ៍១ នៃគោលការណ៍ទាំង១៦ របស់ធនាគារពិភពលោក អំពីគម្រោងធានាឥណទានសាធារណៈ ចែងថា៖ “ដំណើរការនៃការគ្រប់គ្រងការសងត្រឡប់គួរតែមានប្រសិទ្ធភាព, កំណត់ច្បាស់លាស់ជាលាយលក្ខណ៍អក្សរ, មានតម្លាភាព, មានការលើកទឹកចិត្តដល់ការទារមកវិញនូវកម្ចីដែលបានបាត់បង់, និងសមស្របតាមក្របខ័ណ្ឌច្បាប់ និងបទប្បញ្ញត្តិរបស់ប្រទេសសាម៉ី”។ ពិតណាស់ ការគ្រប់គ្រងនីតិវិធីការសងត្រឡប់ គឺជាកត្តាកំណត់មួយ នៃគណនេយ្យភាពរបស់ CGCC។ នីតិវិធីនៃការសងត្រឡប់ ត្រូវបានចែងជាលាយលក្ខណ៍អក្សរ នៅក្នុងកិច្ចព្រមព្រៀងធានាឥណទាន ដែលមានចំណងផ្លូវច្បាប់រវាង CGCC និងគ្រឹះស្ថានហិរញ្ញវត្ថុចូលរួម (PFI) នីមួយៗ ដែលជាដៃគូរបស់ CGCC។

ការដាក់ពាក្យស្នើសុំការសងត្រឡប់. ដើម្បីអាចដាក់ពាក្យស្នើសុំការសងត្រឡប់ពី CGCC លើកម្ចីដែលមានការធានា ទាមទារនូវការបំពេញបាននូវលក្ខខណ្ឌដូចខាងក្រោម៖

កម្ចីត្រូវបានចាត់ទុកថា “បាត់បង់” ដោយផ្អែកតាមនិយមន័យរបស់ធនាគារជាតិនៃកម្ពុជា។
PFI បានទាមទារជាផ្លូវការនូវសំណងពីអ្នកខ្ចី ស្របតាមនីតិវិធីជាធរមានរបស់ PFIs។
PFI បានអនុវត្តរាល់ដំណើរការក្នុងការទាមទារសំណងពីអ្នកខ្ចី ស្របតាមនីតិវិធីជាធរមានរបស់ PFI។
នីតិវិធីផ្លូវច្បាប់ត្រូវបានចាប់ផ្តើមចំពោះអ្នកខ្ចី និងចំពោះទ្រព្យបញ្ចាំដែលមាន។
កម្ចីដែលបាត់បង់ នោះត្រូវបានធ្វើសំវិធានធន ឬត្រូវបានលុបចោលដោយ PFI។

PFI ត្រូវដាក់ពាក្យស្នើសុំការសងត្រឡប់ពី CGCC ក្នុងរយៈពេលយ៉ាងយូរ ៩០ថ្ងៃ បន្ទាប់ពីលក្ខខណ្ឌនៃការសងត្រឡប់ខាងលើត្រូវបានបំពេញ។

ការទូទាត់ការសងត្រឡប់. CGCC ទូទាត់ការសងត្រឡប់ជូន PFI ចំពោះកម្ចីដែលមានការធានាជា ២ដំណាក់កាល។ ក្នុងដំណាក់កាលទី១ CGCC នឹងទូទាត់ការសងត្រឡប់ចំនួន ៥០% នៃទំហំសងត្រឡប់សរុប ជូនទៅ PFIs យ៉ាងយូរ ៣០ថ្ងៃ បន្ទាប់ពីទទួលបានសំណើសុំការសងត្រឡប់ពី PFIs។ CGCC នឹងទូទាត់ការសងត្រឡប់ដែលនៅសេសសល់ ក្នុងដំណាក់កាលទី២ យ៉ាងយូរ ២ឆ្នាំ បន្ទាប់ពីដំណាក់កាលទី១។ រយៈពេលយ៉ាងយូរ ២ឆ្នាំ នេះ គឺជាការទុកពេលជូន PFI ដើម្បីបន្តអនុវត្តនីតិវិធីទាមទារការសងត្រឡប់ពីអ្នកខ្ចីមកវិញ។ ទោះបីជាកម្ចីមានការធានាពី CGCC ក៏ដោយ PFI ត្រូវខិតខំឱ្យអស់លទ្ធភាពក្នុងការទាមទារសំណងពីអ្នកខ្ចី ដូចករណីកម្ចីគ្មានការធានាពី CGCC ដែរ។

ការទទួលបានសំណងមកវិញពីអ្នកខ្ចី. រាល់ការប្រមូលបានមកវិញនូវកម្ចីដែលបានបាត់បង់ ត្រូវបានបែងចែករវាង CGCC និង PFI ទៅតាមសមាមាត្រនៃការធានា។ PFI អាចប្រើប្រាស់សំណងដែលប្រមូលមកវិញពីអ្នកខ្ចី ដើម្បីទូទាត់ចំណាយពាក់ព័ន្ធទៅតាមលំដាប់អាទិភាពដូចខាងក្រោម៖

ចំណាយពាក់ព័ន្ធនឹងដំណើរការនៃការទាមទារការសងត្រឡប់
ការប្រាក់សម្រាប់កម្ចីដែលមានការធានា ដែលអ្នកខ្ចីត្រូវបង់ជូន PFI
ចំណែករបស់ CGCC ទៅតាមសមាមាត្រនៃការធានា
ការផាកពិន័យនានាដែលអ្នកខ្ចីត្រូវបង់ជូន PFI

អានបន្ត៖ នីតិវិធីសងត្រឡប់នៃកម្ចីដែលមានការធានា របស់ CGCC

៥ចំណុច សហគ្រិនគួរត្រៀមខ្លួន ដើម្បីទទួលបាននូវឥណទានដែលមានការធានា

Posted on ខែវិច្ឆិកា 18, 2022ខែកក្កដា 8, 2024 by Sorn Chhorvyvatey

អាននិងទាញយកអត្ថបទជា PDF: ការទទួលបានឥណទានដែលមានការធានា

សេវាធានាឥណទាន ត្រូវបានប្រើប្រាស់ក្នុងគោលដៅគាំទ្រក្រុមហ៊ុនអាជីវកម្ម ជាពិសេស អាជីវកម្មខ្នាតតូច និងមធ្យម ឱ្យទទួលបានហិរញ្ញប្បទានផ្លូវការ។ បច្ចុប្បន្ន សាជីវកម្មធានាឥណទានកម្ពុជា (CGCC) ផ្តល់ការធានាឥណទាន លើកម្ចីដែលបញ្ចេញដោយធនាគារ និងគ្រឹះស្ថានមីក្រូហិរញ្ញវត្ថុជាគ្រឹះស្ថានហិរញ្ញវត្ថុចូលរួម (ហៅថាកាត់ថា PFIs) របស់ CGCC ទៅកាន់អ្នកស្នើសុំកម្ចី ក្រោមគម្រោងធានាឥណទានដែលបានដាក់ចេញដោយ CGCC។ ដូច្នេះ ដើម្បីចាប់យកអត្ថប្រយោជន៍ពីការធានាឥណទាន ក្រុមហ៊ុនអាជីវកម្មត្រូវត្រៀមខ្លួនឱ្យបានរួចរាល់ដើម្បីស្នើសុំកម្ចីទៅកាន់ PFIs ជាមុនសិន។ ការស្វែងយល់អំពីលក្ខណៈវិនិច្ឆ័យដែល PFIs ប្រើប្រាស់ដើម្បីវាយតម្លៃលើសំណើសុំឥណទាន អាចជួយឱ្យក្រុមហ៊ុនអាជីវកម្មត្រៀមខ្លួនបានល្អប្រសើរជាមុន ក្នុងការទទួលបានកម្ចីដែលមានការធានាពី CGCC។

លក្ខខណ្ឌ (CONDITION)

Condition to get guaranteed loans — 5 important things SMEs should understand to apply for guaranteed loans!

មុនពេលអនុម័តកម្ចី ធនាគារត្រូវតែដឹងច្បាស់អំពីគោលបំណងនៃកម្ចី និងទំហំកម្ចីដែលសមស្របទៅនឹងគោលបំណងនៃកម្ចីនោះ។ តើក្រុមហ៊ុនអាជីវកម្មអាចបញ្ជាក់ជូនធនាគារ អំពីគោលបំណងនៃកម្ចី និងទំហំកម្ចីដោយរបៀបណា? ផែនការអាជីវកម្ម និងរបាយការណ៍ហិរញ្ញវត្ថុ ដែលមានភាពជឿទុកចិត្តបាន គឺជាមូលដ្ឋានដ៏សំខាន់ដែលអាចឱ្យធនាគារវាយតម្លៃលើទំហំកម្ចីដែលត្រូវការ និងគោលបំណងនៃកម្ចីរបស់អ្នកខ្ចីបាន។ ពិតណាស់ ផែនការអាជីវកម្ម និងរបាយការណ៍ហិរញ្ញវត្ថុច្បាស់លាស់ មិនត្រឹមតែអាចជួយក្រុមហ៊ុនអាជីវកម្មឱ្យស្នើសុំកម្ចីបានងាយស្រួលប៉ុណ្ណោះទេ ប៉ុន្តែថែមទាំងអាចជួយក្រុមហ៊ុនអាជីវកម្មវាយតម្លៃលើស្ថានភាពអាជីវកម្មរបស់ខ្លួន ដើម្បីរៀបចំផែនការសម្រាប់ភាពជោគជ័យនៃអាជីវកម្មនាពេលអនាគតផងដែរ។ ផែនការអាជីវកម្ម និងរបាយការណ៏ហិរញ្ញវត្ថុ អាចជួយកំណត់ទំហំកម្ចី និងលទ្ធភាពនៃការសងត្រឡប់ ឱ្យកាន់តែមានភាពសុក្រិត។ ការកំណត់ទំហំកម្ចីឱ្យបានត្រឹមត្រូវ ពិតជាសំខាន់។ ការទទួលបានកម្ចីច្រើនហួស ធ្វើឱ្យអ្នកខ្ចីខាតបង់ការប្រាក់ ថ្លៃរដ្ឋបាល ថ្លៃពិន័យក្នុងការសងមុនកាលកំណត់ និងថ្លៃសេវាផ្សេងៗទៀត។ ផ្ទុយទៅវិញ ការទទួលបានកម្ចីមិនបានគ្រប់គ្រាន់រាំងស្ទះដល់ការរីកចម្រើនរបស់ក្រុមហ៊ុនអាជីវកម្មឱ្យអស់សក្តានុពល។ កត្តា “លក្ខខណ្ឌ (Condition)” គឺជាលក្ខណៈវិនិច្ឆ័យមួយ ក្នុងចំណោមលក្ខណៈវិនិច្ឆ័យទាំង៥ ដែលធនាគារប្រើប្រាស់ក្នុងការវាយតម្លៃសំណើសុំកម្ចី។

ទ្រព្យបញ្ចាំ (COLLATERAL)

5 important things SMEs should understand to apply for guaranteed loans!

នៅពេលកត្តា “លក្ខខណ្ឌ” ត្រូវបានបំពេញ ធនាគារក៏មានលក្ខខណ្ឌតម្រូវឱ្យក្រុមហ៊ុនអាជីវកម្មមាន “ទ្រព្យបញ្ចាំ” ដើម្បីការពារធនាគារពីការខាតបង់ ក្នុងករណីក្រុមហ៊ុនអាជីវកម្មមិនអាចសងត្រឡប់បាន។ ជាទូទៅ ធនាគារអាចផ្តល់កម្ចីទំហំត្រឹមប្រមាណ ៧០% នៃតម្លៃទ្រព្យបញ្ចាំ។ តម្រូវការទ្រព្យបញ្ចាំ បានក្លាយឧបសគ្គចម្បងមួយ សម្រាប់ក្រុមហ៊ុនអាជីវកម្មក្នុងការទទួលបានកម្ចីពីធនាគារ។ យោងលើសាជីវកម្មហិរញ្ញវត្ថុអន្តរជាតិ (IFC) ៦៦% នៃអាជីវកម្មខ្នាតតូច និងមធ្យម ដែលបានស្នើសុំកម្ចីទៅកាន់ធនាគារ ត្រូវបានបដិសេធ ដោយសារមូលហេតុខ្វះទ្រព្យបញ្ចាំ។ CGCC ត្រូវបានបង្កើតឡើង ដើម្បីចូលរួមដោះស្រាយបញ្ហានេះ។ CGCC ផ្តល់ការធានាឥណទានដែលដើរតួជំនួសឱ្យទ្រព្យបញ្ចាំរបស់ក្រុមហ៊ុនអាជីវកម្ម ទៅកាន់ធនាគារ។ នៅពេលមានការធានាពី CGCC ធនាគារអាចវាយតម្លៃសំណើសុំខ្ចីពីក្រុមហ៊ុនអាជីវកម្ម ដោយចាត់ទុកការធានាឥណទានរបស់ CGCC ជាទ្រព្យបញ្ចាំរបស់ក្រុមហ៊ុនអាជីវកម្ម។ ការអនុវត្តនេះ អាចកាត់បន្ថយតម្រូវការទ្រព្យបញ្ចាំ សម្រាប់ក្រុមហ៊ុនអាជីវកម្មនៅពេលស្នើសុំកម្ចី។

សមត្ថភាព (CAPACITY)

សមត្ថភាពសងត្រឡប់ គឺជាតម្រូវការជាមូលដ្ឋាន របស់ធនាគារក្នុងការអនុម័តកម្ចី។ ការបំពេញបាននូវកត្តា “លក្ខខណ្ឌ” និង “ទ្រព្យបញ្ចាំ” ខាងលើ មិនទាន់គ្រប់គ្រាន់ដើម្បីឱ្យធនាគារអនុម័តកម្ចី ហើយ CGCC ក៏មិនទាន់អាចផ្តល់ការធានាឥណទានជូននៅឡើយទេ ប្រសិនបើអ្នកខ្ចីមិនអាចបញ្ជាក់បានអំពីសមត្ថភាពគ្រប់គ្រាន់ក្នុងការសងត្រឡប់កម្ចីនោះវិញ។ តើក្រុមហ៊ុនអាជីវកម្មអាចបញ្ជាក់អំពីសមត្ថភាពសងបានយ៉ាងដូចម្តេច? ជាថ្មីម្តងទៀត ផែនការអាជីវកម្ម និងរបាយការណ៏ហិរញ្ញវត្ថុដែលអាចជឿទុកចិត្តបាន គឺជាភស្តុតាងដ៏ល្អ។ របាយការណ៏ហិរញ្ញវត្ថុ អាចបង្ហាញពីទ្រព្យសកម្ម បំណុល ដើមទុន ចំណូល និងលំហូរសាច់ប្រាក់ របស់ក្រុមហ៊ុនអាជីវកម្ម ដែលព័ត៌មានទាំងនេះ គឺជាភស្តុតាងដែលអាចជឿទុកចិត្តបាន ក្នុងការវាយតម្លៃអំពីសមត្ថភាពសងរបស់ក្រុមហ៊ុនអាជីវកម្ម។ ចំណែកឯ ផែនការអាជីវកម្ម អាចបង្ហាញពីសកម្មភាពអាជីវកម្ម និងចំណូលនាពេលអនាគត ដែលអាចត្រូវបានប្រើប្រាស់ដើម្បីបញ្ជាក់អំពីសមត្ថភាពសងត្រឡប់ផងដែរ។

ដើមទុន (CAPITAL)

នៅពេលផ្តល់កម្ចីអាជីវកម្ម ធនាគារតែងតែចង់ដឹងអំពីចំនួនដើមទុនដែលអ្នកខ្ចី បានដាក់វិនិយោគក្នុងក្រុមហ៊ុន។ កត្តា “ដើមទុន” មានសារៈសំខាន់ ព្រោះទំហំដើមទុនរបស់អ្នកខ្ចី បញ្ជាក់ពីការប្តេជ្ញាចិត្តរបស់អ្នកខ្ចីចំពោះក្រុមហ៊ុនអាជីវកម្មនោះ។ តើអ្នកខ្ចីអាចបញ្ជាក់ជូនធនាគារអំពីកត្តាដើមទុនដោយវិធីណា? របាយការណ៏ហិរញ្ញវត្ថុដែលមានលក្ខណៈស្តង់ដា អាចបញ្ជាក់អំពីទំហំដើមទុនរបស់ម្ចាស់ក្រុមហ៊ុនក្នុងក្រុមហ៊ុនអាជីវកម្មនោះ។ ឯកសារផ្លូវការមួយចំនួនទៀត ដូចជា កិច្ចព្រមព្រៀងភាពជាដៃគូ និងការចុះបញ្ជីក្រុមហ៊ុន គឺជាភស្តុតាងដែលអាចជឿទុកចិត្តបាន ដើម្បីបញ្ជាក់អំពីទំហំវិនិយោគរបស់អ្នកខ្ចី ទៅក្នុងក្រុមហ៊ុនអាជីវកម្ម។ ជាធម្មតា ធនាគារមានភាពលំបាកក្នុងការវាយតម្លៃក្រុមហ៊ុនដែលមិនបានចុះបញ្ជី ដោយសារតែកង្វះឯកសារដែលអាចជឿទុកចិត្តបាន ដើម្បីវាយតម្លៃសំណើសុំខ្ចី។ នេះជាមូលហេតុនៃការជំរុញ និងការលើកទឹកចិត្ត ឱ្យក្រុមហ៊នអាជីវកម្ម គួរចុះបញ្ចីឱ្យបានត្រឹមត្រូវ ដើម្បីបង្កើនលទ្ធភាពនៃការទទួលបានហិរញ្ញប្បទាន។

ចរិតលក្ខណៈ (CHARACTER)

កត្តាមួយទៀតដែលបញ្ជាក់ពីលទ្ធភាពសងត្រឡប់ គឺចរិតលក្ខណៈរបស់អ្នកខ្ចី។ ជាការកត់សម្គាល់ ធនាគារពិនិត្យមើលប្រវតិ្តឥណទានរបស់អ្នកខ្ចី ដូចជា ប្រវត្តិនៃការសងត្រឡប់ ចំនួនកម្ចី និងទំហំកម្ចីដែលមានស្រាប់ក្នុងពេលបច្ចុប្បន្ន ជាដើម ដើម្បីវាយតម្លៃអំពីភាពជឿទុកចិត្តបានរបស់អ្នកខ្ចី។ បច្ចុប្បន្ន ក្រុមហ៊ុនក្រេឌីត ប្យួរ៉ូ (ខេមបូឌា) កត់ត្រា និងផ្តល់នូវរបាយការណ៏កម្ចីឥណទានរបស់បុគ្គល និងអាជីវកម្ម ដែលអាចគាំទ្រដល់ធនាគារ ក្នុងការវាយតម្លៃអំពីចរិតលក្ខណៈរបស់អ្នកខ្ចី។ យ៉ាងណាក៏ដោយ ក្នុងករណីមានប្រវត្តិឥណទានមិនល្អ អ្នកខ្ចីត្រូវតែពង្រឹងគុណភាពនៃកត្តាផ្សេងៗដូចបានរៀបរាប់ខាងលើ ដើម្បីគួបផ្សំនឹងកត្តាចរិតលក្ខណៈ។ ជាក់ស្តែង ក្នុងអំឡុងពេលនៃវិបត្តិជំងឺកូវីដ-១៩ ក្រុមហ៊ុនអាជីវកម្មជាច្រើនជួបប្រទះនូវបញ្ហាប្រឈម ដែលនាំឱ្យការសងត្រឡប់កម្ចីមានភាពយឺតយ៉ាវ ឬមិនអាចសងត្រឡប់កម្ចីទាំងស្រុងតែម្តង ដែលកត្តានេះជះឥទ្ធិពលអវិជ្ជមាន ដល់កត្តាចរិតលក្ខណៈ និងកត្តាដើមទុនរបស់ក្រុមហ៊ុនអាជីវកម្ម។ ក្នុងករណីនេះ ដើម្បីទទួលបានកម្ចី អ្នកខ្ចីត្រូវ បង្ហាញផែនការអាជីវកម្មដែលសក្តានុពល និងមានភាពច្បាស់លាស់ និងអាចប្រើប្រាស់សេវាធានាឥណទានរបស់ CGCC ដើម្បីបង្កើនគុណភាពនៃកត្តាទ្រព្យបញ្ចាំ។

ដូចបានរៀបរាប់ពីខាងលើលក្ខណៈវិនិច្ឆ័យទំាងប្រាំ (5Cs) ដែលរួមមាន លក្ខខណ្ឌ (Condition) ទ្រព្យបញ្ចាំ (Collateral) សមត្ថភាព (Capacity) ដើមទុន (Capital) និងចរិតលក្ខណៈ (Character) គឺជាកត្តាសំខាន់ ដែលធនាគារជាទូទៅប្រើប្រាស់ជាមូលដ្ឋានក្នុងការវាយតម្លៃអ្នកខ្ចី មុននឹងអនុម័តកម្ចីណាមួយ។ ដូច្នេះ ការពង្រឹងគុណភាពលក្ខណៈវិនិច្ឆ័យទំាងប្រាំ (5Cs) អាចជួយឱ្យអ្នកខ្ចីមានឱកាសខ្ពស់ជាងមុន ក្នុងការទទួលបានកម្ចីពីធនាគារ។ ក្នុងនោះ របាយការណ៍ហិរញ្ញវត្ថុ និងផែនការអាជីវកម្មដែលមានភាពជឿទុកចិត្តបាន អាចត្រូវបានប្រើប្រាស់ សម្រាប់ការវាយតម្លៃលើលក្ខណៈវិនិច្ឆ័យទំាងប្រាំ ខណៈសេវាធានាឥណទាន អាចជួយបង្កើនគុណភាពនៃកត្តាទ្រព្យបញ្ចាំរបស់ក្រុមហ៊ុនអាជីវកម្ម៕

CGCC គាំទ្រការបណ្តុះចំណេះដឹងហិរញ្ញវត្ថុដល់សហគ្រាសធុនតូចនិងមធ្យម តាមរយៈកម្មវិធីបណ្តុះបណ្តាលស្តីពី “ខ្ញុំមានចំណេះដឹងហិរញ្ញវត្ថុ” វគ្គទី២

Posted on ខែតុលា 17, 2022ខែមិថុនា 1, 2023 by Sorn Chhorvyvatey

កម្មវិធីបណ្តុះបណ្តាលស្តីពី “ខ្ញុំមានចំណេះដឹងហិរញ្ញវត្ថុ” ត្រូវបានរៀបចំឡើងក្រោមកិច្ចផ្តួចផ្តើមពីធនាគារ ស្ថាបនា សហការឧបត្ថម្ភដោយ សហគ្រិនខ្មែរ ក្រុមហ៊ុនធានារ៉ាប់រង Manulife & សាជីវកម្មធានាឥណទានកម្ពុជា (CGCC) ដែលវគ្គទី២នេះធ្វើទ្បើងពីថ្ងៃទី ០៨ – ០៩ & ១៥ – ១៦ ខែតុលា ឆ្នាំ២០២២ ដើម្បីផ្តល់ការបណ្តុះបណ្តាលចំណេះដឹងហិរញ្ញវត្ថុ ដល់សហគ្រាសខ្នាតមីក្រូ តូច និងមធ្យម ជាពិសេសសហគ្រិនស្រ្តី។

សហគ្រិន និងម្ចាស់អាជីវកម្មសរុបជាង៣០រូប បានចូលរួមវគ្គបណ្តុះបណ្តាលវគ្គទី២នេះ ហើយពួកគាត់បានចែករំលែកនូវបទពិសោធន៍ ក៏ដូចជាបញ្ហាពាក់ព័ន្ធលើផ្នែកហិរញ្ញវត្ថុ ហើយពួកគាត់ក៏ទទួលបានឱកាសសិក្សាទៅលើភាពជាសហគ្រិន ការរៀបចំរបាយការណ៍ហិរញ្ញវត្ថុសម្រាប់អាជីវកម្ម ការសិក្សាលើកម្ចីឥណទានជាមួយធនាគារ និងជ្រើសរើសកម្ចីដែលស័ក្ដិសមសម្រាប់អាជីវកម្ម ។

កម្មវិធីបណ្តុះបណ្តាល “ខ្ញុំមានចំណេះដឹងហិរញ្ញវត្ថុ” ត្រូវបានបង្កើតឡើងយ៉ាងពិសេស ដើម្បីផ្តល់នូវជំនាញ និងបទពិសោធន៍ជាក់ស្តែងទាក់ទងទៅនឹងចំណេះដឹងហិរញ្ញវត្ថុ និងជំនាញគ្រប់គ្រងអាជីវកម្ម ក៏ដូចជាការទទួលបាននូវបណ្តាញពាណិជ្ជកម្មដែលអាចជំរុញដល់ការរីកចម្រើនអាជីវកម្មរបស់សហគ្រិន។

CGCC គាំទ្រការបណ្តុះចំណេះដឹងហិរញ្ញវត្ថុដល់សហគ្រាសធុនតូចនិងមធ្យម តាមរយៈកម្មវិធីបណ្តុះបណ្តាលស្តីពី “ខ្ញុំមានចំណេះដឹងហិរញ្ញវត្ថុ” វគ្គទី២

CGCC និង ធនាគារមេយប៊ែង សហការរៀបចំ “កម្មវិធីកសាងសមត្ថភាព និងជំនាញសម្រាប់សហគ្រាស់ធុនតូច និងមធ្យម”

Posted on ខែកញ្ញា 19, 2022ខែមិថុនា 7, 2023 by Sorn Chhorvyvatey

ថ្ងៃទី១៧ ខែកញ្ញា ឆ្នាំ២០២២ សាជីវកម្មធានាឥណទានកម្ពុជា (CGCC) និង ធនាគារមេយប៊ែង ខេមបូឌា បានសហការរៀបចំ កម្មវិធីកសាងសមត្ថភាព និងជំនាញសម្រាប់សហគ្រាស់ធុនតូច និងមធ្យម ក្រោមការចូលរួមពីសហគ្រិនជាង៥០រូប ដែលសុទ្ធសឹងតែជាម្ចាស់សហគ្រាសធុនតូចនិងមធ្យម នៅឯអគារមេយប៊ែង ថៅវើ ដើម្បីផ្តល់ជូននូវការគាំទ្រ និងការផ្តល់ប្រឹក្សាបច្ចេកទេសដោយផ្អែកលើការអនុវត្តអន្តរជាតិដ៏ល្អបំផុត ដើម្បីជួយគាំទ្រដល់រីកចម្រើន ផលិតភាពការងារ និងភាពច្នៃប្រឌិត ក៏ដូចជាការពង្រឹងការប្រកួតប្រជែងរបស់សហគ្រាសធុនតូច និងមធ្យម។

កម្មវិធីនេះ ទទួលបាននូវមតិស្វាគមន៍ពីសំណាក់ លោក ណូ លីដា អគ្គនាយករង CGCC និងបើកកម្មវិធីដោយលោក ឌុក សារ៉ាក់ នាយកនាយកដ្ឋានសេវាកម្មហិរញ្ញវត្ថុសហគមន៍នៃធនាគារមេយប៊ែង។ សហគ្រាសធុនតូចនិងមធ្យម ដែលបានអញ្ជើញចូលរួមកម្មវិធីនេះ បានទទួលនូវឱកាសស្វែងយល់លើប្រធានបទ “ការចុះបញ្ជីពាណិជ្ជកម្មនៅក្នុងប្រទេសកម្ពុជា” ដោយសហការីជាន់ខ្ពស់នៃការិយាល័យមេធាវី សុក ស៊ីផាន់ណានិងសហការី និងការចែករំលែកលើប្រធានបទ “គោលការណ៍នៃការគ្រប់គ្រងហិរញ្ញវត្ថុសម្រាប់សហគ្រាសធុនតូច និងមធ្យម” ដោយវាគ្មិនអញ្ជើញមកពីក្រុមហ៊ុន អាខ្លែម ខេមបូឌា និងបទបង្ហាញស្តីពី “ការទទួលជំនួយផ្នែកហិរញ្ញវត្ថុនិងគម្រោងធានាឥណទាន” ដោយធនាគារមេយប៊ែងខេមបូឌា។

CGCC និង ធនាគារមេយប៊ែង សហការរៀបចំ “កម្មវិធីកសាងសមត្ថភាព និងជំនាញសម្រាប់សហគ្រាស់ធុនតូច និងមធ្យម”

គួរបញ្ជាក់ផងដែរថា កាលពីខែវិច្ឆិកា ឆ្នាំ២០២១ កន្លងទៅ បន្ថែមពីលើការចុះកិច្ចព្រមព្រៀងភាពជាដៃគូលើការធានាឥណទាន CGCC និងធនាគារមេយប៊ែង ក៏បានសហការរៀបចំនូវវេទិកាធុរកិច្ចស្តីពីការលើកស្ទួយការរីកចម្រើនរបស់សហគ្រាសធុនតូចនិងមធ្យម ដើម្បីពិភាក្សាស៊ីជម្រៅបន្ថែមពីលើលទ្ធភាពនៃកិច្ចសហការដែល CGCC និង ធនាគារមេយប៊ែង អាចគាំទ្រដល់ការរីកចម្រើនយូរអង្វែងរបស់សហគ្រាសធុនតូចនិងមធ្យម ទៅលើសមត្ថភាពនិងជំនាញចំណេះដឹងហិរញ្ញវត្ថុ និងការទទួលបានជំនួយហិរញ្ញវត្ថុសម្រាប់ការអភិវឌ្ឍអាជីវកម្មឆ្លើយតបទៅនឹងបញ្ហាខ្វះទ្រព្យបញ្ចាំ។

CGCC គាំទ្រការបណ្តុះចំណេះដឹងហិរញ្ញវត្ថុដល់សហគ្រាសធុនតូចនិងមធ្យម តាមរយៈកម្មវិធីបណ្តុះបណ្តាលស្តីពី “ខ្ញុំមានចំណេះដឹងហិរញ្ញវត្ថុ” វគ្គទី១

Posted on ខែកញ្ញា 12, 2022ខែមិថុនា 7, 2023 by Sorn Chhorvyvatey

កម្មវិធីបណ្តុះបណ្តាលស្តីពី “ខ្ញុំមានចំណេះដឹងហិរញ្ញវត្ថុ” ត្រូវបានរៀបចំឡើងក្រោមកិច្ចផ្តួចផ្តើមពីធនាគារ ស្ថាបនា សហការឧបត្ថម្ភដោយ សហគ្រិនខ្មែរ ក្រុមហ៊ុនធានារ៉ាប់រង Manulife & សាជីវកម្មធានាឥណទានកម្ពុជា (CGCC) ដែលវគ្គដំបូងនេះធ្វើទ្បើងពីថ្ងៃទី 3-4 & 10-11 កញ្ញា ឆ្នាំ2022 ដើម្បីផ្តល់ការបណ្តុះបណ្តាលចំណេះដឹងហិរញ្ញវត្ថុ ដល់សហគ្រាសខ្នាតមីក្រូ តូច និងមធ្យម ជាពិសេសសហគ្រិនស្រ្តី។

សហគ្រិន និងម្ចាស់អាជីវកម្មសរុបជាង៣០រូប បានចូលរួមវគ្គបណ្តុះបណ្តាលវគ្គដំបូងនេះ ហើយពួកគាត់បានចែករំលែកនូវបទពិសោធន៍ ក៏ដូចជាបញ្ហាពាក់ព័ន្ធលើផ្នែកហិរញ្ញវត្ថុ ហើយពួកគាត់ក៏ទទួលបានឱកាសសិក្សាទៅលើភាពជាសហគ្រិន ការរៀបចំរបាយការណ៍ហិរញ្ញវត្ថុសម្រាប់អាជីវកម្ម ការសិក្សាលើកម្ចីឥណទានជាមួយធនាគារ និងជ្រើសរើសកម្ចីដែលស័ក្ដិសមសម្រាប់អាជីវកម្ម ។

CGCC គាំទ្រការបណ្តុះចំណេះដឹងហិរញ្ញវត្ថុដល់សហគ្រាសធុនតូចនិងមធ្យម តាមរយៈកម្មវិធីបណ្តុះបណ្តាលស្តីពី “ខ្ញុំមានចំណេះដឹងហិរញ្ញវត្ថុ” វគ្គទី១ — CGCC supports the accelerating SMEs’ Financial Literacy through the “I’m Financially Literate Program” first cohort

CGCC supports the accelerating SMEs’ Financial Literacy through the “I’m Financially Literate Program” first cohort

Click here to read more about: CGCC គាំទ្រការបណ្តុះចំណេះដឹងហិរញ្ញវត្ថុដល់សហគ្រាសធុនតូចនិងមធ្យម តាមរយៈកម្មវិធីបណ្តុះបណ្តាលស្តីពី “ខ្ញុំមានចំណេះដឹងហិរញ្ញវត្ថុ” វគ្គទី២

កិច្ចពិភាក្សាស្វែងយល់ និងពង្រឹងកិច្ចសហការលើការធានាឥណទានរវាង CGCC និងគ្រឹះស្ថានហិរញ្ញវត្ថុចូលរួម សាខាខេត្តកំពង់ស្ពឺ ខេត្តព្រះសីហនុ និង កំពត

Posted on ខែកញ្ញា 6, 2022ខែមិថុនា 7, 2023 by Sorn Chhorvyvatey

កាលពីថ្ងៃទី២៩ ខែសីហា ដល់ថ្ងៃទី០២ ខែកញ្ញា ឆ្នាំ២០២២ សាជីវកម្មធានាឥណទានកម្ពុជា (CGCC) ដឹកនាំដោយ លោក ណូ លីដា អគ្គនាយករង បានជួបពិភាក្សាស្វែងយល់អំពីការអនុវត្តគម្រោងធានាឥណទាន និងផ្សព្វផ្សាយបន្ថែមអំពីគម្រោងធានាឥណទានរបស់ CGCC ដោយផ្ទាល់ជាមួយថ្នាក់ដឹកនាំ និងបុគ្គលិករបស់សាខានៃគ្រឹះស្ថានហិរញ្ញវត្ថុចូលរួម (PFIs) មួយចំនួនរបស់ CGCC នៅខេត្តកំពង់ស្ពឺ រួមមាន ធនាគារកាណាឌីយ៉ា និងគ្រឹះស្ថានមីក្រូហិរញ្ញវត្ថុអេអឹមខេ, នៅខេត្តព្រះសីហនុ រួមមាន ធនាគារ ABA គ្រឹះស្ថានមីក្រូហិរញ្ញវត្ថុអិលអូអិលស៊ី ធនាគារស្ថាបនា ធនាគារកាណាឌីយ៉ា គ្រឹះស្ថានមីក្រូហិរញ្ញវត្ថុអេអឹមខេ និងធនាគារអេស៊ីលីដា , និងនៅខេត្តកំពតរួមមាន ធនាគារ ABA ធនាគារអេស៊ីលីដា គ្រឹះស្ថានហិរញ្ញវត្ថុអេអឹមខេ និងគ្រឹះស្ថានមីក្រូហិរញ្ញវត្ថុអិលអូអិលស៊ី។

កិច្ចពិភាក្សាជាមួយ PFIs របស់ CGCC នៅខេត្តទាំងបី ដែលជាខេត្តមានសក្តានុពលវិស័យទេសចរណ៍ គឺជាឱកាសមួយដ៏ពិសេសសម្រាប់ទាំង CGCC និង PFIs ស្វែងយល់អំពីភាពចាំបាច់នៃការធានាឥណទាន និងឱកាសដែល PFIs អាចបង្កើនការផ្តល់កម្ចីជូនទៅដល់ក្រុមហ៊ុនអាជីវកម្ម ដែលមានតម្រូវការកម្ចីតែខ្វះទ្រព្យបញ្ចាំ ជាពិសេសដើម្បីផ្សព្វផ្សាយអំពីគម្រោងធានាឥណទានសម្រាប់សហហិរញ្ញប្បទានសម្រាប់វិស័យទេសចរណ៍របស់ CGCC ដែលទើបនឹងដាក់ចេញនាពេលថ្មីៗនេះផងដែរ។

តាមរយៈកិច្ចពិភាក្សាដោយផ្ទាល់ជាមួយ PFIs របស់ CGCC នៅបណ្តាខេត្តទាំងបីនេះ CGCC បានស្វែងយល់អំពីស្ថានភាពនៃការអនុវត្តគម្រោងធានាឥណទាន នៅតាមបណ្តាខេត្ត រួមទាំងមតិយោបល់ដ៏មានសារៈសំខាន់នានាទៅលើគម្រោងធានាឥណទានរបស់ CGCC។ CGCC និង PFIs នឹងបន្តបង្កើនការសហការលើការផ្តល់កម្ចីដែលមានការធានាជូនដល់ក្រុមហ៊ុនអាជីវកម្ម ដែលមានតម្រូវការកម្ចីសម្រាប់អភិវឌ្ឍអាជីវកម្ម តែប្រឈមនឹងបញ្ហាខ្វះទ្រព្យបញ្ចាំ។

សិក្ខាសាលាផ្សព្វផ្សាយ ស្តីពី “កម្ចីដែលមានការធានា ដើម្បីគាំទ្រដល់ការអភិវឌ្ឍសហគ្រាសធុនតូច និងមធ្យម ក្នុងវិស័យទេសចរណ៍”

Posted on ខែកញ្ញា 2, 2022ខែមិថុនា 7, 2023 by Sorn Chhorvyvatey

នាថ្ងៃទី០១ ខែកញ្ញា ឆ្នាំ២០២២ ក្រសួងសេដ្ឋកិច្ច និងហិរញ្ញវត្ថុ និងសាជីវកម្មធានាឥណទានកម្ពុជា (CGCC) បានរៀបចំសិក្ខាសាលាផ្សព្វផ្សាយស្តីពី “កម្ចីដែលមានការធានា ដើម្បីគាំទ្រដល់ការអភិវឌ្ឍសហគ្រាសធុនតូច និងមធ្យម ក្នុងវិស័យទេសចរណ៍” នៅឯខេត្តកំពត ក្រោមកិច្ចសហការពីក្រសួងទេសចរណ៍ តាមរយៈមន្ទីរទេសចរណ៍ខេត្តកំពត និង ធនាគារសហគ្រាសធុនតូចនិងមធ្យមកម្ពុជា (SME Bank) និងមានការចូលរួមពីសំណាក់បណ្តាសហគ្រិនដែលជាម្ចាស់អាជីវកម្មក្នុងវិស័យទេសចរណ៍ នៅក្នុងខេត្តកំពត ជាង៥០នាក់។

សិក្ខាសាលាផ្សព្វផ្សាយនេះ ទទួលបានការអញ្ជើញចូលរួមជាអធិបតីដោយ លោកស្រី ជិន សុភះឡា អនុប្រធានមន្ទីរទេសចរណ៍ខេត្តកំពត លោក ណូ លីដា អគ្គនាយករង CGCC និងលោក នៀវ សុគន្ធ នាយកប្រតិបត្តិ ប្រតិបត្តិការ SME Bank។

Dissemination Seminar on “Guaranteed Loans to support SMEs Development in Tourism Sector”

តាមរយៈសិក្ខាសាលាផ្សព្វផ្សាយនេះ សហគ្រិនដែលមានអាជីវកម្មនៅក្នុងវិស័យទេសចរណ៍ រួមមានរីសត សណ្ឋាគារ ផ្ទះសំណាក់ និងភោជនីយដ្ឋាន ល។ល បានជ្រាបអំពីព័ត៌មាននៃអត្ថប្រយោជន៍ពីកម្ចីដែលមានការធានា ឆ្លើយតបនឹងបញ្ហាខ្វះទ្រព្យបញ្ចាំពេលស្នើសុំកម្ចី សម្រាប់យកទៅកែលម្អ និងស្តារអាជីវកម្មរបស់ខ្លួនរង់ចាំទទួលភ្ញៀវទេសចរ បន្ទាប់ពីសហគ្រាសជាច្រើនក្នុងវិស័យនេះបានរងការប៉ះពាល់ពីវិបត្តិកូវីដ១៩ នារយៈកាលកន្លងទៅ។

ជាមួយគ្នានេះ សហគ្រិនក៏បានស្វែងយល់លម្អិតអំពីយន្តការរបស់រាជរដ្ឋាភិបាលដែលបាននិងកំពុងបន្តផ្តល់ការគាំទ្រផ្នែកហិរញ្ញប្បទាន ក្នុងលក្ខខណ្ឌអនុគ្រោះ លើការប្រាក់ តាមរយៈ SME Bank និងលើទ្រព្យបញ្ចាំ តាមរយៈ CGCC ដែលជារួម សហគ្រិនអាចស្វែងរកកម្ចីដែលមានការធានា សម្រាប់អាជីវកម្មក្នុងវិស័យទេសចរណ៍របស់ខ្លួននេះ តាមរយៈ “គម្រោងធានាឥណទានសម្រាប់សហិរញ្ញប្បទាន សម្រាប់វិស័យទេសចរណ៍” របស់ CGCC ដែលផ្តល់ការធានាឥណទានលើកម្ចីអាជីវកម្មដែលខ្វះទ្រព្យបញ្ចាំ ក្នុងវិស័យទេសចរណ៍ តាមរយៈគម្រោងសហហិរញ្ញប្បទានស្តារ និងជំរុញកំណើនក្នុងវិស័យទេសចរណ៍ របស់ SME Bank។

ព័ត៌មានលម្អិតអំពីគម្រោងធានាឥណទានសម្រាប់សហហិរញ្ញប្បទាន សម្រាប់វិស័យទេសចរណ៍ សូមចុចទីនេះ៖ គម្រោងធានាឥណទានសម្រាប់សហហិរញ្ញប្បទាន សម្រាប់វិស័យទេសចរណ៍

CGCC ចែករំលែកពីមគ្គុទេសក៏ នៃលទ្ធភាពទទួលបានកម្ចីដែលមានការធានា ដល់សហគ្រិនស្រ្តី

Posted on ខែមិថុនា 16, 2022ខែមិថុនា 20, 2023 by Sorn Chhorvyvatey

នាព្រឹកថ្ងៃទី១៦ ខែមិថុនា ឆ្នាំ២០២២ លោក Wong Keet Loong អគ្គនាយកសាជីវកម្មធានាឥណទានកម្ពុជា (CGCC) បានចូលរួមជាវាគ្មិនកិត្តិយសមួយរូបនៅក្នុងវេទិកាសហគ្រិនស្ត្រីស្តីពី “លទ្ធភាពទទួលបានហិរញ្ញប្បទាន និងទីផ្សារក្នុងការអភិវឌ្ឍន៍អាជីវកម្មរបស់ស្រ្តី” ដែលលោកបានចែករំលែកអំពីកិច្ចចូលរួមរបស់ CGCC លើការគាំទ្រដល់ការទទួលបានកម្ចី និងបរិយាបន្នហិរញ្ញវត្ថុសម្រាប់សហគ្រិនស្រ្តី ជាពិសេសលើកម្ចីដែលខ្វះទ្រព្យធានា។

នៅក្នុងវេទិកាពិភាក្សាស្តីពី “ការចែករំលែកពីមគ្គុទេសក៏នៃលទ្ធភាពទទួលបានហិរញ្ញប្បទានដល់សហគ្រិនស្រ្តីវ័យក្មេង” លោកអគ្គនាយកបានគូសបញ្ជាក់អំពីភាពចាំបាច់នៃការធានាឥណទាន ដែលដើរតួជាផ្នែកមួយនៃទ្រព្យបញ្ចាំ ដើម្បីអាចសម្រួលឱ្យអាជីវកម្ម ជាពិសេសអាជីវកម្មដែលគ្រប់គ្រងដោយស្រ្តី បានទទួលកម្ចីងាយស្រួល និងច្រើនជាងមុន ពីគ្រឹះស្ថានហិរញ្ញវត្ថុដៃគូ។ យន្តការនេះគឺជាយន្តការគាំទ្ររបស់រាជរដ្ឋាភិបាលកម្ពុជា បន្ថែមពីលើកិច្ចអន្តរាគមន៍នានា ដែលផ្តល់នូវលក្ខខណ្ឌអនុគ្រោះជាច្រើន ក្នុងការជំរុញឱ្យអាជីវកម្មដែលគ្រប់គ្រងដោយស្រ្តី យមានលទ្ធភាពទទួលបានកម្ចីផ្លូវការ យកទៅប្រើប្រាស់ជាទុនបង្វិល និងពង្រីកអាជីវកម្ម ដោយយើងបានឃើញហើយថា អាជីវកម្មដែលគ្រប់គ្រងដោយស្រ្តីមានចំណែករហូតដល់៦១%នៃអាជីវកម្មសរុបទូទាំងប្រទេសកម្ពុជ។

CGCC ចែករំលែកពីមគ្គុទេសក៏ នៃលទ្ធភាពទទួលបានកម្ចីដែលមានការធានា ដល់សហគ្រិនស្រ្តី

ជាមួយគ្នានេះផងដែរ បន្ថែមពីលើកិច្ចចូលរួមរបស់ស្ថាប័នពាក់ព័ន្ធ លោកអគ្គនាយកក៏បានលើកទឹកចិត្តដល់សហគ្រិនស្រ្តីឱ្យមានការរៀបចំត្រៀមខ្លួន ដើម្បីឱ្យសមស្របទៅនឹងលក្ខខណ្ឌនៃការទទួលបានហិរញ្ញប្បទានដែលមានភាពអនុគ្រោះទាំងនោះ។ ចំពោះការធានាឥណទាន ដែលដើរតួជាផ្នែកមួយនៃទ្រព្យបញ្ចាំលើកម្ចីអាជីវកម្មតាមរយៈគ្រឹះស្ថានហិរញ្ញវត្ថុចូលរួមរបស់ CGCC សហគ្រិនស្រ្តីគ្រប់រូបសុទ្ធតែមានឱកាសក្នុងការទទួលបាន ដោយតោងទាមចាប់ផ្តើមពីការស្វែងរកព័ត៌មានជំនួយហិរញ្ញវត្ថុពី CGCC និងជាពិសេសពីធនាគារ ឬគ្រឹះស្ថានមីក្រូហិរញ្ញវត្ថុទាំង២៣ ដែលជាដៃគូរបស់ CGCC។

គួរបញ្ជាក់ផងដែរថា វេទិកាសហគ្រិនស្រ្តីថ្ងៃនេះ ត្រូវបានរៀបចំឡើងដោយមានអ្នកចូលរួមជិត២០០នាក់ រួមមានទាំងស្រ្តី និងសហគ្រិនស្រ្តី ដែលវេទិកាមួយនេះផ្តល់នូវឱកាសដល់សហគ្រិនស្រ្តីយល់ដឹងពីវិធីសាស្រ្តទទួលបានហិរញ្ញប្បទាន ចំណេះដឹង និងព័ត៌មានហិរញ្ញវត្ថុ ការគ្រប់គ្រងហិរញ្ញវត្ថុ និងធនធានហិរញ្ញវត្ថុផ្សេងទៀត។ CGCC ក៏បានដាក់ចេញនូវគម្រោងធានាឥណទានសម្រាប់សហគ្រិនស្រ្តី កាលពីខែមេសា ឆ្នាំ២០២២ ដើម្បីបន្ថែមការគាំទ្រ ក្នុងលក្ខខណ្ឌអនុគ្រោះ និងពិសេសៗជាច្រើនដល់សហគ្រិនស្រ្តី។ សហគ្រិនស្រ្តីអាចស្វែងរកព័ត៌មានអំពីគម្រោងនេះបានតាមរយៈដំណរភ្ជាប់នេះ៖ https://bit.ly/3LnKlFU

Click here to read about: Courtesy visit by CGCC to NBC to discuss expanding more support to improve financial inclusion

CGCC ផ្តល់ការធានាឥណទានជាង ៤០០ ដែលមានទំហំទឹកប្រាក់ជាង ៤៥,៥ លានដុល្លារ

Posted on ខែមិថុនា 9, 2022ខែមិថុនា 20, 2023 by Sorn Chhorvyvatey

សាជីវកម្មធានាឥណទានកម្ពុជា (CGCC) បានផ្តល់ការធានាឥណទានដល់ ៤៤៨ ក្រុមហ៊ុនអាជីវកម្ម គិតត្រឹមថ្ងៃទី ៣១ ខែឧសភា ឆ្នាំ ២០២២ ដែលគិតជាទឹកប្រាក់ ៤៥,៥ លានដុល្លារក្នុងនោះអាជីវកម្មខ្នាតតូច និងមធ្យម (SME) មានចំនួន ៤៣១ ក្រុមហ៊ុន។ នេះបើតាមព្រឹត្តិបត្ររបស់សាជីវកម្មធានាឥណទានកម្ពុជា។

ទិន្នន័យបង្ហាញថា ឥណទានដែលត្រូវធានាដោយ CGCC មាន ៤៤៨ ក្រុមហ៊ុនអាជីវកម្មដែលស្មើនឹងទឹកប្រាក់សរុប ៤៥,៥ លានដុល្លារក្នុងនោះប្រភេទអាជីវកម្មខ្នាតតូច និងមធ្យមមានចំនួន ៤៣១ និងខ្នាតធំ ១៧។ ដោយឡែកក្នុងចំណោម ៤៤៨ ក្រុមហ៊ុនអាជីវកម្មគឺមានក្រុមហ៊ុនគ្រប់គ្រងដោយស្ត្រី ១៣៨ ។

សេវាធានាឥណទានកម្ពុជា គឺផ្តល់ការធានាឥណទានលើកម្ចីដែលផ្តល់ឱ្យអាជីវកម្ម ដើម្បីចែករំលែកហានិភ័យជាមួយស្ថាប័នផ្តល់កម្ចី និងបង្កើនបរិយាប័ន្នហិរញ្ញវត្ថុ។ បច្ចុប្បន្ននេះ CGCC ផ្តល់ការធានាឥណទានលើកម្ចីបញ្ចេញដោយធនាគារ និងគ្រឹះស្ថានមីក្រូហិរញ្ញវត្ថុ (PFIs) របស់ CGCC ទៅកាន់អ្នកស្នើសុំកម្ចី ក្រោមគម្រោងធានាឥណទានដែលបានដាក់ចេញដោយ CGCC។

លោក ណូ លីដា អគ្គនាយករងសាជីវកម្មធានាឥណទានកម្ពុជាបានលើកឡើងថា៖ «ការបង្រួមគម្លាតតម្រូវការ និងការផ្គត់ផ្គង់ឥណទានដើម្បីគាំទ្រដល់កំណើនសេដ្ឋកិច្ច គឺដើម្បីចែករំលែកហានិភ័យជាមួយនឹងស្ថាប័នផ្តល់កម្ចី និងបង្កើនបរិយាប័ន្នហិរញ្ញវត្ថុ»។

លោកលើកឡើងថា ដើម្បីចាប់យកអត្ថប្រយោជន៍ពីការធានាឥណទាន ក្រុមហ៊ុនអាជីវកម្មត្រូវត្រៀមខ្លួនឱ្យបានរួចរាល់ ដើម្បីស្នើសុំទៅ PFIs ជាមុន។

អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ភ្នំពេញប៉ុស្តិ៍នាថ្ងៃទី ៥ ខែមិថុនាថា ការផ្តល់ និងការទទួលបាននូវឥណទានមួយដែលមានការធានាត្រឹមត្រូវតាមផ្លូវច្បាប់បានដើរតួនាទីយ៉ាងសំខាន់ក្នុងការរក្សាលំនឹងសេដ្ឋកិច្ចឱ្យមានដំណើរការទៅមុខដោយរលូន ជាពិសេសក្នុងដំណាក់កាលដ៏លំបាកនៃវិបត្តិបណ្តាលមកពីជំងឺកូវីដ ១៩។

លោកបន្តថា នៅពេលវិស័យហិរញ្ញវត្ថុមានស្ថិរភាពល្អ ការបញ្ចេញទុនវិនិយោគ និងការបង្កើតឱកាសការងារថ្មីៗក៏មានច្រើនដែរ។ ម្យ៉ាងទៀតនៅពេលសហគ្រាសធុនតូច និងមធ្យម មានទុនគ្រប់គ្រាន់វាក៏ជួយឱ្យដំណើរការផលិតកម្មមានកាន់តែច្រើន និងជួយកាត់បន្ថយការនាំចូលពីបរទេស និងបង្កើនការនាំចេញផងដែរ។

លោកថ្លែងថា៖ «ការផ្តល់ការធានាឥណទានបានជួយទាំងស្ថាប័នផ្តល់កម្ចី និងអ្នកទទួលកម្ចី (ម្ចាស់អាជីវកម្ម) ឱ្យមានទំនុកចិត្តរៀងៗខ្លួន ព្រោះមុននឹងហ៊ានធានា CGCC តែងតែមានលក្ខខណ្ឌ និងធ្វើការសិក្សាទៅលើប្រភេទអាជីវកម្ម ឬផលរបររបស់អ្នកស្នើឱ្យបានច្បាស់ជាមុនសិន»។

កាលពីខែកញ្ញា ឆ្នាំ ២០២១ សាជីវកម្មធានាឥណទានកម្ពុជាបានដាក់ឱ្យដំណើរការ គម្រោងធានាឥណទានសម្រាប់សហហិរញ្ញប្បទាន (CFGS) ដែលត្រូវបានបង្កើតឡើងជាពិសេសសម្រាប់កម្ចីដែលបញ្ចេញក្រោម គម្រោងសហហិរញ្ញប្បទានទ្រទ្រង់សហគ្រាសធុនតូច និងមធ្យមជំហានទី ២ (SCFS II) របស់ធនាគារសហគ្រាសធុន-តូច និងមធ្យមកម្ពុជា៕

អត្ថបទដកស្រង់ពី៖ ភ្នំពេញប៉ុស្តិ៍ ចុះផ្សាយថ្ងៃទី០៦ ខែមិថុនា ឆ្នាំ២០២២

Click here to read about: CGCC recommends ways to Access to Guaranteed Loans

កិច្ចប្រជុំក្រុមប្រឹក្សាភិបាល សាជីវកម្មធានាឥណទានកម្ពុជា អាណត្តិទី១ លើកទី៨

Posted on ខែមីនា 17, 2022ខែតុលា 23, 2023 by Sorn Chhorvyvatey

នាថ្ងៃពុធ ទី១៦ ខែមីនា ឆ្នាំ២០២២ សាជីវកម្មធានាឥណទានកម្ពុជា (ស.ធ.ក.) បានរៀបចំកិច្ចប្រជុំក្រុមប្រឹក្សាភិបាលអាណត្តិទី១ លើកទី៨ ក្រោមវត្តមានដ៏ខ្ពង់ខ្ពស់របស់ ឯកឧត្តម រស់ សីលវ៉ា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាភិបាលរបស់ស.ធ.ក. និងការចូលរួមពីសំណាក់ សមាជិកក្រុមប្រឹក្សាភិបាល ទាំងអស់របស់ ស.ធ.ក.។

កិច្ចប្រជុំក្រុមប្រឹក្សាភិបាល សាជីវកម្មធានាឥណទានកម្ពុជា អាណត្តិទី១ លើកទី៨

របៀបវារៈនៃកិច្ចប្រជុំក្រុមប្រឹក្សាភិបាលលើកទី៨នេះ រួមមាន (១) របាយការណ៍ស្តីពីវឌ្ឍនភាពការងាររបស់ ស.ធ.ក. , (២) ការអនុម័តលើគម្រោងធានាឥណទានសម្រាប់សហគ្រិនស្រ្តី, (៣) របាយការណ៍ហិរញ្ញវត្ថុដែលបានធ្វើសវនកម្មឆ្នាំ២០២១, (៤) កិច្ចសន្យាជួលការិយាល័យថ្មីរបស់ ស.ធ.ក. , (៥) វិសោធនកម្មឯកសារណែនាំអំពីអត្ថប្រយោជន៍បុគ្គលិក , (៦) ប្រាក់រង្វាន់ និងប្រាក់ខែបុគ្គលិក, (៧) ការអនុម័តលើគោលនយោបាយស្តីពីបច្ចេកវិទ្យាព័ត៌មានវិទ្យា, និង (៨) ផ្សេងៗ រួមមាន ការធានាឥណទានលើការបោះផ្សាយសញ្ញាបណ្ណ។

កិច្ចប្រជុំក្រុមប្រឹក្សាភិបាលរបស់ ស.ធ.ក. តែងតែត្រូវបានរៀបចំឡើងជាទៀងទាត់ ដើម្បីពិនិត្យ វាយតម្លៃ និងផ្តល់អនុសាសន៍ ក៏ដូចជាផ្តល់ការសម្រេចនានា ទៅលើសកម្មភាពការងារ ជាពិសេសទៅលើគម្រោងធានាឥណនារបស់ ស.ធ.ក. ដែលបាន និងកំពុងអនុវត្ត ដើម្បីធានានូវតម្លាភាព និងប្រសិទ្ធភាពរបស់ ស.ធ.ក.។

Click here to read about: 9th Board of Directors Meeting of Credit Guarantee Corporation of Cambodia (CGCC)

Tag: ការធានាឥណទាន