បរិយាបន្នហិរញ្ញវត្ថុ Archives - Page 4 of 5

សាជីវកម្មធានាឥណទានកម្ពុជា និង ធនាគារអូរៀនថល ប្រកាសនូវភាពជាដៃគូ ក្នុងការផ្តល់កម្ចីដែលមានការធានា ដល់អាជីវកម្មដែលខ្វះទ្រព្យធានា

Posted on ខែមីនា 28, 2023ខែកុម្ភៈ 7, 2024 by Sorn Chhorvyvatey

(ភ្នំពេញ ថ្ងៃទី២៧ ខែមីនា ឆ្នាំ២០២៣)៖ សាជីវកម្មធានាឥណទានកម្ពុជា (CGCC) និងធនាគារ អូរៀន ថល ម.ក បានប្រកាសជាផ្លូវការនូវភាពជាដៃគូ លើកិច្ចព្រមព្រៀងធានាឥណទាន ដើម្បីផ្តល់ការធានាលើកម្ចីអាជីវកម្មដែលខ្វះទ្រព្យធានា។ កិច្ចសហការនេះ នឹងផ្តល់ការគាំទ្រផ្នែកហិរញ្ញវត្ថុដ៏ចម្បង សម្រួលដល់អាជីវកម្ម ជាពិសេសសហគ្រាសខ្នាតតូច និងមធ្យម ដែលប្រឈមនឹងបញ្ហាខ្វះទ្រព្យធានាសម្រាប់តម្កល់នៅធនាគារ ដើម្បទទួលបានកម្ចីជាទុនបង្វិល និងពង្រីកអាជីវកម្ម។

CGCC ផ្តោតលើការបង្កើនបរិយាបន្នហិរញ្ញវត្ថុ និងអភិវឌ្ឍសហគ្រាសខ្នាតតូច និងមធ្យម តាមរយៈបេសកកម្មផ្តល់ការធានាឥណទានលើកម្ចីអាជីវកម្ម ដែលផ្តល់ឱ្យតាមរយៈគ្រឹះស្ថានហិរញ្ញវត្ថុចូលរួម សមស្របនឹងធនាគារ អូរៀន ថល ម.ក ក្នុងនាមជាធនាគារពាណិជ្ជមួយដែលមានទស្សនវិស័យស្រដៀងគ្នានឹង CGCC ក្នុងការគាំទ្រក្រុមហ៊ុនអាជីវកម្មតាមរយៈការផ្តល់នូវសេវានិងផលិតផលហិរញ្ញវត្ថុ ដែលមានតម្លៃបន្ថែមដល់អតិថិជន និងសេដ្ឋកិច្ចជាតិ។ កិច្ចសហការរវាង CGCC និង ធនាគារ អូរៀន ថល ម.ក នឹងក្លាយជាកាលានុវត្តភាពមួយផ្តល់លទ្ធភាពដល់សហគ្រិន ជាពិសេសសហគ្រាសខ្នាតតូច និងមធ្យម ក្នុងការទទួលបានកម្ចីដោយមិនចាំបាច់ដាក់ទ្រព្យបញ្ចាំ ឬទ្រព្យបញ្ចាំដែលមានតម្លៃមិនគ្រប់គ្រាន់សម្រាប់ទំហំកម្ចី ដែលភាគច្រើនជាបញ្ហាប្រឈមចម្បងដែលសហគ្រិននៅកម្ពុជាបាននិងកំពុងបន្តជួបប្រទះ។

លោក Wong Keet Loong អគ្គនាយក CGCC បានបង្ហាញការសាទរ និងរីករាយចំពោះភាពជាដៃគូនេះថា៖ “កិច្ចសហការភាពជាដៃគូជាមួយនឹងធនាគារអូរៀនថល នឹងបង្កើនចំនួនគ្រឹះស្ថានហិរញ្ញវត្ថុចូលរួមរបស់ CGCC ក្នុងការផ្តល់កម្ចីដែលមានការធានា សរុបចំនួន២៦ស្ថាប័ន។ ទោះបីជាធនាគារអូរៀនថល ជាធនាគារថ្មីមួយនៅកម្ពុជា តែធនាគារនេះមានថ្នាក់ដឹកនាំដែលមានជំនាញ និងបទពិសោធន៍ផ្នែកធនាគាររហូតដល់ជាង២៥ឆ្នាំនៅកម្ពុជា ជាមួយនឹងការជ្រួតជ្រាបយ៉ាងរឹងមាំពីតម្រូវផ្នែកហិរញ្ញប្បទានរបស់សហគ្រាសធុនតូចនិងមធ្យម”។

លោកអគ្គនាយកក៏បានបន្តទៀតថា ៖ “ក្នុងត្រីមាសដំបូង នៃឆ្នាំ២០២៣នេះ CGCC បានផ្តល់ការធានាឥណទានប្រហាក់ប្រហែល ២៥០ ក្រុមហ៊ុន/អាជីវកម្ម ក្នុងរង្វង់ទឹកប្រាក់ប្រហែល២០លានដុល្លារសហរដ្ឋអាមេរិក។ យើងឃើញថានេះជា ការចាប់ផ្តើមមួយដ៏ល្អសម្រាប់ឆ្នាំនេះ ហើយយើងជឿជាក់ថា របត់មួយនេះនឹងនៅតែបន្តទៅមុខ ដើម្បីគាំទ្រដល់ក្រុមហ៊ុន/អាជីវកម្មក្នុងការទទួលបានកម្ចី”។

CGCC and Oriental Bank Announce Partnership to Provide Guaranteed Loans for businesses lacking collaterals

Datuk Phan Ying Tong នាយកគ្រប់គ្រងរួម/នាយកប្រតិបត្តិ នៃធនាគារអូរៀនថល មានប្រសាសន៍ឱ្យដឹងថា៖ “យើងមានសេចក្តីរំភើបរីករាយក្នុងការធ្វើជាដៃគូជាមួយ CGCC ដើម្បីគាំទ្រដល់សហគ្រាសធុនតូច និងមធ្យមនៅកម្ពុជា។ ភាពជាដៃគូនេះគឺជាព្រឹត្តិការណ៍ដ៏សំខាន់មួយសម្រាប់យើង វាបើកឱកាសថ្មីសម្រាប់យើង ហើយវាបង្ហាញពីការប្តេជ្ញាចិត្តរបស់យើងក្នុងការជំរុញការដាក់បញ្ចូលហិរញ្ញវត្ថុ (Financial inclusion) និងការលើកកម្ពស់កំណើនសេដ្ឋកិច្ចនៅក្នុងប្រទេស។ ការផ្តល់ជូនចុងក្រោយនេះ គឺស្របជាមួយនឹងបេសកកម្មសាជីវកម្មរបស់យើង ដែលនឹងទៅជា ”ធនាគារដែលលើសពីធនាគារធម្មតា”។ យើងខិតខំដើម្បីរីកចម្រើនជាមួយសហគមន៍ និង MSMEs របស់យើង ហើយជួយអតិថិជនតាមគ្រប់មធ្យោបាយដែលយើងអាចធ្វើបាន។ ភាពជាដៃគូជាមួយ CGCC បានអនុញ្ញាតឱ្យសហគ្រាសធុនតូច និងមធ្យមទទួលបាននូវហិរញ្ញប្បទានពីធនាគារ អូរៀន ថល ម.ក ក្នុងអត្រាប្រកួតប្រជែងដោយមិនចាំបាច់មានវត្ថុបញ្ចាំ។ កិច្ចសហការណ៍មួយនេះក៏បញ្ជាក់ជាថ្មីពីការប្តេជ្ញាចិត្តរបស់ធនាគារ អូរៀន ថល ម.ក ក្នុងការគាំទ្រដល់ការអភិវឌ្ឍន៍អាជីវកម្មខ្នាតតូច និងមធ្យម ដែលជាឆ្អឹងខ្នងនៃសេដ្ឋកិច្ចកម្ពុជា”។

ឥឡូវនេះធនាគារ អូរៀន ថល ម.ក បានក្លាយជាស្ថាប័នហិរញ្ញវត្ថុមួយក្នុងចំណោមស្ថាប័នហិរញ្ញវត្ថុដែលចូលរួមចំនួន 26 (PFIs) របស់ CGCC ដែលបានប្តេជ្ញាចិត្តក្នុងការជួយក្រុមហ៊ុនអាជីវកម្មស្របតាមទិសដៅរបស់រដ្ឋាភិបាលក្នុងការគាំទ្រសហគ្រាសធុនតូច និងមធ្យម។ CGCC និងធនាគារ អូរៀន ថល ម.ក មានទំនុកចិត្តថាភាពជាដៃគូនេះនឹងជួយដោះស្រាយគម្លាតហិរញ្ញប្បទានដែលប្រឈមមុខដោយ MSMEs ជាច្រើននៅក្នុងប្រទេសកម្ពុជា និងរួមចំណែកដល់លើកកម្ពស់ និងការអភិវឌ្ឍន៍សេដ្ឋកិច្ចរបស់ប្រទេស។

ក្រោមកិច្ចព្រមព្រៀងធានាឥណទាននេះ ធនាគារអូរៀនថល បានក្លាយជាគ្រឹះស្ថានហិរញ្ញវត្ថុចូលរួម (PFIs) មួយ ក្នុងចំណោម PFIs សរុប២៦ ស្ថាប័នរបស់ CGCC ក្នុងការប្តេជ្ញាចិត្តគាំទ្រដល់ក្រុមហ៊ុនអាជីវកម្មក្នុងការទទួលបានហិរញ្ញប្បទានស្របទៅនឹងយុទ្ធសាស្ត្ររបស់រាជរដ្ឋាភិបាលក្នុងការគាំទ្រ MSMEs តាមរយៈយន្តការធានាឥណទាន។ CGCC និងធនាគារអូរៀនថល ជឿជាក់យ៉ាងមុតមាំថា កិច្ចសហការនេះ នឹងអាចសម្រួលក្នុងការដោះស្រាយគម្លាតហិរញ្ញវត្ថុ ដែលជាបញ្ហាប្រឈមរបស់ MSMEs នៅកម្ពុជា និងចូលរួមចំណែកដល់ការរីកចម្រើន និងការអភិវឌ្ឍសេដ្ឋកិច្ចជាតិ។

អំពី CGCC

CGCC គឺជាសហគ្រាសសាធារណៈដែលបង្កើតឡើងដោយអនុក្រឹត្យរបស់រាជរដ្ឋាភិបាលចុះថ្ងៃទី០១ ខែកញ្ញា ឆ្នាំ២០២០។ CGCC ស្ថិតក្រោមអាណាព្យាបាលបច្ចេកទេសនិងហិរញ្ញវត្ថុពីក្រសួងសេដ្ឋកិច្ចនិងហិរញ្ញវត្ថុ ជាមួយនឹងបេសកកម្មផ្តល់ការធានាឥណទានលើកម្ចីដែលផ្តល់ឱ្យអាជីវកម្ម ដើម្បីចែករំលែកហានិភ័យជាមួយស្ថាប័នផ្តល់កម្ចី និងបង្កើនបរិយាបន្នហិរញ្ញវត្ថុ។

គិតត្រឹមចុងខែកុម្ភៈ ឆ្នាំ២០២៣ CGCC បានផ្តល់ការធានាឥណទាន ដល់ក្រុមហ៊ុន/អាជីវកម្ម សរុបចំនួន ១១៩៥ ក្នុងរង្វង់ទឹកប្រាក់ប្រហាក់ប្រហែល៨៥.៧៣ លានដុល្លារ ដែលក្នុងនោះ ៩៥% នៃចំនួនក្រុមហ៊ុន/អាជីវកម្មដែលទទួលការធានាសរុប បានផ្តល់ជូនទៅសហគ្រាសធុនតូចនិងមធ្យម (SMEs)។

អំពីធនាគារអូរៀនថល

ធនាគារ អូរៀន ថល ម.ក គឺជាធនាគារពាណិជ្ជថ្មី និងរីកចម្រើនយ៉ាងឆាប់រហ័សដែលបើកសម្ភោធជាផ្លូវការនៅថ្ងៃទី២២ ខែកុម្ភៈ ឆ្នាំ២០២២ នឹងបើកសាខាទី៣ របស់ខ្លួននៅដើមខែមេសា ឆ្នាំ២០២៣ ខាងមុននេះ។ ធនាគារ អូរៀន ថល ម.ក មានការយកចិត្តទុកដាក់យ៉ាងខ្លាំងក្នុងការផ្តល់នូវបទពិសោធន៍សេវាកម្មអតិថិជនដ៏ល្អបំផុត មិនត្រឹមតែការផ្តល់សេវាកម្មជាមួយអតិថិជនផ្ទាល់ ប៉ុន្តែក៏ត្រូវបានមើលឃើញផងដែរនៅក្នុងការរចនាដែលផ្តោតលើការផ្តល់សេវាឌីជីថល ដែលធនាគារ អូរៀន ថល ម.ក មានកម្មវិធីធនាគារចល័តរបស់ខ្លួនផ្ទាល់ ។

កិច្ចសហប្រតិបត្តិការនេះនឹងអនុញ្ញាតឱ្យធនាគារ អូរៀន ថល ម.ក ផ្តល់ការគាំទ្រកាន់តែច្រើនដល់សហគ្រាសធុនតូច និងមធ្យម ដោយជួយគាំទ្រអតិថិជនឱ្យទទួលបានជម្រើសហិរញ្ញប្បទានដែលមានតម្លៃសមរម្យ និងបត់បែនដែលអតិថិជនត្រូវការដើម្បីទទួលបានជោគជ័យ។ តាមរយៈការធ្វើដូច្នេះ ធនាគារ អូរៀន ថល ម.ក ក៏កំពុងកំណត់ទីតាំងខ្លួនឯងសម្រាប់ភាពជោគជ័យកាន់តែច្រើនផងដែរ ដោយសារធនាគារនៅតែបន្តរីកចម្រើន និងពង្រីកការផ្តល់អាជីវកម្មរបស់ខ្លួន៕

Click here: ទឹកប្រាក់ជាង ១០០ លានដុល្លារ ត្រូវផ្តល់ដល់ SME តាម CGCC

ទឹកប្រាក់ជាង ១០០ លានដុល្លារ ត្រូវផ្តល់ដល់ SME តាម CGCC

Posted on ខែមីនា 16, 2023ខែឧសភា 26, 2023 by Sorn Chhorvyvatey

សាជីវកម្មធានាឥណទានកម្ពុជា (CGCC) បានផ្តល់ការធានាឥណទានជូនដល់ ១១៥៥ ក្រុមហ៊ុន/អាជីវកម្ម ក្នុងទំហំទឹកប្រាក់កម្ចីចំនួនជិត ១០៥ លានដុល្លារ គិតត្រឹមចុងខែកុម្ភ: ឆ្នាំ ២០២៣ ក្នុងការផ្តល់លទ្ធភាពហិរញ្ញវត្ថុដល់សហគ្រាសធុនតូច និងមធ្យម (SMEs) ដើម្បីបន្តនិរន្តរភាពនិងពង្រីកអាជីវកម្មដែលបានរងផលប៉ះពាល់ពីការរីករាលដាលនៃជំងឺកូវីដ ១៩។

យោងតាមរបាយការណ៍របស់ CGCC ចេញផ្សាយកាលពីថ្ងៃទី ១០ ខែមីនានេះ គិតត្រឹមចុងខែកុម្ភ: ឆ្នាំ ២០២៣ CGCC បានផ្តល់ការធានាឥណទានជូនដល់ ១១៥៥ ក្រុមហ៊ុន/អាជីវកម្ម ក្នុងទំហំទឹកប្រាក់កម្ចីប្រហាក់ប្រហែល ១០៤,៩ លានដុល្លារ។ បើគិតត្រឹមថ្ងៃទី ៣១ ខែមករា សន្និធិឥណទានដែលមានការធានាមានចំនួន ៨១,៦ លានដុល្លារ និងសន្និធិទំហំការធានាឥណទានមានចំនួន ៥៨,៩ លានដុល្លារ។

លោក សុខ វឿង ប្រធានសមាគមមីក្រូហិរញ្ញវត្ថុនៅកម្ពុជាបានថ្លែងប្រាប់ភ្នំពេញប៉ុស្តិ៍នៅថ្ងៃទី ១៣ ខែមីនាថា គម្រោងធានាឥណទាននេះបានដើរ តួនាទីយ៉ាងសំខាន់ក្នុងការផ្តល់លទ្ធភាពដល់សហគ្រាសធុនតូចនិងមធ្យមទទួលបាននូវកម្ចីដោយពុំបាច់មានទ្រព្យធានាដើម្បីយកទៅបន្តនិរន្តរភាពនិងពង្រីកអាជីវកម្មរបស់ពួកគាត់ក្រោយពីទទួលរងពីផលប៉ះពាល់នៃការរីករាលដាលនៃជំងឺកូវីដ ១៩ ជាង ២ ឆ្នាំមកនេះ។

លោកបានថ្លែងថា ជាមួយនឹងកំណើននៃការធានាចំនួន ១ ១៥៥ នេះ ក្នុងនោះ ៨០ ភាគរយគឺផ្តល់ដោយធនាគារពាណិជ្ជ និងចំណែកដែលនៅសល់គឺគ្រឹះស្ថានមីក្រូហិរញ្ញវត្ថុ ដែលជាដៃគូចូលរួមជាមួយគម្រោងធានាឥណទាននេះ។

ប៉ុន្តែសម្រាប់ទឹកប្រាក់នៃទំហំឥណទានដែលមានជិត ១០៥ លានដុល្លារនោះគឺ ប្រមាណ ៩៥ ភាគរយត្រូវផ្តល់ដោយគ្រឹះស្ថានធនាគារ។

លោកបានថ្លែងថា៖ «សម្រាប់ទំហំឥណទានដែលបានផ្តល់នោះគឺយើងបានផ្តល់ភាគច្រើនទៅលើវិស័យអាទិភាពដូចជាវិស័យសេវាកម្ម កសិកម្ម និងផលិតកម្ម ដែលបណ្តាសហគ្រាសខ្នាតតូចនិងមធ្យមទាំងនោះអាចទទួលបានកម្ចីដើម្បីយកទៅពង្រីកអាជីវកម្មរបស់ខ្លួនដោយពុំចាំបាច់មានទ្រព្យធានា»។

លោកបានថ្លែងបញ្ជាក់ទៀតថា៖ «យើងរីករាយក្នុងការចូលរួមជាមួយ CGCC ដោយសារតែហានិភ័យត្រូវបានធានា។ យើងសង្កេតឃើញថាចាប់តាំងពីគម្រោងនេះចាប់ផ្តើមអនុវត្តគឺអត្រាឥណទានដែលខូច នោះមានអត្រាតិចតួចបំផុត ដោយសារតែអាជីវកម្មទាំងនោះគឺសុទ្ធសឹងតែមានសក្តានុពលក្នុងការជំរុញសកម្មភាពសេដ្ឋកិច្ចប៉ុន្តែពួកគេពុំមានទ្រព្យធានា ហេតុដូច្នេះហើយការអនុវត្តគម្រោងធានាឥណទាននេះគឺបានជួយពួកគាត់ច្រើនក្នុងការពង្រីកអាជីវកម្ម។

លោក សុខ វឿង ដែលជាអគ្គនាយករបស់គ្រឹះស្ថានមីក្រូហិរញ្ញវត្ថុ LOLC ផងដែរនោះបានថ្លែងថា ស្ថាប័នរបស់លោកក៏បានផ្តល់កម្ចីប្រមាណជា ២ លានដុល្លារផងដែរ ហើយលោកនឹងធ្វើការពង្រីកឱ្យបានពី ៤ ទៅ ៥ លានដុល្លារសម្រាប់ឆ្នាំ ២០២៣ នេះដើម្បីចូលរួមចំណែកផ្តល់មូលនិធិ បន្ថែមដល់ SMEs។

លោក តូច ចៅចេក ប្រធាននាយកប្រតិបត្តិធនាគារប្រៃសណីយ៍កម្ពុជា បានថ្លែងប្រាប់ភ្នំពេញប៉ុស្តិ៍នៅថ្ងៃទី ១៣ ខែមីនាថា ធនាគាររបស់លោកចូលរួមជាមួយគម្រោងធានាឥណទាននេះមានទឹកប្រាក់ជាង១លានដុល្លាររួចទៅហើយគិតត្រឹមដំណាច់ ឆ្នាំ ២០២២។ លោកបន្ថែមថា ធនាគារលោកនឹងមានគម្រោងក្នុងការពង្រីកឱ្យបានប្រមាណពី ៥ ទៅ ១០ លានដុល្លារក្នុងឆ្នាំ ២០២៣ នេះ។

លោកបានថ្លែងថា៖ «ជាការពិត ណាស់ តាមរយៈគម្រោង CGCC នេះគឺជាគម្រោងមួយល្អសម្រាប់ SMEs ទាំងឡាយដែលពួកគាត់គ្មានទ្រព្យដាក់ធានាគឺអាចស្នើសុំឥណទានតាមគម្រោងនេះគឺពួកគាត់មានឱកាសក្នុងការស្តារ និងពង្រីកអាជីវកម្មរបស់ពួកគាត់ដោយមិនតម្រូវឱ្យមានទ្រព្យធានាទេ»។

«សម្រាប់ឆ្នាំ ២០២៣ នេះយើងចង់ពង្រីកឱ្យធំដោយយើងចង់ពង្រីកទៅអាជីវកម្មផ្សេងៗឱ្យបានច្រើនដោយកាលពីមុនយើងផ្តោតតែទៅលើ SMEs ធំៗដែលមានទ្រព្យធានាដើម្បីពង្រីកអាជីវកម្មរបស់គាត់ ហើយឥឡូវនេះសម្រាប់ SMEs តូចៗដែលត្រូវការសាច់ប្រាក់ដើម្បីពង្រីកអាជីវកម្មរបស់ពួកគាត់ប៉ុន្តែមិនមានទ្រព្យធានាក៏បានដែរដោយយកតាម CGCC ហេតុដូច្នេះហើយបានជាធនាគាររបស់ខ្ញុំនឹងធ្វើការពង្រីកការផ្តល់កម្ចីរបស់យើងតាមរយៈគម្រោង CGCC នេះពី ១ លានដុល្លារ ទៅចន្លោះពី ៥ ទៅ ១០ លានដុល្លារនៅឆ្នាំ ២០២៣ នេះ» នេះបើតាមលោក ចៅចេក៕

ដកស្រង់ពីសារព័ត៌មានភ្នំពេញប៉ុស្តិ៍ ចេញផ្សាយថ្ងៃទី១៤ ខែមីនា ឆ្នាំ២០២៣៖ ទឹកប្រាក់ជាង ១០០ លានដុល្លារ ត្រូវផ្តល់ដល់ SME តាម CGCC

ជួបជាមួយម្ចាស់សិប្បកម្មទូកនេសាទ ដែលទទួលបានកម្ចីមានការធានាពី CGCC ដើម្បីទ្រទ្រង់អាជីវកម្ម និងលើកកម្ពស់ផលិតផលក្នុងស្រុក

Posted on ខែមីនា 15, 2023ខែមិថុនា 20, 2023 by Sorn Chhorvyvatey

អាននិងទាញយកអត្ថបទជា PDF: លោក ហៀង តារា ម្ចាស់អាជីវកម្មទូកនេសាទ KCC ខេត្តកំពង់ឆ្នាំង

ដោយសារតែមើលឃើញពីសក្ដានុពុល និងដើម្បីលើកស្ទួយដល់ផលិតផលខ្មែរ ខ្ញុំបានសម្រេចចិត្តចាប់ផ្តើមសិប្បកម្មផលិតទូក KCC ដែលជា សិប្បកម្មផលិតទូកនៅក្នុងស្រុកដ៏កម្រមួយ នៅក្នុងខេត្តកំពង់ឆ្នាំង នៅក្នុងឆ្នាំ ២០១៤។ ទូក គឺជាយាន្តដ៏សំខាន់សម្រាប់បងប្អូនប្រជាជនខ្មែរ ដែលប្រកបរបរនេសាទ និងស្រែចម្ការជាប់មាត់ទឹក។

ចាប់ពីចាប់ផ្ដើមដំបូងរហូតដល់សព្វថ្ងៃ បញ្ហាប្រឈមសំខាន់របស់ខ្ញុំគឺ កង្វះទុនបង្វិល ដើម្បីពង្រីកអាជីវកម្ម ព្រោះកំណើននៃការបញ្ជាទិញពីអតិថិជន និងដេប៉ូចែកចាយនៅតាមបណ្ដាខេត្តនីមួយៗ មានការកើនឡើងជាលំដាប់។ ដំណោះស្រាយសម្រាប់ខ្ញុំ គឺប្រាក់កម្ចីពីធនាគារ។ ដោយសារតែទ្រព្យធានារបស់ខ្ញុំមិនគ្រប់គ្រាន់សម្រាប់ប្រាក់កម្ចីដែលខ្ញុំបានស្នើសុំ អាជីវកម្មរបស់ខ្ញុំមានការរាំងស្ទះ។

ជួបជាមួយម្ចាស់សិប្បកម្មទូកនេសាទ ដែលទទួលបានកម្ចីមានការធានាពី CGCC ដើម្បីទ្រទ្រង់អាជីវកម្ម និងលើកកម្ពស់ផលិតផលក្នុងស្រុក

ប៉ុន្តែ ដោយសារការធានាឥណទានពី CGCC ខ្ញុំក៏ទទួលបានកម្ចីអាជីវកម្មពី ធនាគារ ABA ទៅតាមទំហំកម្ចីដែលខ្ញុំបានស្នើសុំ ទាន់ពេលវេលា។ បន្ទាប់ពីទទួលបានកម្ចីដែលមានការធានា ខ្ញុំបានយកវាទៅធ្វើជាទុនបង្វិល ដែលអាចឲ្យខ្ញុំបន្ដការផលិតទូកបាឡាស្មាច់ជូនដល់អតិថិជន និងដេប៉ូចែកចាយបានជាច្រើនខេត្តក្រុង ទាន់ពេលវេលា។

ការទទួលបានកម្ចីដែលមានការធានាពី CGCC គឺអាស្រ័យទៅលើសក្ដានុពលនៃអាជីវកម្មរបស់យើង ពោលគឺលទ្ធភាពនៃការរីកចម្រើនទៅមុខ ការកសាងនិងការថែទាំប្រវត្តិឥណទានឲ្យបានល្អ ក៏ដូចជាបំពេញនូវឯកសារតម្រូវដែលអាចបញ្ជាក់ពីភាពទុកចិត្តលើម្ចាស់អាជីវកម្មក្នុងការប្រើប្រាស់កម្ចីឲ្យចំគោលដៅផងដែរ។ ការទទួលបានកម្ចីដែលមានការធានាពី CGCC ពិតជាបានជួយឱ្យអាជីវកម្មរបស់ខ្ញុំ រីករូតលាស់មកទល់សព្វថ្ងៃ។ ប្រសិនមិនមានវត្តមានរបស់ CGCC ទេ ម្លេះមិនដឹងថាអាជីវកម្មរបស់ខ្ញុំនឹងទៅជាយ៉ាងណាទេ? ម្ចាស់អាជីវកម្មដទៃទៀត ក៏អាចទទួលបានអត្ថប្រយោជន៍ពីការធានាឥណទានពី CGCC តាមរយៈគ្រឹះស្ថានហិរញ្ញវត្ថុដៃគូរបស់ CGCC ដូចរូបខ្ញុំដែរ៕

CGCC និងតួនាទីនៃគម្រោងធានាឥណទាននៅក្នុងការអភិវឌ្ឍសហគ្រិនភាព នៃវេទិកា “Give a Day”

Posted on ខែកុម្ភៈ 13, 2023ខែមិថុនា 7, 2023 by Sorn Chhorvyvatey

នាព្រឹកថ្ងៃទី១០ ខែកុម្ភៈ ឆ្នាំ២០២៣ លោក Wong Keet Loong អគ្គនាយក CGCC បានចូលរួមជាវាគ្មិនកិត្តិយសចែករំលែកអំពីប្រធានបទ “គម្រោងធានាឥណទានរបស់ CGCC និងតួនាទីនៅក្នុងការអភិវឌ្ឍសហគ្រិនភាព” នៅក្នុងវេទិកា “Give a Day” ដែលសហការរៀបចំឡើងដោយ ស្វីសខន់ថាក់ សហគ្រិនខ្មែរ អង្គការផេក (Pact Cambodia) និងក្រោមអធិបតីភាពឯកឧត្តមបណ្ឌិត ឈៀង វណ្ណមុនិណ្ឌ នាយកប្រតិបត្តិនៃសហគ្រិនខ្មែរ លោក Rajiv Pradhan នាយកប្រចាំប្រទេសនៃ ស្វីសខន់ថាក់ និងលោកស្រី Sabine Joukes នាយិកាប្រចាំប្រទេសអង្គការ ផេកកម្ពុជា ក្រោមការចូលរួមពីអ្នកតំណាងស្ថាប័ន/អង្គការដៃគូអភិវឌ្ឍន៍គាំទ្រលើសហគ្រិនភាព អ្នកវិនិយោគ និងសមាគមអាជីវកម្ម នានាជិត៥០រូប។

CGCC និងតួនាទីនៃគម្រោងធានាឥណទាននៅក្នុងការអភិវឌ្ឍសហគ្រិនភាព នៃវេទិកា “Give a Day”

Give a day គឺជាវេទិកាប្រមូលផ្តុំនូវអ្នកពាក់ព័ន្ធនៅក្នុងប្រព័ន្ធអេកូឡូស៊ីសហគ្រិនភាពនៅកម្ពុជា ដែលធ្វើការគាំទ្រការអភិវឌ្ឍសហគ្រិនភាព ប្រកបដោយឆន្ទៈរួមគ្នា ដើម្បីផ្តល់ការគាំទ្ររវាងគ្នាទៅវិញទៅមក ក៏ដូចជាការពិភាក្សាបើកចំហរលើបញ្ហាប្រឈមជាក់លាក់ណាមួយទាក់ទងនឹងសហគ្រិនភាព និងឈានទៅរកដំណោះស្រាយប្រកបដោយប្រសិទ្ធភាព។ ជាក់ស្តែង វេទិកា Give a day នាថ្ងៃនេះ បាននាំយកនូវប្រធានបទនៃការធានាឥណទាន ដែលជាផ្នែកមួយដ៏សំខាន់នៃ ការទទួលបានហិរញ្ញប្បទានផ្លូវការ ដូច្នេះសហគ្រិន និងអ្នកចូលរួមនៅក្នុងវេទិកានាថ្ងៃនេះ ដែលអញ្ជើញមកពីស្ថាប័នធ្វើការលើការគាំទ្រសហគ្រិនភាព នឹងអាចបង្កើនយុទ្ធសាស្រ្តក្នុងការបញ្រ្ជាបការយល់ដឹងពីអត្ថប្រយោជន៍នៃគម្រោងធានាឥណទានទៅដល់បណ្តាញ/ប្រព័ន្ធអេកូឡូស៊ីនៃសហគ្រិនភាពនេះ។

លោកអគ្គនាយក CGCC បានចែករំលែកអំពីការធានាឥណទាន និងតួនាទីនៃគម្រោងធានាឥណទាន ក្នុងការគាំទ្រដល់សហគ្រិន ជាពិសេសសហគ្រាសខ្នាតមីក្រូ តូចនិងមធ្យម ដែលមានសក្តានុពលក្នុងការរីកចម្រើន ឱ្យទទួលបានកម្ចីដែលមានការធានាពី CGCC ដែលបញ្ចេញតាមរយៈគ្រឹះស្ថានហិរញ្ញវត្ថុចូលរួមរបស់ CGCC។ អ្នកចូលរួមនៅក្នុងវេទិកានាថ្ងៃនេះ មានការចាប់អារម្មណ៍ជាពិសេសលើគម្រោងធានាឥណទាន និងឱកាសប្រើប្រាស់ការធានាឥណទានជាផ្នែកមួយនៃដំណោះស្រាយឆ្លើយតបនឹងបញ្ហាប្រឈមនៃការទទួលបានហិរញ្ញប្បទាន របស់បណ្តាញសមាជិកជាសហគ្រិននៃស្ថាប័នរបស់ពួកគេ។

ចុចទីនេះដើម្បីស្វែងយល់បន្ថែម: កិច្ចប្រជុំក្រុមប្រឹក្សាភិបាល សាជីវកម្មធានាឥណទានកម្ពុជា អាណត្តិទី១ លើកទី៨

វិទ្យាល័យកោះស្ដេច ខេត្តកោះកុង ទទួលអំណោយម៉ាស៊ីនផលិតទឹកស្អាត ពីសាជីវកម្មធានាឥណទានកម្ពុជា

Posted on ខែកុម្ភៈ 7, 2023ខែមិថុនា 7, 2023 by Sorn Chhorvyvatey

(កោះកុង)៖ សាជីវកម្មធានាឥណទានកម្ពុជា (CGCC) នៅថ្ងៃទី៥ ខែកុម្ភៈ ឆ្នាំ២០២៣កន្លងទៅនេះ បាននាំយកអំណោយម‌៉ាស៊ីនផលិតទឹកស្អាត ជូនទៅវិទ្យាល័យកោះស្ដេច ខេត្តកោះកុង ក្រោមការដឹកនាំរបស់លោក Wong Keet Long អគ្គនាយក CGCC ក្រោមអធិបតីរបស់លោក សាយ ហេង មេឃុំកោះស្ដេច លោក រ៉ូវ រតនៈសម្បត្តិ ប្រធានគណៈកម្មការគ្រប់គ្រងសាលា លោក ភោគ ហឿន នាយកវិទ្យាល័យកោះស្ដេច និងវត្តមានរបស់អាណាព្យាបាល និងសិស្សានុសិស្សរបស់វិទ្យាល័យកោះស្ដេច ប្រមាណ ២០០នាក់។

ម៉ាស៊ីនផលិតទឹកស្អាតរបស់ CGCC នេះ នឹងអាចសម្រួលឱ្យសិស្សានុសិស្ស និងសហគមន៍ នៃកោះស្ដេច មានទឹកស្អាតប្រើប្រាស់ ដោយកាត់បន្ថយការប្រើប្រាស់ដបទឹកផ្លាស្ទិចនៅលើកោះស្ដេច។ ម៉ាស៊ីនផលិតទឹកស្អាតនេះ អាចផ្គត់ផ្គង់ទឹកស្អាតសម្រាប់កោះទាំងមូល ថែមទាំងអាចជួយសម្រាលបន្ទុកហិរញ្ញវត្ថុ និងបង្កើនសុខមាលភាពរបស់ប្រជាជននៃកោះស្ដេចផងដែរ។

លោក Wong Keet Loong អគ្គនាយក CGCC បានមានប្រសាសន៍ថា «នៅពេលដែលខ្ញុំបានឮពីសំណើនៃកម្មវិធីសប្បុរសធម៌នេះ ពីក្រុមការងាររបស់ខ្ញុំ អំពីតម្រូវការទឹកស្អាតសម្រាប់សិស្សានុសិស្ស និងសហគមន៍កោះស្តេច ខ្ញុំគិតថាវាជាអ្វីដែល CGCC អាចចូលរួមចំណែកក្នុងការជួយសហគមន៍នេះបាន ហើយថ្ងៃនេះ ពួកយើងបានធ្វើឱ្យការគិតរបស់យើងបានក្លាយជាការពិត តាមរយៈការឧបត្ថម្ភម៉ាស៊ីនផលិតទឹកស្អាត ជូនទៅកាន់វិទ្យាល័យកោះស្ដេច សម្រាប់សិស្សានុសិស្សនៃវិទ្យាល័យ និងប្រជាជននៃកោះស្ដេចទាំងមូលផងដែរ ដើម្បីកាត់បន្ថយការបំពុលបរិស្ថានពីការប្រើប្រាស់ដបទឹកផ្លាស្ទិច»។

លោក ភោគ ហឿន នាយកវិទ្យាល័យកោះស្ដេច ក៏បានសម្ដែងការថ្លែងអំណរអរគុណ និងបង្ហាញពីអារម្មណ៍រីករាយយ៉ាងក្រៃលែង ដែល CGCC បានផ្ដល់ម៉ាស៊ីនផលិតទឹកស្អាត ដល់សាលារៀន ដែលអាចឱ្យលោកគ្រូ អ្នកគ្រូ សិស្សានុសិស្ស ក៏ដូចជាប្រជាជនកោះស្ដេចទាំងមូល អាចប្រើប្រាស់បាន។ ម៉ាស៊ីនផលិតទឹកស្អាតនេះពិតជាផ្ដល់ប្រយោជន៍យ៉ាងច្រើនមិនត្រឹមតែសាលារៀនកោះស្ដេចនោះទេ តែសហគមន៍កោះស្ដេចទាំងមូលផងដែរ។

លោក សាយ ហេង មេឃុំកោះស្ដេច ក៏បានថ្លែងអំណរអរគុណ និងបង្ហាញពីអារម្មណ៍រីករាយដូចគ្នា ពីព្រោះម៉ាស៊ីនផលិតទឹកស្អាតនេះ អាចជួយសម្រួលដល់សាលារៀនកោះស្ដេច និងសហគមន៍កោះស្ដេច ក្នុងការកាត់បន្ថយការប្រើប្រាស់ដបទឹកផ្លាស្ទិច និងការបំពុលបរិស្ថាន ដើម្បីឱ្យបរិស្ថានកោះស្ដេចប្រែក្លាយជាបរិស្ថានបៃតង ដើម្បីទាក់ទាញភ្ញៀវទេសចរណ៍ ឱ្យមកកម្សាន្តនៅកោះស្ដេចឱ្យកាន់តែច្រើន។

តាមរយៈកម្មវិធីប្រគល់ម៉ាស៊ីនផលិតទឹកស្អាតនៅលើកោះស្តេចនេះ ក្រុមការងារ CGCC ដែលដឹកនាំដោយលោក ណូ លីដា អគ្គនាយករង CGCC នៅថ្ងៃទី៤ ខែកុម្ភៈ ឆ្នាំ២០២៣ ក៏បានជួបសម្តែងការគួរសម ជាមួយលោកមេឃុំកោះស្តេច និងលោកនាយកវិទ្យាល័យកោះស្តេច ព្រមទាំងចូលរួមជាមួយនឹងសិស្សានុសិស្សនៃវិទ្យាល័យកោះស្តេច ក្នុងការប្រមូលកាកសំណល់ផ្លាស្ទិច ដើម្បីរួមចំណែកថែរក្សាបរិស្ថាននៃកោះស្ដេចផងដែរ។

CGCC សូមថ្លែងអំណរគុណយ៉ាងជ្រាលជ្រៅ ចំពោះការសម្របសម្រួលយ៉ាងកក់ក្តៅ ពីសំណាក់អាជ្ញាធរមូលដ្ឋាន និងប្រជាពលរដ្ឋនៃកោះស្ដេច មកកាន់ក្រុមការងារ CGCC ក្នុងការសម្រេចបេសកកម្មការងារសង្គមមួយនេះ ប្រកបដោយផ្លែផ្កា។

CGCC ផ្តល់ការធានាឥណទានលើកម្ចី ដែលបញ្ចេញដោយគ្រឹះស្ថានហិរញ្ញវត្ថុចូលរួម ដើម្បីគាំទ្រដល់ក្រុមហ៊ុនអាជីវកម្មដែលមានលទ្ធភាពសង ប៉ុន្តែខ្វះទ្រព្យបញ្ចាំពេលដាក់ស្នើកម្ចី។ CGCC ចូលរួមចំណែកអនុវត្តគោលនយោបាយរបស់រាជរដ្ឋាភិបាល ដើម្បីជំរុញបរិយាបន្នហិរញ្ញវត្ថុ និងអភិវឌ្ឍសហគ្រាសធុនតូច និងមធ្យមនៅកម្ពុជា៕

ដកស្រង់ពី Fresh News: វិទ្យាល័យកោះស្ដេច ខេត្តកោះកុង ទទួលអំណោយម៉ាស៊ីនផលិតទឹកស្អាត ពីសាជីវកម្មធានាឥណទានកម្ពុជា

សហគ្រិននៅក្នុងវិស័យបច្ចេកវិទ្យា-ការទទួលបានកម្ចីដែលមានការធានា ក្លាយជាឱកាសក្នុងការបន្តសក្តានុពលអាជីវកម្មឱ្យកាន់តែរីកចម្រើន

Posted on ខែកុម្ភៈ 1, 2023ខែកញ្ញា 13, 2024 by Sorn Chhorvyvatey

អាននិងទាញយកអត្ថបទជា PDF: លោក ប៊ុន ចាន់ឈីម នាយកប្រតិបត្តិក្រុមហ៊ុន Cyber Grow Solution

នៅពាក់កណ្តាលឆ្នាំ២០១៩ ខ្ញុំបានបង្កើត “ក្រុមហ៊ុន Cyber Grow Solution” ដែលជាក្រុមហ៊ុនផ្តល់នូវសេវាកម្មព័ត៌មានវិទ្យា និងប្រឹក្សាយោបល់ផ្នែកសន្តិសុខ Cyber ដល់ក្រុមហ៊ុនសហគ្រាស ដើម្បីលើកស្ទួយការរីកចម្រើនរបស់អាជីវកម្មតាមប្រព័ន្ធស្តង់ដារបច្ចេកវិទ្យា និងសុវត្ថិភាព។ ដោយសារជាក្រុមហ៊ុន Startup ខ្ញុំជួបប្រទះនូវបញ្ហាប្រឈមរាប់មិនអស់ ប៉ុន្តែខ្ញុំនិងក្រុមការងារនៅតែខិតខំពុះពារបន្តទៅមុខ ដោយចាប់ផ្តើមជ្រៀតខ្លួនចូលទៅក្នុងទីផ្សារ និងបណ្តាញទំនាក់ទំនងនានា ជាពិសេសបាននាំចូលកម្មវិធីកម្ចាត់មេរោគ និងកម្មវិធីតេស្តសន្តិសុខនៅប្រព័ន្ធធនាគារ ដែលផ្តល់ឱកាសឱ្យខ្ញុំបានកសាងកេរ្តិ៍ឈ្មោះ និងលក្ខណៈពិសេសរបស់ក្រុមហ៊ុន។

ស្របពេលក្រុមហ៊ុនរីកចម្រើនលូតលាស់ ខ្ញុំមានភាពចាំបាច់ក្នុងការស្នើសុំកម្ចីពីគ្រឹះស្ថានធនាគារ ព្រោះដើម្បីអនុវត្តគម្រោងក្រុមហ៊ុន ខ្ញុំត្រូវមានទុនបម្រុងដើម្បីបញ្ជាទិញឧបករណ៍ព័ត៌មានវិទ្យានានាជាមុន ក៏ដូចជាចំណាយលើថ្លៃសិក្សាគម្រោង មុននឹងផ្តល់សេវាកម្មជូនដល់អតិថិជនជាស្ថាពរ និងទទួលចំណូលតាមក្រោយ។ មិនខុសពីសហគ្រិនជាច្រើនទៀតនោះទេ កង្វះទ្រព្យធានា គឺជាបញ្ហាប្រឈមរបស់ខ្ញុំក្នុងការស្នើសុំកម្ចីពីគ្រឹះស្ថានហិរញ្ញវត្ថុ។ ប៉ុន្តែ ខ្ញុំត្រូវបានណែនាំអំពីសេវាធានាឥណទានរបស់ CGCC ដែលបានជួយខ្ញុំឱ្យបានទទួលកម្ចីដែលមានការធានា ពីធនាគារ J-Trust Royal ដែលជាគ្រឹះស្ថានហិរញ្ញវត្ថុចូលរួមមួយរបស់ CGCC ក្នុងគោលបំណងប្រើប្រាស់ជាទុនបង្វិល សម្រាប់អាជីវកម្មរបស់ខ្ញុំ។ ការទទួលបាននូវកម្ចីដែលមានការធានានេះ បានជួយដោះស្រាយនូវបញ្ហាលំហូរសាច់ប្រាក់របស់ខ្ញុំ និងអាចឱ្យខ្ញុំទទួលបាននូវឱកាសចាប់យកនូវគម្រោងធំៗ ដែលទទួលបានពីអតិថិជនមកពីក្រុមហ៊ុន សហគ្រាស ធនាគារ រោងចក្រនានា។

សម្រាប់ខ្ញុំ ការទទួលបានកម្ចីដែលមានការធានា ដោយជោគជ័យ ទាមទារនូវរបាយការណ៍ហិរញ្ញវត្ថុ ផែនការអាជីវកម្ម ដែលបង្ហាញពីសក្តានុពលក្នុងការរីកចម្រើនរបស់អាជីវកម្ម និងអនុលោមភាពទៅតាមច្បាប់ និងលក្ខខណ្ឌនានា៕

គន្លឹះក្នុងការរៀបចំរបាយការណ៍ហិរញ្ញវត្ថុសម្រាប់សហគ្រាសធុនតូច និងមធ្យម

Posted on ខែកុម្ភៈ 1, 2023ខែកក្កដា 8, 2024 by Sorn Chhorvyvatey

អាននិងទាញយកអត្ថបទជា PDF: គន្លឹះក្នុងការរៀបចំរបាយការណ៍ហិរញ្ញវត្ថុសម្រាប់ SME

អាជីវកម្មជោគជ័យ និងមានការអភិវឌ្ឍយូរអង្វែង មិនអាចខ្វះនូវរបាយការណ៍ហិរញ្ញវត្ថុស្តង់ដាបាន ទេ។ យ៉ាងណាក៏ដោយ ក្រុមហ៊ុនភាគច្រើននៅប្រទេសកម្ពុជា ជាពិសេស សហគ្រាសខ្នាតមីក្រូ តូច និងមធ្យម (MSMEs) មិនបានអនុវត្តឱ្យបានខ្ជាប់ខ្ជួនក្នុងការរៀបចំរបាយការណ៍ហិរញ្ញវត្ថុឱ្យមានលក្ខណៈស្តង់ដា និងអាចជឿទុកចិត្តបាននោះទេ។ កត្តានេះ បានក្លាយជាបញ្ហាប្រឈមសម្រាប់ MSMEs ក្នុងការអភិវឌ្ឍខ្លួនឱ្យបានវែងឆ្ងាយ ទៅជាក្រុមហ៊ុនអាជីវកម្មស្តង់ដា និងបានបន្ទុចបង្អាក់ដល់លទ្ធភាពទទួលបានហិរញ្ញប្បទានរបស់ MSMEs។

របាយការណ៍ហិរញ្ញវត្ថុ គឺជាមូលដ្ឋានដ៏សំខាន់សម្រាប់ ធនាគារ និងវិនិយោគិន ក្នុងការសម្រេចចិត្តផ្តល់ឥណទាន ឬផ្តល់ទុនវិនិយោគដល់ក្រុមហ៊ុនអាជីវកម្ម។ លើសពីនេះ ការរៀបចំរបាយការណ៍ហិរញ្ញវត្ថុ ឱ្យបានត្រឹមត្រូវតាមស្តង់ដាបច្ចេកទេស អាចផ្ដល់អត្ថប្រយោជន៍ជាច្រើនដល់ដំណើរការ និងការគ្រប់គ្រងអាជីវកម្ម ដូចជា ជំនួយក្នុងការធ្វើសេចក្តីសម្រេចចិត្ត ការគ្រប់គ្រងបំណុល និងការគ្រប់គ្រងទុនបង្វិល ជាដើម។

អានបន្ត៖ គន្លឹះក្នុងការរៀបចំរបាយការណ៍ហិរញ្ញវត្ថុសម្រាប់ SME

ការផ្ដល់ជូនឥណទានពិសេសដោយមិនតម្រូវឱ្យមានទ្រព្យធានា

Posted on ខែមករា 19, 2023ខែឧសភា 30, 2023 by Sorn Chhorvyvatey

ធនាគារ កាណាឌីយ៉ា បានសហការជាមួយនឹងសមាគមសហគ្រិនវ័យក្មេងកម្ពុជា និងសមាគមសហគ្រិនស្ត្រីកម្ពុជា ក្នុងការផ្តល់ជូនពិសេសនូវឥណទានសម្រាប់សហគ្រិន សាជីវកម្ម និងធុរកិច្ច ដែលជាសមាជិកសហគម។

ការផ្ដល់ជូនឥណទានពិសេសដោយមិនតម្រូវឱ្យមានទ្រព្យធានា — Unsecured Loan Under CGCC Scheme from Canadia Bank

ធនាគារ កាណាឌីយ៉ា ផ្តល់ជូនឥណទានពិសេសដល់៖

១. សមាគមសហគ្រិនវ័យក្មេងកម្ពុជា (YEAC)

Unsecured Loan Under CGCC Scheme from Canadia Bank

២. សមាគមសហគ្រិនស្រ្តីកម្ពុជា (CWEA)

អត្រាការប្រាក់ទាបត្រឹមតែ 13.20% ក្នុងមួយឆ្នាំ

ទំហំប្រាក់កម្ចី៖ រហូតដល់ 100,000 ដុល្លារ
រយៈពេលកម្ចី៖ រហូតដល់ 5ឆ្នាំ ដោយពុំចាំបាច់មានទ្រព្យបញ្ចាំ

លក្ខខណ្ឌផ្សេងៗ

ចូលជាសមាជិកសមាគមសហគ្រិនវ័យក្មេងកម្ពុជា (YEAC) ឬសមាគមសហគ្រិនស្ត្រីកម្ពុជា (CWEA)

អាជីវកម្មមានសុពលភាពដែលបានចុះបញ្ជីមុនពេលការអនុម័តឥណទាន (យ៉ាងហោចណាស់ដោយអាជ្ញាធរថ្នាក់ស្រុក/គណៈប្រតិភូ)។ សម្រាប់ការចុះបញ្ជីផុតកំណត់ ត្រូវបន្តជាថ្មីក្នុងរយៈពេល 3 ខែ បន្ទាប់ពីដកឥណទាន

រយៈពេលអាជីវកម្មត្រូវដំណើរការលើសពី 2 ឆ្នាំគិតចាប់ពីថ្ងៃស្នើរសុំឥណទាន

អ្នកខ្ចីត្រូវតែជាម្ចាស់អាជីវកម្ម និងតំណាងឱ្យឈ្មោះនៅលើការចុះបញ្ជីអា ជីវកម្ម

សំណើកម្ចីសម្រាប់គោលបំណងដើមទុនធ្វើការ ឬការវិនិយោគ/ពង្រីកអាជីវកម្ម

បញ្ជាក់៖ ខ្លឹមសារខាងលើដកស្រង់ពីវេបសាយរបស់ធនាគារកាណាឌីយ៉ា

ព័ត៌មានលម្អិតសូមចូលទៅកាន់៖ ការផ្ដល់ជូនឥណទានពិសេសដោយមិនតម្រូវឱ្យមានទ្រព្យធានា

នីតិវិធីសងត្រឡប់នៃកម្ចីដែលមានការធានា របស់សាជីវកម្មធានាឥណទានកម្ពុជា

Posted on ខែវិច្ឆិកា 29, 2022ខែកក្កដា 8, 2024 by Sorn Chhorvyvatey

ចុចអាននិងទាញយកជា PDF ៖ នីតិវិធីសងត្រឡប់នៃកម្ចីដែលមានការធានា របស់ CGCC

គោលការណ៍១ នៃគោលការណ៍ទាំង១៦ របស់ធនាគារពិភពលោក អំពីគម្រោងធានាឥណទានសាធារណៈ ចែងថា៖ “ដំណើរការនៃការគ្រប់គ្រងការសងត្រឡប់គួរតែមានប្រសិទ្ធភាព, កំណត់ច្បាស់លាស់ជាលាយលក្ខណ៍អក្សរ, មានតម្លាភាព, មានការលើកទឹកចិត្តដល់ការទារមកវិញនូវកម្ចីដែលបានបាត់បង់, និងសមស្របតាមក្របខ័ណ្ឌច្បាប់ និងបទប្បញ្ញត្តិរបស់ប្រទេសសាម៉ី”។ ពិតណាស់ ការគ្រប់គ្រងនីតិវិធីការសងត្រឡប់ គឺជាកត្តាកំណត់មួយ នៃគណនេយ្យភាពរបស់ CGCC។ នីតិវិធីនៃការសងត្រឡប់ ត្រូវបានចែងជាលាយលក្ខណ៍អក្សរ នៅក្នុងកិច្ចព្រមព្រៀងធានាឥណទាន ដែលមានចំណងផ្លូវច្បាប់រវាង CGCC និងគ្រឹះស្ថានហិរញ្ញវត្ថុចូលរួម (PFI) នីមួយៗ ដែលជាដៃគូរបស់ CGCC។

ការដាក់ពាក្យស្នើសុំការសងត្រឡប់. ដើម្បីអាចដាក់ពាក្យស្នើសុំការសងត្រឡប់ពី CGCC លើកម្ចីដែលមានការធានា ទាមទារនូវការបំពេញបាននូវលក្ខខណ្ឌដូចខាងក្រោម៖

កម្ចីត្រូវបានចាត់ទុកថា “បាត់បង់” ដោយផ្អែកតាមនិយមន័យរបស់ធនាគារជាតិនៃកម្ពុជា។
PFI បានទាមទារជាផ្លូវការនូវសំណងពីអ្នកខ្ចី ស្របតាមនីតិវិធីជាធរមានរបស់ PFIs។
PFI បានអនុវត្តរាល់ដំណើរការក្នុងការទាមទារសំណងពីអ្នកខ្ចី ស្របតាមនីតិវិធីជាធរមានរបស់ PFI។
នីតិវិធីផ្លូវច្បាប់ត្រូវបានចាប់ផ្តើមចំពោះអ្នកខ្ចី និងចំពោះទ្រព្យបញ្ចាំដែលមាន។
កម្ចីដែលបាត់បង់ នោះត្រូវបានធ្វើសំវិធានធន ឬត្រូវបានលុបចោលដោយ PFI។

PFI ត្រូវដាក់ពាក្យស្នើសុំការសងត្រឡប់ពី CGCC ក្នុងរយៈពេលយ៉ាងយូរ ៩០ថ្ងៃ បន្ទាប់ពីលក្ខខណ្ឌនៃការសងត្រឡប់ខាងលើត្រូវបានបំពេញ។

ការទូទាត់ការសងត្រឡប់. CGCC ទូទាត់ការសងត្រឡប់ជូន PFI ចំពោះកម្ចីដែលមានការធានាជា ២ដំណាក់កាល។ ក្នុងដំណាក់កាលទី១ CGCC នឹងទូទាត់ការសងត្រឡប់ចំនួន ៥០% នៃទំហំសងត្រឡប់សរុប ជូនទៅ PFIs យ៉ាងយូរ ៣០ថ្ងៃ បន្ទាប់ពីទទួលបានសំណើសុំការសងត្រឡប់ពី PFIs។ CGCC នឹងទូទាត់ការសងត្រឡប់ដែលនៅសេសសល់ ក្នុងដំណាក់កាលទី២ យ៉ាងយូរ ២ឆ្នាំ បន្ទាប់ពីដំណាក់កាលទី១។ រយៈពេលយ៉ាងយូរ ២ឆ្នាំ នេះ គឺជាការទុកពេលជូន PFI ដើម្បីបន្តអនុវត្តនីតិវិធីទាមទារការសងត្រឡប់ពីអ្នកខ្ចីមកវិញ។ ទោះបីជាកម្ចីមានការធានាពី CGCC ក៏ដោយ PFI ត្រូវខិតខំឱ្យអស់លទ្ធភាពក្នុងការទាមទារសំណងពីអ្នកខ្ចី ដូចករណីកម្ចីគ្មានការធានាពី CGCC ដែរ។

ការទទួលបានសំណងមកវិញពីអ្នកខ្ចី. រាល់ការប្រមូលបានមកវិញនូវកម្ចីដែលបានបាត់បង់ ត្រូវបានបែងចែករវាង CGCC និង PFI ទៅតាមសមាមាត្រនៃការធានា។ PFI អាចប្រើប្រាស់សំណងដែលប្រមូលមកវិញពីអ្នកខ្ចី ដើម្បីទូទាត់ចំណាយពាក់ព័ន្ធទៅតាមលំដាប់អាទិភាពដូចខាងក្រោម៖

ចំណាយពាក់ព័ន្ធនឹងដំណើរការនៃការទាមទារការសងត្រឡប់
ការប្រាក់សម្រាប់កម្ចីដែលមានការធានា ដែលអ្នកខ្ចីត្រូវបង់ជូន PFI
ចំណែករបស់ CGCC ទៅតាមសមាមាត្រនៃការធានា
ការផាកពិន័យនានាដែលអ្នកខ្ចីត្រូវបង់ជូន PFI

អានបន្ត៖ នីតិវិធីសងត្រឡប់នៃកម្ចីដែលមានការធានា របស់ CGCC

៥ចំណុច សហគ្រិនគួរត្រៀមខ្លួន ដើម្បីទទួលបាននូវឥណទានដែលមានការធានា

Posted on ខែវិច្ឆិកា 18, 2022ខែកក្កដា 8, 2024 by Sorn Chhorvyvatey

អាននិងទាញយកអត្ថបទជា PDF: ការទទួលបានឥណទានដែលមានការធានា

សេវាធានាឥណទាន ត្រូវបានប្រើប្រាស់ក្នុងគោលដៅគាំទ្រក្រុមហ៊ុនអាជីវកម្ម ជាពិសេស អាជីវកម្មខ្នាតតូច និងមធ្យម ឱ្យទទួលបានហិរញ្ញប្បទានផ្លូវការ។ បច្ចុប្បន្ន សាជីវកម្មធានាឥណទានកម្ពុជា (CGCC) ផ្តល់ការធានាឥណទាន លើកម្ចីដែលបញ្ចេញដោយធនាគារ និងគ្រឹះស្ថានមីក្រូហិរញ្ញវត្ថុជាគ្រឹះស្ថានហិរញ្ញវត្ថុចូលរួម (ហៅថាកាត់ថា PFIs) របស់ CGCC ទៅកាន់អ្នកស្នើសុំកម្ចី ក្រោមគម្រោងធានាឥណទានដែលបានដាក់ចេញដោយ CGCC។ ដូច្នេះ ដើម្បីចាប់យកអត្ថប្រយោជន៍ពីការធានាឥណទាន ក្រុមហ៊ុនអាជីវកម្មត្រូវត្រៀមខ្លួនឱ្យបានរួចរាល់ដើម្បីស្នើសុំកម្ចីទៅកាន់ PFIs ជាមុនសិន។ ការស្វែងយល់អំពីលក្ខណៈវិនិច្ឆ័យដែល PFIs ប្រើប្រាស់ដើម្បីវាយតម្លៃលើសំណើសុំឥណទាន អាចជួយឱ្យក្រុមហ៊ុនអាជីវកម្មត្រៀមខ្លួនបានល្អប្រសើរជាមុន ក្នុងការទទួលបានកម្ចីដែលមានការធានាពី CGCC។

លក្ខខណ្ឌ (CONDITION)

Condition to get guaranteed loans — 5 important things SMEs should understand to apply for guaranteed loans!

មុនពេលអនុម័តកម្ចី ធនាគារត្រូវតែដឹងច្បាស់អំពីគោលបំណងនៃកម្ចី និងទំហំកម្ចីដែលសមស្របទៅនឹងគោលបំណងនៃកម្ចីនោះ។ តើក្រុមហ៊ុនអាជីវកម្មអាចបញ្ជាក់ជូនធនាគារ អំពីគោលបំណងនៃកម្ចី និងទំហំកម្ចីដោយរបៀបណា? ផែនការអាជីវកម្ម និងរបាយការណ៍ហិរញ្ញវត្ថុ ដែលមានភាពជឿទុកចិត្តបាន គឺជាមូលដ្ឋានដ៏សំខាន់ដែលអាចឱ្យធនាគារវាយតម្លៃលើទំហំកម្ចីដែលត្រូវការ និងគោលបំណងនៃកម្ចីរបស់អ្នកខ្ចីបាន។ ពិតណាស់ ផែនការអាជីវកម្ម និងរបាយការណ៍ហិរញ្ញវត្ថុច្បាស់លាស់ មិនត្រឹមតែអាចជួយក្រុមហ៊ុនអាជីវកម្មឱ្យស្នើសុំកម្ចីបានងាយស្រួលប៉ុណ្ណោះទេ ប៉ុន្តែថែមទាំងអាចជួយក្រុមហ៊ុនអាជីវកម្មវាយតម្លៃលើស្ថានភាពអាជីវកម្មរបស់ខ្លួន ដើម្បីរៀបចំផែនការសម្រាប់ភាពជោគជ័យនៃអាជីវកម្មនាពេលអនាគតផងដែរ។ ផែនការអាជីវកម្ម និងរបាយការណ៏ហិរញ្ញវត្ថុ អាចជួយកំណត់ទំហំកម្ចី និងលទ្ធភាពនៃការសងត្រឡប់ ឱ្យកាន់តែមានភាពសុក្រិត។ ការកំណត់ទំហំកម្ចីឱ្យបានត្រឹមត្រូវ ពិតជាសំខាន់។ ការទទួលបានកម្ចីច្រើនហួស ធ្វើឱ្យអ្នកខ្ចីខាតបង់ការប្រាក់ ថ្លៃរដ្ឋបាល ថ្លៃពិន័យក្នុងការសងមុនកាលកំណត់ និងថ្លៃសេវាផ្សេងៗទៀត។ ផ្ទុយទៅវិញ ការទទួលបានកម្ចីមិនបានគ្រប់គ្រាន់រាំងស្ទះដល់ការរីកចម្រើនរបស់ក្រុមហ៊ុនអាជីវកម្មឱ្យអស់សក្តានុពល។ កត្តា “លក្ខខណ្ឌ (Condition)” គឺជាលក្ខណៈវិនិច្ឆ័យមួយ ក្នុងចំណោមលក្ខណៈវិនិច្ឆ័យទាំង៥ ដែលធនាគារប្រើប្រាស់ក្នុងការវាយតម្លៃសំណើសុំកម្ចី។

ទ្រព្យបញ្ចាំ (COLLATERAL)

5 important things SMEs should understand to apply for guaranteed loans!

នៅពេលកត្តា “លក្ខខណ្ឌ” ត្រូវបានបំពេញ ធនាគារក៏មានលក្ខខណ្ឌតម្រូវឱ្យក្រុមហ៊ុនអាជីវកម្មមាន “ទ្រព្យបញ្ចាំ” ដើម្បីការពារធនាគារពីការខាតបង់ ក្នុងករណីក្រុមហ៊ុនអាជីវកម្មមិនអាចសងត្រឡប់បាន។ ជាទូទៅ ធនាគារអាចផ្តល់កម្ចីទំហំត្រឹមប្រមាណ ៧០% នៃតម្លៃទ្រព្យបញ្ចាំ។ តម្រូវការទ្រព្យបញ្ចាំ បានក្លាយឧបសគ្គចម្បងមួយ សម្រាប់ក្រុមហ៊ុនអាជីវកម្មក្នុងការទទួលបានកម្ចីពីធនាគារ។ យោងលើសាជីវកម្មហិរញ្ញវត្ថុអន្តរជាតិ (IFC) ៦៦% នៃអាជីវកម្មខ្នាតតូច និងមធ្យម ដែលបានស្នើសុំកម្ចីទៅកាន់ធនាគារ ត្រូវបានបដិសេធ ដោយសារមូលហេតុខ្វះទ្រព្យបញ្ចាំ។ CGCC ត្រូវបានបង្កើតឡើង ដើម្បីចូលរួមដោះស្រាយបញ្ហានេះ។ CGCC ផ្តល់ការធានាឥណទានដែលដើរតួជំនួសឱ្យទ្រព្យបញ្ចាំរបស់ក្រុមហ៊ុនអាជីវកម្ម ទៅកាន់ធនាគារ។ នៅពេលមានការធានាពី CGCC ធនាគារអាចវាយតម្លៃសំណើសុំខ្ចីពីក្រុមហ៊ុនអាជីវកម្ម ដោយចាត់ទុកការធានាឥណទានរបស់ CGCC ជាទ្រព្យបញ្ចាំរបស់ក្រុមហ៊ុនអាជីវកម្ម។ ការអនុវត្តនេះ អាចកាត់បន្ថយតម្រូវការទ្រព្យបញ្ចាំ សម្រាប់ក្រុមហ៊ុនអាជីវកម្មនៅពេលស្នើសុំកម្ចី។

សមត្ថភាព (CAPACITY)

សមត្ថភាពសងត្រឡប់ គឺជាតម្រូវការជាមូលដ្ឋាន របស់ធនាគារក្នុងការអនុម័តកម្ចី។ ការបំពេញបាននូវកត្តា “លក្ខខណ្ឌ” និង “ទ្រព្យបញ្ចាំ” ខាងលើ មិនទាន់គ្រប់គ្រាន់ដើម្បីឱ្យធនាគារអនុម័តកម្ចី ហើយ CGCC ក៏មិនទាន់អាចផ្តល់ការធានាឥណទានជូននៅឡើយទេ ប្រសិនបើអ្នកខ្ចីមិនអាចបញ្ជាក់បានអំពីសមត្ថភាពគ្រប់គ្រាន់ក្នុងការសងត្រឡប់កម្ចីនោះវិញ។ តើក្រុមហ៊ុនអាជីវកម្មអាចបញ្ជាក់អំពីសមត្ថភាពសងបានយ៉ាងដូចម្តេច? ជាថ្មីម្តងទៀត ផែនការអាជីវកម្ម និងរបាយការណ៏ហិរញ្ញវត្ថុដែលអាចជឿទុកចិត្តបាន គឺជាភស្តុតាងដ៏ល្អ។ របាយការណ៏ហិរញ្ញវត្ថុ អាចបង្ហាញពីទ្រព្យសកម្ម បំណុល ដើមទុន ចំណូល និងលំហូរសាច់ប្រាក់ របស់ក្រុមហ៊ុនអាជីវកម្ម ដែលព័ត៌មានទាំងនេះ គឺជាភស្តុតាងដែលអាចជឿទុកចិត្តបាន ក្នុងការវាយតម្លៃអំពីសមត្ថភាពសងរបស់ក្រុមហ៊ុនអាជីវកម្ម។ ចំណែកឯ ផែនការអាជីវកម្ម អាចបង្ហាញពីសកម្មភាពអាជីវកម្ម និងចំណូលនាពេលអនាគត ដែលអាចត្រូវបានប្រើប្រាស់ដើម្បីបញ្ជាក់អំពីសមត្ថភាពសងត្រឡប់ផងដែរ។

ដើមទុន (CAPITAL)

នៅពេលផ្តល់កម្ចីអាជីវកម្ម ធនាគារតែងតែចង់ដឹងអំពីចំនួនដើមទុនដែលអ្នកខ្ចី បានដាក់វិនិយោគក្នុងក្រុមហ៊ុន។ កត្តា “ដើមទុន” មានសារៈសំខាន់ ព្រោះទំហំដើមទុនរបស់អ្នកខ្ចី បញ្ជាក់ពីការប្តេជ្ញាចិត្តរបស់អ្នកខ្ចីចំពោះក្រុមហ៊ុនអាជីវកម្មនោះ។ តើអ្នកខ្ចីអាចបញ្ជាក់ជូនធនាគារអំពីកត្តាដើមទុនដោយវិធីណា? របាយការណ៏ហិរញ្ញវត្ថុដែលមានលក្ខណៈស្តង់ដា អាចបញ្ជាក់អំពីទំហំដើមទុនរបស់ម្ចាស់ក្រុមហ៊ុនក្នុងក្រុមហ៊ុនអាជីវកម្មនោះ។ ឯកសារផ្លូវការមួយចំនួនទៀត ដូចជា កិច្ចព្រមព្រៀងភាពជាដៃគូ និងការចុះបញ្ជីក្រុមហ៊ុន គឺជាភស្តុតាងដែលអាចជឿទុកចិត្តបាន ដើម្បីបញ្ជាក់អំពីទំហំវិនិយោគរបស់អ្នកខ្ចី ទៅក្នុងក្រុមហ៊ុនអាជីវកម្ម។ ជាធម្មតា ធនាគារមានភាពលំបាកក្នុងការវាយតម្លៃក្រុមហ៊ុនដែលមិនបានចុះបញ្ជី ដោយសារតែកង្វះឯកសារដែលអាចជឿទុកចិត្តបាន ដើម្បីវាយតម្លៃសំណើសុំខ្ចី។ នេះជាមូលហេតុនៃការជំរុញ និងការលើកទឹកចិត្ត ឱ្យក្រុមហ៊នអាជីវកម្ម គួរចុះបញ្ចីឱ្យបានត្រឹមត្រូវ ដើម្បីបង្កើនលទ្ធភាពនៃការទទួលបានហិរញ្ញប្បទាន។

ចរិតលក្ខណៈ (CHARACTER)

កត្តាមួយទៀតដែលបញ្ជាក់ពីលទ្ធភាពសងត្រឡប់ គឺចរិតលក្ខណៈរបស់អ្នកខ្ចី។ ជាការកត់សម្គាល់ ធនាគារពិនិត្យមើលប្រវតិ្តឥណទានរបស់អ្នកខ្ចី ដូចជា ប្រវត្តិនៃការសងត្រឡប់ ចំនួនកម្ចី និងទំហំកម្ចីដែលមានស្រាប់ក្នុងពេលបច្ចុប្បន្ន ជាដើម ដើម្បីវាយតម្លៃអំពីភាពជឿទុកចិត្តបានរបស់អ្នកខ្ចី។ បច្ចុប្បន្ន ក្រុមហ៊ុនក្រេឌីត ប្យួរ៉ូ (ខេមបូឌា) កត់ត្រា និងផ្តល់នូវរបាយការណ៏កម្ចីឥណទានរបស់បុគ្គល និងអាជីវកម្ម ដែលអាចគាំទ្រដល់ធនាគារ ក្នុងការវាយតម្លៃអំពីចរិតលក្ខណៈរបស់អ្នកខ្ចី។ យ៉ាងណាក៏ដោយ ក្នុងករណីមានប្រវត្តិឥណទានមិនល្អ អ្នកខ្ចីត្រូវតែពង្រឹងគុណភាពនៃកត្តាផ្សេងៗដូចបានរៀបរាប់ខាងលើ ដើម្បីគួបផ្សំនឹងកត្តាចរិតលក្ខណៈ។ ជាក់ស្តែង ក្នុងអំឡុងពេលនៃវិបត្តិជំងឺកូវីដ-១៩ ក្រុមហ៊ុនអាជីវកម្មជាច្រើនជួបប្រទះនូវបញ្ហាប្រឈម ដែលនាំឱ្យការសងត្រឡប់កម្ចីមានភាពយឺតយ៉ាវ ឬមិនអាចសងត្រឡប់កម្ចីទាំងស្រុងតែម្តង ដែលកត្តានេះជះឥទ្ធិពលអវិជ្ជមាន ដល់កត្តាចរិតលក្ខណៈ និងកត្តាដើមទុនរបស់ក្រុមហ៊ុនអាជីវកម្ម។ ក្នុងករណីនេះ ដើម្បីទទួលបានកម្ចី អ្នកខ្ចីត្រូវ បង្ហាញផែនការអាជីវកម្មដែលសក្តានុពល និងមានភាពច្បាស់លាស់ និងអាចប្រើប្រាស់សេវាធានាឥណទានរបស់ CGCC ដើម្បីបង្កើនគុណភាពនៃកត្តាទ្រព្យបញ្ចាំ។

ដូចបានរៀបរាប់ពីខាងលើលក្ខណៈវិនិច្ឆ័យទំាងប្រាំ (5Cs) ដែលរួមមាន លក្ខខណ្ឌ (Condition) ទ្រព្យបញ្ចាំ (Collateral) សមត្ថភាព (Capacity) ដើមទុន (Capital) និងចរិតលក្ខណៈ (Character) គឺជាកត្តាសំខាន់ ដែលធនាគារជាទូទៅប្រើប្រាស់ជាមូលដ្ឋានក្នុងការវាយតម្លៃអ្នកខ្ចី មុននឹងអនុម័តកម្ចីណាមួយ។ ដូច្នេះ ការពង្រឹងគុណភាពលក្ខណៈវិនិច្ឆ័យទំាងប្រាំ (5Cs) អាចជួយឱ្យអ្នកខ្ចីមានឱកាសខ្ពស់ជាងមុន ក្នុងការទទួលបានកម្ចីពីធនាគារ។ ក្នុងនោះ របាយការណ៍ហិរញ្ញវត្ថុ និងផែនការអាជីវកម្មដែលមានភាពជឿទុកចិត្តបាន អាចត្រូវបានប្រើប្រាស់ សម្រាប់ការវាយតម្លៃលើលក្ខណៈវិនិច្ឆ័យទំាងប្រាំ ខណៈសេវាធានាឥណទាន អាចជួយបង្កើនគុណភាពនៃកត្តាទ្រព្យបញ្ចាំរបស់ក្រុមហ៊ុនអាជីវកម្ម៕

Tag: បរិយាបន្នហិរញ្ញវត្ថុ

ទឹកប្រាក់ជាង ១០០ លានដុល្លារ ត្រូវផ្តល់ដល់ SME តាម CGCC

CGCC និងតួនាទីនៃគម្រោងធានាឥណទាននៅក្នុងការអភិវឌ្ឍសហគ្រិនភាព នៃវេទិកា “Give a Day”

វិទ្យាល័យកោះស្ដេច ខេត្តកោះកុង ទទួលអំណោយម៉ាស៊ីនផលិតទឹកស្អាត ពីសាជីវកម្មធានាឥណទានកម្ពុជា

គន្លឹះក្នុងការរៀបចំរបាយការណ៍ហិរញ្ញវត្ថុសម្រាប់សហគ្រាសធុនតូច និងមធ្យម