CGCC

Menu
Menu

Tag: Cambodia

ជួបជាមួយម្ចាស់អាជីវកម្មដែលទទួលបានកម្ចីដែលមានការធានាពី CGCC

Posted on by Sorn Chhorvyvatey

ក្តីស្រម៉ៃរបស់ខ្ញុំ គឺចង់វិនិយោគលើអាជីវកម្មដែលអាចជួយដល់សុខុមាលភាពរបស់មនុស្ស ដោយសារតែមនុស្សអាចរស់នៅបានដោយសារសុខភាព និងស្មារតីល្អ។ នេះហើយជាមូលហេតុចម្បងដែលជំរុញចិត្តរបស់ខ្ញុំ និងភរិយារបស់ខ្ញុំ ឱ្យបង្កើតអាជីវកម្មចំនួន២ឡើងមក គឺក្រុមហ៊ុន អេឌីខេរ៉ាយស៍ (អង្ករដីខ្មែរ) និងមុនីគ្លីនិក។ សម្រាប់ក្រុមហ៊ុនអង្ករដីខ្មែរ ខ្ញុំបានផ្តួចផ្តើមបង្កើតឡើងមកដោយជឿជាក់ថា អង្ករគឺជាប្រភពអាហារចម្បងរបស់មនុស្ស ដោយសារតែចំនួនប្រជាជនមានការកើនឡើងរៀងរាល់ថ្ងៃ តែផ្ទៃដីដាំដុះកសិកម្ម បែរជាកាន់តែថមថយទៅ រីឯមុនីគ្លីនិកគឺត្រូវបានបង្កើតឡើងជាមួយនឹងភរិយារបស់ខ្ញុំ ក្នុងចក្ខុវិស័យផ្តល់នូវការថែទាំនិងព្យាបាលសុខភាព តាមរយៈសេវាសុខាភិបាលដែលមានតម្លៃសមរម្យ ប្រកបដោយគុណភាពស្តង់ដារ។

តាមរយៈបទពិសោធន៍នៃការបំពេញការងារនៅក្រុមហ៊ុននាំចេញអង្ករដ៏ធំមួយក្នុងប្រទេសកម្ពុជា ខ្ញុំបានសិក្សារៀនសូត្រ និងបានចុះឃើញផ្ទាល់ពីស្ថានភាពរបស់ប្រជាកសិករដាំដុះស្រូវនៅតាមជនបទ ទើបខ្ញុំសម្រេចចិត្តចាប់ផ្តើមបង្កើតដេប៉ូលក់អង្ករក្នុងស្រុកឈ្មោះថា អង្ករដីខ្មែរ និងបានពង្រីកវិសាលភាព នៅឆ្នាំ២០២១ ក្លាយជាក្រុមហ៊ុនអេឌីខេរ៉ាយស៍ ដែលជាក្រុមហ៊ុនផលិតអង្ករមានគុណភាពខ្ពស់ គោរពតាមស្តង់ដារសុវត្ថិភាពចំណីអាហារ និងផ្តល់ឱ្យកសិករនូវទីផ្សារដែលមាននិរន្តរភាព និងបង្កើនប្រាក់ចំណូលតាមរយៈការចុះកិច្ចសន្យាផ្គត់ផ្គង់ស្រូវមកកាន់ក្រុមហ៊ុនរបស់ខ្ញុំ។ រីឯមុនីគ្លីនិក គឺជាគ្លីនិកព្យាបាល និងថែទាំសុខភាព ដែលត្រូវបានបង្កើតឡើងនៅក្នុងឆ្នាំ២០១៨ តាមរយៈការចាប់ដៃជាមួយភរិយារបស់ខ្ញុំ ឈរលើឆន្ទៈក្នុងការប្តេជ្ញាផ្តល់នូវសេវាសុខភាពជូនដល់ប្រជាជនខ្មែរ ប្រកបដោយគុណភាព និងតម្លៃសមរម្យ ជាពិសេសទៅលើការព្យាបាលជំងឺទឹកនោមផ្អែម និងការត្រួតពិនិត្យសុខភាពជាប្រចាំក្នុងការការពារជំងឺធ្ងន់ធ្ងរនានា។

ពិតណាស់ គោលការណ៍នៃការប្រកបអាជីវកម្ម យើងតែងតែចង់អភិវឌ្ឍនិងពង្រីកឱ្យកាន់តែធំ។ មិនខុសពីអាជីវកម្មគ្លីនិករបស់ខ្ញុំនេះទេ ដែលនៅពេលដល់ដំណាក់កាលត្រូវពង្រីកអាជីវកម្ម យើងមានតម្រូវការទិញសម្ភារបរិក្ខារទំនើបៗ ដើម្បីបង្កើនស្តង់ដាររបស់គ្លីនិក។ ការសម្រេចចិត្តស្នើកម្ចីពីគ្រឹះស្ថានធនាគារ គឺជាមធ្យោបាយតែមួយគត់ដែលខ្ញុំជឿជាក់ថា អាចបំពេញនូវក្តីស្រម៉ៃរបស់ខ្ញុំនិងភរិយារបស់ខ្ញុំ ឱ្យកើតជារូបរាងបាន។ ប៉ុន្តែខ្ញុំមិនមានទ្រព្យធានាជាប្លង់ដី ឬប្លង់ផ្ទះ ក្នុងការតម្កល់នៅធនាគារនោះទេ តែបញ្ហាប្រឈមនេះត្រូវបានដោះស្រាយ តាមរយៈការធានាឥណទានរបស់ CGCC ដែលបានសម្រួលឱ្យខ្ញុំទទួលបានកម្ចីពីធនាគារព្រីនស៍ សម្រាប់ការទិញសម្ភារបរិក្ខារគ្លីនិក។

ការទទួលបានការធានាពី CGCC លើកម្ចីរបស់ខ្ញុំនេះ វាមិនមែនជារឿងចៃដន្យនោះទេ តែជាការទទួលបានតាមរយៈការចូលរួមកម្មវិធីកសាងសមត្ថភាពសហគ្រិនរបស់ CGCC ដែលហៅកាត់ថា EPIC វគ្គទី១ នៃឆ្នាំ២០២៤ កាលពីខែឧសភា ឆ្នាំ២០២៤ កន្លងទៅ ដែលធ្វើឱ្យខ្ញុំបានស្គាល់ពី CGCC និងស្គាល់ពីធនាគារដៃគូដែលអាចផ្តល់កម្ចីដល់អាជីវកម្មដែលមានសក្តានុពល ជាមួយនឹងផែនការអាជីវកម្មច្បាស់លាស់ ហើយអាចដោះស្រាយនឹងបញ្ហាប្រឈមខ្វះទ្រព្យធានា។ ក្រោយពីទទួលបានកម្ចីរួច ខ្ញុំបានយកទៅទិញសម្ភារបរិក្ខារពេទ្យបន្ថែមសម្រាប់ដាក់នៅអគារគ្លីនិកដែលបាននិងកំពុងសាងសង់បន្ថែម ស្របនឹងគោលដៅរបស់កម្ចី ផែនការអាជីវកម្ម និងផែនការវិនិយោគច្បាស់លាស់របស់ខ្ញុំ។ បន្ថែមពីលើនេះ ខ្ញុំក៏មានគម្រោងក្នុងការស្នើកម្ចីបន្ថែមសម្រាប់ជាទុនបង្វិលក្នុងការទិញស្រូវពីកសិករ ដើម្បីបង្កើនការផលិតអង្កររបស់ក្រុមហ៊ុនអង្ករដីខ្មែររបស់ខ្ញុំនាពេលអនាគតផងដែរ។

ក្នុងនាមជាម្ចាស់អាជីវកម្មមួយរូប ខ្ញុំយល់ថា ការស្វែងយល់ពីចំណេះដឹងហិរញ្ញវត្ថុពិតជាមានសារៈសំខាន់ណាស់ ព្រោះអាចធ្វើឱ្យយើងគិតគូរបានល្អិតល្អន់លើការវិនិយោគបានគ្រប់ជ្រុងជ្រោយ ជាក់ស្តែងលើការទិញទ្រព្យ (Asset) ដើម្បីបង្កើនចំណូល ជាជាងការទិញទ្រព្យសកម្មដែលមិនអាចបម្លែងជាចំណូលបាន។ មួយវិញទៀត បើយើងចេះមានចំណេះដឹងហិរញ្ញវត្ថុ វាក៏អាចជួយឱ្យយើងចេះគ្រប់គ្រងធនធានមនុស្សដូចជា ការគិតគូរលើចំនួនបុគ្គលិក ប្រាក់ខែ ការលើកទឹកចិត្ត អត្ថប្រយោជន៍នានាផងដែរ៕

អាននិងទាញយកជា PDF: ជួបជាមួយម្ចាស់អាជីវកម្មដែលទទួលបានកម្ចីដែលមានការធានាពី CGCC

 

ការស្វែងយល់អំពីរចនាសម្ព័ន្ធទីផ្សារ

Posted on by Sorn Chhorvyvatey

តើអាជីវកម្មរបស់អ្នកផលិតផលិតផល ឬផ្តល់សេវាអ្វី? តើមានអាជីវកម្មណាទៀត ដែលផលិតផលិតផល និងផ្តល់សេវាដូចអាជីវកម្មរបស់អ្នក? តើអ្នកមានយុទ្ធសាស្ត្រអាជីវកម្មបែបណា ដើម្បីប្រកួតប្រជែងក្នុងទីផ្សារ? ចម្លើយទៅនឹងសំណួរនេះ ទាក់ទងនឹងរចនាសម្ព័ន្ធទីផ្សារ ដែលអាជីវកម្មរបស់អ្នកកំពុងតែស្ថិតនៅ។ រចនាសម្ព័ន្ធទីផ្សារ សំដៅលើចរិកលក្ខណៈនៃទីផ្សារ រួមមាន ចំនួនអាជីវកម្ម, ប្រភេទផលិតផលនិងសេវា, សេរីភាពនៃការចូល និងដកខ្លួនចេញពីទីផ្សារជាដើម។ រចនាសម្ព័ន្ធទីផ្សារ ដើរតួនាទីយ៉ាងសំខាន់ក្នុងសម្រេចចិត្តជាយុទ្ធសាស្ត្រក្នុងអាជីវកម្ម ថាតើត្រូវធ្វើប្រតិបត្តិការនិងប្រកួតប្រជែងយ៉ាងដូចម្តេច។

ទីផ្សារប្រកួតប្រជែងល្អឥតខ្ចោះ

ប្រសិនអ្នកចង់ទិញទឹកបរិសុទ្ធពិសារនៅទីក្រុងភ្នំពេញ អ្នកមានជម្រើសជាច្រើន ដូចជា ទឹកបរិសុទ្ធ វីតាល់, អង្គរពូរ៉ូ, ដាសានី, ឱរ៉ាល់, ហាយ-ធិច, អរុណា, និងទឹកបរិសុទ្ធ កម្ពុជា ជាដើម។ ទោះបីមានផ្លាកសញ្ញាខុសគ្នា ទឹកបរិសុទ្ធទាំងនេះមានរសជាតិដូចគ្នា និងជាធម្មតាត្រូវបានលក់ក្នុងតម្លៃ ១.០០០រៀល ក្នុងមួយដបដូចគ្នា ដែលជាថ្លៃលំនឹងទីផ្សារសម្រាប់ទឹកបរិសុទ្ធប្រភេទនេះ។ ប្រសិនទឹកបរិសុទ្ធទាំងនេះត្រូវបានលក់នៅកន្លែងតែមួយដូចគ្នា ទឹកបរិសុទ្ធណាមួយដែលលក់ថ្លៃជាងថ្លៃលំនឹងទីផ្សារ នឹងបាត់បង់ទីផ្សារ។ អតិថិជននឹងប្តូរទៅទិញទឹកបរិសុទ្ធណាដែលមានតម្លៃទាបជាងគេបំផុត។ ទីផ្សារសម្រាប់ទឹកបរិសុទ្ធ គឺជាឧទារណ៍ប្រហាក់ប្រហែលបំផុត សម្រាប់ទីផ្សារប្រកួតប្រជែងល្អឥតខ្ចោះ។

ទីផ្សារប្រកួតប្រជែងល្អឥតខ្ចោះ គឺជារចនាសម្ព័ន្ធទីផ្សារ ដែលមានអាជីវកម្មច្រើន ផលិតផលិតផល ឬផ្តល់សេវាដូចគ្នាបេះបិត ហើយគ្មានអាជីវកម្មណាមួយមានអំណាចក្នុងការកំណត់ថ្លៃនោះទេ។ អតិថិជនមានព័ត៌មានពេញលេញអំពីផលិតផល និងសេវា ហើយតម្លៃនៃផលិតផលនិងសេវាត្រូវបានកំណត់ទាំងស្រុងដោយកត្តាតម្រូវការនិងការផ្គត់ផ្គង់។ ការចូល ឬដកខ្លួនចេញពីទីផ្សារ មានភាពងាយស្រួលបំផុត។ យុទ្ធសាស្ត្រក្នុងការប្រកួតប្រជែងក្នុងទីផ្សារប្រភេទនេះ គឺត្រូវកំណត់ថ្លៃលក់ (P) ឱ្យស្មើនឹងចំណាយក្នុងការផលិតមួយឯកតាបន្ថែម (Marginal Cost – MC)។

ជាការពិតណាស់ ទីផ្សារប្រកួតប្រជែងល្អឥតខ្ចោះគឺកម្រនឹងកើតមាន (ឬមិនកើតមានសោះតែម្តង) ក្នុងស្ថានភាពជាក់ស្តែង។ ចរិកលក្ខណៈនៃទីផ្សារ ដែលថាមានអាជីវកម្មច្រើនផលិតផលិតផល ឬសេវាដូចគ្នាបេះបិត, អតិថិជនមានព័ត៌មានពេញលេញអំពីផលិតផល ឬសេវា, ហើយការចូល ឬដកខ្លួនចេញពីទីផ្សារមានភាពងាយស្រួលបំផុតនោះ គឺពិបាកនឹងកើតមានណាស់។ យ៉ាងណាក៏ដោយ ទីផ្សារប្រកួតប្រជែងល្អឥតខ្ចោះ គឺជាទ្រឹស្តីដែលអាចជួយឱ្យយើងប្រើប្រាស់ដើម្បីប្រៀបធៀបនិងស្វែងយល់អំពីស្ថានភាពជាក់ស្តែងនៃទីផ្សារ។

ទីផ្សារផ្តាច់មុខ

ខ្ញុំបានត្រឡប់ចូលបម្រើការងារនៅក្រសួងសេដ្ឋកិច្ច និងហិរញ្ញវត្ថុវិញក្នុងឆ្នាំ២០១០ ខ្ញុំត្រូវបានចាត់ឱ្យធ្វើការពាក់ព័ន្ធនឹងការបោះផ្សាយលក់មូលបត្រជាលើកដំបូងជាសាធារណៈ (IPO) ដែលជាការធ្វើ IPO លើកដំបូងបំផុត នៅលើក្រុមហ៊ុនផ្សារមូលបត្រកម្ពុជា។ ដោយសារជាលើកដំបូងបំផុតនៅកម្ពុជា ការចុះបញ្ជីបោះផ្សាយលក់មូលបត្ររបស់រដ្ឋាករទឹកស្វយ័តក្រុងភ្នំពេញ (PPWSA) មានបញ្ហាប្រឈមជាច្រើន និងចំណាយពេលយូរជាធម្មតា។ យ៉ាងណាក៏ដោយ PPWSA បានបញ្ចប់នីតិវិធីនៃការចុះបញ្ជីបោះផ្សាយលក់មូលបត្រ ដោយជោគជ័យ នៅក្នុងខែមេសា ឆ្នាំ២០១២ ដោយកៀរគរទុនបានប្រមាណ ២០លានដុល្លារ។ ការវិនិយោគលើភាគហ៊ុនរបស់ PPWSA គឺជាការវិនិយោគដែលមានហានិភ័យទាប ដោយសារ PPWSA គឺជាប្រតិបត្តិករទឹកស្អាតតែមួយគត់ ដែលមានអាជ្ញាបណ្ណនៅទីក្រុងភ្នំពេញ និងក្រុងតាខ្មៅ។ PPWSA ផ្តល់សេវាដែលមិនអាចខ្វះបាន (សេវាទឹកស្អាត) និងមិនមានដៃគូប្រកួតប្រជែងនោះទេ ក្នុងព្រំដែនអាជីវកម្មដែលត្រូវបានអនុញ្ញាត។ PPWSA អាចកំណត់តម្លៃទឹកស្អាត ដោយមិនព្រួយបារម្ភពីការបាត់បង់អតិថិជន។ និយាយឱ្យខ្លី PPWSA ផ្តល់សេវាផ្តាច់មុខ។

ទីផ្សារផ្តាច់មុខ ផ្ទុយគ្នាពីទីផ្សារប្រកួតប្រជែងល្អឥតខ្ចោះ។ នៅក្នុងទីផ្សារផ្តាច់មុខ មានអ្នកលក់តែមួយប៉ុណ្ណោះ និងមានអ្នកទិញច្រើន។ ទីផ្សារនេះមានរបាំង ដែលមិនអនុញ្ញាតឱ្យដៃគូប្រកួតប្រជែងអាចចូលក្នុងទីផ្សារនេះបាន។ អាជីវកម្មក្នុងទីផ្សារផ្តាច់មុខ អាចចាប់យកប្រាក់ចំណេញជាអតិបរមា ដោយផលិតផលិតផល ឬផ្តល់សេវា ក្នុងបរិមាណមួយ ដែលចំណូលក្នុងមួយឯកតាបន្ថែម (Marginal Revenue – MR) ស្មើនឹងចំណាយក្នុងមួយឯកតាបន្ថែម ហើយកំណត់ថ្លៃលក់ខ្ពស់បំផុតតាមដែលអាចធ្វើបាន ល្គឹកណាអតិថិជននៅតែមានឆន្ទៈក្នុងការទិញ។ យ៉ាងណាក៏ដោយ យុទ្ធសាស្ត្រថ្លៃរបស់អាជីវកម្មក្នុងទីផ្សារផ្តាច់មុខតែងតែស្ថិតក្រោមការគ្រប់គ្រងរបស់រដ្ឋ ដើម្បីធានាថាផលិតផល ឬសេវាផ្តាច់មុខនោះ អាចផ្តល់អត្ថប្រយោជន៍ដល់សង្គម។ អាជីវកម្មផ្សេងទៀត ដែលអាចត្រូវបានចាត់ទុកថាផ្តល់សេវាផ្តាច់មុខនៅកម្ពុជា មានដូចជា អគ្គិសនីកម្ពុជា, ក្រុមហ៊ុន ណាហ្គា, ក្រុមហ៊ុន ស៊ីនទ្រី, និងក្រុមហ៊ុនដែលខ្ញុំកំពុងបម្រើការ គឺសាជីវកម្មធានាឥណទានកម្ពុជា។

ទីផ្សារប្រកួតប្រជែង

ប្រសិនអ្នកសួរប្រជាជនកម្ពុជា ថាតើពួកគាត់ប្រើប្រាស់សេវាទូរសព័្ទចល័តមួយណានោះ ពិតណាស់ចម្លើយប្រាកដជា Cellcard, Smart ឬក៏ Metfone ជាមិនខាន។ ក្រុមហ៊ុនទាំងបីនេះ គឺជាក្រុមហ៊ុននាំមុខក្នុងទីផ្សារសេវាទូរសព័្ទចល័ត ដែលក្តោបក្តាប់ចំណែកទីផ្សារលើសពី ៩០%។ Cellcard, Smart និង Metfone ប្រកួតប្រជែងគ្នាយ៉ាងខ្លាំង លើគ្រប់ផ្នែក ទាំងថ្លៃ, ទាំងផលិតផល, ទាំងនវានុវត្តន៍, និងទាំងការផ្សាយពាណិជ្ជកម្មជាដើម។ ធ្លាប់មានក្រុមហ៊ុនសេវាទូរសព័្ទចល័តមួយចំនួនបានព្យាយាមចូលក្នុងទីផ្សារនេះ ប៉ុន្តែបានដកខ្លួនវិញ ដូចជា ក្រុមហ៊ុន Beelines និង QB ជាដើម។ សេវាទូរសព័្ទចល័ត គឺជាទីផ្សារប្រកួតប្រជែង (Oligopoly)។ ខ្ញុំមិនដឹងថាតើត្រូវបកប្រែ Oligopoly ជាភាសាខ្មែរ ឱ្យបានត្រឹមត្រូវថាម៉េចនោះទេ។ ពាក្យនេះហាក់មិនទាន់មានជាភាសាខ្មែរនៅឡើយទេ។

ទីផ្សារប្រកួតប្រជែង (Oligopoly) គឺជាទីផ្សារដែលមានអាជីវកម្មក្នុងចំនួនតិចដែលប្រកួតប្រជែងគ្នា និងក្តោបក្តាប់ទីផ្សារ។ ទីផ្សារប្រភេទនេះ មានការប្រកួតប្រជែងគ្នាខ្លាំង ហើយការចូលក្នុងទីផ្សារនេះ មានការលំបាកខ្លាំង។ យុទ្ធសាស្ត្រដែលប្រើដោយអាជីវកម្មមួយក្នុងទីផ្សារនេះ មានឥទ្ធិពលលើការកំណត់យុទ្ធសាស្ត្រឆ្លើយតបរបស់អាជីវកម្មផ្សេងទៀត។ ដោយសារតែមានអាជីវកម្មក្នុងចំនួនតិច អាជីវកម្មទាំងអស់ក្នុងទីផ្សារនេះអាចនឹងសហការគ្នា ក្នុងការកំណត់បរិមាណផលិតផល និងកំណត់ថ្លៃ ដើម្បីទទួលបានប្រាក់ចំណេញអតិបរមា ដើម្បីចែកគ្នា (collusion) ហើយពួកគេធ្វើប្រតិបត្តិការអាជីវកម្ម ហាក់បីដូចជាអាជីវកម្មផ្តាច់មុខ។ ទីផ្សារប្រកួតប្រជែង (Oligopoly) ផ្សេងទៀតនៅកម្ពុជា អាចជាទីផ្សារផ្សារទំនើប (ផ្សារទំនើបឡាក់គី, ផ្សារទំនើបអុីអន, ផ្សារទំនើបជីបម៉ុង), ទីផ្សារប្រេងឥន្ទនៈលក់រាយ (តូតាល់, តេឡា, និងកាល់តិច), និងទីផ្សាររោងភាពយន្ត (លេជេន និង មេជ័រ ស៊ីណេផ្លិច)។

អាជីវកម្មនៅក្នុងរចនាសម្ព័ន្ធទីផ្សារខុសគ្នា ត្រូវកំណត់យុទ្ធសាស្ត្រអាជីវកម្មខុសគ្នាដើម្បីដំណើរការ និងប្រកួតប្រជែង។ ដូច្នេះ តើរចនាសម្ព័ន្ធទីផ្សារមួយណា ល្អជាងគេ? មិនមានរចនាសម្ព័ន្ធទីផ្សារណាមួយល្អបំផុតនោះទេ។ រចនាសម្ព័ន្ធទីផ្សារនីមួយៗមានចំណុចល្អ និងចំណុចមិនល្អរៀងៗខ្លួន អាស្រ័យលើទីផ្សារជាក់លាក់ និងគោលនយោបាយរបស់រដ្ឋាភិបាលចំពោះទីផ្សារទាំងនោះ៕

តារាងសង្ខេបអំពីរចនាសម្ព័ន្ធទីផ្សារ

អាននិងទាញយកជា PDF: ការស្វែងយល់អំពីរចនាសម្ព័ន្ធទីផ្សារ

 

ស្វែងយល់អំពីការធានាឥណទាន – កិច្ចសម្ភាសន៍ជាមួយមួយគ្រឹះស្ថានហិរញ្ញវត្ថុចូលរួម ធនាគារ ព្រីនស៍

Posted on by Sorn Chhorvyvatey

១. តើធនាគារ ព្រីនស៍ យល់ឃើញដូចម្តេច ចំពោះគម្រោងធានាឥណទាន? ហេតុអ្វីបានជា ព្រីនស៍ ចូលរួមជាដៃគូជាមួយ CGCC?

នៅធនាគារ ព្រីនស៍ យើងមានចក្ខុវិស័យច្បាស់លាស់ក្នុងការជួយអតិថិជនរបស់យើងឱ្យសម្រេចបាននូវកំណើនប្រកបដោយនិរន្តរភាពតាមរយៈការគាំទ្រពេញលេញ និងជម្រើសផ្តល់ប្រាក់កម្ចីដែលមានភាពបត់បែន។ ភាពជាដៃគូយុទ្ធសាស្រ្តរវាងធនាគារ ព្រីនស៍ និងសាជីវកម្មធានាឥណទានកម្ពុជា (CGCC) ជាកាតាលីករជួយធ្វើឱ្យធនាគារ ព្រីនស៍ ខិតកាន់តែជិតដល់ការសម្រេចបាននូវចក្ខុវិស័យរបស់ខ្លួនថែមទៀត ក្នុងការផ្តល់លទ្ធភាពដល់សហគ្រិនឱ្យទទួលបានហិរញ្ញប្បទានកាន់តែប្រសើរជាងមុនសម្រាប់គាំទ្រប្រតិបត្តិការពង្រីកអាជីវកម្ម និងភាពរីកចម្រើនរបស់ពួកគាត់ប្រកបដោយសុខដុមរមនា។ ជាមួយនឹងគម្រោងធានាឥណទាន យើងជឿជាក់យ៉ាងមុតមាំថា ការគាំទ្រផ្នែកហិរញ្ញវត្ថុរបស់យើង គឺលើសពីការរំពឹងទុករបស់អតិថិជន។

២. តើគម្រោងធានាឥណទានបានផ្តល់អត្ថប្រយោជន៍ដូចម្តេចខ្លះចំពោះធនាគារ ព្រីនស៍ និងអតិថិជន?

ជាមួយនឹងលទ្ធភាពនៃគម្រោងការធានាឥណទាន ធនាគារ ព្រីនស៍ និងអតិថិជនរបស់យើង ទទួលបាននូវអត្ថប្រយោជន៍ជាច្រើន ជាពិសេសទាក់ទងនឹងកម្រិតហានិភ័យសម្រាប់ធនាគារ និងកម្រិតហិរញ្ញប្បទានធំជាងមុនសម្រាប់អតិថិជន ដើម្បីបំពេញតម្រូវការអាជីវកម្មរបស់ពួកគាត់ដោយមិនគិតពីលទ្ធភាពនៃទ្រព្យធានារបស់ពួកគាត់ឡើយ។

៣. តើកន្លងមក ធនាគារ ព្រីនស៍ បានប្រើប្រាស់ការធានាឥណទានដើម្បីផ្តល់កម្ចីប្រភេទណាខ្លះ ជូនដល់អតិថិជន?

ចាប់តាំងពីការចាប់ផ្តើមនៃភាពជាដៃគូជាមួយ CGCC មក ធនាគារ ព្រីនស៍ បានប្រើប្រាស់នូវប្រភេទឥណទានជូនអតិថិជនដូចខាងក្រោម៖

  • ឥណទានអាជីវកម្មមានកាលកំណត់
  • ឥណទានវិបារូបន៍
  • សេវាហិរញ្ញប្បទានពាណិជ្ជកម្ម

៤. តើម្ចាស់អាជីវកម្ម គួររៀបចំខ្លួនយ៉ាងដូចម្តេច ដើម្បីទទួលបានកម្ចីដែលមានការធានាពី ធនាគារ ព្រីនស៍?

ដើម្បីទទួលបានប្រាក់កម្ចីពីធនាគារ ព្រីនស៍ អតិថិជនគួរតែយកចិត្តទុកដាក់ក្នុងការរៀបចំផែនការអាជីវកម្មរបស់ពួកគាត់ និងកំណត់តម្រូវការហិរញ្ញវត្ថុរបស់ខ្លួនសម្រាប់ការរីកចម្រើនប្រកបដោយចីរភាព។ បន្ទាប់មក ពួកគាត់អាចពិគ្រោះជាមួយអ្នកជំនាញផ្តល់ប្រាក់កម្ចីនៅសាខាណាមួយរបស់ធនាគារ ព្រីនស៍ ដែលនៅជិតពួកគាត់បំផុតសម្រាប់ព័ត៌មានបន្ថែមអំពីគម្រោងដែលគាត់អាចស្នើបាន។ នៅពេលដែលពួកគាត់បានពិភាក្សា និងសម្រេចចិត្តលើគម្រោងណាមួយហើយ ពួកគាត់អាចដាក់សំណើមកកាន់ធនាគារ ព្រីនស៍ ដើម្បីយើងខ្ញុំចាប់ផ្តើមដំណើរការសិក្សាវាយតម្លៃ និងអនុម័តសំណើឥណទាននោះតាមគោលការណ៍របស់ធនាគារ។ សំណើនេះ នឹងត្រូវបានពិនិត្យឡើងវិញដោយ CGCC សម្រាប់ការអនុម័តចុងក្រោយលើគម្រោងធានា និងកម្រិតឥណទានដែលបានស្នើសុំ ឬធនាគារ ព្រីនស៍ ស្នើសុំចុះកិច្ចធានាឥណទានដែលបានអនុម័តរួចដោយគណៈកម្មការផ្ទៃក្នុងរបស់ធនាគារ ជាមួយសាជីវកម្មធានាឥណទានកម្ពុជា។

៥. តើធនាគារ ព្រីនស៍ មានយុទ្ធសាស្រ្ត ឬផែនការដូចម្តេច ដើម្បីបន្តបង្កើនការបញ្ចេញកម្ចីដែលមានការធានាក្នុងឆ្នាំ២០២៤ នេះ ក៏ដូចជាឆ្នាំបន្ទាប់?

ឆ្នាំ២០២៤ នៅតែជាឆ្នាំដ៏លំបាកសម្រាប់អ្នកគ្រប់គ្នា ប៉ុន្តែធនាគារ ព្រីនស៍ ក៏នៅតែបន្តបើកការផ្តល់ឥណទានដល់អតិថិជនរបស់យើង ហើយយើងបានបន្តផ្សព្វផ្សាយនៅលើបណ្តាញផ្សព្វផ្សាយសង្គម គេហទំព័ររបស់ធនាគារ ព្រីនស៍ និងភ្នាក់ងារសារព័ត៌មាន អំពីគម្រោងធានាឥណទានដើម្បីជួយពួកគាត់ ប្រសិនបើពួកគាត់មិនមានទ្រព្យធានាគ្រប់គ្រាន់សម្រាប់កម្ចី។ យើងនឹងនៅតែបន្តនូវបេសកកម្មរបស់យើងប្រកបដោយការប្តេជ្ញាខ្ពស់ ក្នុងភាពជាដៃគូជាមួយ CGCC ដើម្បីផ្តល់ឥណទានជូនអតិថិជនរបស់យើង តាមរយៈការប្រើប្រាស់គម្រោងកិច្ចធានាឥណទានដែល CGCC មានស្រាប់ និងគម្រោងកិច្ចធានាឥណទានថ្មី ដែលស័ក្តិសមប្រសិនបើមានសម្រាប់ឆ្នាំ២០២៥ ខាងមុខនេះ។

អាននិងទាញយកជា PDF: ស្វែងយល់អំពីការធានាឥណទាន – កិច្ចសម្ភាសន៍ជាមួយមួយគ្រឹះស្ថានហិរញ្ញវត្ថុចូលរួម ធនាគារ ព្រីនស៍

 

CMA និង CGCC រួមគ្នាលើកកម្ពស់បរិយាបន្នហិរញ្ញវត្ថុនៅកម្ពុជា

Posted on by Sorn Chhorvyvatey

ភ្នំពេញ៖ សមាគមមីក្រូហិរញ្ញវត្ថុកម្ពុជា(CMA) និងសាជីវកម្មធានាឥណទានកម្ពុជា (CGCC) បានចុះអនុស្សរណៈនៃការយោគយល់គ្នា (MOU) ដើម្បីលើកកម្ពស់បរិយាបន្នហិរញ្ញវត្ថុ ប្រកបដោយនិរន្តរភាពនៅកម្ពុជា។ ការប្រកាសពីភាពជាដៃគូនេះ ធ្វើឡើង នៅក្នុងក្នុង សន្និបាតស្តីពី«ការធ្វើនវានុវត្តន៍យន្តការធានាឥណទាន ដើម្បីគាំទ្រហិរញ្ញប្បទានបៃតង» កាលពីថ្ងៃទី២៤ ខែមករា។

យោងតាមសេចក្តីប្រកាសព័ត័មានរួម របស់ CMA និង CGCC កិច្ចសហប្រតិបត្តិការនេះ មានរយៈពេល៣ឆ្នាំ និងមានគោលបំណងជំរុញដល់ការអភិវឌ្ឍគ្រឹះស្ថានធនាគារ និងហិរញ្ញវត្ថុ (BFIs) និងគាំទ្រសហគ្រាសធុនមីក្រូ ខ្នាតតូច និងមធ្យម (MSMEs) តាមរយៈការអភិវឌ្ឍសមត្ថភាព សេវាហិរញ្ញវត្ថុឌីជីថល និងការលើកកម្ពស់ចំណេះដឹងផ្នែកហិរញ្ញវត្ថុ។
តាមរយៈ  MOUនេះ ស្ថាប័នទាំងពីរ ប្តេជ្ញាដូច្នេះ៖  «CMA និង CGCC នឹងធ្វើការរួមគ្នា ដើម្បីពង្រឹង និងអភិវឌ្ឍសមត្ថភាព MSMEs BFIs និងភាគីពាក់ព័ន្ធនានា ដោយរៀបចំវគ្គបណ្តុះបណ្តាល សិក្ខាសាលា និងធ្វើការសិក្សាស្រាវជ្រាវនានា ក្នុងគោលដៅលើកកំពស់ចំណេះដឹងផ្នែកហិរញ្ញវត្ថុ ជំរុញសេវា ហិញ្ញវត្ថុឌីជីថល និងការគាំទ្រគំនិតផ្តួចផ្តើមវិស័យបៃតងនៅកម្ពុជា។»។
ស្ថាប័នទាំងពីរប្តេជ្ញាចិត្ត ប្រើប្រាស់ធនធានដែល ខ្លួនមាន ដើម្បីធានាឱ្យបាន នូវការអនុវត្តប្រកបដោយជោគជ័យ នូវគំនិតផ្តួចផ្តើម ផ្សេងៗក្នុងគោលបំណងជំរុញការរួមចំណែក របស់វិស័យហិរញ្ញវត្ថុ ដល់ការអភិវឌ្ឍសេដ្ឋកិច្ចកម្ពុជា។ នេះបើតាមសេចក្តីប្រកាសព័ត៌មានដដែល។
លោក ហួត អៀងតុង តំណាងសមាគមមីក្រូហិរញ្ញវត្ថុកម្ពុជា បានមានប្រសាសន៍ថា «កិច្ចសហ ប្រតិបត្តិការនេះ គឺជាជំហ៊ានដ៏សំខាន់មួយក្នុងការលើកកម្ពស់បរិយាបន្នហិរញ្ញវត្ថុនៅកម្ពុជា។
លោក ហួត អៀងតុង បន្តថា៖«តាមរយៈការរួមបញ្ចូលគ្នាទាំងធនធាន និងជំនាញ យើងអាចបង្កើតនូវប្រព័ន្ធហិរញ្ញវត្ថុដ៏រឹងមាំ ដែលគាំទ្រការលូតលាស់ នៃអាជីវកម្មធុនមីក្រូ តូច និងមធ្យម (MSMEs) ព្រមទាំងចូលរួមក្នុងការអភិវឌ្ឍនៅ ប្រទេសកម្ពុជាប្រកបដោយនិរន្តរភាព។»
ក្នុងពិធីនោះដែរ លោក ណូ លីដា អគ្គនាយក CGCC បានមានប្រសាសន៍ថាអនុស្សរណៈនៃការយោគយល់គ្នានេះ គឺជាសក្ខីភាពនៃការប្តេជ្ញាចិត្តរួមគ្នា របស់ CGCC និង CMA ក្នុងការជំរុញកំណើនសេដ្ឋកិច្ច និងនិរន្តរភាពនៅកម្ពុជា។
លោក ណូ លីដា បន្ថែមថា៖ «CGCC មានសេចក្តីសោមនស្សក្នុងការ សហការជាមួយ CMA ដើម្បីពង្រឹងចំណេះដឹងផ្នែកហិរញ្ញវត្ថុ និងផ្តល់លទ្ធភាពទទួលបានសេវាហិរញ្ញ វត្ថុកាន់តែប្រសើរឡើង។ CGCC និង CMA ក៏ដូចជាសមាជិករបស់ CMA នឹងមានឱកាសជាច្រើន ក្នុងការប្រើប្រាស់ការធានាឥណទាន ដើម្បីបង្កើនការផ្តល់ប្រាក់កម្ចីចាំបាច់ដល់អាជីវកម្ម ដែលមិនមានលទ្ធ ភាពទទួលបានសេវាហិរញ្ញវត្ថុនៅទូទាំងប្រទេស។ »៕

សេចក្តីប្រកាសព័ត៌មាន CMA និង CGCC បង្កើតភាពជាដៃគូយុទ្ធសាស្ត្រដើម្បីពង្រឹងបរិយាបន្នហិរញ្ញវត្ថុ

Posted on by Sorn Chhorvyvatey

 

ទាញយកសេចក្តីប្រកាសព័ត៌មាន

 

សេចក្តីប្រកាសព័ត៌មាន សន្និបាតប្រចាំឆ្នាំរបស់សាជីវកម្មធានាឥណទានកម្ពុជា ក្រោមប្រធានបទ “ការធ្វើនវានុវត្តន៍យន្តការធានាឥណទាន ដើម្បីគាំទ្រហិរញ្ញប្បទានបៃតង”

Posted on by Sorn Chhorvyvatey

នៅថ្ងៃទី២៣ ខែមករា ឆ្នាំ២០២៥ ក្រសួងសេដ្ឋកិច្ច និងហិរញ្ញវត្ថុ និងសាជីវកម្មធានាឥណទានកម្ពុជា បានសហការរៀបចំសន្និបាតប្រចាំឆ្នាំរបស់សាជីវកម្មធានាឥណទានកម្ពុជា (CGCC) ស្តីពី “ការធ្វើនវានុវត្តន៍យន្តការធានាឥណទាន ដើម្បីគាំទ្រហិរញ្ញប្បទានបៃតង” ក្រោមអធិបតីភាពដ៏ខ្ពង់ខ្ពស់របស់ ឯកឧត្តម រស់ សីលវ៉ា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ តំណាងដ៏ខ្ពង់ខ្ពស់បំផុតរបស់ ឯកឧត្តមអគ្គបណ្ឌិតសភាចារ្យ ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ នៅសណ្ឋាគារ ហៃយ៉ាត់ រីជិនស៊ី ភ្នំពេញ។ 

សន្និបាតប្រចាំឆ្នាំរបស់ CGCC ត្រូវបានរៀបចំឡើង ក្នុងគោលបំណង ដើម្បីពិនិត្យ និងវាយតម្លៃអំពីវឌ្ឍនភាពនៃយន្តការធានាឥណទានរបស់រាជរដ្ឋាភិបាល, សម្ពោធ​​ដាក់ឱ្យដំណើរការគម្រោងធានាឥណទានសាធារណៈថ្មីៗ និងជាវេទិកាចែករំលែកមេរៀន និងបទពិសោធន៍នៃការធ្វើនវានុវត្តន៍យន្តការធានាឥណទាន ដើម្បីគាំទ្រហិរញ្ញប្បទានបៃតង ឱ្យកាន់តែមានប្រសិទ្ធភាព សម្រាប់ការគាំទ្របរិយាន្នហិរញ្ញវត្ថុ និងអភិវឌ្ឍសហគ្រាសខ្នាតតូច និងមធ្យមនៅកម្ពុជា​។ សន្និបាតនេះ មានអ្នកចូលរួមដែលជាតំណាងមកពីស្ថាប័នរដ្ឋ ដៃគូអភិវឌ្ឍន៍ជាតិ និងអន្តរជាតិ ធនាគារនិងគ្រឹះស្ថានមីក្រូហិរញ្ញវត្ថុ ក្រុមហ៊ុនមូលបត្រ សមាគមអាជីវកម្ម និងស្ថាប័នពាក់ព័ន្ធនានា សរុបប្រមាណ ១៥០រូប។  

តាមរយៈសន្និបាតនេះ ឯកឧត្តម រស់ សីលវ៉ា បានដាក់ឱ្យសម្ពោធជាផ្លូវការ “គម្រោងធានាឥណទានបោះដុំ” របស់ CGCC ដើម្បីផ្តល់ការធានាលើកម្ចីអាជីវកម្មដែលមានស្រាប់ របស់គ្រឹះស្ថានហិរញ្ញវត្ថុចូលរួម (PFIs) ក្នុងគោលបំណងចែករំលែកហានិភ័យជាមួយគ្រឹះស្ថានហិរញ្ញវត្ថុចូលរួម និងកាត់បន្ថយកម្រិតថ្លឹងហានិភ័យនៃអ៊ិចស្ពូស៊ើដែលមានការធានាដោយ CGCC។ យោងលើប្រកាសស្តីពីហានិភ័យឥណទានសម្រាប់អនុបាតភាពគ្រប់គ្រាន់នៃដើមទុនរបស់គ្រឹះស្ថានធនាគារ និងហិរញ្ញវត្ថុទទួលប្រាក់បញ្ញើ របស់ធនាគារជាតិនៃកម្ពុជា ចុះថ្ងៃទី២៩​ ខែមិថុនា ឆ្នាំ២០២៣ អ៊ិចស្ពូស៊ើចារឹកជាប្រាក់រៀល ឬរូបិយបណ្ណដែលមានការធានាច្បាស់លាស់ និងឥតលក្ខខណ្ឌដោយរាជរដ្ឋាភិបាលកម្ពុជា រាប់បញ្ចូលទាំងការធានាដោយគម្រោងធានាឥណទានដែលបង្កើតដោយរាជរដ្ឋាភិបាលកម្ពុជា ត្រូវបានថ្លឹងហានិភ័យសូន្យភាគរយ។

 

ជាមួយគ្នានេះ ឯកឧត្តម រស់ សីលវ៉ា ក៏បានផ្តល់លិខិតកោតសរសើររបស់ក្រសួងសេដ្ឋកិច្ច និងហិរញ្ញវត្ថុ ជូនគ្រឹះស្ថានហិរញ្ញវត្ថុចូលរួមឆ្នើមរបស់ CGCC ប្រចាំឆ្នាំ ចំនួន៥ រួមមាន ធនាគារ ព្រីនស៍, ធនាគារ ស្ថាបនា, ធនាគារ កាណាឌីយ៉ា, គ្រឹះស្ថានមីក្រូហិរញ្ញវត្ថុ អិល អូ អិល ស៊ី, និងធនាគារ វឌ្ឍនៈអាស៊ី ចំកាត់, ដែលបានបញ្ចេញកម្ចីមានការធានាបានច្រើនជាងគេក្នុងឆ្នាំ ២០២៤ និងលិខិតកោតសរសើរពិសេស ជូនដល់ ធនាគារ ហ្វីលីព  ដែលរក្សាបាននូវគុណភាពកម្ចីមានការធានាបានល្អជាងគេ គិតត្រឹមបំណាច់ឆ្នាំ២០២៤។ 

 

ឯកឧត្តម រស់ សីលវ៉ា បានលើកឡើងថា៖ “ការធានាចីរភាពនៃការអភិវឌ្ឍសង្គម-សេដ្ឋកិច្ច និងកសាងភាពធន់ទៅនឹងការប្រែប្រួលអាកាសធាតុ គឺជាគោលដៅយុទ្ធសាស្ត្រ របស់រាជរដ្ឋាភិបាល ដោយផ្តោតអាទិភាពលើការបង្កើនហិរញ្ញប្បទានចីរភាពនិងបៃតង ដើម្បីបង្កើនលំហូរហិរញ្ញវត្ថុឆ្ពោះទៅរកការវិនិយោគបៃតង និងសេដ្ឋកិច្ចបៃតង និងជំរុញការវិនិយោគសាធារណៈដែលមានភាពធន់នឹងអាកាសធាតុ និងមានការបញ្ចេញកាបូនទាប ជាដើម។ ការវិនិយោគលើការប្រែប្រួលអាកាសធាតុ មិនត្រឹមតែអាចនាំមកនូវផលចំណេញផ្នែកហិរញ្ញវត្ថុប៉ុណ្ណោះទេ ប៉ុន្តែក៏អាចផ្តល់ចំណេញដល់សង្គម-សេដ្ឋកិច្ចផងដែរ។ ដូច្នេះ ខ្ញុំសូមលើកទឹកចិត្តឱ្យភាគីពាក់ព័ន្ធផ្តោតការយកចិត្តទុកដាក់លើកិច្ចសហប្រតិបត្តិការជាមួយស្ថាប័នរាជរដ្ឋាភិបាល ក្នុងការពិនិត្យលទ្ធភាពបង្កើតផលិតផលហិរញ្ញវត្ថុ, រៀបចំនិងអនុវត្តគម្រោង, ព្រមទាំងការរៀបចំយន្តការគាំទ្រនានា ដើម្បីបង្កើនការផ្តល់ហិរញ្ញប្បទានបៃតងនៅកម្ពុជា។  

នៅក្នុងសន្និបាតនេះ ក៏មាននូវការប្រារព្ធពិធីចុះហត្ថលេខាលើកិច្ចព្រមព្រៀងធានាឥណទាន រវាង CGCC និងគ្រឹះស្ថានហិរញ្ញវត្ថុចូលរួមថ្មីចំនួន២ គឺ ធនាគារសហគ្រាសធុនតូច និងមធ្យម កម្ពុជា និង ធនាគារ ស៊ិនហាន និងពិធីចុះហត្ថលេខាលើអនុស្សរណៈនៃការយោគយល់គ្នារវាង CGCC និងសមាគមមីក្រូហិរញ្ញវត្ថុកម្ពុជា លើកិច្ចសហប្រតិបត្តិការសំដៅគាំទ្រដល់ការលើកកម្ពស់បរិយាបន្នហិរញ្ញវត្ថុ និងចំណេះដឹងហិរញ្ញវត្ថុដល់សហគ្រាសខ្នាតតូច និងមធ្យម​ផងដែរ។ 

 

គោលបំណងសំខាន់មួយទៀតនៃសន្និបាតប្រចាំឆ្នាំរបស់ CGCC គឺការចែករំលែកនូវចំណេះដឹង និងបទពិសោធន៍ទាក់ទងនឹងការធានាឥណទាន តាមរយៈកិច្ចពិភាក្សាស្តីពី “ការធ្វើនវានុវត្តន៍យន្តការធានាឥណទាន ដើម្បីគាំទ្រហិរញ្ញប្បទានបៃតង”  ដោយមានការចូលរួមពីវាគ្មិនកិត្តិយស រួមមាន Mr. Kittipong Buranasiri តំណាងស្ថាប័នធានាឥណទានថៃ, Ms. Lee Hyeok តំណាងមូលនិធិធានាឥណទានកូរ៉េ, Mr. Mohamed Azman Mohamed Taufik តំណាងសាជីវកម្មធានាឥណទានម៉ាឡេស៊ី, និង លោក ញឹម សូរិយា តំណាងសាជីវកម្មធានាឥណទានកម្ពុជា ក្រោមការសម្របសម្រួលពី Mr. Shakeel Ahmad អ្នកតំណាងរងប្រចាំប្រទេស របស់កម្មវិធីអភិវឌ្ឍន៍សហប្រជាជាតិ (UNDP) ប្រចាំនៅកម្ពុជា។ 

CGCC គឺជាសហគ្រាសសាធារណៈ ក្រោមអាណាព្យាបាលបច្ចេកទេស និងហិរញ្ញវត្ថុរបស់ក្រសួងសេដ្ឋកិច្ច និងហិរញ្ញវត្ថុ ដែលមានបេសកកម្មចម្បងក្នុងការផ្តល់ការធានាឥណទាន ដើម្បីបង្កើនបរិយាបន្នហិរញ្ញវត្ថុ និងអភិវឌ្ឍសហគ្រាសធុនតូច និងមធ្យម។ CGCC បានដាក់ឱ្យដំណើរការគម្រោងធានាឥណទានឯកត្តឥណទានចំនួន ៥គម្រោង, កិច្ចព្រមព្រៀងលើគម្រោងធានាឥណទានជាកញ្ចប់ចំនួន ១៧, គម្រោងធានាឥណទានលើការបោះផ្សាយសញ្ញាប័ណ្ណ និងកម្មវិធីកសាងសមត្ថភាពសហគ្រិនរបស់CGCC។ គិតត្រឹមថ្ងៃទី៣១ ខែធ្នូ ឆ្នាំ២០២៤ បន្ទាប់ពីប្រតិបត្តិការរយៈពេល៤ឆ្នាំ CGCC បានអនុម័តការធានាឥណទានចំនួន ៣.១៣៩ គណនី លើកម្ចីប្រមាណ ២៥៦,៥៨ លានដុល្លារ ជូនដល់ក្រុមហ៊ុនអាជីវកម្មនៅទូទាំងប្រទេស ដែលអាជីវកម្មទាំងនោះ បានផ្តល់នូវឱកាសការងារជូនដល់កម្មករនិយោជិត ជាង ៣ម៉ឺននាក់៕

 

CGCC ចូលរួមក្នុងកិច្ចពិភាក្សាលើ ហិរញ្ញវត្ថុសម្រាប់អាជីវកម្មធុនតូច និងមធ្យម

Posted on by Sorn Chhorvyvatey

នាថ្ងៃទី០៤ ខែមករា ឆ្នាំ២០២៥ នៅការិយាល័យសហគ្រិនខ្មែរ លោក យុន ផន ប្រធាននាយកដ្ឋានយុទ្ធសាស្រ្ត និងអភិវឌ្ឍន៍អាជីវកម្មនៃ CGCC  បានចូលរួមជាវាគ្មិនកិត្តិយសមួយរូបក្នុងកិច្ចពិភាក្សាលើប្រធានបទ “ហិរញ្ញវត្ថុសម្រាប់អាជីវកម្មធុនតូច និងមធ្យម” ដែលត្រូវបានរៀបចំឡើងនៅក្នុងជំនួបលើកចុងក្រោយ នៃកម្មវិធី​ហិរញ្ញវត្ថុសម្រាប់អាជីវកម្ម រដូវកាលទី២ ដោយសហគ្រិនខ្មែរ។

តាមរយៈកិច្ចពិភាក្សានេះ លោក យុន ផន បានចែករំលែកអំពីយន្តការធានាឥណទាន និងអត្ថប្រយោជន៍សម្រាប់សហគ្រាសធុនតូច និងមធ្យម ក្នុងការពង្រីកលទ្ធភាពទទួលបានហិរញ្ញប្បទានផ្លូវការពីគ្រឹះស្ថានហិរញ្ញវត្ថុ តាមរយៈសេវាកម្ម និងផលិតផលរបស់ CGCC ដែលរួមមាន ការធានាលើកម្ចីអាជីវកម្ម ការធានាសញ្ញាប័ណ្ណ និងកម្មវិធីកសាងសមត្ថភាពសម្រាប់សហគ្រិនរបស់ CGCC ដើម្បីជួយអភិវឌ្ឍអាជីវកម្មខ្នាតតូចនិងមធ្យមនៅកម្ពុជា។

សហគ្រិនដែលជាម្ចាស់អាជីវកម្មទាំងអស់ មិនត្រឹមតែបានយកចិត្តទុកដាក់យ៉ាងខ្លាំងក្នុងការស្វែងយល់ពីការចែករំលែករបស់វាគ្មិនកិត្តិយស ទៅលើទិដ្ឋភាព និងនិន្នាការនៃហិរញ្ញប្បទានសម្រាប់អាជីវកម្មខ្នាតតូច និងមធ្យមនៅកម្ពុជា​ រួមទាំងបញ្ហាប្រឈម និងដំណោះស្រាយប៉ុណ្ណោះទេ តែថែមទាំងមានឱកាសបានលើកឡើងនូវសំណួរនានាដែលពួកគាត់បាននិងកំពុងជួបប្រទះ ដើម្បីទទួលបានអនុសាសន៍ពីវាគ្មិនយកទៅកែលម្អលើប្រតិបត្តិការអាជីវកម្ម និងពង្រីកចំណេះដឹងហិរញ្ញវត្ថុ ដែលជាមូលដ្ឋានគ្រឹះក្នុងការបង្កើនលទ្ធភាពអភិវឌ្ឍន៍អាជីវកម្មរបស់ខ្លួន សម្រាប់ការទទួលបានហិរញ្ញប្បទានប្រកបដោយលក្ខខណ្ឌអនុគ្រោះនានា៕

 

CGCC ចូលរួមជាវាគ្មិនកិត្តិយសក្នុងកម្មវិធី លុយខ្ញុំ ជីវិតខ្ញុំ របស់វិទ្យុស្រ្តីកម្ពុជា គាំទ្រដោយសមាគមធនាគារនៅកម្ពុជា

Posted on by Sorn Chhorvyvatey

នាថ្ងៃទី១៩​ ខែធ្នូ ឆ្នាំ២០២៤ លោកស្រី ពិន ម៉ានីកា ប្រធានការិយាល័យទីផ្សារ និងអភិវឌ្ឍន៍អាជីវកម្មនៃសាជីវកម្មធានាឥណទានកម្ពុជា (CGCC) បានចូលរួមជាវាគ្មិនកិត្តិយសមួយរូប នៅក្នុងកម្មវិធី លុយខ្ញុំ ជីវិតខ្ញុំ ដែលផលិតដោយ វិទ្យុស្ត្រី គាំទ្រដោយ សមាគមធនាគារនៅកម្ពុជា (ABC) ដែលប្រធានបទនៃកម្មវិធីនេះ ត្រូវបានរៀបចំឡើងដើម្បីបញ្ជ្រាបការយល់ដឹងដល់សាធារណជនទាក់ទងនឹងCGCC, លក្ខខណ្ឌ និងនីតិវិធីដើម្បីទទួលបានការធានា និងជាពិសេសគឺអត្ថប្រយោជន៍​នៃយន្តការធានាឥណទានសម្រាប់អាជីវកម្ម។ 

 

តាមរយៈកម្មវិធីនេះ លោកស្រីម៉ានីកា បានចូលរួមចែករំលែកអំពីតួនាទី ផលិតផល និងសេវាកម្មរបស់ CGCC ដើម្បីបញ្ជ្រាបឱ្យសាធារណជនបានស្គាល់អំពី CGCC កាន់តែច្បាស់ និងអាចឱ្យម្ចាស់អាជីវកម្មអាចទាញយកអត្ថប្រយោជន៍ពីការប្រើប្រាស់សេវាធានាឥណទាន តាមរយៈការស្នើសុំកម្ចីទៅកាន់គ្រឹះស្ថានហិរញ្ញវត្ថុធនាគារ/មីក្រូហិរញ្ញវត្ថុ ដែលជាដៃគូរបស់ CGCC ក្នុងករណីខ្វះឬមិនមានទ្រព្យធានាគ្រប់គ្រាន់។ មិនតែប៉ុណ្ណោះ លោកស្រីក៏បានលើកយកករណីជោគជ័យ នៃសហគ្រិនស្រ្តីមួយរូប ដែលបានស្នើកម្ចីពីគ្រឹះស្ថានធនាគារដៃគូរបស់ CGCC ដែលមានការធានាពី CGCC ដែលបានជួយពង្រីកលទ្ធភាពទទួលបានកម្ចី ក្នុងការប្រើប្រាស់ចាំបាច់។ បន្ថែមពីលើនេះ លោកស្រីក៏បានចែករំលែកអំពីការចូលរួមរបស់ CGCC លើការកសាងសមត្ថភាព និងលើកកម្ពស់ចំណេះដឹងហិរញ្ញវត្ថុដល់សហគ្រាសធុនតូចនិងមធ្យម ដែលជាការងារអាទិភាពមួយក្នុងចំណោមការងារអាទិភាពនានារបស់ CGCC។

ជាអនុសាសន៍និងសំណូមពរ ដល់សហគ្រាស និងម្ចាស់អាជីវកម្ម (SMEs) លោកស្រីបានលើកទឹកចិត្តឱ្យពួកគាត់គួរតែត្រៀមខ្លួនអោយបានល្អ ក្នុងការទទួលកម្ចីផ្លូវការ តាមរយៈការរៀបចំរបាយការណ៍ហិរញ្ញវត្ថុឱ្យបានត្រឹមត្រូវ និងតាមស្តង់ដារ ដើម្បីអាចអភិវឌ្ឍខ្លួនឱ្យបានវែងឆ្ងាយទៅជាក្រុមហ៊ុនអាជីវកម្មស្តង់ដារ និងសំណូមពរដល់គ្រឹះស្ថានហិរញ្ញវត្ថុដៃគូរបស់ CGCC ឱ្យបន្តផ្សព្វផ្សាយបន្ថែមដល់បុគ្គលិក និងសាខាទាំងអស់ អំពីសេវាធានាឥណទានរបស់CGCC ដែលអាចជួយសម្រួលតម្រូវការទ្រព្យធានា និងជំរុញលទ្ធភាពទទួលបានកម្ចីផ្លូវការរបស់ SME៕

 

កម្មវិធីកសាងសមត្ថភាពសហគ្រិនរបស់ CGCC (EPIC) វគ្គទី៣ នៃឆ្នាំ២០២៤

Posted on by Sorn Chhorvyvatey

ថ្ងៃទី០៦ ខែធ្នូ ឆ្នាំ២០២៤ នៅមជ្ឈមណ្ឌលអភិវឌ្ឍធុរកិច្ច សាជីវកម្មធានាឥណទានកម្ពុជា (CGCC) សហការជាមួយ ធនាគារ ជេ ត្រាស់ រ៉ូយ៉ាល់ បានរៀបចំកម្មវិធីកសាងសមត្ថភាពសហគ្រិនរបស់ CGCC (EPIC) វគ្គទី៣ នៃឆ្នាំ២០២៤ ស្តីអំពី “ប្រតិបត្តិការអាជីវកម្មក្នុងយុគសម័យឌីជីថល សម្រាប់សហគ្រាសខ្នាតមីក្រូ តូច និងមធ្យម (MSMEs)” ដែលមានការចូលរួមពីសិក្ខាកាមដែលជាម្ចាស់សហគ្រាសខ្នាតមីក្រូ តូច និងមធ្យមសរុបប្រមាណ៥០រូប ក្នុងនោះមាន ​៦៥% ជាសហគ្រិនស្រ្តី និងរួមទាំងនិស្សិតប្រមាណ១០រូប នៃសមាគមសិស្ស-និសិ្សតអាហារូបករណ៍សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត (អ.ម.ត)។

កម្មវិធី EPIC វគ្គទី៣នៃឆ្នាំ ២០២៤នេះ ត្រូវបានចូលរួមជាកិត្តិយសដ៏ខ្ពង់ខ្ពស់ សម្រាប់ពិធីប្រគល់វិញ្ញាបនបត្របញ្ជាក់ការចូលរួមជូនដល់សិក្ខាកាម គ្រូបណ្តុះបណ្តាល និងវាគ្មិនកិត្តិយសទាំងអស់ ពីសំណាក់ឯកឧត្តមបណ្ឌិត ម៉ី វ៉ាន់ រដ្ឋលេខាធិការ ក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមការងារគ្រប់គ្រងនិស្សិត (ក្រុមទី៦) នៃសមាគមសិស្ស-និសិ្សតអាហារូបករណ៍សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត (អ.ម.ត) និងក្រោមចូលរួមជាគណអធិបតីពីសំណាក់ លោកជំទាវ យូ បូរី អនុប្រធានសមាគមស្រ្តីកម្ពុជា, លោក ណូ លីដា អគ្គនាយក CGCC, លោកស្រី ហង់ ជួ​ន ណារីតា នាយិកានាយកដ្ឋានសេវាកម្មធនាគារផ្នែកសាជីវកម្ម នៃធនាគារ ជេ ត្រាស់ រ៉ូយ៉ាល់, លោក ពា វណ្ណឆាយ នាយកផ្នែកសហគ្រាសធុនតូចនិងមធ្យម នៃនាយកដ្ឋានធនាគារសាជីវកម្ម នៃធនាគារ ជេ ត្រាស់ រ៉ូយ៉ាល់ និងគណៈគ្រប់គ្រង នៃCGCC និង ធនាគារ ជេ ត្រាស់ រ៉ូយ៉ាល់។

តាមរយៈ EPIC វគ្គទី៣ នៃឆ្នាំ២០២៤នេះ សិក្ខាកាមទាំងអស់បានស្វែងយល់អំពី “ប្រតិបត្តិការអាជីវកម្មក្នុងយុគសម័យឌីជីថល សម្រាប់សហគ្រាសខ្នាតមីក្រូ តូច និងមធ្យម (MSMEs)” ដែលត្រូវបានចែករំលែកដោយ លោកស្រី សែម ស្រីតូច នាយិកាប្រតិបត្តិ និងស្ថាបនិកសហគ្រាស អ៊ីភីអិល ផូលីនែត និងជាប្រធានសមាគមទឹកឃ្មុំកម្ពុជាដែលលោកស្រីបានចែករំលែកនូវឧបករណ៍ឌីជីថល ដើម្បីសម្រួលដល់ប្រតិបត្តិការអាជីវកម្ម, របៀបប្រើប្រាស់ឧបករណ៍ឌីជីថល ដើម្បីបង្កើនការលក់ ការគ្រប់គ្រងផ្នែកលក់និងអាជីវកម្ម ទំនាក់ទំនងអតិថិជន ការផ្សព្វផ្សាយផលិតផលឬសេវាកម្ម ការការពារការគំរាមកំហែងសន្តិសុខសាយប័រ និងចែករំលែកអំពីវិធីសាស្រ្តក្នុងការសម្របខ្លួនទៅនឹងនិន្នាការទីផ្សារនាពេលអនាគត និងឌីជីថលនីយកម្ម ដើម្បីរក្សាការប្រកួតប្រជែង និងនិរន្តរភាពនៃអាជីវកម្ម។  សិក្ខាកាមទាំងអស់ ក៏បានចែករំលែកនូវបទពិសោធន៍ជាក់ស្តែងផ្ទាល់ខ្លួន ពីគ្នាទៅវិញទៅមក តាមរយៈវេទិកាពិភាក្សាជាក្រុមទៅលើប្រធានបទជុំវិញសារៈសំខាន់នៃការប្រើប្រាស់ឧបករណ៍ និងប្រព័ន្ធឌីជីថល បញ្ហាប្រឈមក្នុងការផ្លាស់ប្តូរទៅរកការប្រើប្រាស់ប្រព័ន្ធឌីជីថល និងសំណូមពរឬសំណើនានា។

បន្ថែមពីនេះ សិក្ខាកាមក៏ទទួលបានស្វែងយល់អំពី “យន្តការធានាឥណទាន ក្នុងការគាំទ្រលទ្ធភាពទទួលបានហិរញ្ញប្បទានរបស់   សហគ្រាសធុនតូច និងមធ្យម”  តាមរយៈបទបង្ហាញដោយ លោកស្រី លឹម ចាន់ធីតា ប្រធាននាយកដ្ឋានប្រតិបត្តិការនៃ CGCC។ ស្របជាមួយនឹងយន្តការធានាឥណទាន លោក ប៉ូច ពិសាល ប្រធានផ្នែកទំនាក់ទំនងអតិថិជន ផ្នែកសហគ្រាសធុនតូច និងមធ្យម នៃ ធនាគារ ជេត្រាស់ រ៉ូយ៉ាល់ ក៏បានចែករំលែកអំពី “ដំណើរការវាយតម្លៃឥណទាន និងដំណោះស្រាយហិរញ្ញវត្ថុសម្រាប់អាជីវកម្ម និងជាពិសេសការគាំទ្រដល់សហគ្រិនស្រ្តីផងដែរ”។

ការកសាងសមត្ថភាពសហគ្រិន គឺជាការងារអាទិភាពមួយរបស់ CGCC ក្នុងបេសកកម្មបង្កើនបរិយាបន្នហិរញ្ញវត្ថុ និងអភិវឌ្ឍសហគ្រាសខ្នាតតូច និងមធ្យម នៅកម្ពុជា។ EPIC គឺជាកម្មវិធីកសាងសមត្ថភាពសហគ្រិនរបស់ CGCC ដែល នឹងនាំមកនូវប្រធានបទពាក់ព័ន្ធការប្រតិ​បត្តិនិងគ្រប់គ្រងអាជីវកម្ម ដើម្បីអភិវឌ្ឍសមត្ថភាពសហគ្រាសធុនមីក្រូ តូច និងមធ្យម តាមរយៈកិច្ចសហការជាមួយស្ថាប័នពាក់ព័ន្ធ/គ្រឹះស្ថានហិរញ្ញវត្ថុចូលរួម៕

 

ការលើកកម្ពស់សហគ្រាសធុនតូច និងមធ្យមក្នុងស្រុក ដើម្បីភាពប្រកួតប្រជែងលើឆាកអន្តរជាតិ៖ ការដាក់ឱ្យដំណើរការជាផ្លូវការ កម្មវិធីហិរញ្ញប្បទានសម្រាប់សហគ្រិននាំចេញ និងកម្មវិធីកសាងសមត្ថភាព និងជំនាញ សម្រាប់សហគ្រាសធុនតូច និងមធ្យម

Posted on by Sorn Chhorvyvatey

រាជធានីភ្នំពេញ ថ្ងៃទី២៣ ខែវិច្ឆិកា ឆ្នាំ២០២៤៖ ធនាគារ មេយប៊ែង សហការជាមួយ គម្រោង Feed the Future Cambodia Harvest III (គម្រោងហាវែស III) ក្រោមជំនួយពីទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ​ (USAID) បានប្រកាសដាក់ឱ្យដំណើរការ កម្មវិធីហិរញ្ញប្បទានសម្រាប់សហគ្រិននាំចេញ ដែលផ្តល់នូវដំណោះស្រាយហិរញ្ញវត្ថុដ៏សមស្របសម្រាប់ការនាំចេញ ក្នុងគោលបំណងលើកស្ទួយសហគ្រាសធុនតូន និងមធ្យមក្នុងស្រុក ក្នុងការប្រកួតប្រជែងលើឆាកអន្តរជាតិ។ កម្មវិធីហិរញ្ញប្បទានសម្រាប់សហគ្រិននាំចេញនេះ ក៏ត្រូវបានដាក់បញ្ចូល គម្រោងធានាឥណទាន និងកម្មវិធីកសាងសមត្ថភាព និងជំនាញ សម្រាប់សហគ្រាសធុនតូន និងមធ្យម ក្រោមកិច្ចសហប្រតិបត្តិការរវាងធនាគារ មេយប៊ែង ជាមួយសាជីវកម្មធានាឥណទានកម្ពុជា (CGCC)។

កិច្ចសហប្រតិបត្តិការនេះ មានគោលបំណងលើកកម្ពស់ការប្រកួតប្រជែង របស់សហគ្រាសធុនតូច និងមធ្យមក្នុងស្រុក លើឆាកអន្តរជាតិ ដើម្បីជំរុញឱ្យមានការអភិវឌ្ឍប្រកបដោយចីរភាព និងពង្រឹងវត្តមានរបស់ប្រទេសកម្ពុជា លើទីផ្សារអន្តរជាតិ។ ការផ្តល់នូវដំណោះស្រាយហិរញ្ញវត្ថុ ដែលមានដូចជា កម្ចីសម្រាប់ជាទុន ហិរញ្ញប្បទានសម្រាប់ការនាំចេញ ទីផ្សាររូបិយប័ណ្ណបរទេសចំនួន២១ប្រភេទដែលមានអត្រាប្រកួតប្រជែង ដំណោះស្រាយផ្ទេរ និងទទួលប្រាក់ និងសេវា​ហិរញ្ញប្បទាន​ពាណិជ្ជកម្ម ដែលសុទ្ធសឹងតែជាដំណោះស្រាយ សម្រាប់សហគ្រាសធុនតូច និងមធ្យម ក្នុងការជំនះឧបសគ្គផ្នែកហិរញ្ញវត្ថុ និងបន្តកំណើន លើទីផ្សារអន្តរជាតិ។ ពិធីប្រកាសដាក់ឱ្យដំណើរការកម្មវិធីហិរញ្ញប្បទានសម្រាប់សហគ្រិននាំចេញនេះ ជាព្រឹត្តិការណ៍ដ៏សំខាន់មួយសម្រាប់សហគ្រាសធុនតូច និងមធ្យមនៅប្រទេសកម្ពុជា ដោយផ្តល់នូវមធ្យោបាយដ៏សមស្របសម្រាប់ឱ្យពួកគេពង្រីកប្រតិបត្តិការ បង្កើនប្រាក់ចំណូល និងធានាការប្រកួតប្រជែងនៅលើទីផ្សារអន្តរជាតិ។​

លោក រ័ត្ន សោភ័ណ នាយកប្រតិបត្តិ និងនាយកប្រចាំប្រទេស របស់ធនាគារ មេយប៊ែង ខេមបូឌា មានប្រសាសន៍ថា៖ «កម្មវិធីហិរញ្ញប្បទានសម្រាប់សហគ្រិននាំចេញ គឺជាដំណោះស្រាយយ៉ាងសំខាន់សម្រាប់សហគ្រាសក្នុងស្រុក ដែលមានគោលបំណងពង្រីកការនាំចេញរបស់ខ្លួន ទាំងទៅកាន់ទីផ្សារអន្តរជាតិដែលខ្លួនកំពុងមានវត្តមានស្រាប់ ឬទៅកាន់ទីផ្សារអន្តរជាតិថ្មី។ តាមរយៈការគាំទ្រដល់សហគ្រាសធុនតូច និងមធ្យម ដើម្បីជម្នះឧបសគ្គលើផ្នែកហិរញ្ញវត្ថុ ភាពជាដៃគូចម្រុះភាគីនេះនឹងចូលរួមជំរុញកំណើនអាជីវកម្មបុគ្គល ក៏ដូចជារួមចំណែកដល់ការអភិវឌ្ឍសេដ្ឋកិច្ចប្រទេសកម្ពុជា ឱ្យកាន់តែមានភាពទូលំទូលាយ»។

«សហគ្រាសធុនតូច និងមធ្យម ប្រៀបបានដូចជាឆ្អឹងខ្នងនៃសេដ្ឋកិច្ចកម្ពុជា ហើយតាមរយៈការជួយគាំទ្រពួកគេ ដើម្បីឱ្យទទួលបានជោគជ័យក្នុងទីផ្សារនាំចេញ កិច្ចសហប្រតិបត្តិការនេះនឹងរួមចំណែកក្នុងការបង្កើតការងារ ជំរុញកំណើនសេដ្ឋកិច្ចប្រកបដោយចីរភាព និងពង្រឹងជំហររបស់ប្រទេសកម្ពុជាក្នុងការប្រកួតប្រជែងនៅក្នុងតំបន់អាស៊ាន និងទីផ្សារសាកល។ គំនិតផ្តួចផ្តើមនេះក៏បានសបញ្ជាក់ពីការប្តេជ្ញាចិត្តរបស់ធនាគារ មេយប៊ែង ក្នុងនាមជាធនាគារអាស៊ានឆ្នើមជាងគេនៅប្រទេសកម្ពុជា និងឈានមុខគេក្នុងការជំរុញសេដ្ឋកិច្ចក្នុងតំបន់»។

ស្របតាមបេសកកម្មរបស់ គម្រោងហាវែស III ដែលជាគម្រោងរយៈពេលប្រាំឆ្នាំ របស់ទីភ្នាក់ងារជំនួយអាមេរិក USAID ផ្តោតលើការជំរុញកំណើនប្រកបដោយចីរភាព និងបរិយាបន្នក្នុងវិស័យកសិកម្ម និងសហគ្រាសធុនតូច និងមធ្យមនៅប្រទេសកម្ពុជា កិច្ចសហប្រតិបត្តិការនេះនឹងគាំទ្រដល់ការធ្វើពិពិធកម្ម ការអភិវឌ្ឍភាពធន់ និងការប្រកួតប្រជែងសម្រាប់សហគ្រាសធុនតូច និងមធ្យមក្នុងប្រទេសកម្ពុជា។ តាមរយៈការចូលរួមសហការពីដៃគូក្នុងវិស័យឯកជន និងអ្នកពាក់ព័ន្ធសំខាន់ៗ គម្រោងនេះមានគោលបំណងពង្រឹងសមត្ថភាពសហគ្រាសធុនតូច និងមធ្យម ដើម្បីរួមចំណែក ដល់ការអភិវឌ្ឍសេដ្ឋកិច្ចរបស់ប្រទេសកម្ពុជា ក៏ដូចជាលើកកម្ពស់ជីវភាពរស់នៅរបស់ប្រជាជនកម្ពុជា។

លោក នីមីស ហ្សាវឺរី ប្រធានគម្រោងហាវែស III មានប្រសាសន៍ថា «ជាមួយនឹងដំណោះស្រាយហិរញ្ញប្បទានពាណិជ្ជកម្មថ្មីនេះ យើងអាចផ្តល់ឱ្យសហគ្រាសធុនតូច និងមធ្យមនូវដើមទុនចាំបាច់ដើម្បីគ្រប់គ្រងចំណាយផលិតកម្ម វិនិយោគលើការបង្កើនគុណភាព និងបំពេញតម្រូវការបញ្ជាទិញពីអន្តរជាតិ។ ដំណោះស្រាយហិរញ្ញប្បទានពាណិជ្ជកម្មប្រកបដោយប្រសិទ្ធភាព គឺពិតជាមានសារៈសំខាន់សម្រាប់សហគ្រាសក្នុងស្រុកទាំងនេះ ព្រោះវាមិនត្រឹមតែជួយផ្សាភ្ជាប់គម្លាតលំហូរសាច់ប្រាក់ប៉ុណ្ណោះទេ ប៉ុន្តែថែមទាំងអនុញ្ញាតឱ្យពួកគេប្រកួតប្រជែងកាន់តែមានប្រសិទ្ធភាព ដោយជួយសម្រួលដល់ការឆ្លើយតបទៅនឹងតម្រូវការទាន់ពេលវេលា ក៏ដូចជាពង្រីកទីផ្សារនាំចេញរបស់ពួកគេ។ ទាំងអស់គ្នា យើងអាចធានាថាសហគ្រាសទាំងនេះមិនត្រឹមតែមានធនធានហិរញ្ញវត្ថុប៉ុណ្ណោះទេ ថែមទាំងមានចំណេះដឹង និងជំនាញដែលចាំបាច់ ដើម្បីទទួលបានជោគជ័យក្នុងទីផ្សារជាសាកល។ ភាពជាដៃគូនេះនឹងដើរតួនាទីយ៉ាងសំខាន់ក្នុងការបង្កើនសក្តានុពលនាំចេញ និងជំរុញកំណើនសេដ្ឋកិច្ចប្រកបដោយចីរភាពរបស់ប្រទេសកម្ពុជា»។

រួមជាមួយនឹងហិរញ្ញប្បទានសម្រាប់សហគ្រិននាំចេញ ធនាគារ មេយប៊ែង CGCC និង គម្រោងហាវែស III ក៏បានប្រកាស ”កម្មវិធីកសាងសមត្ថភាព និងជំនាញសម្រាប់សហគ្រាសធុនតូច និងមធ្យម (BCC) ឆ្នាំ២០២៤ និងឆ្នាំ២០២៥” ដែលជាគំនិតផ្តួចផ្តើមដ៏លេចធ្លោមួយ ដែលត្រូវបានបង្កើតឡើងដើម្បីបំពេញបន្ថែមនូវជំនាញ និងចំណេះដឹងសំខាន់ៗ ដល់សហគ្រាសធុនតូច និងមធ្យម។ ចាប់តាំងពីការបង្កើតកម្មវិធីនេះឡើងក្នុងឆ្នាំ ២០២១ កម្មវិធី BCC បានផ្តល់ការបណ្តុះបណ្តាលដល់សហគ្រាសធុនតូច និងមធ្យមរាប់រយនាក់ លើមូលដ្ឋានគ្រឹះក្នុងការធ្វើអាជីវកម្ម បច្ចេកទេស និងបច្ចេកវិទ្យាទំនើបផ្សេងៗក្នុងការគ្រប់គ្រងអាជីវកម្ម។ ដោយផ្អែកលើភាពជោគជ័យរបស់កម្មវិធីនេះ កម្មវិធី BCC ថ្មីនេះនឹងផ្តល់វគ្គបណ្តុះបណ្តាលលើប្រធានបទសំខាន់ៗ ដែលទាក់ទងនឹង ដំណោះស្រាយហិរញ្ញវត្ថុពាណិជ្ជកម្ម ការគ្រប់គ្រងហិរញ្ញវត្ថុ និងផែនការយុទ្ធសាស្រ្ត ដែលផ្តល់ដោយអ្នកជំនាញដែលមានបទពិសោធជាច្រើនឆ្នាំក្នុងផ្នែកគណនេយ្យ ពាណិជ្ជកម្ម និងហិរញ្ញវត្ថុជាដើម។ វគ្គបណ្តុះបណ្តាលនេះនឹងផ្តល់ជូនសហគ្រិន នូវការយល់ដឹង បទពិសោធជាក់ស្តែង និងជំនាញដែលចាំបាច់ ដើម្បីបង្កើនប្រសិទ្ធភាពប្រតិបត្តិការ ក៏ដូចជាបង្កើនសក្តានុពលនៃកំណើនអាជីវកម្មរបស់ពួកគេ។

លោក ណូ លីដា អគ្គនាយក CGCC មានប្រសាសន៍ថា៖ «កម្មវិធី BCC ផ្តល់ជូនសហគ្រិន និងម្ចាស់អាជីវកម្មនូវជំនាញ និងចំណេះដឹងសំខាន់ៗ ដែលគាំទ្រពួកគាត់ឱ្យទទួលបានហិរញ្ញប្បទាន ដើម្បីពង្រីកអាជីវកម្ម។ តាមរយៈកម្មវិធីនេះ យើងអាចគាំទ្រពួកគាត់ ក្នុងការបង្កើនចំណេះដឹងហិរញ្ញវត្ថុ ដែលជាមូលដ្ឋានគ្រឹះសម្រាប់សហគ្រាសធុនតូច និងមធ្យម ក្នុងការប្រកួតប្រជែងទាំងក្នុងស្រុក និងក្រៅស្រុក។ កម្មវិធីនេះ គឺជាជំហានដ៏សំខាន់ ស្របតាមចក្ខុវិស័យរួមគ្នារបស់យើងក្នុងការជំរុញការអភិវឌ្ឍសហគ្រាសធុនតូច និងមធ្យម ប្រកបដោយភាពធន់ និងថាមវន្ត ដែលរួមចំណែកយ៉ាងសំខាន់ដល់កំណើនសេដ្ឋកិច្ចរបស់ប្រទេសកម្ពុជា។ លើសពីនេះ គំនិតផ្តួចផ្តើមនេះ ត្រូវបានគាំទ្រដោយ គម្រោងធានាឥណទាន របស់ CGCC ដែលផ្តល់នូវដំណោះស្រាយ ចំពោះបញ្ហាខ្វះទ្រព្យធានា ដែលជាបញ្ហាប្រឈមចម្បងមួយសម្រាប់សហគ្រាសធុនតូច និងមធ្យម។ តាមរយៈការបន្ធូរបន្ថយតម្រូវការទ្រព្យធានា យើងអាចចូលរួមបង្កើនលទ្ធភាពរបស់សហគ្រាសធុនតូច និងមធ្យម ក្នុងការទទួលបានហិរញ្ញប្បទាន ដែលអនុញ្ញាតឱ្យពួកគាត់ ទទួលបានទុនចាំបាច់ សម្រាប់កំណើនអាជីវកម្មប្រកបដោយចីរភាព»។

កិច្ចសហប្រតិបត្តិការរវាង ធនាគារ មេយប៊ែង គម្រោងហាវែស III និងCGCC បាននិងកំពុងកសាងប្រព័ន្ធអេកូដ៏រឹងមាំសម្រាប់គាំទ្រសហគ្រាសធុនតូច និងមធ្យម នៅប្រទេសកម្ពុជា ដើម្បីឱ្យពួកគេរីកចម្រើនទាំងនៅក្នុងទីផ្សារក្នុងស្រុក និងលើឆាកអន្តរជាតិ។ តាមរយៈគំនិតផ្តួចផ្តើមដ៏ចាំបាច់ទាំងនេះ ដែលរួមមាន៖ ដំណោះស្រាយហិរញ្ញវត្ថុ កម្មវិធីពង្រឹងសមត្ថភាព និងការកាត់បន្ថយតម្រូវការទ្រព្យធានាតាមរយៈយន្តការធានាឥណទាន សម្រាប់សហគ្រាសធុនតូច និងមធ្យម នឹងអាចទទួលបាននូវធនធានគ្រប់គ្រាន់ ក៏ដូចជាចំណេះដឹង និងទំនុកចិត្ត ដើម្បីពង្រីកអាជីវកម្មរបស់ពួកគេ និងឈានទៅរកការប្រកួតប្រជែងលើទីផ្សារអន្តរជាតិ។

ភាពជាដៃគូជាយុទ្ធសាស្រ្តដ៏រឹងមាំនេះ បានបង្ហាញពីការប្តេជ្ញារួមគ្នាក្នុងការគាំទ្រ និងអភិវឌ្ឍសហគ្រាសធុនតូច និងមធ្យមនៅក្នុងប្រទេសកម្ពុជា ប្រកបដោយភាពធន់ បរិយាបន្ន និងការតភ្ជាប់ជាសកល។ គំនិតផ្តួចផ្តើមរួមគ្នារវាង ធនាគារ មេយប៊ែង គម្រោងហាវែស III និងCGCC នឹងរួមចំណែកជាមូលដ្ឋានគ្រឹះ សម្រាប់ការអភិវឌ្ឍរិស័យធុរកិច្ចកម្ពុជា ដែលជាចំណែកយ៉ាងសំខាន់សម្រាប់សេដ្ឋកិច្ចជាតិ ក៏ដូចជាការលើកកម្ពស់វត្តមានរបស់ប្រទេសកម្ពុជានៅលើឆាកអន្តរជាតិ៕