Tag: Cambodia

(រាជធានីភ្នំពេញ) ៖ នៅព្រឹកថ្ងៃទី១៧ ខែមករា ឆ្នាំ២០២៣ ក្រសួងសេដ្ឋកិច្ច និងហិរញ្ញវត្ថុ (MEF) និងសាជីវកម្មធានាឥណទានកម្ពុជា (CGCC) សហការរៀបចំសន្និបាតប្រចាំឆ្នាំរបស់ CGCC ក្រោមប្រធានបទ “តួនាទីរបស់គម្រោងធានាឥណទានក្នុងការអភិវឌ្ឍសហគ្រាសខ្នាតតូច និងមធ្យមនៅកម្ពុជា និងតំបន់អាស៊ាន”។ សន្និបាតនេះ ប្រព្រឹត្តិទៅក្រោមអធិបតីភាពដ៏ខ្ពង់ខ្ពស់របស់ ឯកឧត្តម បណ្ឌិត ម៉ី វ៉ាន់ រដ្ឋលេខាធិការ ក្រសួងសេដ្ឋកិច្ច និងហិរញ្ញវត្ថុ តំណាងដ៏ខ្ពង់ខ្ពស់របស់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងមានការចូលរួមពីថ្នាក់ដឹកនាំរបស់ក្រសួងសេដ្ឋកិច្ច និងហិរញ្ញវត្ថុ, ធនាគារជាតិនៃកម្ពុជា, ក្រសួងកិច្ចការនារី, ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍, ដៃគូអភិវឌ្ឍន៍ជាតិនិងអន្តរជាតិ, គ្រឹះស្ថានធនាគារ និងហិរញ្ញវត្ថុ, និងសមាគមនានា សរុបប្រមាណ ១៥០រូប។

គោលបំណងនៃសន្និបាតនេះ គឺដើម្បីបូកសរុបលទ្ធផលការងារប្រចាំឆ្នាំរបស់ CGCC, ពិភាក្សាអំពីបញ្ហាប្រឈម និងដំណោះស្រាយក្នុងការអនុវត្តគម្រោងធានាឥណទាន, ចែករំលែកទស្សនៈអំពីតួនាទីរបស់គម្រោងធានាឥណទានក្នុងការអភិវឌ្ឍសហគ្រាសធុនតូច និងមធ្យម ក៏ដូចជា សិក្សាអំពីបទពិសោធន៍នៃគម្រោងធានាឥណទានរបស់ប្រទេសម៉ាឡេស៊ី និងប្រទេសថៃផងដែរ។

ឯកឧត្តម បណ្ឌិត  ម៉ី  វ៉ាន់ បានលើកឡើងថា “សហគ្រាសធុនតូច និងមធ្យម គឺជាកម្លាំងចលករ ដែលមិនអាចខ្វះបាន ដើម្បីធានាការអភិវឌ្ឍសេដ្ឋកិច្ចកម្ពុជា ប្រកបដោយចីរភាព បរិយាបន្ន និងភាពធន់។ សហគ្រាសធុនតូច និងមធ្យម បានដើរតួយ៉ាងសំខាន់ ក្នុងការទ្រទ្រង់ការអភិវឌ្ឍសង្គម-សេដ្ឋកិច្ច កម្ពុជា ដោយបានចូលរួមកាត់បន្ថយភាពក្រីក្រ គួរឱ្យកត់សម្គាល់ពីអត្រា ៥០,២% ក្នុងឆ្នាំ ២០០៣ មកត្រឹមអត្រា ១៧,៨% ប៉ុណ្ណោះ ក្នុងឆ្នាំ ២០២០ តាមរយៈការបង្កើនការងារ និងប្រាក់ចំណូលជូនប្រជាជនកម្ពុជា។ ដូច្នេះ រាជរដ្ឋាភិបាល នឹងបន្តអនុវត្តគោលនយោបាយគាំទ្រ តាមរយៈយន្តការធានាឥណទាន ដើម្បីធានាការអភិវឌ្ឍសហគ្រាសធុនតូច និងមធ្យម។”

តាមរយៈសន្និបាតនេះ ឯកឧត្តម បណ្ឌិត  ម៉ី  វ៉ាន់ តំណាងដ៏ខ្ពង់ខ្ពស់របស់ ឯកឧត្តមអគ្គបណ្ឌិតសភាចារ្យ ឧបនាយករដ្ឋមន្ត្រី បានសម្ពោធដាក់ឱ្យដំណើរការជាផ្លូវការនូវ “គម្រោងធានាឥណទានជាកញ្ចប់ (Portfolio Guarantee Scheme)​” និងផ្តល់ពានរង្វាន់ដល់គ្រឹះស្ថានហិរញ្ញវត្ថុចូលរួមឆ្នើម របស់ CGCC ប្រចាំឆ្នាំ២០២២ រួមមាន ធនាគារកាណាឌីយ៉ា, ធនាគារស្ថាបនា, គ្រឹះស្ថានមីក្រូហិរញ្ញវត្ថុ អេ អឹម ខេ, ធនាគារវឌ្ឍនៈ អាស៊ី (ABA), និងគ្រឹះស្ថានមីក្រូហិរញ្ញវត្ថុ អិល អូ អិល ស៊ី។

CGCC ត្រូវបានបង្កើតឡើងដោយរាជរដ្ឋាភិបាលកម្ពុជា នៅចុងឆ្នាំ២០២០ និងបានដាក់ឱ្យដំណើរការគម្រោងធានាឥណទានជាលើកដំបូង នៅក្នុងខែមីនា ឆ្នាំ២០២១។ គិតត្រឹមបំណាច់ខែធ្នូ ឆ្នាំ២០២២ CGCC បានផ្តល់ការធានាឥណទានលើកម្ចីចំនួន ៩៨៥ ដល់ក្រុមហ៊ុនអាជីវកម្ម ដោយគិតជាទឹកប្រាក់កម្ចីមានចំនួនជាង ៩២លានដុល្លារ ដែលភាគច្រើនលើសលប់ជាកម្ចីខ្វះទ្រព្យធានា៕

Click here to read more about: កិច្ចប្រជុំក្រុមប្រឹក្សាភិបាល សាជីវកម្មធានាឥណទានកម្ពុជា អាណត្តិទី១ លើកទី១២

(ភ្នំពេញ)៖ អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានឯកភាពឲ្យសាជីវកម្មធានាឥណទានកម្ពុជា (CGCC) បន្តដាក់ឱ្យដំណើរការ «គម្រោងធានាឥណទានដើម្បីស្តារអាជីវកម្ម (Business Recovery Guarantee Scheme, BRGS)» ដើម្បីជួយស្តារអាជីវកម្ម តាមរយៈការបង្កើនលទ្ធភាពទទួលបានហិរញ្ញប្បទាន ទោះបីខ្វះទ្រព្យធានាក្តី។

សេចក្តីប្រកាសព័ត៌មានរបស់ សាជីវកម្មធានាឥណទានកម្ពុជា (CGCC) ដែលបណ្តាញព័ត៌មាន Fresh News ទទួលបាននៅថ្ងៃទី៤ ខែមករា ឆ្នាំ២០២៣នេះបានប្រកាសបន្តដាក់ឱ្យដំណើរការ «គម្រោងធានាឥណទានដើម្បីស្តារអាជីវកម្ម» ចាប់ពីថ្ងៃទី១ ខែមករា ឆ្នាំ២០២៣ តទៅ រហូតដល់គម្រោងនេះ ត្រូវបានប្រើប្រាស់អស់។

គម្រោងធានាឥណទានដើម្បីស្តារអាជីវកម្ម ជាគម្រោងធានាឥណទាន ដែលមានគោលដៅគាំទ្រអាជីវកម្ម ទាំងអាជីវកម្មខ្នាតមីក្រូ សហគ្រាសខ្នាតតូច និងមធ្យម និងសហគ្រាសខ្នាតធំ ក្នុងការបង្កើនលទ្ធភាពទទួលបានហិរញ្ញប្បទាន ពីគ្រឹះស្ថានហិរញ្ញវត្ថុចូលរួម (PFIs) សម្រាប់ធ្វើជាទុនបង្វិល, ការវិនិយោគ, និងការពង្រីកអាជីវកម្ម។

គម្រោងធានាឥណទានដើម្បីស្តារអាជីវកម្ម មានទំហំទឹកប្រាក់ ២០០លានដុល្លារ ត្រូវបានដាក់ឱ្យដំណើរការជាលើកដំបូង ចាប់ពីថ្ងៃទី២៩ ខែមីនា ឆ្នាំ២០២១ រហូតដល់ថ្ងៃទី៣១ ខែធ្នូ ឆ្នាំ២០២២។ គិតត្រឹមថ្ងៃទី៣១ ខែធ្នូ ឆ្នាំ២០២២ កន្លងទៅ កម្ចីទំហំប្រមាណ ៨៩លានដុល្លារ ដែលភាគច្រើនជាកម្ចីដែលខ្វះទ្រព្យធានា ត្រូវបានធានាដោយ CGCC ក្រោមគម្រោងគម្រោងធានាឥណទានដើម្បីស្តារអាជីវកម្ម។

សេចក្តីប្រកាសព័ត៌មានបញ្ជាក់ថា «CGCC បានទទួលការឯកភាពដ៏ខ្ពង់ខ្ពស់បំផុតពី ឯកឧត្តមអគ្គបណ្ឌិតសភាចារ្យ ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ដើម្បីបន្តដាក់ឱ្យដំណើរការគម្រោង BRGS នេះ ដោយកែសម្រួលលក្ខខណ្ឌមួយចំនួន ឱ្យមានភាពប្រសើរឡើង ដូចជា សុពលភាពនៃគម្រោង, ការកំណត់និយមន័យនៃអាជីវកម្មខ្នាតមីក្រូ សហគ្រាសខ្នាតតូច និងមធ្យម និងសហគ្រាសខ្នាតធំ, និងការកំណត់ទំហំជាអតិបរមាសម្រាប់កម្ចីនីមួយៗ»។

ការធានាឥណទានរបស់សាជីវកម្មធានាឥណទានកម្ពុជា ក្រោមគម្រោង BRGS នឹងបន្តដើរតួជាទ្រព្យធានាចាប់ពី ៧០%ដល់ ៨០% នៃទំហំឥណទានដែលផ្តល់ដោយ PFIs ដូច្នេះនឹងជួយកាត់បន្ថយតម្រូវការទ្រព្យធានាពីអាជីវកម្មដែលស្នើកម្ចី។ សាជីវកម្មធានាឥណទានកម្ពុជា ស្វាគមន៍នូវកិច្ចសហការជិតស្និតជាមួយគ្រប់ស្ថាប័នពាក់ព័ន្ធ ដើម្បីជំរុញការអនុវត្តគម្រោង BRGS៕

Credit to : Fresh News, Published on 04 January 2023

ចុចទីនេះស្វែងយល់បន្ថែមពី: ៥ចំណុច សហគ្រិនគួរត្រៀមខ្លួន ដើម្បីទទួលបាននូវឥណទានដែលមានការធានា

សាជីវកម្មធានាឥណទានកម្ពុជា (CGCC) មានកិត្តិយសប្រកាសបន្តដាក់ឱ្យដំណើរការ “គម្រោងធានាឥណទានដើម្បីស្តារអាជីវកម្ម  (Business Recovery Guarantee Scheme, BRGS)” ចាប់ពីថ្ងៃទី១ ខែមករា ឆ្នាំ២០២៣ តទៅ រហូតដល់គម្រោងនេះ ត្រូវបានប្រើប្រាស់អស់។​

BRGS គឺជាគម្រោងធានាឥណទាន ដែលមានគោលដៅគាំទ្រអាជីវកម្ម ទាំងអាជីវកម្មខ្នាតមីក្រូ សហគ្រាសខ្នាតតូច និងមធ្យម និងសហគ្រាសខ្នាតធំ ក្នុងការបង្កើនលទ្ធភាពទទួលបានហិរញ្ញប្បទាន ពីគ្រឹះស្ថានហិរញ្ញវត្ថុចូលរួម (PFIs) សម្រាប់ធ្វើជាទុនបង្វិល​, ការវិនិយោគ, និងការពង្រីកអាជីវកម្ម។ BRGS ដែលមានទំហំ ២០០លានដុល្លារ ត្រូវបានដាក់ឱ្យដំណើរការជាលើកដំបូង ចាប់ពីថ្ងៃទី២៩ ខែមីនា ឆ្នាំ២០២១ រហូតដល់ថ្ងៃទី៣១ ខែធ្នូ ឆ្នាំ២០២២។ គិតត្រឹមថ្ងៃទី៣១ ខែធ្នូ ឆ្នាំ២០២២​ កន្លងទៅ កម្ចីទំហំប្រមាណ ៨៩លានដុល្លារ ដែលភាគច្រើនជាកម្ចីដែលខ្វះទ្រព្យធានា ត្រូវបានធានាដោយ CGCC ក្រោមគម្រោង BRGS។

CGCC​ បានទទួលការឯកភាពដ៏ខ្ពង់ខ្ពស់បំផុតពី ឯកឧត្តមអគ្គបណ្ឌិតសភាចារ្យ ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ដើម្បីបន្តដាក់ឱ្យដំណើរការគម្រោង BRGS នេះ ដោយកែសម្រួលលក្ខខណ្ឌមួយចំនួន ឱ្យមានភាពប្រសើរឡើង ដូចជា ​សុពលភាពនៃគម្រោង, ការកំណត់និយមន័យនៃអាជីវកម្មខ្នាតមីក្រូ សហគ្រាសខ្នាតតូច និងមធ្យម និងសហគ្រាសខ្នាតធំ, និងការកំណត់ទំហំជាអតិបរមាសម្រាប់កម្ចីនីមួយៗ (សម្រាប់ព័ត៌មានលម្អិតសូមចូលទៅកាន់គេហទំព័ររបស់ CGCC www.cgcc.com.kh)។

ការធានាឥណទានរបស់សាជីវកម្មធានាឥណទានកម្ពុជា ក្រោមគម្រោង BRGS នឹងបន្តដើរតួជាទ្រព្យធានាចាប់ពី ៧០%ដល់ ៨០% នៃទំហំឥណទានដែលផ្តល់ដោយ PFIs ដូច្នេះនឹងជួយកាត់បន្ថយតម្រូវការទ្រព្យធានាពីអាជីវកម្មដែលស្នើកម្ចី។

សាជីវកម្មធានាឥណទានកម្ពុជា ស្វាគមន៍នូវកិច្ចសហការជិតស្និតជាមួយគ្រប់ស្ថាប័នពាក់ព័ន្ធ ដើម្បីជំរុញការអនុវត្តគម្រោង BRGS។ សូមអរគុណ៕

ថ្ងៃអង្គារ ១២កើត ខែបុស្ស ឆ្នាំខាល ចត្វាស័ក ព.ស.២៥៦៦

រាជធានីភ្នំពេញ ថ្ងៃទី៣ ខែមករា ឆ្នាំ២០២៣

កាលពីថ្ងៃទី២០ដល់ថ្ងៃទី២១ខែធ្នូឆ្នាំ២០២២​ ក្រុមការងារ CGCC បានចូលរួមដំណើរទស្សនកិច្ចសិក្សាទៅកាន់ខេត្តកំពង់ចាម ក្រោមកិច្ចសហការរៀបចំដោយសមាគមមីក្រូហិរញ្ញវត្ថុកម្ពុជា (CMA) និងសម្ព័ន្ធសហគមន៍សិកម្មកម្ពុជា (CACA)​ ដើម្បីស្វែងយល់​ពីតម្រូវការនិងបញ្ហាប្រឈមនានាដែលសាខាគ្រឹះស្ថានមីក្រូហិរញ្ញវត្ថុ និងសហគមន៍កសិកម្មកំពុងជួបប្រទះ ដើម្បីចូលរួមលើកកម្ពស់ការផ្តល់ឥណទានសម្រាប់វិស័យកសិកម្មចំពោះសហគមន៍ ពីគ្រឹះស្ថានហិរញ្ញវត្ថុ ជាពិសេសគឺការកសាងបណ្ដាញទំនាក់ទំនងរវាងគ្នានិងគ្នា។

ដំណើរទស្សនកិច្ចនេះ ត្រូវបានរៀបចំឡើងរយៈពេល៣ថ្ងៃ ដោយបានចុះសិក្សាស្វែងយល់ស្ថានភាពរបស់សហគមន៍ចំនួន៣ នៅស្រុកព្រៃឈរ ស្រុកស្ទឹងត្រង់ និងស្រុកជើងព្រៃ។ បន្ថែមពីលើនេះ ក្រុមកាងារក៏បានចុះទៅកាន់សាខាគ្រឹះស្ថានមីក្រូហិរញ្ញវត្ថុអេអឹមខេ នៅទីប្រជុំជនស្គន់ គ្រឹះស្ថានមីក្រូហិរញ្ញវត្ថុចម្រើន និងគ្រឹះស្ថានមីក្រូហិរញ្ញវត្ថុ អិលអូអិលស៊ី ខេត្តកំពង់ចាម។ CGCC ពិតជាមានក្តីសោមនស្ស ដែលបានចូលរួមក្នុងដំណើរទស្សនកិច្ចនេះ  ស្វែងយល់ពីប្រធានបទនិងតួអង្គសំខាន់ៗពាក់ព័ន្ធនឹងឥណទាននៅក្នុងវិស័យកសិកម្ម ដែលធាតុចូលទាំងអស់នេះនឹងជាបច្ច័យដល់ CGCC ក្នុងការរៀបចំយុទ្ធសាស្រ្តនានាដើម្បីបង្កើនការគាំទ្រដល់សហគមន៍កសិកម្មដែលខ្វះទ្រព្យធានា ឱ្យទទួលបានកម្ចីសម្រាប់ទ្រទ្រង់ និងអភិវឌ្ឍសហគមន៍។

Also check: CGCC Annual Staff Retreat 2022

ថ្ងៃអង្គារ ទី១៣ ខែធ្នូ ឆ្នាំ២០២២ លោក ណូ លីដា អគ្គនាយករង CGCC បានដឹកនាំ សហការី  ចូលរួមដំណើរទស្សនកិច្ច នៅឯកសិដ្ឋានចិញ្ចឹមជ្រូកសាច់មួយកន្លែង នៅស្រុកព្រៃនប់ ខេត្តព្រះសីហនុ​  និងបានចែករំលែកអំពីគម្រោងធានាឥណទានរបស់ CGCC ជូនដល់គណៈប្រតិភូនៃដំណើរទស្សនកិច្ច ក្រោមអធិបតីភាព  ឯកឧត្តម ទិន ពន្លក រដ្ឋលេខាធិការក្រសួងបរិស្ថាន និង លោកបណ្ឌិត សរ ចិត្រា អគ្គលេខាធិការរងក្រសួងកសិកម្ម រុក្ខាប្រមាញ់ និងនេសាទ និងក្រោមការសម្របសម្រួលរបស់ អង្គការសហប្រជាជាតិដើម្បីអភិវឌ្ឍន៍ឧស្សាហកម្ម (UNIDO)។

ដំណើរទស្សនកិច្ចនេះរៀបចំឡើងដើម្បីបង្កើនចំណេះដឹង ក៏ដូចជាផ្សព្វផ្សាយអំពីអត្ថប្រយោជន៍ និងបញ្ហាប្រឈមនានាដែលទាក់ទងនឹងការអនុវត្តបច្ចេកវិទ្យាជីវឧស្ម័ននៅក្នុងវិស័យកសិកម្ម ជាពិសេសលើការ ចិញ្ចឹមជ្រូកសាច់ក្នុងប្រទេសកម្ពុជា និងបង្កើនកិច្ចសហការរវាងស្ថាប័នពាក់ព័ន្ធ រួមមានស្ថាប័នរដ្ឋ ដៃគូអភិវឌ្ឍ វិស័យឯកជន គ្រឹះស្ថានហិរញ្ញវត្ថុ និងអ្នកសិក្សាស្រាវជ្រាវផងដែរ។

តាមរយៈដំណើរទស្សនកិច្ចនេះ អ្នកចូលរួម ជាពិសេសគ្រឹះស្ថានហិរញ្ញវត្ថុ បានយល់ដឹងនិងទស្សនាដោយផ្ទាល់អំពីការប្រើប្រាសប្រព័ន្ធជីវឧស្ម័ន ដើម្បីផលិតអគ្គិសនី និងអត្ថប្រយោជន៍ដល់ដំណើរការរបស់កសិដ្ឋាន ទាំងលើផ្នែកសេដ្ឋកិច្ច និងការចូលរួមចំណែកការពារបរិស្ថាន។ ការណ៍នេះ នឹងជំរុញឱ្យបង្កើននូវការបង្កើតផលិតផលឥណទានដែលមានលក្ខណៈអនុគ្រោះដល់អាជីវកម្មដែលនៅក្នុងវិស័យនេះកាន់តែច្រើនជាងមុន។ ជាមួយគ្នានេះ CGCC ក៏រីករាយនឹងចូលរួមចំណែកផ្តល់នូវការធានាឥណទានជូនដល់ម្ចាស់អាជីវកម្ម ដែលមានតម្រូវការកម្ចីសម្រាប់អាជីវកម្ម ក្នុងគោលបំណងបម្រើឱ្យផលប្រយោជន៍បរិស្ថាន។

CGCC តែងតែផ្តល់ឱ្យបុគ្គលិកនូវឱកាសលើសពីការពង្រីកចំណេះដឹង និងបទពិសោធន៍ការងារ ដោយចាត់ទុកបុគ្គលិកទាំងអស់ ជាទ្រព្យដ៏មានតម្លៃ ដែលមានតួនាទីមិនអាចខ្វះបានក្នុងការសម្រេចបានចក្ខុវិស័យរបស់ CGCC។ ដើម្បីរឹតចំណងសាមគ្គីភាព បង្កើនផលិតភាពការងារ និងថ្លែងអំណរគុណដល់បុគ្គលិកទាំងអស់ក្នុងកិច្ចខិតខំប្រឹងប្រែងចូលរួមចំណែក នៅក្នុងប្រតិបត្តិការធានាឥណទាន CGCC បានរៀបចំកម្មវិធីវិបស្សនាប្រចាំឆ្នាំ២០២២ នៅកោះរ៉ុងសន្លឹម កាលពីថ្ងៃទី៩-១១ ខែធ្នូ ឆ្នាំ២០២២។

តាមរយៈកម្មវិធីនេះ ថ្នាក់ដឹកនាំ និងបុគ្គលិករបស់ CGCC មានឱកាសបានស្វែងយល់ពីគ្នាទៅវិញទៅមក និងបានផ្លាស់ប្តូរបទពិសោធន៍ការងារ ប្រកបដោយក្តីសប្បាយរីករាយ និងសហប្រតិបត្តិការល្អ។ CGCC សង្ឃឹមថា កម្មវិធីដ៏មានអត្ថន័យនេះ នឹងបង្កើនសាមគ្គីភាព ប្រសិទ្ធភាព និងផលិតភាពការងារ សំដៅរួមចំណែកដល់ប្រតិបត្តិការ និងការអភិវឌ្ឍរបស់ CGCC ស្របតាមចក្ខុវិស័យក្នុងការលើកកម្ពស់បរិយាបន្នហិរញ្ញវត្ថុ និងអភិវឌ្ឍសហគ្រាសខ្នាតតូច និងមធ្យមនៅកម្ពុជា៕

ចុចទីនេះដើម្បីស្វែងយល់បន្ថែម: CGCC participates in the discussion on “SMEs and FinTech Joining Hands to Promote Economic Recovery”

(ភ្នំពេញ) ថ្ងៃទី០៧ ខែធ្នូ ឆ្នាំ២០២២៖ សាជីវកម្មធានាឥណទានកម្ពុជា (CGCC) និងធនាគារ CIMB បានប្រកាសជាផ្លូវការនូវភាពជាដៃគូ ក្នុងពិធីចុះហត្ថលេខាលើកិច្ចព្រមព្រៀងធានាឥណទាន ដើម្បីផ្តល់កម្ចីដែលមានការធានាគាំទ្រដល់សហគ្រាសធុនតូចនិងមធ្យមក៏ដូចជាក្រុមហ៊ុនអាជីវកម្មនានានៅក្នុងប្រទេសកម្ពុជា ឱ្យមានលទ្ធភាពទទួលបានកម្ចីអាជីវកម្មកាន់តែច្រើន ក្នុងការពង្រីកអាជីវកម្ម វិនិយោគ និងទុនបង្វិល។

ភាពជាដៃគូរវាង CGCC ដែលជាសហគ្រាសសាធារណៈ ស្ថិតក្រោមអាណាព្យាបាលបច្ចេកទេស និង ហិរញ្ញវត្ថុពីក្រសួងសេដ្ឋកិច្ចនិងហិរញ្ញវត្ថុ ជាមួយនិងធនាគារ CIMB ដែលជាធនាគារពាណិជ្ជមានបណ្តាញសាខាជាច្រើននៅកម្ពុជា នឹងបង្កើនការគាំទ្រដល់ក្រុមហ៊ុនអាជីវកម្មដែលមានតម្រូវការហិរញ្ញវត្ថុ ប៉ុន្តែខ្វះទ្រព្យធានាដើម្បីដាក់តម្កល់នៅពេលស្នើសុំកម្ចី ឱ្យទទួលបានកម្ចីដែលមានការធានាក្នុងការអភិវឌ្ឍនិងទ្រទ្រង់អាជីវកម្ម។

លោក Wong Keet Loong អគ្គនាយក CGCC បានលើកឡើងថា “ភាពជាដៃគូជាមួយ ធនាគារ CIMB កម្ពុជា នឹងបង្កើនចំនួនគ្រឹះស្ថានហិរញ្ញវត្ថុចូលរួមរបស់ CGCC ដល់ទៅ២៥ស្ថាប័ន ក្នុងការផ្តល់កម្ចីដែលមានការធានា ដើម្បីគាំទ្រដល់សហគ្រាសខ្នាតមីក្រូ តូច និងមធ្យម (MSMEs) ដើម្បីភាពរីកចម្រើននៃអាជីវកម្ម”។

លោកបានបន្តទៀតថា ៖ “គិតមកត្រឹមថ្ងៃទី ៣០ ខែវិច្ឆិកា ឆ្នាំ២០២២ នេះ CGCC បានផ្តល់ធានាឥណទានដល់ទៅជិត ៩០០ ក្រុមហ៊ុន/អាជីវកម្មក្នុងរង្វង់ទឹកប្រាក់ប្រហាក់ប្រហែល ៨៥ លានដុល្លារសហរដ្ឋអាមេរិក។ យើងមានសុទិដ្ឋិនិយមថា ការធានាឥណទាននឹងត្រូវបានប្រើប្រាស់ជាយន្តការចែករំលែកហានិភ័យដ៏ប្រសើរមួយ សម្រាប់ការផ្តល់ប្រាក់កម្ចីទៅកាន់ MSMEs ក្នុងដំណាក់កាលស្តារឡើងវិញនៃសេដ្ឋកិច្ចជាតិ។ កម្ចីដែលធានាពី CGCC នឹងបង្កើនទំនុកចិត្តដល់គ្រិះស្ថានហិរញ្ញវត្ថុក្នុងការផ្តល់កម្ចី ដើម្បីគាំទ្រដល់កំណើននៃMSMEs នៅកម្ពុជា”។

លោក ប៊ុន យីន ប្រធាននាយកប្រតិបត្តិ នៃធនាគារ CIMB  មានប្រសាសន៍ថា៖ «ការចុះកិច្ចព្រមព្រៀងធានាឥណទាននេះ បានផ្តល់ឱកាសដ៏ល្អប្រសើរ ដល់ធនាគារ CIMB ក្នុងការគាំទ្រយ៉ាងពេញទំហឹង ដល់ភាពរីកចម្រើន ប្រកបដោយនិរន្តរភាព នៃសហគ្រាសធុនតូច និងមធ្យម​ ក្នុងប្រទេសកម្ពុជា តាមរយៈផលិតផលដ៏សម្បូរបែបរបស់ធនាគារ។ ការបង្កើតកិច្ចសហការ ជាមួយសាជីវកម្មធានាឥណទានកម្ពុជា ផ្តល់លទ្ធភាពឲ្យម្ចាស់អាជីវកម្មធុនតូច និងមធ្យម ដែលមិនមានទ្រព្យបញ្ចាំ អាចទទួលបានសាច់ប្រាក់ចាំបាច់ សម្រាប់ជាទុនបង្វិល និងពង្រីកអាជីវកម្ម ជាមួយអត្រាការប្រាក់ប្រកួតប្រជែង»។

 លោក ប៊ុន យីន បានបន្តទៀតថា៖ «ការផ្តល់ជូនថ្មីនេះ សបញ្ជាក់ពីការបន្តប្តេជ្ញាចិត្តរបស់ធនាគារ CIMB ក្នុងការគាំទ្រដល់ការអភិវឌ្ឍន៍អាជីវកម្មខ្នាតតូច និងមធ្យម ដែលជាឆ្អឹងខ្នងនៃសេដ្ឋកិច្ចប្រទេសកម្ពុជា»។

ក្រោមកិច្ចព្រមព្រៀងធានាឥណទាននេះ ធនាគារ CIMB បានក្លាយជាគ្រឹះស្ថានហិរញ្ញវត្ថុចូលរួម (PFIs) មួយ ក្នុងចំណោម PFIs សរុប២៥ ស្ថាប័នរបស់ CGCC ក្នុងការប្តេជ្ញាចិត្តគាំទ្រដល់ក្រុមហ៊ុនអាជីវកម្មក្នុងការទទួលបានហិរញ្ញប្បទានស្របទៅនឹងយុទ្ធសាស្ត្ររបស់រាជរដ្ឋាភិបាលក្នុងការគាំទ្រ MSMEs ដែលជាឆ្អឹងខ្នងនៃសេដ្ឋកិច្ច តាមរយៈយន្តការធានាឥណទាន។

កិច្ចសហប្រតិបត្តិការ រវាង CGCC និង ធនាគារ CIMB នឹងបង្កើនលទ្ធភាពទទួលបានកម្ចីរបស់ក្រុមហ៊ុន/អាជីវកម្ម ឱ្យទទួលបានកម្ចី ទោះបីគ្មានទ្រព្យធានា និងជួយឱ្យទទួលបានកម្ចីច្រើនជាងមុន ជាងការខ្ចីដោយគ្មានការធានាឥណទាន។

អំពី CGCC 

CGCC គឺជាសហគ្រាសសាធារណៈដែលបង្កើតឡើងដោយអនុក្រឹត្យរបស់រាជរដ្ឋាភិបាលចុះថ្ងៃទី០១ ខែកញ្ញា ឆ្នាំ២០២០។ CGCC ស្ថិតក្រោមអាណាព្យាបាលបច្ចេកទេសនិងហិរញ្ញវត្ថុពីក្រសួងសេដ្ឋកិច្ចនិងហិរញ្ញវត្ថុ ជាមួយនឹងបេសកកម្មផ្តល់ការធានាឥណទានលើកម្ចីដែលផ្តល់ឱ្យអាជីវកម្ម ដើម្បីចែករំលែកហានិភ័យជាមួយស្ថាប័នផ្តល់កម្ចី និងបង្កើនបរិយាបន្នហិរញ្ញវត្ថុ។

គិតត្រឹមចុងខែវិច្ឆិកា ឆ្នាំ២០២២ CGCC បានផ្តល់ការធានាឥណទាន ដល់ក្រុមហ៊ុន/អាជីវកម្ម សរុបចំនួន៨៩៩ ក្នុងរង្វង់ទឹកប្រាក់ប្រហាក់ប្រហែល៨៥.៧៣ លានដុល្លារ ដែលក្នុងនោះ ៩៥% នៃចំនួនក្រុមហ៊ុន/អាជីវកម្មដែលទទួលការធានាសរុប បានផ្តល់ជូនទៅសហគ្រាសធុនតូចនិងមធ្យម (SMEs)។

អំពីធនាគារ CIMB

ធនាគារ ស៊ីអាយអិមប៊ី​ ភីអិលស៊ី​ ជាផ្នែកមួយនៃស៊ីអាយអិមប៊ី គ្រុប ដែលបានចាប់ផ្តើមប្រតិបត្តិការ នៅថ្ងៃទី១៩ ខែវិច្ឆិកា ឆ្នាំ២០១០ ដោយបានបើកសាខាពាណិជ្ជទី១ នៅចំកណ្តាលរាជធានីភ្នំពេញ។ បច្ចុប្បន្ន ធនាគារមានសាខាចំនួន ១៤កន្លែង នៅក្នុងខេត្តរាជធានីសំខាន់ៗទាំង៥ រួមមានរាជធានីភ្នំពេញ ខេត្តសៀមរាប ខេត្តព្រះសីហនុ ខេត្តកំពង់ចាម និងខេត្តបាត់ដំបង។ ជាមួយនឹងអតិថិជនទាំងបុគ្គលសរុបប្រមាណ ៣៥,០០០នាក់ ធនាគារ ស៊ីអាយអិមប៊ី មានផ្តល់ជូនសេវាកម្ម និងផលិតផលធនាគារដ៏ទូលំទូលាយ រួមមានសេវាកម្មហិរញ្ញវត្ថុបុគ្គល សេវាកម្មហិរញ្ញពាណិជ្ជកម្ម ព្រមទាំងសេវាកម្មហិរញ្ញវត្ថុសាជីវកម្ម សេវាប្រតិបត្តិការ និងគ្រឹះស្ថានហិរញ្ញវត្ថុផងដែរ។

ស៊ីអាយអិមប៊ី គ្រុប គឺជាស្ថាប័នហិរញ្ញវត្ថុដ៏ធំបំផុតទីពីររបស់ប្រទេសម៉ាឡេស៊ី និងជាធនាគារសាកលនាំមុខគេមួយក្នុងតំបន់អាស៊ាន។

ចុចទីនេះអានបន្ថែម: CGCC supports the accelerating SMEs’ Financial Literacy through the “I’m Financially Literate Program” second cohort

កម្មវិធីបណ្តុះបណ្តាលស្តីពី “ខ្ញុំមានចំណេះដឹងហិរញ្ញវត្ថុ” ត្រូវបានរៀបចំឡើងក្រោមកិច្ចផ្តួចផ្តើមពីធនាគារ ស្ថាបនា សហការឧបត្ថម្ភដោយ សហគ្រិនខ្មែរ ក្រុមហ៊ុនធានារ៉ាប់រង Manulife & សាជីវកម្មធានាឥណទានកម្ពុជា (CGCC) ដែលវគ្គទីបួន​នេះធ្វើទ្បើងពីថ្ងៃទី ៣ – ៤ & ១០ -​ ១១ ខែធ្នូ ឆ្នាំ២០២២ ដើម្បីផ្តល់ការបណ្តុះបណ្តាលចំណេះដឹងផ្នែកហិរញ្ញវត្ថុ ដល់សហគ្រាសខ្នាតមីក្រូ តូច និងមធ្យម ជាពិសេសសហគ្រិនស្រ្តី។

សហគ្រិន និងម្ចាស់អាជីវកម្មសរុបជាង២០រូប បានចូលរួមវគ្គបណ្តុះបណ្តាលវគ្គទីបួននេះ ពួកគាត់បានចែករំលែកនូវបទពិសោធន៍ ក៏ដូចជាបញ្ហាពាក់ព័ន្ធលើផ្នែកហិរញ្ញវត្ថុ ហើយពួកគាត់ក៏ទទួលបានឱកាសសិក្សាទៅលើភាពជាសហគ្រិន ការរៀបចំរបាយការណ៍ហិរញ្ញវត្ថុសម្រាប់អាជីវកម្ម ការសិក្សាលើកម្ចីឥណទានជាមួយធនាគារ និងជ្រើសរើសកម្ចីដែលស័ក្ដិសម​សម្រាប់​អាជីវកម្មរបស់ខ្លួន ។

កម្មវិធីបណ្តុះបណ្តាល “ខ្ញុំមានចំណេះដឹងហិរញ្ញវត្ថុ” ត្រូវបានបង្កើតឡើងយ៉ាងពិសេស ដើម្បីផ្តល់នូវជំនាញ និងបទពិសោធន៍ជាក់ស្តែងទាក់ទងទៅនឹងចំណេះដឹងហិរញ្ញវត្ថុ និងជំនាញគ្រប់គ្រងអាជីវកម្ម ក៏ដូចជាការទទួលបាននូវបណ្តាញពាណិជ្ជកម្មដែលអាចជំរុញដល់ការរីកចម្រើនអាជីវកម្មរបស់សហគ្រិន។

Click here to know more about: CGCC គាំទ្រការបណ្តុះចំណេះដឹងហិរញ្ញវត្ថុដល់សហគ្រាសធុនតូចនិងមធ្យម តាមរយៈកម្មវិធីបណ្តុះបណ្តាលស្តីពី “ខ្ញុំមានចំណេះដឹងហិរញ្ញវត្ថុ” វគ្គទី៣

Also check: Small and medium enterprises SME

នៅថ្ងៃទី០៥ ខែធ្នូ ឆ្នាំ២០២២ វេលាម៉ោង ៩:០០នាទីព្រឹក សាជីវកម្មធានាឥណទានកម្ពុជា (CGCC) បានរៀបចំកិច្ចប្រជុំក្រុមប្រឹក្សាភិបាលអាណត្តិទី១ លើកទី១២ នៅការិយាល័យកណ្តាលរបស់ CGCC ក្រោមវត្តមានដ៏ខ្ពង់ខ្ពស់របស់ ឯកឧត្តម រស់ សីលវ៉ា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាភិបាលរបស់ CGCC ដោយមានការចូលរួមពី សមាជិកក្រុមប្រឹក្សាភិបាល និងមន្ត្រីត្រួតពិនិត្យរដ្ឋ។

របៀបវារៈនៃកិច្ចប្រជុំក្រុមប្រឹក្សាភិបាលលើកទី១២ នេះ រួមមាន (១) របាយការណ៍ស្តីពីវឌ្ឍនភាពការងាររបស់ CGCC, (២) ពាក្យស្នើសុំធ្វើជាស្ថាប័នហិរញ្ញវត្ថុចូលរួម (PFIs) , (៣) គម្រោងធានាឥណទានថ្មីរបស់ CGCC (៤) ក្របខណ្ឌនៃការធានាឥណទានលើការបោះផ្សាយសញ្ញាបណ្ណ, (៥) វិសោធនកម្មនៃលក្ខន្តិកៈរបស់ CGCC និង (៦) ផ្សេងៗ។

កិច្ចប្រជុំក្រុមប្រឹក្សាភិបាលរបស់ CGCC តែងតែត្រូវបានរៀបចំឡើងជាទៀងទាត់ ដើម្បីពិនិត្យ វាយតម្លៃ និងផ្តល់អនុសាសន៍ដល់ CGCC ក៏ដូចជាផ្តល់ការសម្រេចនានា ទៅលើសកម្មភាពការងារ ជាពិសេសទៅលើកិច្ចការងារអភិវឌ្ឍស្ថាប័ន  ដើម្បីធានានូវតម្លាភាព និងប្រសិទ្ធភាពរបស់ CGCC។

ចុចទីនេះដើម្បីស្វែងយល់បន្ថែម: 11th Board of Directors Meeting of Credit Guarantee Corporation of Cambodia (CGCC)