CGCC

Menu
Menu

Tag: Credit Guarantee Corporation of Cambodia

កម្មវិធីកសាងសមត្ថភាពសហគ្រិនរបស់ CGCC (EPIC) វគ្គទី៣ នៃឆ្នាំ២០២៤ ផ្តោតលើ ប្រតិបត្តិការអាជីវកម្ម ក្នុងយុគសម័យឌីជីថល សម្រាប់ MSMEs

Posted on by Sorn Chhorvyvatey

(ភ្នំពេញ)៖ សាជីវកម្មធានាឥណទានកម្ពុជា (CGCC) សហការជាមួយធនាគារ ជេ ត្រាស់ រ៉ូយ៉ាល់ នាថ្ងៃទី០៦ ខែធ្នូ ឆ្នាំ២០២៤ នៅមជ្ឈមណ្ឌលអភិវឌ្ឍធុរកិច្ច បានរៀបចំកម្មវិធីកសាងសមត្ថភាពសហគ្រិនរបស់ CGCC (EPIC) វគ្គទី៣ នៃឆ្នាំ២០២៤ ស្តីអំពី «ប្រតិបត្តិការអាជីវកម្ម ក្នុងយុគសម័យឌីជីថល សម្រាប់សហគ្រាសខ្នាតមីក្រូ តូច និងមធ្យម (MSMEs)» ដែលមានការចូលរួមពីសិក្ខាកាម ដែលជាម្ចាស់សហគ្រាសខ្នាតមីក្រូ តូច និងមធ្យមសរុបប្រមាណ៥០រូប ក្នុងនោះមាន ៦៥% ជាសហគ្រិនស្រ្តី និងរួមទាំងនិស្សិតប្រមាណ១០រូប នៃសមាគមសិស្ស-និសិ្សតអាហារូបករណ៍សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត (អ.ម.ត)។

កម្មវិធី EPIC វគ្គទី៣នៃឆ្នាំ ២០២៤នេះ ត្រូវបានចូលរួមជាកិត្តិយស សម្រាប់ពិធីប្រគល់វិញ្ញាបនបត្របញ្ជាក់ការចូលរួម ជូនដល់សិក្ខាកាម គ្រូបណ្តុះបណ្តាល និងវាគ្មិនកិត្តិយសទាំងអស់ ពីសំណាក់បណ្ឌិត ម៉ី វ៉ាន់ រដ្ឋលេខាធិការ ក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមការងារគ្រប់គ្រងនិស្សិត (ក្រុមទី៦) នៃសមាគមសិស្ស-និសិ្សតអាហារូបករណ៍ សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត (អ.ម.ត) និងក្រោមចូលរួមជាគណអធិបតីពីសំណាក់ លោកស្រី យូ បូរី អនុប្រធានសមាគមស្រ្តីកម្ពុជា, លោក ណូ លីដា អគ្គនាយក CGCC, លោកស្រី ហង់ ជួន ណារីតា នាយិកានាយកដ្ឋានសេវាកម្មធនាគារផ្នែកសាជីវកម្មនៃ ធនាគារ ជេ ត្រាស់ រ៉ូយ៉ាល់, លោក ពា វណ្ណឆាយ នាយកផ្នែកសហគ្រាសធុនតូចនិងមធ្យម នៃនាយកដ្ឋានធនាគារសាជីវកម្ម នៃធនាគារជេត្រាស់ រ៉ូយ៉ាល់ និងគណៈគ្រប់គ្រង នៃCGCC និង ធនាគារ ជេ ត្រាស់ រ៉ូយ៉ាល់។

តាមរយៈ EPIC វគ្គទី៣ នៃឆ្នាំ២០២៤នេះ សិក្ខាកាមទាំងអស់បានស្វែងយល់អំពី «ប្រតិបត្តិការអាជីវកម្មក្នុងយុគសម័យឌីជីថល សម្រាប់សហគ្រាសខ្នាតមីក្រូ តូច និងមធ្យម (MSMEs)» ដែលត្រូវបានចែករំលែកដោយ លោកស្រី សែម ស្រីតូច នាយិកាប្រតិបត្តិ និងស្ថាបនិកសហគ្រាស អ៊ីភីអិល ផូលីនែត និងជាប្រធានសមាគមទឹកឃ្មុំកម្ពុជាដែលលោកស្រីបានចែករំលែកនូវឧបករណ៍ឌីជីថល ដើម្បីសម្រួលដល់ប្រតិបត្តិការអាជីវកម្ម, របៀបប្រើប្រាស់ឧបករណ៍ឌីជីថល ដើម្បីបង្កើនការលក់ ការគ្រប់គ្រងផ្នែកលក់និងអាជីវកម្ម ទំនាក់ទំនងអតិថិជន ការផ្សព្វផ្សាយផលិតផលឬសេវាកម្ម ការការពារការគំរាមកំហែងសន្តិសុខសាយប័រ និងចែករំលែកអំពីវិធីសាស្រ្តក្នុងការសម្របខ្លួនទៅនឹងនិន្នាការទីផ្សារនាពេលអនាគត និងឌីជីថលនីយកម្ម ដើម្បីរក្សាការប្រកួតប្រជែង និងនិរន្តរភាពនៃអាជីវកម្ម។

សិក្ខាកាមទាំងអស់ ក៏បានចែករំលែកនូវបទពិសោធន៍ ជាក់ស្តែងផ្ទាល់ខ្លួន ពីគ្នាទៅវិញទៅមក តាមរយៈវេទិកាពិភាក្សាជាក្រុម ទៅលើប្រធានបទជុំវិញសារៈសំខាន់នៃការប្រើប្រាស់ឧបករណ៍ និងប្រព័ន្ធឌីជីថល បញ្ហាប្រឈមក្នុងការផ្លាស់ប្តូរ ទៅរកការប្រើប្រាស់ប្រព័ន្ធឌីជីថល និងសំណូមពរឬសំណើនានា។

បន្ថែមពីនេះ សិក្ខាកាមក៏ទទួលបានស្វែងយល់អំពី «យន្តការធានាឥណទាន ក្នុងការគាំទ្រលទ្ធភាពទទួលបានហិរញ្ញប្បទានរបស់ សហគ្រាសធុនតូច និងមធ្យម» តាមរយៈបទបង្ហាញដោយ លោកស្រី លឹម ចាន់ធីតា ប្រធាននាយកដ្ឋានប្រតិបត្តិការនៃ CGCC។ ស្របជាមួយនឹងយន្តការធានាឥណទាន លោក ប៉ូច ពិសាល ប្រធានផ្នែកទំនាក់ទំនងអតិថិជន ផ្នែកសហគ្រាសធុនតូច និងមធ្យម នៃ ធនាគារ ជេត្រាស់ រ៉ូយ៉ាល់ ក៏បានចែករំលែកអំពី «ដំណើរការវាយតម្លៃឥណទាន និងដំណោះស្រាយហិរញ្ញវត្ថុសម្រាប់អាជីវកម្ម និងជាពិសេសការគាំទ្រដល់សហគ្រិនស្រ្តីផងដែរ»។

ការកសាងសមត្ថភាពសហគ្រិន គឺជាការងារអាទិភាពមួយរបស់ CGCC ក្នុងបេសកកម្មបង្កើនបរិយាបន្នហិរញ្ញវត្ថុ និងអភិវឌ្ឍសហគ្រាសខ្នាតតូច និងមធ្យម នៅកម្ពុជា។ EPIC គឺជាកម្មវិធីកសាងសមត្ថភាពសហគ្រិនរបស់ CGCC ដែល នឹងនាំមកនូវប្រធានបទពាក់ព័ន្ធការប្រតិបត្តិ និងគ្រប់គ្រងអាជីវកម្ម ដើម្បីអភិវឌ្ឍសមត្ថភាពសហគ្រាសធុនមីក្រូ តូច និងមធ្យម តាមរយៈកិច្ចសហការជាមួយស្ថាប័នពាក់ព័ន្ធ/គ្រឹះស្ថានហិរញ្ញវត្ថុចូលរួម៕

Credit to: Fresh News, published on 10 December 2024

 

ការលើកកម្ពស់សហគ្រាសធុនតូច និងមធ្យមក្នុងស្រុក ដើម្បីភាពប្រកួតប្រជែងលើឆាកអន្តរជាតិ៖ ការដាក់ឱ្យដំណើរការជាផ្លូវការ កម្មវិធីហិរញ្ញប្បទានសម្រាប់សហគ្រិននាំចេញ និងកម្មវិធីកសាងសមត្ថភាព និងជំនាញ សម្រាប់សហគ្រាសធុនតូច និងមធ្យម

Posted on by Sorn Chhorvyvatey

រាជធានីភ្នំពេញ ថ្ងៃទី២៣ ខែវិច្ឆិកា ឆ្នាំ២០២៤៖ ធនាគារ មេយប៊ែង សហការជាមួយ គម្រោង Feed the Future Cambodia Harvest III (គម្រោងហាវែស III) ក្រោមជំនួយពីទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ​ (USAID) បានប្រកាសដាក់ឱ្យដំណើរការ កម្មវិធីហិរញ្ញប្បទានសម្រាប់សហគ្រិននាំចេញ ដែលផ្តល់នូវដំណោះស្រាយហិរញ្ញវត្ថុដ៏សមស្របសម្រាប់ការនាំចេញ ក្នុងគោលបំណងលើកស្ទួយសហគ្រាសធុនតូន និងមធ្យមក្នុងស្រុក ក្នុងការប្រកួតប្រជែងលើឆាកអន្តរជាតិ។ កម្មវិធីហិរញ្ញប្បទានសម្រាប់សហគ្រិននាំចេញនេះ ក៏ត្រូវបានដាក់បញ្ចូល គម្រោងធានាឥណទាន និងកម្មវិធីកសាងសមត្ថភាព និងជំនាញ សម្រាប់សហគ្រាសធុនតូន និងមធ្យម ក្រោមកិច្ចសហប្រតិបត្តិការរវាងធនាគារ មេយប៊ែង ជាមួយសាជីវកម្មធានាឥណទានកម្ពុជា (CGCC)។

កិច្ចសហប្រតិបត្តិការនេះ មានគោលបំណងលើកកម្ពស់ការប្រកួតប្រជែង របស់សហគ្រាសធុនតូច និងមធ្យមក្នុងស្រុក លើឆាកអន្តរជាតិ ដើម្បីជំរុញឱ្យមានការអភិវឌ្ឍប្រកបដោយចីរភាព និងពង្រឹងវត្តមានរបស់ប្រទេសកម្ពុជា លើទីផ្សារអន្តរជាតិ។ ការផ្តល់នូវដំណោះស្រាយហិរញ្ញវត្ថុ ដែលមានដូចជា កម្ចីសម្រាប់ជាទុន ហិរញ្ញប្បទានសម្រាប់ការនាំចេញ ទីផ្សាររូបិយប័ណ្ណបរទេសចំនួន២១ប្រភេទដែលមានអត្រាប្រកួតប្រជែង ដំណោះស្រាយផ្ទេរ និងទទួលប្រាក់ និងសេវា​ហិរញ្ញប្បទាន​ពាណិជ្ជកម្ម ដែលសុទ្ធសឹងតែជាដំណោះស្រាយ សម្រាប់សហគ្រាសធុនតូច និងមធ្យម ក្នុងការជំនះឧបសគ្គផ្នែកហិរញ្ញវត្ថុ និងបន្តកំណើន លើទីផ្សារអន្តរជាតិ។ ពិធីប្រកាសដាក់ឱ្យដំណើរការកម្មវិធីហិរញ្ញប្បទានសម្រាប់សហគ្រិននាំចេញនេះ ជាព្រឹត្តិការណ៍ដ៏សំខាន់មួយសម្រាប់សហគ្រាសធុនតូច និងមធ្យមនៅប្រទេសកម្ពុជា ដោយផ្តល់នូវមធ្យោបាយដ៏សមស្របសម្រាប់ឱ្យពួកគេពង្រីកប្រតិបត្តិការ បង្កើនប្រាក់ចំណូល និងធានាការប្រកួតប្រជែងនៅលើទីផ្សារអន្តរជាតិ។​

លោក រ័ត្ន សោភ័ណ នាយកប្រតិបត្តិ និងនាយកប្រចាំប្រទេស របស់ធនាគារ មេយប៊ែង ខេមបូឌា មានប្រសាសន៍ថា៖ «កម្មវិធីហិរញ្ញប្បទានសម្រាប់សហគ្រិននាំចេញ គឺជាដំណោះស្រាយយ៉ាងសំខាន់សម្រាប់សហគ្រាសក្នុងស្រុក ដែលមានគោលបំណងពង្រីកការនាំចេញរបស់ខ្លួន ទាំងទៅកាន់ទីផ្សារអន្តរជាតិដែលខ្លួនកំពុងមានវត្តមានស្រាប់ ឬទៅកាន់ទីផ្សារអន្តរជាតិថ្មី។ តាមរយៈការគាំទ្រដល់សហគ្រាសធុនតូច និងមធ្យម ដើម្បីជម្នះឧបសគ្គលើផ្នែកហិរញ្ញវត្ថុ ភាពជាដៃគូចម្រុះភាគីនេះនឹងចូលរួមជំរុញកំណើនអាជីវកម្មបុគ្គល ក៏ដូចជារួមចំណែកដល់ការអភិវឌ្ឍសេដ្ឋកិច្ចប្រទេសកម្ពុជា ឱ្យកាន់តែមានភាពទូលំទូលាយ»។

«សហគ្រាសធុនតូច និងមធ្យម ប្រៀបបានដូចជាឆ្អឹងខ្នងនៃសេដ្ឋកិច្ចកម្ពុជា ហើយតាមរយៈការជួយគាំទ្រពួកគេ ដើម្បីឱ្យទទួលបានជោគជ័យក្នុងទីផ្សារនាំចេញ កិច្ចសហប្រតិបត្តិការនេះនឹងរួមចំណែកក្នុងការបង្កើតការងារ ជំរុញកំណើនសេដ្ឋកិច្ចប្រកបដោយចីរភាព និងពង្រឹងជំហររបស់ប្រទេសកម្ពុជាក្នុងការប្រកួតប្រជែងនៅក្នុងតំបន់អាស៊ាន និងទីផ្សារសាកល។ គំនិតផ្តួចផ្តើមនេះក៏បានសបញ្ជាក់ពីការប្តេជ្ញាចិត្តរបស់ធនាគារ មេយប៊ែង ក្នុងនាមជាធនាគារអាស៊ានឆ្នើមជាងគេនៅប្រទេសកម្ពុជា និងឈានមុខគេក្នុងការជំរុញសេដ្ឋកិច្ចក្នុងតំបន់»។

ស្របតាមបេសកកម្មរបស់ គម្រោងហាវែស III ដែលជាគម្រោងរយៈពេលប្រាំឆ្នាំ របស់ទីភ្នាក់ងារជំនួយអាមេរិក USAID ផ្តោតលើការជំរុញកំណើនប្រកបដោយចីរភាព និងបរិយាបន្នក្នុងវិស័យកសិកម្ម និងសហគ្រាសធុនតូច និងមធ្យមនៅប្រទេសកម្ពុជា កិច្ចសហប្រតិបត្តិការនេះនឹងគាំទ្រដល់ការធ្វើពិពិធកម្ម ការអភិវឌ្ឍភាពធន់ និងការប្រកួតប្រជែងសម្រាប់សហគ្រាសធុនតូច និងមធ្យមក្នុងប្រទេសកម្ពុជា។ តាមរយៈការចូលរួមសហការពីដៃគូក្នុងវិស័យឯកជន និងអ្នកពាក់ព័ន្ធសំខាន់ៗ គម្រោងនេះមានគោលបំណងពង្រឹងសមត្ថភាពសហគ្រាសធុនតូច និងមធ្យម ដើម្បីរួមចំណែក ដល់ការអភិវឌ្ឍសេដ្ឋកិច្ចរបស់ប្រទេសកម្ពុជា ក៏ដូចជាលើកកម្ពស់ជីវភាពរស់នៅរបស់ប្រជាជនកម្ពុជា។

លោក នីមីស ហ្សាវឺរី ប្រធានគម្រោងហាវែស III មានប្រសាសន៍ថា «ជាមួយនឹងដំណោះស្រាយហិរញ្ញប្បទានពាណិជ្ជកម្មថ្មីនេះ យើងអាចផ្តល់ឱ្យសហគ្រាសធុនតូច និងមធ្យមនូវដើមទុនចាំបាច់ដើម្បីគ្រប់គ្រងចំណាយផលិតកម្ម វិនិយោគលើការបង្កើនគុណភាព និងបំពេញតម្រូវការបញ្ជាទិញពីអន្តរជាតិ។ ដំណោះស្រាយហិរញ្ញប្បទានពាណិជ្ជកម្មប្រកបដោយប្រសិទ្ធភាព គឺពិតជាមានសារៈសំខាន់សម្រាប់សហគ្រាសក្នុងស្រុកទាំងនេះ ព្រោះវាមិនត្រឹមតែជួយផ្សាភ្ជាប់គម្លាតលំហូរសាច់ប្រាក់ប៉ុណ្ណោះទេ ប៉ុន្តែថែមទាំងអនុញ្ញាតឱ្យពួកគេប្រកួតប្រជែងកាន់តែមានប្រសិទ្ធភាព ដោយជួយសម្រួលដល់ការឆ្លើយតបទៅនឹងតម្រូវការទាន់ពេលវេលា ក៏ដូចជាពង្រីកទីផ្សារនាំចេញរបស់ពួកគេ។ ទាំងអស់គ្នា យើងអាចធានាថាសហគ្រាសទាំងនេះមិនត្រឹមតែមានធនធានហិរញ្ញវត្ថុប៉ុណ្ណោះទេ ថែមទាំងមានចំណេះដឹង និងជំនាញដែលចាំបាច់ ដើម្បីទទួលបានជោគជ័យក្នុងទីផ្សារជាសាកល។ ភាពជាដៃគូនេះនឹងដើរតួនាទីយ៉ាងសំខាន់ក្នុងការបង្កើនសក្តានុពលនាំចេញ និងជំរុញកំណើនសេដ្ឋកិច្ចប្រកបដោយចីរភាពរបស់ប្រទេសកម្ពុជា»។

រួមជាមួយនឹងហិរញ្ញប្បទានសម្រាប់សហគ្រិននាំចេញ ធនាគារ មេយប៊ែង CGCC និង គម្រោងហាវែស III ក៏បានប្រកាស ”កម្មវិធីកសាងសមត្ថភាព និងជំនាញសម្រាប់សហគ្រាសធុនតូច និងមធ្យម (BCC) ឆ្នាំ២០២៤ និងឆ្នាំ២០២៥” ដែលជាគំនិតផ្តួចផ្តើមដ៏លេចធ្លោមួយ ដែលត្រូវបានបង្កើតឡើងដើម្បីបំពេញបន្ថែមនូវជំនាញ និងចំណេះដឹងសំខាន់ៗ ដល់សហគ្រាសធុនតូច និងមធ្យម។ ចាប់តាំងពីការបង្កើតកម្មវិធីនេះឡើងក្នុងឆ្នាំ ២០២១ កម្មវិធី BCC បានផ្តល់ការបណ្តុះបណ្តាលដល់សហគ្រាសធុនតូច និងមធ្យមរាប់រយនាក់ លើមូលដ្ឋានគ្រឹះក្នុងការធ្វើអាជីវកម្ម បច្ចេកទេស និងបច្ចេកវិទ្យាទំនើបផ្សេងៗក្នុងការគ្រប់គ្រងអាជីវកម្ម។ ដោយផ្អែកលើភាពជោគជ័យរបស់កម្មវិធីនេះ កម្មវិធី BCC ថ្មីនេះនឹងផ្តល់វគ្គបណ្តុះបណ្តាលលើប្រធានបទសំខាន់ៗ ដែលទាក់ទងនឹង ដំណោះស្រាយហិរញ្ញវត្ថុពាណិជ្ជកម្ម ការគ្រប់គ្រងហិរញ្ញវត្ថុ និងផែនការយុទ្ធសាស្រ្ត ដែលផ្តល់ដោយអ្នកជំនាញដែលមានបទពិសោធជាច្រើនឆ្នាំក្នុងផ្នែកគណនេយ្យ ពាណិជ្ជកម្ម និងហិរញ្ញវត្ថុជាដើម។ វគ្គបណ្តុះបណ្តាលនេះនឹងផ្តល់ជូនសហគ្រិន នូវការយល់ដឹង បទពិសោធជាក់ស្តែង និងជំនាញដែលចាំបាច់ ដើម្បីបង្កើនប្រសិទ្ធភាពប្រតិបត្តិការ ក៏ដូចជាបង្កើនសក្តានុពលនៃកំណើនអាជីវកម្មរបស់ពួកគេ។

លោក ណូ លីដា អគ្គនាយក CGCC មានប្រសាសន៍ថា៖ «កម្មវិធី BCC ផ្តល់ជូនសហគ្រិន និងម្ចាស់អាជីវកម្មនូវជំនាញ និងចំណេះដឹងសំខាន់ៗ ដែលគាំទ្រពួកគាត់ឱ្យទទួលបានហិរញ្ញប្បទាន ដើម្បីពង្រីកអាជីវកម្ម។ តាមរយៈកម្មវិធីនេះ យើងអាចគាំទ្រពួកគាត់ ក្នុងការបង្កើនចំណេះដឹងហិរញ្ញវត្ថុ ដែលជាមូលដ្ឋានគ្រឹះសម្រាប់សហគ្រាសធុនតូច និងមធ្យម ក្នុងការប្រកួតប្រជែងទាំងក្នុងស្រុក និងក្រៅស្រុក។ កម្មវិធីនេះ គឺជាជំហានដ៏សំខាន់ ស្របតាមចក្ខុវិស័យរួមគ្នារបស់យើងក្នុងការជំរុញការអភិវឌ្ឍសហគ្រាសធុនតូច និងមធ្យម ប្រកបដោយភាពធន់ និងថាមវន្ត ដែលរួមចំណែកយ៉ាងសំខាន់ដល់កំណើនសេដ្ឋកិច្ចរបស់ប្រទេសកម្ពុជា។ លើសពីនេះ គំនិតផ្តួចផ្តើមនេះ ត្រូវបានគាំទ្រដោយ គម្រោងធានាឥណទាន របស់ CGCC ដែលផ្តល់នូវដំណោះស្រាយ ចំពោះបញ្ហាខ្វះទ្រព្យធានា ដែលជាបញ្ហាប្រឈមចម្បងមួយសម្រាប់សហគ្រាសធុនតូច និងមធ្យម។ តាមរយៈការបន្ធូរបន្ថយតម្រូវការទ្រព្យធានា យើងអាចចូលរួមបង្កើនលទ្ធភាពរបស់សហគ្រាសធុនតូច និងមធ្យម ក្នុងការទទួលបានហិរញ្ញប្បទាន ដែលអនុញ្ញាតឱ្យពួកគាត់ ទទួលបានទុនចាំបាច់ សម្រាប់កំណើនអាជីវកម្មប្រកបដោយចីរភាព»។

កិច្ចសហប្រតិបត្តិការរវាង ធនាគារ មេយប៊ែង គម្រោងហាវែស III និងCGCC បាននិងកំពុងកសាងប្រព័ន្ធអេកូដ៏រឹងមាំសម្រាប់គាំទ្រសហគ្រាសធុនតូច និងមធ្យម នៅប្រទេសកម្ពុជា ដើម្បីឱ្យពួកគេរីកចម្រើនទាំងនៅក្នុងទីផ្សារក្នុងស្រុក និងលើឆាកអន្តរជាតិ។ តាមរយៈគំនិតផ្តួចផ្តើមដ៏ចាំបាច់ទាំងនេះ ដែលរួមមាន៖ ដំណោះស្រាយហិរញ្ញវត្ថុ កម្មវិធីពង្រឹងសមត្ថភាព និងការកាត់បន្ថយតម្រូវការទ្រព្យធានាតាមរយៈយន្តការធានាឥណទាន សម្រាប់សហគ្រាសធុនតូច និងមធ្យម នឹងអាចទទួលបាននូវធនធានគ្រប់គ្រាន់ ក៏ដូចជាចំណេះដឹង និងទំនុកចិត្ត ដើម្បីពង្រីកអាជីវកម្មរបស់ពួកគេ និងឈានទៅរកការប្រកួតប្រជែងលើទីផ្សារអន្តរជាតិ។

ភាពជាដៃគូជាយុទ្ធសាស្រ្តដ៏រឹងមាំនេះ បានបង្ហាញពីការប្តេជ្ញារួមគ្នាក្នុងការគាំទ្រ និងអភិវឌ្ឍសហគ្រាសធុនតូច និងមធ្យមនៅក្នុងប្រទេសកម្ពុជា ប្រកបដោយភាពធន់ បរិយាបន្ន និងការតភ្ជាប់ជាសកល។ គំនិតផ្តួចផ្តើមរួមគ្នារវាង ធនាគារ មេយប៊ែង គម្រោងហាវែស III និងCGCC នឹងរួមចំណែកជាមូលដ្ឋានគ្រឹះ សម្រាប់ការអភិវឌ្ឍរិស័យធុរកិច្ចកម្ពុជា ដែលជាចំណែកយ៉ាងសំខាន់សម្រាប់សេដ្ឋកិច្ចជាតិ ក៏ដូចជាការលើកកម្ពស់វត្តមានរបស់ប្រទេសកម្ពុជានៅលើឆាកអន្តរជាតិ៕

CGCC ចូលរួមក្នុងសន្និសីទរបស់ ACSIC លើកទី៣៦ នៅប្រទេសនេប៉ាល់

Posted on by Sorn Chhorvyvatey

នៅថ្ងៃទី២០ ដល់ថ្ងៃទី២៥ ខែកញ្ញា ឆ្នាំ២០២៤ គណៈប្រតិភូ CGCC ដឹកនាំដោយ ឯកឧត្តមបណ្ឌិត ម៉ី វ៉ាន់ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មការគ្រប់គ្រងហានិភ័យរបស់ CGCC បានចូលរួមសន្និសីទ Asian Credit Supplementation Institution Confederation (ACSIC) លើកទី៣៦ នៅរដ្ឋធានី Kathmandu នៃប្រទេសនេប៉ាល់ ដែលត្រូវបានរៀបចំដោយ Deposit and Credit Guarantee Fund of Nepal ក្រោមប្រធានបទ “Financing Innovations for Economic Growth”។

តាមរយៈសន្និសីទនេះ​ ឯកឧត្តមបណ្ឌិត ម៉ី វ៉ាន់ ត្រូវបានអញ្ជើញចូលរួមថ្លែងសុន្ទរកថាចំណាប់អារម្មណ៍ក្រោយពីទទួលបានការប្រកាសជាផ្លូវការនូវការក្លាយជាសមាជិក ACSIC ចាប់ពីឆ្នាំ២០២៤ តទៅ ដោយបានថ្លែងអំណរគុណដល់សមាជិក ACSIC ទាំងអស់ដែលបានគាំទ្រ និងស្វាគមន៍ CGCC ជាសមាជិកផ្លូវការ និងបានបង្ហាញការប្តេជ្ញាចិត្តក្នុងការធ្វើជាម្ចាស់ផ្ទះរៀបចំកម្មវិធីបណ្តុះបណ្តាល ACSIC សម្រាប់ឆ្នាំ២០២៦ខាងមុខ។

ជាងនេះទៅទៀត លោក ណូ លីដា អគ្គនាយក CGCC ក៏ត្រូវបានអញ្ជើញជាវាគ្មិនកិត្តិយសចែករំលែកអំពី គម្រោងធានាឥណទាន និងការធានាលើសញ្ញាបណ្ណរបស់ CGCC ជាពិសេសក្នុងគោលបំណងគាំទ្រដល់សហគ្រាសធុនតូច និងមធ្យម តាមរយៈការងារអាទិភាពលើគម្រោងហិរញ្ញប្បទានបៃតងប្រកបដោយនិរន្តរភាព។ បន្ថែមពីលើនេះ លោកអគ្គនាយកក៏បានចែករំលែកអំពីកម្មវិធីកសាងសមត្ថភាពរបស់ CGCC ដែលមានគោលដៅគាំទ្រដល់ក្រុមហ៊ុនអាជីវកម្ម, ការចូលរួមនៃយន្តការធានាឥណទានដើម្បីបង្កើនឱកាសការងារ ការដោះស្រាយបម្រែបម្រួលអាកាសធាតុ និងសមភាពយេនឌ័រ និងការគិតគូរពីដំណោះស្រាយហិរញ្ញប្បទានប្រកបដោយចីរភាព និងនវានុវត្តន៍ តាមរយៈការរៀនសូត្រពីបទពិសោធន៍ល្អៗពីប្រទេសជាសមាជិក។

នៅក្នុងសន្និសីទនេះ គណៈប្រតិភូមកពីប្រទេសសមាជិក/អ្នកសង្កេតការណ៍មួយចំនួនរបស់ ACSIC បានធ្វើបទបង្ហាញពីវឌ្ឍនភាពនៃគម្រោងធានាឥណទានរៀងៗខ្លួន ក៏ដូចជាមានកិច្ចពិភាក្សាពាក់ព័ន្ធនឹងប្រធានបទសំខាន់ៗដូចជា យន្តការនវានុវត្តន៍ហិរញ្ញវត្ថុ ការគ្រប់គ្រងហានិភ័យនៃស្ថាប័នធានាឥណទាន ការប្រើប្រាស់ប្រព័ន្ធឌីជីថល (AI) និងការអភិវឌ្ឍប្រកបដោយចីរភាពជាដើម។

សន្និសីទ ACSIC លើកទី៣៦ មានការចូលរួមពីតំណាងសមាជិក ACSIC និងស្ថាប័នពាក់ព័ន្ធដូចជាធនាគារពិភពលោក ធនាគារកណ្តាលរបស់ប្រទេសនេប៉ាល់ ប្រមាណជាង១០០រូប។ គួរបញ្ជាក់ផងដែរថា ACSIC គឺជាសមាគមនៃស្ថាប័នធានាឥណទាន ឬស្ថាប័នមានតួនាទីប្រហាក់ប្រហែលនេះដ៏ធំជាងគេ នៅក្នុងតំបន់អាស៊ី ដែលត្រូវបានបង្កើតឡើងនៅក្នុងឆ្នាំ១៩៨៧ ដើម្បីជំរុញការអភិវឌ្ឍប្រព័ន្ធធានាឥណទានសម្រាប់សហគ្រាសធុនតូច និងមធ្យម តាមរយៈការចែករំលែកព័ត៌មាន ការប្រឹក្សាយោបល់ និងការកសាងសមត្ថភាពរវាងស្ថាប័នសមាជិក៕

 

លោក ណូ លីដា ត្រូវបានតែងតាំងជាអគ្គនាយកថ្មី នៃសាជីវកម្មធានាឥណទានកម្ពុជា នៃក្រសួងសេដ្ឋកិច្ច និងហិរញ្ញវត្ថុ

Posted on by Sorn Chhorvyvatey

(ភ្នំពេញ)៖ លោក ណូ លីដា ត្រូវបានតែងតាំងជាអគ្គនាយកថ្មី នៃសាជីវកម្មធានាឥណទានកម្ពុជា នៃក្រសួងសេដ្ឋកិច្ច និងហិរញ្ញវត្ថុ ដោយអនុក្រឹត្យលេខ ៨៧២ អនក្រ.តត តាមរយៈការឯកភាពរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃកម្ពុជា តបតាមសំណើរបស់ អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ។

នាពេលថ្មីៗកន្លងទៅនេះ សាជីវកម្មធានាឥណទានកម្ពុជា (CGCC) បានរៀបចំ «ពិធីប្រកាសតែងតាំង និងការផ្ទេរភារកិច្ចរបស់អគ្គនាយកសាជីវកម្មធានាឥណទានកម្ពុជា» ក្រោមអធិបតីភាពរបស់លោក រស់ សីលវ៉ា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាភិបាល CGCC។

លោក ណូ លីដា ជាអគ្គនាយក CGCC ដែលលោក គឺជាបុគ្គលដ៏សំខាន់មួយរូប ក្នុងការចូលរួមបង្កើតគោលនយោបាយបង្កើត CGCC និងបានកាន់តួនាទីជាអគ្គនាយករង ក្នុងរយៈពេល៤ឆ្នាំ កន្លងមកនេះ និងបានបម្រើការងារនៅក្រសួងសេដ្ឋកិច្ច និងហិរញ្ញវត្ថុ ជាង១០ឆ្នាំ ដែលពោរពេញដោយបទពិសោធន៍ និងសមត្ថភាពគ្រប់គ្រាន់ ក្នុងការបន្តដឹកនាំ CGCC ឱ្យកាន់តែរីកចម្រើន។

តាមរយៈពិធីនេះ CGCC ក៏បានរៀបចំពិធីដាក់ឱ្យដំណើរការជាផ្លូវការនូវ គម្រោងហិរញ្ញប្បទានបៃតងប្រកបដោយចីរភាព ដែលជាគម្រោងបង្កើតឡើង ក្រោមកិច្ចសហការផ្តួចផ្តើមរបស់ CGCC និង កម្មវិធីអភិវឌ្ឍន៍សហប្រជាជាតិ (UNDP) ដែលនឹងអនុញ្ញាតឱ្យដៃគូអភិវឌ្ឍន៍ និងគ្រឹះស្ថានហិរញ្ញវត្ថុចូលរួមបង្កើតមូលនិធិរួមគ្នាជាមួយ CGCC ដើម្បីផ្តល់ហិរញ្ញប្បទានចម្រុះសម្រាប់ការវិនិយោគវិស័យបៃតងដែលមានការធានាពី CGCC ក្នុងលក្ខខណ្ឌអនុគ្រោះ ដើម្បីគាំទ្រដល់គោលដៅអភិវឌ្ឍន៍ប្រកបដោយចីរភាព។ ការដាក់ឱ្យដំណើរការជាផ្លូវការ នេះមានការចូលរួមជាវត្តមានកិត្តិយស និងជាសក្ខីភាពពីសំណាក់ឯកឧត្តមប្រធាន និងសមាជិកក្រុមប្រឹក្សាភិបាល CGCC, លោក Shakeel Ahmad អ្នកតំណាងរងនៃ UNDP និងសហការី និងអគ្គនាយក CGCC។

លោក រស់ សីលវ៉ា បានថ្លែងថា «ពិតណាស់ ភាពជោគជ័យ និងការរីកចម្រើនរបស់ CGCC មកទល់ពេលនេះ មិនមែនកើតឡើងដោយចៃដន្យនោះទេ ពោលគឺកើតចេញពីការបំពេញតួនាទីប្រកបដោយវិជ្ជាជីវៈ ការទទួលខុសត្រូវ និងឆន្ទៈរបស់ថ្នាក់ដឹកនាំ និងបុគ្គលិកគ្រប់ជាន់ថ្នាក់របស់ CGCC ជាពិសេសការគាំទ្រ កិច្ចសហការល្អពីគ្រប់ភាគីពាក់ព័ន្ធទាំងអស់ដែលរួមមាន រាជរដ្ឋាភិបាល ដៃគូអភិវឌ្ឍន៍ អង្គការ សមាគម គ្រឹះស្ថានហិរញ្ញវត្ថុចូលរួម និងសហគ្រាសខ្នាតតូច និងមធ្យមរបស់យើង»។

លោក ណូ លីដា អគ្គនាយក CGCC បានថ្លែងប្តេជ្ញាថា នឹងខិតខំបំពេញតួនាទីនេះ ឱ្យអស់ពីសមត្ថភាព និងពីអស់ពីកម្លាំងកាយចិត្ត នឹងប្រើប្រាស់ នូវរាល់មធ្យោបាយដែលខ្លួនមាន ដើម្បីដឹកនាំ CGCC ឱ្យកាន់តែរីចកម្រើនបន្ថែមទៀត ដោយផ្អែកលើគុណាធិបតេយ្យ និងគោលការណ៍ ព្រមទាំងប្រកាន់ភ្ជាប់ជានិច្ច នូវការបំពេញការងារ ប្រកបដោយទំនុកចិត្ត, ទំនួលខុសត្រូវ, សាមគ្គីភាព, ចីរភាព, តម្លាភាព ដើម្បីគាំទ្រគោលនយោបាយរបស់រាជរដ្ឋាភិបាល។

CGCC ត្រូវបានបង្កើតឡើងក្នុងខែវិច្ឆិកា ឆ្នាំ២០២០ និងបានដាក់ឱ្យដំណើរការគម្រោងធានាឥណទានជាលើកដំបូងនៅថ្ងៃទី២៩ ខែមីនា ឆ្នាំ២០២១៕

 

Credit to: Fresh News, Published on 04 October 2024

 

អគ្គនាយកចប់អាណត្តិលើកឡើងពីការផ្លាស់ប្តូរគួរឱ្យកត់សម្គាល់របស់សាជីវកម្មធានាឥណទានកម្ពុជា

Posted on by Sorn Chhorvyvatey

ដោយចាប់ផ្តើមជាស្ថាប័នរដ្ឋាភិបាលជួយដល់សហគ្រាសធុនតូច និងមធ្យមនៅកម្ពុជាក្នុងអំឡុងជំងឺរាតត្បាត សាជីវកម្មធានាឥណទានកម្ពុជា (CGCC) បានប្រែក្លាយពីការធានាឥណទានទៅជាហិរញ្ញប្បទានបៃតង និងការធានាសញ្ញាប័ណ្ណក្រោមការដឹកនាំរបស់លោកអគ្គនាយក Wong Keet Loong ។ លោកបានបំពេញការងារជាមួយ CGCC ចាប់តាំងពីក្រុមហ៊ុនត្រូវបានបង្កើតឡើងនៅក្នុងខែតុលាឆ្នាំ២០២០។ បច្ចុប្បន្ននេះ CGCC បានធានាឥណទានចំនួន២៣០ លានដុល្លារក្នុងការធានាដល់២.៨០០ ក្រុមហ៊ុន/អាជីវកម្ម ។ ពិតណាស់ លោក Wong មិនមែនជាអ្នកចំណូលថ្មីសម្រាប់ពិភពឥណទានទេ លោកធ្លាប់មានបទពិសោធន៍ធ្វើការឱ្យសាជីវកម្មធានាឥណទាន (CGC) នៃប្រទេសម៉ាឡេស៊ី។ ជាមួយនឹងបទពិសោធន៍ ២៥ ឆ្នាំក្នុងវិស័យធនាគារ លោកគឺជាអ្នកជំនាញអន្តរជាតិផ្នែកហិរញ្ញវត្ថុនៅប្រទេសមួយចំនួនដូចជា ស្រីលង្កា ហ្ស៊ីមបាវ៉េ ក្នុងចំណោមប្រទេសដទៃទៀត។ យោងតាមគណនីធម្មនុញ្ញដែលមានការបញ្ជាក់ លោក Wong ជាសមាជិកនៃសមាគមគណនេយ្យករដែលមានវិញ្ញាបនបត្រ (ACCA) តាំងពីឆ្នាំ១៩៩៤ ។

សព្វថ្ងៃនេះ CGCC ​បាន​ក្លាយ​ជា​ស្ថាប័នដ៏​សំខាន់​សម្រាប់កម្ពុជា។ ចាប់ផ្តើមនៅអំឡុងពេលមានជំងឺCovid-19 CGCC បានផ្តល់ការការពារសុវត្ថិភាពសម្រាប់ធនាគារ និងស្ថាប័នហិរញ្ញវត្ថុជាច្រើនក្នុងការបន្តផ្តល់ប្រាក់កម្ចីដល់សេដ្ឋកិច្ចនៃប្រទេស។

កន្លងមក លោក Wong បានធ្វើការជាមួយសាជីវកម្មធានាឥណទាននៃប្រទេសម៉ាឡេស៊ីជាមួយក្រុមស្ថាបនិកនៃ CGCC ដើម្បីបង្កើតសហគ្រាសពីដំណាក់កាលដំបូង។ ក្នុងនាមជាអគ្គនាយកដំបូងរបស់ CGCC លោក Wong បានបន្សល់ទុកនូវកេរ្តិ៍ដំណែលសម្រាប់ឧស្សាហកម្មនេះ។ មន្ត្រី​ក្រសួង​ដែល​បាន​និយាយ​ជាមួយកាសែត​ខ្មែរថាមស៍​បាន​សាទរ​ចំពោះ​​ការ​ដឹកនាំរបស់លោកនៅ CGCC ក្នុងពេលកន្លងមក។

ក្នុងឱកាសផ្តល់បទសម្ភាសន៍ជាមួយខ្មែរថាមស៍ លោក Wong បាននិយាយថា លោកក៏ទទួលបានការណែនាំពីលោក រស់ សីលវ៉ា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធាន CGCC និងដផ្សេងទៀតដើម្បីជួយលោកក្នុងការបំពេញតួនាទីថ្មី។

CGCC បានចាប់ផ្តើមនៅខែកក្កដា ឆ្នាំ២០២០ ក្រោមកម្រិតគោលនយោបាយ ហើយលោក Wong បានចាប់ផ្តើមតួនាទីជាផ្លូវការក្នុងខែតុលា ឆ្នាំ២០២០។ ក្នុងរយៈពេល៩ខែបន្ទាប់ មន្ត្រីក្រសួងបានកំណត់អំពីការបង្កើតក្របខ័ណ្ឌគោលនយោបាយ និងគោលការណ៍ណែនាំសម្រាប់ប្រតិបត្តិការ។ “ត្រឹមខែមីនា ឆ្នាំ២០២១ យើងបានចាប់ផ្តើមគម្រោងធានាឥណទានដំបូងរបស់យើង”។

លោកបានអោយដឹងទៀតថា “នៅពេលយើងចាប់ផ្តើម ចក្ខុវិស័យរបស់យើងគឺច្បាស់លាស់៖ ដើម្បីបង្កើតស្ថាប័នធានាឥណទានដំបូងគេនៅកម្ពុជា។ ខ្ញុំមានមោទនភាពក្នុងការនិយាយថា យើងបានប្រែក្លាយចក្ខុវិស័យនោះឱ្យក្លាយជាការពិត ដោយដាក់មូលដ្ឋានគ្រឹះសម្រាប់ទិដ្ឋភាពហិរញ្ញវត្ថុ ដែលនឹងគាំទ្រដល់សហគ្រាសធុនតូច និងមធ្យមទូទាំងប្រទេស។ CGCC ត្រូវបានបញ្ចូលនៅថ្ងៃទី៣ ខែវិច្ឆិកា ឆ្នាំ២០២០ ហើយយើងបានចាប់ផ្តើមប្រតិបត្តិការបន្ទាប់ពី៤ខែ​ដែល​យើង​បាន​ដាក់​ដំណើរការ​គម្រោង​ធានា​ឥណទានដើម្បីស្ដារ​អាជីវកម្ម​ដំបូង​របស់​យើង (BRGS)។

លោកបានបន្ថែមថា ខណៈដែលឆ្នាំ២០២១ មានសន្ទុះយឺតនៅពេលដែល CGCC បានព្យាយាមផ្តល់លារយល់ដឹងដល់អ្នកទីផ្សារអំពីតម្រូវការសម្រាប់ការធានាឥណទាន នៅឆ្នាំ២០២២ ល្បឿននៃការធានាឥណទានបានកើនឡើង។ “នៅក្នុងឆ្នាំ២០២១ យើងបានធានាឥណទានចំនួន ២១,៣ លានដុល្លារសម្រាប់ ១៩៤ គណនី។ នៅឆ្នាំ២០២២ យើងធានាឥណទានដែលមានទំហំទឹកប្រាក់ដល់ ៧១,៤ លានដុល្លារជូនដល់ ៧៩១អាជីវកម្ម”។ “យើងបានរក្សាល្បឿននេះនៅឆ្នាំ២០២៣ និងធានាឥណទានចំនួន ៧២ លានដុល្លារសម្រាប់ ៩៤៣គណនី។” សរុបមក CGCC បានធានាឥណទានចំនួន ១៦៤ លានដុល្លារដល់ ១.៩២៨សហគ្រាសខ្នាតតូច និងមធ្យម គិតត្រឹមខែមិថុនា ឆ្នាំ២០២៤។

លោកបានបន្តថា កិច្ចខិតខំប្រឹងប្រែងរបស់ CGCC មកទល់បច្ចុប្បន្នបាននាំឱ្យមានការធានាចំនួន ២.៨០០ដល់សហគ្រាស/អាជីវកម្ម ដែលស្មើនឹងទឹកប្រាក់ចំនួន ២៣០ លានដុល្លារនៅទូទាំងខេត្តទាំងអស់។ “យន្តការធានាឥណទានគឺត្រូវការជាចាំបាច់នៅក្នុងប្រទេស។ សព្វថ្ងៃនេះ នៅពេលដែលយើងឈានចូលដល់ឆ្នាំទីបួននៃប្រតិបត្តិការរបស់យើង CGCC បានក្លាយជាមធ្យោបាយផ្តល់ហិរញ្ញប្បទានប្រកបដោយនិរន្តរភាពសម្រាប់សហគ្រាសធុនតូច និងមធ្យម។

លោកបានលើកឡើងទៀតថា នៅកម្ពុជា សហគ្រាសធុនតូច និងមធ្យមតំណាងឱ្យ ៧០ ភាគរយនៃឱកាសការងារ និងរួមចំណែក៥៨ ភាគរយដល់ផលិតផលសរុបរបស់ប្រទេស។ សហគ្រាសធុនតូច និងមធ្យមមកពីវិស័យចម្រុះដូចជា កសិកម្ម ឧស្សាហកម្ម និងសេវាកម្ម។ ប៉ុន្តែ រដ្ឋាភិបាល​បាន​កត់​សម្គាល់​ថា មាន​គម្លាត​ឥណទាន។ មនុស្សជាច្រើនមិនអាចទទួលបានឥណទានពីធនាគារទេ ដូច្នេះរដ្ឋាភិបាលបានដោះស្រាយបញ្ហានេះដោយបានបង្កើត CGCC ។

ឧបសគ្គទូទៅមួយចំនួនដែលសហគ្រាសធុនតូច និងមធ្យមប្រឈមក្នុងការទទួលបានឥណទាន គឺការខ្វះខាតកំណត់ត្រាហិរញ្ញវត្ថុដែលអាចជឿទុកចិត្តបាន ដូចជាពិន្ទុឥណទាន និងវត្ថុបញ្ចាំជាដើម។ “ពួកគេក៏រងផលប៉ះពាល់ផងដោយកង្វះចំណេះដឹងផ្នែកហិរញ្ញវត្ថុ និងគំរូអភិបាលកិច្ចសាជីវកម្មល្អ។ ប៉ុន្តែជាមួយនឹងការគាំទ្ររបស់ CGCC សហគ្រាសធុនតូច និងមធ្យមអាចទទួលបានឥណទានដែលដើម្បីពង្រីកអាជីវកម្មរបស់ពួកគេ ឬទទួលបានដើមទុនសម្រាប់ការបណ្តាក់ទុនថ្មីៗ។

បើក្រឡេកមើលផលប័ត្រនៃអាជីវកម្មដែល CGCC ធានាមានខ្ពស់រហូតដល់ ៥០ ភាគរយគឺជាសហគ្រាសធុនតូច និងមធ្យមក្នុងសេវាកម្ម និងពាណិជ្ជកម្ម ៣ ភាគរយពីវិស័យកសិកម្ម ៧ ភាគរយពីឧស្សាហកម្មជាមួយសហគ្រាសធុនតូច និងមធ្យមផ្សេងទៀតដែលបង្កើតបាន៤០ ភាគរយ។

CGCC ក៏បានដើរតួនាទីយ៉ាងសំខាន់ក្នុងការបង្កើតការងារផងដែរ។ នៅឆ្នាំ២០២១ CGCC បានបង្កើតការងារចំនួន ៤.៦៧១កន្លែង ក្នុងចំណោមសហគ្រាសធុនតូច និងមធ្យម។ ចំនួននេះបានកើនឡើងបួនដងក្នុងឆ្នាំ២០២២ ដល់ ១៩.៩២១កន្លែ ហើយនៅឆ្នាំ ២០២៣ បានកើនឡើង៤០ ភាគរយដល់ ២៨.១៤៨ កន្លែង។ លោក Wong បានបន្តថា “សរុបមក CGCC បានដើរតួយ៉ាងសំខាន់ក្នុងការបង្កើតការងារជាង ៥២.៧៤០កន្លែងនៅក្នុងប្រទេសកម្ពុជា” ។

នៅឆ្នាំនេះ CGCC ក៏បានចាប់ផ្តើម “គំនិតផ្តួចផ្តើមកម្មវិធីសហគ្រិន” ដើម្បីលើកកម្ពស់ភាពជាសហគ្រិន និងចំណេះដឹងផ្នែកហិរញ្ញវត្ថុក្នុងចំណោមម្ចាស់សហគ្រាសធុនតូច និងមធ្យម។ នៅឆ្នាំ២០២៣ យើងសម្រេចបានសមិទ្ធផលមួយទៀត ដោយក្លាយជាស្ថាប័នធានាសញ្ញាប័ណ្ណដំបូងគេនៅកម្ពុជា។ កាលពីដើមខែនេះ CGCC បានចុះហត្ថលេខាលើអនុស្សរណៈយោគយល់ជាមួយនិយតករមូលបត្រកម្ពុជា (SERC) ដើម្បីគាំទ្រទីផ្សារមូលបត្រកម្ពុជា តាមរយៈការធ្វើពិពិធកម្មសេវាកម្មធានាឥណទាន និងការធានាលើសញ្ញាប័ណ្ណ។ ជាមួយគ្នានេះ CGCC ក៏បានចុះហត្ថលេខាលើអនុស្សរណៈយោគយល់គ្នាកាលពីខែមុនជាមួយក្រុមហ៊ុន GuarantCo ដើម្បីផ្តល់ការធានាសម្រាប់មូលបត្របំណុលក្នុងស្រុក ដែលជាក្រុមហ៊ុនធានាអន្តរជាតិដែលផ្តល់មូលនិធិដោយបណ្តាប្រទេសអ៊ឺរ៉ុបមួយចំនួនដូចជា ចក្រភពអង់គ្លេស ហូឡង់ និងស្វីស ដើម្បីផ្តល់សមត្ថភាពធានាបន្ថែម និងជំនួយបច្ចេកទេសដល់ CGCC ។

លោកបានលើកឡើងទៀតថា “ពួកយើងនឹងផ្តល់ការធានាដល់វិនិយោគិនស្ថាប័ន និងសាធារណៈជន ដោយសារ CGCC បានទទួលចំណាត់ថ្នាក់ឥណទានក្នុងស្រុករបស់ khAAA ។ វាក៏នឹងជាការធានាដល់វិនិយោគិនថា ដៃគូរបស់យើង GuarantCo គឺជាអង្គភាពវាយតម្លៃបច្ចេកវិទ្យាហិរញ្ញវត្ថុ “ស្ថិរភាព” និងមានកម្រិត “AA” ។

“សមិទ្ធិផលនេះបង្ហាញពីការគាំទ្ររបស់យើងចំពោះគ្រប់ផ្នែកនៃសហគ្រាសធុនតូច និងមធ្យម តាមរយៈការបង្កើនមូលបត្របំណុលដែលធានាដោយ CGCC”។

លោកបានបញ្ជាក់ទៀតថា “ចក្ខុវិស័យរបស់យើងត្រូវបានពង្រីក ហើយយើងក៏បានបង្កើតកន្លែងផ្តល់ហិរញ្ញប្បទានបៃតងប្រកបដោយនិរន្តរភាព និងគម្រោងការធានាសញ្ញាប័ណ្ណនេះ ដែលយើងសង្ឃឹមថាយើងនឹងមានដៃគូល្អជាមួយ SERC, CSX និង GuarantCo”។

លោក រស់ សីលវ៉ា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធាន CGCC បានមានប្រសាសន៍ថា “ការធានារបស់ CGCC នឹងលើកកម្ពស់ការផ្តល់ហិរញ្ញប្បទានប្រកបដោយភាពច្នៃប្រឌិត និងផលិតផលហិរញ្ញវត្ថុ ដែលនឹងគាំទ្រដល់ការធ្វើពិពិធកម្មសេដ្ឋកិច្ច និងលើកកម្ពស់ការប្រកួតប្រជែងរបស់កម្ពុជា ស្របតាមយុទ្ធសាស្ត្របញ្ចកោណដំណាក់កាលទី១ ដើម្បីកំណើនការងារ សមធម៌ ប្រសិទ្ធភាព និងនិរន្តរភាពរបស់រាជរដ្ឋាភិបាលកម្ពុជា នីតិកាលទី៧ នៃរដ្ឋសភា។

លោក Wong បាននិយាយថា អស់រយៈពេលបួនឆ្នាំហើយចាប់តាំងពីខ្ញុំបានមកប្រទេសកម្ពុជាជាលើកដំបូងក្នុងអំឡុងពេលបិទខ្ទប់នៃជំងឺកូវីដ-១៩ ហើយត្រូវបំពេញការងារនៅក្រសួងនៅថ្ងៃទី១ ខែតុលាឆ្នាំ២០២០ ។ ខ្ញុំនៅតែចងចាំថ្ងៃនោះដែលមានភាពស្ងប់ស្ងាត់ និងមិនមានចរាចរណ៍ច្រើន។ វា​ជា​ដំណើរ​ដ៏​អស្ចារ្យ​មួយ​ជាមួយ​គ្នា ហើយ​វា​ជា​ដំណើរ​ដ៏​អស្ចារ្យ​សម្រាប់​ខ្ញុំ​!”។

នៅឆ្នាំ២០២០ CGCC បានចាប់ផ្តើមគម្រោងធានាឥណទានដើម្បីស្ដារអាជីវកម្ម (BRGS)ដំបូងរបស់ខ្លួន។ សព្វ​ថ្ងៃ​នេះ​វា​មាន​ច្រើន​ដូច​ជា​ការ​ធានា​ជា​បុគ្គល​ចំនួន​ប្រាំ​ដូច​ជា​គម្រោង​ធានា​សម្រាប់ៀសហគ្រិនស្ត្រី គម្រោងធានាសហហិរញ្ញប្បទាន ដើម្បីគាំទ្រដល់គម្រោងសហហិរញ្ញប្បទានរបស់ធនាគារ SME និងគម្រោងធានាជលផលក្រោយការប្រមូលផលនេសាទ។

“យើងក៏បានដាក់ឱ្យដំណើរការនូវគម្រោងធានាផលប័ត្រជាពិសេសសម្រាប់គ្រឹះស្ថានហិរញ្ញវត្ថុ និងជាពិសេសគម្រោងធានាការនាំចេញអង្ករដើម្បីគាំទ្រដល់ការនាំចេញអង្ករចំនួន១ លានតោនក្នុងឆ្នាំ២០២៥ ។ ការដាក់ឱ្យដំណើរការនាពេលបច្ចុប្បន្នរបស់យើងនូវការផ្តល់ហិរញ្ញប្បទានបៃតងប្រកបដោយនិរន្តរភាព (SGFF) ដើម្បីគាំទ្រដល់ការផ្តល់ហិរញ្ញប្បទានបៃតងដែលមានគោលដៅលើកកម្ពស់បច្ចេកវិទ្យាបៃតងក្នុងការដោះស្រាយបញ្ហាប្រែប្រួលអាកាសធាតុ។

គម្រោងការធានាទាំងនេះធ្វើឱ្យ CGCC ដើរតួនាទីយ៉ាងសំខាន់ក្នុងការផ្តល់អំណាចដល់សហគ្រិន និងការអភិវឌ្ឍវិស័យផ្សេងៗ។

លោកក៏បាននិយាយផងដែរថា ក្នុងរយៈពេលប៉ុន្មានឆ្នាំមកនេះ CGCC បានបង្កើតភាពជាដៃគូរឹងមាំជាមួយស្ថាប័នហិរញ្ញវត្ថុចំនួន ២៧ ដោយសហការគ្នាដើម្បីបង្កើតប្រព័ន្ធអេកូដ៏រឹងមាំដែលគាំទ្រដល់សហគ្រាសធុនតូច និងមធ្យមរបស់យើង។

លោកបានបន្តថា “ខ្ញុំមានសេចក្តីសោមនស្សរីករាយក្នុងការជម្រាបជូនថា CGCC ទទួលបានសមិទ្ធផលហិរញ្ញវត្ថុដ៏ល្អជាមួយនឹងភាគហ៊ុនសរុបរបស់ខ្លួនបានកើនឡើងពី២០០ លានដុល្លារដល់ ២៣៥ លានដុល្លារជាមួយនឹងកំណើន ១៥ ភាគរយ។ ជាមួយនឹងការកើនឡើងនៃទុន វាបង្កើនសមត្ថភាពធានា និងនិរន្តរភាពរបស់យើង”។ “កំណើននេះគឺជាសក្ខីភាពមួយចំពោះការខិតខំប្រឹងប្រែង ការយកចិត្តទុកដាក់ និងការគាំទ្រឥតឈប់ឈរពីគ្រប់បុគ្គលិកនៃ CGCC និងក្រសួង/ស្ថាប័នពាក់ព័ន្ធ” ។

លោកបានបន្ថែមថា លោកសូមថ្លែងអំណរគុណចំពោះប្រធាន CGCC ក្រុមប្រឹក្សាភិបាល និងអ្នកពាក់ព័ន្ធ និងដៃគូទាំងអស់របស់យើងរួមមាន ធនាគារពិភពលោក ADB UNDP UNIDO ស្ថាប័នហិរញ្ញវត្ថុ និងសមាគមសហគ្រាសធុនតូច និងមធ្យម។ “វាជាកិត្តិយសដែលបានធ្វើការជាមួយនឹងដៃគូ និងអ្នកពាក់ព័ន្ធដែលចែករំលែកចក្ខុវិស័យរបស់យើងសម្រាប់ភាពរីកចម្រើននៃសេដ្ឋកិច្ច។ កិច្ចសហការ ការយល់ដឹង និងការគាំទ្រដែលមិនផ្លាស់ប្តូររបស់អ្នកគឺជាឆ្អឹងខ្នងនៃសមិទ្ធិផលរបស់ CGCC ។ ខ្ញុំសូមជំរុញឱ្យអ្នកទាំងអស់គ្នាបន្តដំណើរនេះជាមួយយើង ដើម្បីគាំទ្រ CGCC ក្នុងការផ្តល់អំណាចដល់សហគ្រាសធុនតូច និងមធ្យមកាន់តែច្រើន និងលើកកម្ពស់បរិយាបន្នហិរញ្ញវត្ថុនៅទូទាំងប្រទេសកម្ពុជា»។

លោកបន្ថែមថា No Lida នឹងចូលកាន់តំណែងជាអគ្គនាយកថ្មីរបស់ CGCC។ “ខ្ញុំសូមជូនពរឱ្យ CGCC បន្តទទួលបានជោគជ័យក្នុងតួនាទីអភិវឌ្ឍសហគ្រាសធុនតូច និងមធ្យមរបស់យើង។ រួមគ្នា យើងអាចកសាងអនាគតដ៏ភ្លឺស្វាងសម្រាប់សហគ្រិន និងសេដ្ឋកិច្ចរបស់យើង»។

 

Credit to: Khmer Times, Published on 30 September 2024

 

ពិធីប្រកាសតែងតាំង និងការផ្ទេរភារកិច្ចរបស់ អគ្គនាយកសាជីវកម្មធានាឥណទានកម្ពុជា

Posted on by Sorn Chhorvyvatey

នៅថ្ងៃទី២៧ ខែកញ្ញា ឆ្នាំ២០២៤ សាជីវកម្មធានាឥណទានកម្ពុជា (CGCC) បានរៀបចំ “ពិធីប្រកាសតែងតាំង និងការផ្ទេរភារកិច្ចរបស់អគ្គនាយកសាជីវកម្មធានាឥណទានកម្ពុជា” ក្រោមអធិបតីភាពដ៏ខ្ពង់ខ្ពស់របស់ ឯកឧត្តម រស់ សីលវ៉ា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាភិបាល CGCC និងវត្តមានកិត្តិយសរបស់សមាជិកក្រុមប្រឹក្សាភិបាលរបស់ CGCC ដៃគូជាតិ និងអន្តរជាតិ ធនាគារនិងគ្រឹះស្ថានមីក្រូហិរញ្ញវត្ថុ សមាគមអាជីវកម្ម និងស្ថាប័នពាក់ព័ន្ធសរុបប្រមាណជាង ១០០រូប នៅសណ្ឋាគារ Oakwood Premier Phnom Penh។

ពិធីនេះត្រូវបានរៀបចំឡើង ក្នុងគោលបំណងសម្តែងនូវការថ្លែងអំណរគុណ ជូនចំពោះ លោក Wong Keet Loong ដែលបានចូលរួមបង្កើត និងដឹកនាំ CGCC ក្នុងរយៈពេល៤ឆ្នាំកន្លងមកនេះ និងដើម្បីប្រកាសជាផ្លូវការនូវការតែងតាំង និងផ្ទេរភារកិច្ចរបស់អគ្គនាយក CGCC ដោយអនុក្រឹត្យលេខ ៨៧២ អនក្រ.តត តាមរយៈការឯកភាពដ៏ខ្ពង់ខ្ពស់បំផុតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា តបតាមសំណើដ៏ខ្ពង់ខ្ពស់របស់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ ដែលបានតែងតាំង លោក ណូ លីដា  ជាអគ្គនាយក CGCC ដែលលោកគឺជាបុគ្គលដ៏សំខាន់មួយរូប ក្នុងការចូលរួមរៀបចំគោលនយោបាយបង្កើត CGCC និងបានកាន់តួនាទីជាអគ្គនាយករង ក្នុងរយៈពេល ៤ឆ្នាំ កន្លងមកនេះ និងបានបម្រើការងារនៅក្រសួងសេដ្ឋកិច្ច និងហិរញ្ញវត្ថុ ជាង១០ឆ្នាំ ដែលពោរពេញដោយបទពិសោធន៍ និងសមត្ថភាពគ្រប់គ្រាន់ ក្នុងការបន្តដឹកនាំ CGCC ឱ្យកាន់តែរីកចម្រើន។

តាមរយៈពិធីនេះ CGCC ក៏បានរៀបចំពិធីដាក់ឱ្យដំណើរការជាផ្លូវការនូវ គម្រោងហិរញ្ញប្បទានបៃតងប្រកបដោយចីរភាព ដែលជាគម្រោងបង្កើតឡើង ក្រោមកិច្ចសហការផ្តួចផ្តើមរបស់ CGCC និង កម្មវិធីអភិវឌ្ឍន៍​សហប្រជាជាតិ (UNDP) ដែលនឹងអនុញ្ញាតឱ្យដៃគូអភិវឌ្ឍន៍ និងគ្រឹះស្ថានហិរញ្ញវត្ថុចូលរួមបង្កើតមូលនិធិរួមគ្នាជាមួយ CGCC ដើម្បីផ្តល់ហិរញ្ញប្បទានចម្រុះសម្រាប់ការវិនិយោគវិស័យបៃតងដែលមានការធានាពី CGCC ក្នុងលក្ខខណ្ឌអនុគ្រោះ ដើម្បីគាំទ្រដល់គោលដៅអភិវឌ្ឍន៍ប្រកបដោយចីរភាព។ ការដាក់ឱ្យដំណើរការជាផ្លូវការ នេះមានការចូលរួមជាវត្តមានកិត្តិយស និងជាសក្ខីភាពពីសំណាក់ឯកឧត្តមប្រធាន និងសមាជិកក្រុមប្រឹក្សាភិបាល CGCC, លោក Shakeel Ahmad អ្នកតំណាងរងនៃ UNDP និងសហការី និងអគ្គនាយក CGCC។

ឯកឧត្តម រស់ សីលវ៉ា បានថ្លែងចំណាប់អារម្មណ៍នៅក្នុងពិធីនេះថា ៖ “ពិតណាស់ ភាពជោគជ័យ  និងការរីកចម្រើនរបស់ CGCC មកទល់ពេលនេះ មិនមែនកើតឡើងដោយចៃដន្យនោះទេ ពោលគឺកើតចេញពីការបំពេញតួនាទីប្រកបដោយវិជ្ជាជីវៈ ការទទួលខុសត្រូវ និងឆន្ទៈរបស់ថ្នាក់ដឹកនាំ និងបុគ្គលិកគ្រប់ជាន់ថ្នាក់របស់ CGCC ជាពិសេសការគាំទ្រ កិច្ចសហការល្អពីគ្រប់ភាគីពាក់ព័ន្ធទាំងអស់ដែលរួមមាន រាជរដ្ឋាភិបាល ដៃគូអភិវឌ្ឍន៍ អង្គការ សមាគម  គ្រឹះស្ថានហិរញ្ញវត្ថុចូលរួម និងសហគ្រាសខ្នាតតូច និងមធ្យមរបស់យើង”។

លោក Wong Keet Loong បានថ្លែងថា៖ “ខ្ញុំមានកិត្តិយសណាស់ដែលមានឱកាសដឹកនាំ CGCC តាំងពីការចាប់ផ្តើម រហូតដល់សព្វថ្ងៃ។ CGCC បាន​សម្រេច​បាន​នូវសមិទ្ធផលសំខាន់ៗ​ជា​ច្រើន​ តាមរយៈ​ការ​ក្លាយ​ជា​ស្ថាប័ន​ធានា​ឥណទាន និងធានាលើការបោះផ្សាយសញ្ញាបណ្ណ​ដំបូង​គេ ​ក្នុង​ប្រទេស​កម្ពុជា។ CGCC ​នឹង​បន្ត​ដើរតួនាទី​យ៉ាងសំខាន់ ​ក្នុង​ការ​អភិវឌ្ឍការរីកចម្រើនរបស់​សហគ្រាស​ធុន​តូច និង​មធ្យម តាមរយៈការលើកកម្ពស់​លទ្ធភាព​ទទួលបាន​ហិរញ្ញប្បទាន និង​ចំណេះដឹង​ផ្នែក​ហិរញ្ញវត្ថុ​”។

លោក ណូ លីដា អគ្គនាយក CGCC បានថ្លែងថា៖ “ខ្ញុំពិតជាមានមហាកិត្តិយសដ៏ធំធេង ដែលទទួលបានការជឿទុកចិត្ត ពីក្រុមប្រឹក្សាភិបាល ពីឯកឧត្តមអគ្គបណ្ឌិតសភាចារ្យ ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និង ជាពិសេស ពីសម្តេចមហាបវរអធិបតី ហ៊ុន ម៉ាណែត នាយករដ្ឋមន្ត្រី ដែលបានឯកភាពដ៏ខ្ពង់ខ្ពស់បំផុត លើការតែងតាំងរូបខ្ញុំ ជាអគ្គនាយករបស់ CGCC។ ខ្ញុំសូមប្តេជ្ញាថា នឹងខិតខំបំពេញតួនាទីនេះ ឱ្យអស់ពីសមត្ថភាព និងអស់ពីកម្លាំងកាយចិត្ត។ ខ្ញុំនឹងប្រើប្រាស់ នូវរាល់មធ្យោបាយដែលខ្ញុំមាន ដើម្បីដឹកនាំ CGCC ឱ្យកាន់តែរីចកម្រើនបន្ថែមទៀត ដោយផ្អែកលើគុណាធិបតេយ្យ និងគោលការណ៍ ព្រមទាំងប្រកាន់ភ្ជាប់ជានិច្ច នូវការបំពេញការងារ ប្រកបដោយទំនុកចិត្ត, ទំនួលខុសត្រូវ, សាមគ្គីភាព, ចីរភាព, តម្លាភាព ដើម្បីគាំទ្រគោលនយោបាយរបស់រាជរដ្ឋាភិបាល។”

CGCC ត្រូវបានបង្កើតឡើងក្នុងខែវិច្ឆិកា ឆ្នាំ២០២០ និងបានដាក់ឱ្យដំណើរការគម្រោងធានាឥណទានជាលើកដំបូងនៅថ្ងៃទី២៩ ខែមីនា ឆ្នាំ២០២១។ គិតត្រឹមបំណាច់ខែសីហា ឆ្នាំ២០២៤ CGCC បានផ្តល់ការធានាលើឥណទានចំនួន ២.៦៧៨ គណនី ក្នុងទំហំទឹកប្រាក់ប្រមាណ ២២៥ លានដុល្លារ៕

 

ទាញយកសេចក្តីប្រកាសព័ត៌មាន

 

ក្រសួងកសិកម្ម រុក្ខាប្រមាញ់និងនេសាទ និងសាជីវកម្មធានាឥណទានកម្ពុជា បានចុះហត្ថលេខាលើអនុស្សរណៈយោគយល់គ្នា ដើម្បីអភិវឌ្ឍសហគមន៍កសិកម្មទំនើប

Posted on by Sorn Chhorvyvatey

ក្រសួងកសិកម្ម រុក្ខាប្រមាញ់ និងនេសាទ (MAFF) និងសាជីវកម្មធានាឥណទានកម្ពុជា (CGCC) កាលពីថ្ងៃអង្គារបានចុះហត្ថលេខាលើអនុស្សរណៈនៃការយោគយល់គ្នា (MoU) ដើម្បីលើកកម្ពស់ការអភិវឌ្ឍសហគមន៍កសិកម្មទំនើប។

ពិធីចុះហត្ថលេខាលើអនុស្សរណៈយោគយល់គ្នានេះ ធ្វើឡើងក្រោមអធិបតីភាព លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងលោក រស់ សីលវ៉ា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាភិបាលសាជីវកម្មធានាឥណទានកម្ពុជា (CGCC) នៅ ក្រសួងកសិកម្ម។

ដោយគូសបញ្ជាក់ខ្លឹមសារនៃ MoU នេះ លោក ឌិត ទីណា បានមានប្រសាសន៍ថា កិច្ចសហប្រតិបត្តិការថ្មីនេះនឹងមានការផលិតដោយផ្អែកលើតម្រូវការទីផ្សារ គុណភាពល្អ កាត់បន្ថយថ្លៃដើមផលិតកម្ម និងប្រសិទ្ធភាពសេដ្ឋកិច្ច។

លោក ឌិត ទីណា បានបន្តថា ការអភិវឌ្ឍសហគមន៍កសិកម្មទំនើបគឺជាអាទិភាពរបស់រាជរដ្ឋាភិបាលកម្ពុជា។

លោករដ្ឋមន្ត្រីបានមានប្រសាសន៍ថា “សហគមន៍កសិកម្មទំនើបដើរតួនាទីយ៉ាងសំខាន់ និងដើរតួជាខែលដ៏រឹងមាំក្នុងការជួយកសិករដែលខ្វះបច្ចេកវិទ្យា បញ្ហាប្រឈមនឹងការប្រែប្រួលអាកាសធាតុ ខ្វះឥណទាន និងបញ្ហាប្រឈមនឹងហានិភ័យទីផ្សារ។

កសិករដែលស្ម័គ្រចិត្តចូលជាសមាជិកសហគមន៍កសិកម្មទំនើបនឹងទទួលបានការវិនិយោគ និងដើមទុនគ្រប់គ្រាន់សម្រាប់ផលិតផលកសិកម្មដែលមានសក្តានុពលដូចជាស្រូវ ដំឡូងមី និងគ្រាប់ស្វាយចន្ទី។

លោក ឌិត ទីណា បានលើកសរសើរសាជីវកម្មធានាឥណទានកម្ពុជា (CGCC) ដោយកត់សម្គាល់ថា CGCC ដើរតួជាដៃគូដ៏ល្អក្នុងការវាយតម្លៃ និងផ្តល់ធាតុចូលសំខាន់ៗក្នុងការរៀបចំផែនការអាជីវកម្ម ដែលជួយនាំយកចក្ខុវិស័យនៃសហគមន៍កសិកម្មទំនើបប្រកបដោយផ្លែផ្កា និងធានានូវភាពជោគជ័យរបស់ខ្លួន។

CGCC គឺជាសហគ្រាសគ្រប់គ្រងដោយរដ្ឋ ក្រោមការណែនាំហិរញ្ញវត្ថុ និងបច្ចេកទេសរបស់ក្រសួងសេដ្ឋកិច្ច និងហិរញ្ញវត្ថុ ដែលមានបេសកកម្មចម្បងក្នុងការផ្តល់ការធានាឥណទាន ដើម្បីកែលម្អបរិយាប័ន្នហិរញ្ញវត្ថុ និងគាំទ្រដល់ការអភិវឌ្ឍន៍សហគ្រាសធុនតូច និងមធ្យម។

លោក ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានសរសេរនៅលើបណ្តាញសង្គមរបស់លោកកាលពីថ្ងៃអង្គារថា MoU រវាងក្រសួងកសិកម្ម និង CGCC នឹងបើកផ្លូវឱ្យសហគមន៍កសិកម្មទំនើបមានដើមទុនសម្រាប់ចំណាយលើប្រតិបត្តិការរបស់ពួកគេ និងព្រមទាំងទទួលបាន អត្រាការប្រាក់ទាបជាងប្រាក់កម្ចីទូទៅផ្សេងទៀត។

លោក ហ្វីណង់ បានមានប្រសាសន៍ថា “ដោយសារតែភាពរឹងមាំនៃផែនការអាជីវកម្ម និងកិច្ចសន្យាទីផ្សារច្បាស់លាស់ជាមុន CGCC ត្រៀមខ្លួនក្នុងការផ្តល់សេវាកម្មធានាឥណទានក្នុងនាមសហគមន៍ ដែលនឹងអនុញ្ញាតឱ្យសហគមន៍មានធនធានគ្រប់គ្រាន់ដើម្បីដំណើរការប្រតិបត្តិការរបស់ខ្លួនដោយមិនចាំបាច់ឱ្យសមាជិកនីមួយៗជាប់បំណុលធនាគារ។ នេះជាជំហានសំខាន់មួយទៀតសម្រាប់សហគមន៍ទំនើបរបស់យើង»។

ថ្លែងក្នុងវេទិកាស្រូវអង្ករកម្ពុជាលើកទី៧ ឆ្នាំ២០២៤ ក្រោមមូលបទ ‘ការប្រែក្លាយខ្សែច្រវាក់ផ្គត់ផ្គង់អង្ករកម្ពុជាឱ្យមានភាពធន់ បរិយាប័ន្ន និងនិរន្តរភាព’ លោកនាយករដ្ឋមន្ត្រី ហ៊ុន ម៉ាណែត បានកោតសរសើរចំពោះកិច្ចខិតខំប្រឹងប្រែង និងសមិទ្ធផលរបស់សហគមន៍កសិកម្មទំនើប និងបានអំពាវនាវឱ្យមានសហគមន៍កសិកម្មបែបនេះបន្ថែមទៀត នៅទូទាំងប្រទេសកម្ពុជា។

លោកបានបន្ថែមថា រហូតមកដល់ពេលនេះ ការអភិវឌ្ឍន៍បានធ្វើឡើងជាមួយនឹងសហគមន៍កសិកម្មទំនើបចំនួន ៨ ដែលគ្របដណ្តប់លើផ្ទៃដីជិត ២០០០ ហិកតា ក្នុងដំណាក់កាលដំបូង ហើយលោកបានអំពាវនាវឱ្យបន្តធ្វើដើម្បីឲ្យកាន់តែរីកចម្រើន។

 

Credit to: Khmer Times, Published on 19 September 2024

 

ពិធីចុះហត្ថលេខាលើ MOU រវាងនិយ័តករមូលបត្រកម្ពុជា និងCGCC និងសិក្ខាសាលា ស្ដីពី “អត្ថប្រយោជន៍ និងកាលានុវត្តភាពនៃការបោះផ្សាយលក់សញ្ញាបណ្ណដែលមានការធានានៅកម្ពុជា”

Posted on by Sorn Chhorvyvatey

នាព្រឹកថ្ងៃសុក្រ ១១រោច ខែស្រាពណ៍ ឆ្នាំរោង ឆស័ក ព.ស. ២៥៦៨ ត្រូវនឹងថ្ងៃទី៣០ ខែសីហា ឆ្នាំ២០២៤ ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយក–រដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ និងជាប្រធានក្រុមប្រឹក្សាភិបាលអាជ្ញាធរសេវាហិរញ្ញវត្ថុមិនមែនធនាគារ (អ.ស.ហ.) ឯកឧត្តម ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃនិយ័តករមូលបត្រកម្ពុជា (ន.ម.ក.) និងលោក Wong Keet Loong អគ្គនាយកនៃសាជីវកម្មធានាឥណទានកម្ពុជា (ស.ធ.ក.) បានចុះហត្ថលេខាលើអនុស្សរណៈនៃការយោគយល់គ្នា (MoU) ស្ដីពី “កិច្ចសហប្រតិបត្តិការក្នុងការជំរុញការអភិវឌ្ឍ និងការបោះផ្សាយលក់សញ្ញាបណ្ណដែលមានការធានា” និងសហការរៀបចំសិក្ខាសាលាស្ដីពី “អត្ថ–ប្រយោជន៍ និងកាលានុវត្តភាពនៃការបោះផ្សាយលក់សញ្ញាបណ្ណដែលមានការធានានៅកម្ពុជា” ក្រោមអធិបតីភាពដ៏ខ្ពង់​ខ្ពស់​របស់ ឯកឧត្តម រស់ សីលវ៉ា រដ្ឋលេខា​ធិការ នៃក្រសួងសេដ្ឋកិច្ចនិងហិរញ្ញវត្ថុ និងជាប្រធានក្រុម-ប្រឹក្សាភិបាលរបស់សាជីវកម្មធានាឥណទានកម្ពុជា ព្រមទាំងជាអនុប្រធានក្រុមប្រឹក្សាភិបាល អ.ស.ហ. នៅអគារ អ.ស.ហ.។

កម្មវិធីចុះ MoU នេះ ត្រូវបានរៀបចំឡើងក្នុងគោលបំណងដើម្បីជំរុញការអភិវឌ្ឍវិស័យមូលបត្រ និងការបោះផ្សាយលក់សញ្ញាបណ្ណដែលមានការធានា តាមរយៈការគាំទ្រឱ្យក្រុមហ៊ុន និងស្ថាប័នហិរញ្ញវត្ថុទទួលបាននូវទុនបន្ថែមតាមរយៈការបោះផ្សាយលក់សញ្ញាបណ្ណ ដែលរួមបញ្ចូលទាំងសញ្ញាបណ្ណបៃតង, សញ្ញាបណ្ណសង្គម, សញ្ញាបណ្ណផ្សារភ្ជាប់នឹងចីរភាព និងសញ្ញាបណ្ណចីរភាពជាដើម ដែលមានការគាំទ្រ និងធានាលទ្ធភាពសងក្នុងករណីក្ស័យធន់ពីបុគ្គលធានាក្នុងស្រុក ក្នុងគោលដៅលើកកម្ពស់ការកៀរគរមូលធនក្នុងស្រុកឱ្យកាន់តែមានប្រសិទ្ធ-ភាព។ ផ្សារភ្ជាប់នឹងកម្មវិធីនេះ ស្ថាប័នទាំងពីរក៏បានសហការរៀបចំសិក្ខាសាលាស្តីពី “អត្ថប្រយោជន៍ និងកាលានុវត្តភាពនៃការបោះផ្សាយលក់សញ្ញាបណ្ណដែលមានការធានានៅកម្ពុជា” ក្នុងគោលបំណងលើកកម្ពស់ការយល់ដឹង និងផ្សព្វផ្សាយ អំពី​លក្ខខណ្ឌដើម្បីទទួលបាននូវការធានាសញ្ញាបណ្ណ និងការធានាដល់សហគ្រាសធុនតូច និងមធ្យម និងស្ថាប័នពាក់ព័ន្ធ ក៏ដូចជាបង្ហាញពីអត្ថប្រយោជន៍ និងកាលានុវត្តភាពនៃការបោះផ្សាយសញ្ញាបណ្ណដែលមានការធានាផងដែរ។

ថ្លែងក្នុងកម្មវិធីនេះ ឯកឧត្តមប្រតិភូ បានលើកឡើងថា៖ “តាមរយៈ MoU នាថ្ងៃនេះ នឹងអាចទាក់ទាញក្រុមហ៊ុនកាន់តែច្រើន ដែលរួមបញ្ចូលផងដែរទាំងសហគ្រាសធុនតូច និងមធ្យមក្នុងការស្វែងរកហិរញ្ញប្បទានតាមរយៈទីផ្សារមូលបត្រ ហើយក៏នឹងផ្តល់អត្ថប្រយោជន៍បន្ថែមសម្រាប់ក្រុមហ៊ុនដែលបានចុះបញ្ជីលក់មូលបត្រ ហើយត្រូវការស្វែងរកប្រភពហិរញ្ញប្បទានបន្ថែមក្នុងទម្រង់ជាការបោះផ្សាយលក់សញ្ញាបណ្ណ ឬជាលក្ខណៈបំណុលផ្សេងទៀត ដោយក្រុមហ៊ុននឹងអាចមានឱកាសទទួលបាននូវការធានាឥណទានមួយក្នុងអត្រាពិសេស។”

ជាមួយគ្នានេះ លោក Wong Keet Loong បានលើកឡើងថា៖  “ក្នុងនាមជាស្ថាប័នធានាលើសញ្ញា–បណ្ណដំបូង និងតែមួយគត់នៅក្នុងប្រទេសកម្ពុជា ស.ធ.ក. នឹងដើរតួនាទីយ៉ាងសំខាន់ក្នុងការអភិវឌ្ឍការរីកចម្រើននៃការបោះផ្សាយសញ្ញាបណ្ណ ដែលបានចុះបញ្ជីក្នុងផ្សារមូលបត្រកម្ពុជា។ ចំណាត់ថ្នាក់ឥណទាន khAAA របស់ ស.ធ.ក. នឹងបង្កើនចំណាត់ថ្នាក់ឥណទានរបស់អ្នកបោះផ្សាយ ដែលនឹងផ្តល់ទំនុកចិត្តបន្ថែមដល់វិនិ–យោគិនលើសញ្ញាបណ្ណ។ MoU ជាមួយ ន.ម.ក. គឺជាយុទ្ធសាស្រ្តដើម្បីអភិវឌ្ឍ និងឆ្ពោះទៅរកការពង្រឹងក្រប–ខណ្ឌមូលបត្រ ដើម្បីលើកកម្ពស់ការបោះផ្សាយសញ្ញាបណ្ណឱ្យបានច្រើនជាងមុន ដើម្បីកៀរគរទុន និងទាក់ទាញវិនិយោគិនក្នុងស្រុក និងបរទេសកាន់តែច្រើន។”

បន្ថែមពីនេះ ឯកឧត្តម រស់ សីលវ៉ា បានមានប្រសាសន៍បន្ថែមថា៖ “MoU នេះនឹងអនុញ្ញាតឱ្យភាគីទាំង២ សម្រេចបាននូវគោលដៅរួម ក្នុងការគាំទ្រ ន.ម.ក. លើការអភិវឌ្ឍទីផ្សារសញ្ញាបណ្ណ និងគាំទ្រ ស.ធ.ក.  លើការក្លាយជាស្ថាប័នធានាសញ្ញាបណ្ណឈានមុខគេនៅកម្ពុជា ដើម្បីបង្កើនបរិយាបន្នហិរញ្ញវត្ថុ និងអភិវឌ្ឍសហគ្រាសធុនតូច និងមធ្យមនៅកម្ពុជា។ ទន្ទឹមនេះ កិច្ចសហប្រតិបត្តិការនេះ នឹងផ្តល់ជាផលវិជ្ជមាននៅក្នុងទីផ្សារសញ្ញាបណ្ណនៅកម្ពុជា តាមរយៈការជំរុញឱ្យមានការបោះផ្សាយ និងការវិនិយោគលើសញ្ញាបណ្ណកាន់តែច្រើន រួមមាន សញ្ញាបណ្ណបៃតង, សញ្ញាបណ្ណសង្គម, និងសញ្ញាបណ្ណចីរភាព ជាដើម។”

កម្មវិធីនេះ មានសមាសភាពចូលរួមរួមមាន៖ តំណាងជាន់ខ្ពស់ដែលអញ្ជើញមកពីអគ្គលេខាធិការដ្ឋាន និងនិយ័តករក្រោមឱវាទ អ.ស.ហ., ផ្សារមូលបត្រកម្ពុជា, សមាគមក្រុមហ៊ុនមូលបត្រកម្ពុជា, សភាពាណិជ្ជកម្មកម្ពុជា, សមាគមសហគ្រិនវ័យក្មេង, សមាគមធនាគារនៅកម្ពុជា, រេតធីង អេជេនស៊ី អហ្វ (ខេមបូឌា) ម.ក, ក្រុមហ៊ុន បោះផ្សាយលក់មូលបត្រ និងក្រុមហ៊ុនបោះផ្សាយសក្តានុពល, ដៃគូប្រព័ន្ធផ្សព្វផ្សាយ​ និងក្រុមហ៊ុន-ស្ថាប័ន​ពាក់ព័ន្ធដទៃទៀត សរុបចំនួន ១០០ រូប។ ក្នុងកម្មវិធីសិក្ខាសាលា ក៏មានការចូលរួមធ្វើបទបង្ហាញពីវាគ្មិនកិត្តិយសដែលមានបទពិសោធន៍យូរឆ្នាំមកពី ន.ម.ក. និងស.ធ.ក., ក្រុមហ៊ុន តែលកូថេក ធិកធីឌី, ក្រុម-ហ៊ុនមូលបត្រ រ៉ូយ៉ាល់គ្រុប ម.ក និងក្រុមហ៊ុន ព្រូដិនសល (ខេមបូឌា) ឡាយហ្វ៍ អឹសួរឺន ម.ក ផងដែរ។

 

មធ្យោបាយទំនាក់ទំនង៖

ន.ម.ក.

សូមទាក់ទងនាយកដ្ឋានស្រាវជ្រាវ បណ្តុះបណ្តាល អភិវឌ្ឍន៍ទីផ្សារមូលបត្រ និងទំនាក់ទំនងអន្តរជាតិ តាមរយៈលេខទូរសព្ទ (៨៥៥) ៩៥ ៧៧៥ ៧៧២​ (ឃី ពុជ្ឈីង) ឬ អ៊ីមែល៖ [email protected]

ស.ធ.ក.

សូមទាក់ទងនាយកដ្ឋានយុទ្ធសាស្រ្ត និងអភិវឌ្ឍអាជីវកម្ម តាមរយៈលេខទូរសព្ទ (៨៥៥) ០៧៨​២២២ ​១៨៦ (សន ឆវីវតី) ឬ អ៊ីមែល៖ [email protected]

 

អំពី ន.ម.ក.

ន.ម.ក. ជាអាជ្ញាធរគ្រប់គ្រង ត្រួតពិនិត្យ និងអភិវឌ្ឍវិស័យមូលបត្រនៅព្រះរាជាណាចក្រកម្ពុជា ដែលត្រូវបានបង្កើតឡើងដោយព្រះរាជក្រមលេខ នស/រកម/០១២១/០០៣ ចុះថ្ងៃទី១៦ ខែមករា ឆ្នាំ២០២១ ដែលប្រកាសឱ្យប្រើច្បាប់ស្ដីពីការរៀបចំ និងការប្រព្រឹត្តទៅរបស់អាជ្ញាធរសេវាហិរញ្ញវត្ថុមិនមែនធនាគារ, ដែលត្រូវបានបង្កើតឡើងដោយព្រះរាជក្រមលេខ នស/រកម/១០០៧/០២៨ ចុះថ្ងៃទី១៩ ខែតុលា ឆ្នាំ២០០៧ ដែលប្រកាសឱ្យប្រើច្បាប់ស្តីពីការបោះផ្សាយ និងជួញដូរមូលបត្រមហាជន និងអនុក្រឹត្យលេខ ៩៧ អនក្រ.បក ចុះថ្ងៃទី២៣ ខែកក្កដា ឆ្នាំ២០០៨ ស្តីពីការរៀបចំ និងការប្រព្រឹត្តទៅរបស់គណៈកម្មការមូលបត្រកម្ពុជា។​ ន.ម.ក.មានគេហទំព័រផ្លូវការ (វេបសាយ) www.serc.gov.kh និងគេហទំព័រផ្លូវការ (ហ្វេសប៊ុក) www.face​book.​com/serc.gov.kh។

 

អំពី ស.ធ.ក.

ស.ធ.ក. គឺជាក្រុមហ៊ុនធានាឥណទានមុនដំបូងបង្អស់នៅកម្ពុជា ដែលត្រូវបានសម្រេចបង្កើតឡើងដោ​​យ​សម្តេចអគ្គមហាសេនាបតីតេជោ ហ៊ុន សែន ជាសហគ្រាសសាធារណៈ ក្រោមអាណាព្យាបាលបច្ចេក​ទេស និងហិរញ្ញវត្ថុ របស់ក្រសួងសេដ្ឋកិច្ច និងហិរញ្ញវត្ថុ។ បេសកកម្មចម្បងរបស់សាជីវកម្មធានាឥណទានកម្ពុជា គឺផ្តល់​នូវ​ការ​ធានាឥណទាន​ ដើម្បីលើកកម្ពស់បរិយាបន្នហិរញ្ញវត្ថុ និងគាំទ្រការអភិវឌ្ឍសហគ្រាសធុនតូច និងមធ្យមនៅកម្ពុជា។ នៅ​ថ្ងៃទី ៣១ ខែមករា ឆ្នាំ ២០២៤ ស.ធ.ក. បានប្រកាសជាផ្លូវការនូវការក្លាយខ្លួនជាបុគ្គលធានាលើការបោះផ្សាយសញ្ញាបណ្ណ​ដំបូង​គេរ​បស់កម្ពុជា បន្ទាប់ពីទទួលបានការទទួលស្គាល់ពី ន.ម.ក. និងទទួលបានចំណាត់ថ្នាក់ឥណទាន khAAA ដែលជាចំណាត់ថ្នាក់ខ្ពស់បំផុតក្នុងស្រុក ពីក្រុមហ៊ុន រ៉េតធីង អេជេនស៊ី អហ្វ ខេមបូឌា។ ស.ធ.ក. មានគោលបំណងផ្តល់ការធានាលើការបោះផ្សាយសញ្ញាបណ្ណរបស់សាជីវកម្មក្នុងស្រុក នៅក្នុង​ផ្សារ​មូលបត្រកម្ពុជា ដើម្បីគាំទ្រដល់ក្រុមហ៊ុនក្នុងស្រុក ក្នុងការកៀរគរទុន និង​ដើម្បីអភិវឌ្ឍវិ​ស័យ​មូលបត្រ​នៅប្រទេស​កម្ពុជា។ គេហទំព័រផ្លូវការរបស់ CGCC ៖ www.cgcc.com.kh និងទំព័រហ្វេសប៊ុក ៖ https://www.​​facebook.com/officialcgcc។

 

គម្រោងធានាឥណទានសហគ្រិនស្ត្រីមានប្រមាណ ៤០ភាគរយ ទទួលបានការធានាពីសាជីវកម្មធានាឥណទានកម្ពុជា

Posted on by Sorn Chhorvyvatey

ជាង៤០ ភាគរយនៃប្រាក់កម្ចីទាំងអស់ដែលធានាដោយសាជីវកម្មធានាឥណទានកម្ពុជា (CGCC) ត្រូវបានផ្តល់ទៅឱ្យសហគ្រិនស្ត្រី នេះបើតាមលោក KL Wong អគ្គនាយកនៃសាជីវកម្មធានាឥណទានកម្ពុជា (CGCC) ក្នុងបទសម្ភាសន៍ជាមួយកាសែតខ្មែរថាមស៍។

បច្ចុប្បន្ន CGCC បានធានាឥណទានចំនួន ២០០លានដុល្លារដល់ ២.៣៦៦ គណនីសហគ្រាសធុនតូច និងមធ្យម ដូចដែលបានកំណត់រយៈពេលបីឆ្នាំនៃប្រតិបត្តិការ។ CGCC បានអោយដឹងថា ដោយបានចាប់ផ្តើមក្នុងអំឡុងពេលជំងឺ Covid-19 ដើម្បីជួយទ្រទ្រង់ដំណើរអាជីវកម្ម ឥឡូវនេះស្ថាប័នបានធានាឥណទានចំនួន ១២៩ លានដុល្លារ និងចំនួនទឹកប្រាក់ធានា ៩៤ លានដុល្លារពីការផ្តល់ប្រាក់កម្ចីដល់អាជីវកម្មសហគ្រាសធុនមីក្រូ តូច និងមធ្យម ដែលបានផ្តល់ការងារដល់ជាង ៥២.០០០កន្លែងដល់ប្រជាជនកម្ពុជា។

នៅក្រោមគម្រោងធានាឥណទានរបស់សហគ្រិនស្ត្រី (WEGS) មានអត្ថប្រយោជន៍ជាច្រើនសម្រាប់ស្ត្រីដែលទទួលយកឥណទានដែលធានាដោយ CGCC ។ លោក Wong បាននិយាយថា ក្នុងចំណោមអត្ថប្រយោជន៍នានាគឺអត្រាការប្រាក់ទាបជាមួយធនាគារ ថ្លៃធានាទាបសម្រាប់ឆ្នាំដំបូង និងការធានារ៉ាប់រងលើប្រាក់កម្ចីខ្ពស់ជាង។

លោកបាន​បន្ត​ថា ការ​​ធានា​សម្រាប់​សហគ្រាស​ធុន​តូច និង​មធ្យម​ក្រោម​គម្រោង​ធានា​ការ​ស្ដារ​អាជីវកម្ម​របស់ CGCC (BRGS) គឺ ១ ភាគរយ។ ប៉ុន្តែសម្រាប់សហគ្រិនស្ត្រី ថ្លៃសេវានេះត្រូវបានកាត់បន្ថយមកត្រឹម ០,៥ ភាគរយសម្រាប់ឆ្នាំដំបូងនៃឥណទាន។ ក្រៅពីនោះ សម្រាប់សហគ្រាសធុនតូច និងមធ្យមក្រោមគម្រោង BRGS ប្រហែល ៧០ ភាគរយនៃឥណទានត្រូវបានធានាដោយ CGCC ។ ចំណែក​​គម្រោង​សហគ្រិន​ស្ត្រី​ខ្ពស់​រហូត​ដល់ ៨០ ភាគរយ​នៃ​ឥណទាន​ត្រូវ​បាន​ធានា​ដោយ CGCC។

រហូតមកដល់ពេលនេះ CGCC បានគាំទ្រសហគ្រិនស្ត្រីជាច្រើននៅក្នុងវិស័យចម្រុះ។ អ្នក​ទទួល​ផល​មួយ​ក្នុង​ចំណោម​អ្នក​ទទួល​ផល​ពី​គម្រោង​របស់​ខ្លួន​គឺក្រុមហ៊ុនឬទ្ធិពល ដែលមានអ្នកស្រី Bopha Pen ​ជា​ស្ថាបនិក និង​ជាអគ្គ​នាយក​។ នៅឆ្នាំ២០២០ អ្នកស្រីបានជួបវិបត្តហិរញ្ញវត្ថុ ហើយត្រូវការដើមទុនសម្រាប់ប្រតិបត្តិការប្រចាំថ្ងៃ អ្នកស្រីបានស្វែងរកប្រាក់កម្ចីពីធនាគារ។ ប៉ុន្តែ អ្នកស្រីមិនមានវត្ថុបញ្ចាំគ្រប់គ្រាន់ រហូតដល់ CGCC បានធានាប្រាក់កម្ចីរបស់អ្នកស្រីជាមួយស្ថាប័នហិរញ្ញវត្ថុដែលជាដៃគូរបស់ខ្លួនគឺ CAMMA មីក្រូហិរញ្ញវត្ថុ។

បច្ចុប្បន្ននេះ អ្នកស្រី Bopha ដំណើរការក្រុមហ៊ុនឬទ្ធិពល និងបានបើកដំណើរការមជ្ឈមណ្ឌលបណ្តុះបណ្តាល និងបង្កើតកម្មវិធីទូរស័ព្ទ fintech Kotluy ។ សហគ្រិនស្ត្រីម្នាក់ទៀតដែលទទួលបានអត្ថប្រយោជន៍ពីការធានាឥណទានរបស់ CGCC គឺក្រុមហ៊ុន SOGE របស់អ្នកស្រី ខៀវ ធីតា។ SOGE (Solar Green Energy (Cambodia) Co) ជាក្រុមហ៊ុនផលិតគ្រឿងអេឡិចត្រូនិកថាមពលកកើតឡើងវិញ ដែលខ្វះដើមទុនសម្រាប់ការពង្រីក។

លោក K L Wong បាននិយាយថា រដ្ឋាភិបាលផ្តល់អាទិភាពដល់អាជីវកម្មដែលដឹកនាំដោយស្ត្រី។ នៅពេលដែលបានចាប់ផ្តើមដំបូងនៅឆ្នាំ២០២១ ប្រហែល២៣ភាគរយនៃអ្នកខ្ចីសរុបរបស់ខ្លួនគឺជាស្ត្រី។ ចំនួននេះបានកើនឡើងដល់៣៥ ភាគរយនៃអ្នកខ្ចីសរុបក្នុងឆ្នាំ២០២២។ នៅចុងឆ្នាំ២០២៣ ខ្ពស់រហូតដល់៤២ ភាគរយនៃផលប័ត្រធានាឥណទានសរុបរបស់ CGCC គឺសម្រាប់ស្ត្រី។

លោកបានបន្ថែមថា “យើងមានមោទនភាពចំពោះភាពចម្រុះនៅក្នុងផលប័ត្ររបស់យើង”។ បច្ចុប្បន្ន CGCC មានគម្រោងធានាឥណទានចំនួនប្រាំ។ ក្រៅពីគម្រោង WEGS និង BRGS CGCC ក៏មានគម្រោងការធានាឥណទានសម្រាប់សហហិរញ្ញប្បទាន (CFGS) គម្រោងធានាឥណទានសម្រាប់សហហិរញ្ញប្បទានសម្រាប់វិស័យទេសចរណ៍ (CFGS-TR) និងគម្រោងការធានាឥណទានជាកញ្ចប់ (PGS)។

លោកបានលើកឡើងទៀតថា គម្រោងរបស់ពួកគេគឺត្រូវបានកែសម្រួលសម្រាប់សហគ្រាសធុនតូច និងមធ្យម ដែលជាផ្នែកមួយដ៏សំខាន់នៃសេដ្ឋកិច្ចរបស់កម្ពុជា។ សហគ្រាសធុនតូច និងមធ្យមតំណាងឱ្យ ៧០ ភាគរយនៃឱកាសការងារនៅក្នុងប្រទេស និងរួមចំណែក ៥៨ ភាគរយដល់ផលិតផលសរុបក្នុងស្រុករបស់ប្រទេស។ CGCC បានអោយដឹងថា ខ្លួនកំពុងគាំទ្រសហគ្រាសធុនតូច និងមធ្យមពីវិស័យចម្រុះ ដូចជា កសិកម្ម សេវាកម្ម ឧស្សាហកម្ម និងសេវាកម្ម។

លោកបានបន្ថែមថា គម្រោង WEGS មានកម្រិតសម្រាប់អត្រាការប្រាក់នៃឥណទាន។ សម្រាប់អត្រាការប្រាក់ឆ្នាំដំបូង រួមទាំងថ្លៃធានាឆ្នាំដំបូងគឺ ៨ ភាគរយសម្រាប់ឥណទានជាប្រាក់រៀល និង ៩ ភាគរយសម្រាប់ឥណទានជាប្រាក់ដុល្លារ។ ហើយសម្រាប់គ្រឹះស្ថានមីក្រូហិរញ្ញវត្ថុ (MFIs) និងស្ថាប័នទទួលប្រាក់បញ្ញើ (MDIs) ស្ត្រីអាចទទួលបានឥណទានដែលមានអត្រាការប្រាក់ ១០ ភាគរយសម្រាប់កម្ចីជាប្រាក់រៀល និង ១១ ភាគរយសម្រាប់កម្ចីជាប្រាក់ដុល្លារ។

លោកបានមានប្រសាសន៍ថា អាជីវកម្មដែលដឹកនាំដោយស្ត្រីមានសិទ្ធិទទួលបានកម្ចីគ្រប់ប្រភេទ រួមទាំងកម្ចីមានរយៈកាល សម្ភារៈហិរញ្ញប្បទានពាណិជ្ជកម្ម។ល។

ជាមួយគ្នានេះ ក៏មានជម្រើសមិនត្រឹមតែសម្រាប់កម្ចីថ្មីប៉ុណ្ណោះទេ ប៉ុន្តែថែមទាំងផ្តល់កម្ចីចាស់ឡើងវិញផងដែរ។ CGCC បាននិយាយថា បច្ចុប្បន្ន ខ្លួនកំពុងធានាទាំងប្រាក់កម្ចីដែលមានការធានា និងមិនមានការធានា។ ចំនួនប្រាក់កម្ចីអតិបរមាសម្រាប់កម្ចីដើមទុនគឺ ៣០០.០០០ដុល្លារ ហើយចំនួនអតិបរមាសម្រាប់គម្រោងវិនិយោគ និងពង្រីកអាជីវកម្មគឺ ៥០០.០០០ដុល្លារ។

 

Credit to: Khmer Times, Published on 16 August 2024

 

ការស្វែងយល់អំពីជម្រើសហិរញ្ញប្បទានសម្រាប់អាជីវកម្ម

Posted on by Sorn Chhorvyvatey

តើអ្នកមានជម្រើសអ្វីខ្លះក្នុងការកៀរគរទុនសម្រាប់អាជីវកម្ម? ការជ្រើសរើសជម្រើសហិរញ្ញប្បទានដែលត្រឹមត្រូវ គឺជាគន្លឹះមួយក្នុងការទទួលបានជោគជ័យក្នុងអាជីវកម្ម។ មិនថាការខ្ចីពីសមាជិកគ្រួសារ ឬការកៀរគរទុនជាសាធារណៈ តាមរយៈការបោះផ្សាយលក់មូលបត្រកម្មសិទ្ធិលើកដំបូងជាសាធារណៈ (IPO) ជម្រើសហិរញ្ញប្បទាននីមួយៗ មានលក្ខណៈសម្បត្តិខុសគ្នា ដែលឆ្លើយតបទៅតាមតម្រូវការអាជីវកម្ម ក្នុងកាលៈទេសៈជាក់ស្តែងណាមួយ។ ការស្វែងយល់អំពីជម្រើសហិរញ្ញប្បទាន គឺជាយុទ្ធសាស្ត្រ ក្នុងការកសាងមូលដ្ឋានគ្រឹះហិរញ្ញវត្ថុឱ្យបានរឹងមាំ និងមានចីរភាពសម្រាប់អាជីវកម្ម។

១. ហិរញ្ញប្បទានបំណុល

ហិរញ្ញប្បទានបំណុល គឺជាវិធីសាស្ត្រក្នុងការកៀរគរទុន តាមរយៈការខ្ចីពីក្រុមគ្រួសារ, មិត្តភក្តិ, ស្ថាប័នហិរញ្ញវត្ថុ, ឬវិនិយោគិន។ អ្នកខ្ចីត្រូវសងត្រឡប់ទៅអ្នកផ្តល់កម្ចីនូវប្រាក់ដើម បូកនឹងការប្រាក់នៅក្នុងអំឡុងពេលនៃកម្ចី។ ហិរញ្ញប្បទានបំណុល គឺជាវិធីសាស្ត្រដ៏សាមញ្ញមួយក្នុងការកៀរគរទុនសម្រាប់អាជីវកម្មទូទៅ។

កម្ចីពីក្រុមគ្រួសារ និងមិត្តភក្តិ គឺជាវិធីសាស្ត្រដែលទាក់ទាញសម្រាប់អាជីវកម្មទើបចាប់ផ្តើមដំបូងនិងអាជីវកម្មខ្នាតតូច។ កម្ចីប្រភេទនេះនិងកម្ចីផ្សេងទៀតពីស្ថាប័នផ្តល់កម្ចីដែលមិនមានអាជ្ញាប័ណ្ណ មិនមានការគ្រប់គ្រងនិងមិនមានការត្រួតពិនិត្យត្រឹមត្រូវពីអាជ្ញាធរពាក់ព័ន្ធ គឺជាកម្ចីក្រៅផ្លូវការ។ ជាធម្មតា កម្ចីក្រៅផ្លូវការមិនតម្រូវឱ្យអ្នកខ្ចីមានប្រវត្តិអាជីវកម្មច្បាស់លាស់, ព្រមទាំងមានលក្ខខណ្ឌធូររលុង, ឯកសារតម្រូវតិចតួច, និងអាចទទួលបានកម្ចីឆាប់រហ័ស។ ប៉ុន្តែ កម្ចីក្រៅផ្លូវការមានគុណវិបត្តិជាច្រើន។ ជាក់ស្តែង លទ្ធភាពសងរបស់អ្នកខ្ចីមិនត្រូវបានវាយតម្លៃឱ្យបានស៊ីជម្រៅនិងល្អិតល្អន់នោះទេ ដែលជាហេតុបណ្តាលឱ្យអ្នកខ្ចី អាចបាត់បង់លទ្ធភាពសងនៅពេលក្រោយ និងប្រឈមបំណុលវ័ណ្ឌកធ្ងន់ធ្ងរ។ លើសពីនេះ កម្ចីក្រៅផ្លូវការមិនមានស្តង់ដារនៃការរៀបចំឥណទានឡើងវិញដើម្បីសម្រួលអ្នកខ្ចីក្នុងពេលជួបការលំបាកផ្នែកហិរញ្ញវត្ថុនោះទេ។ ការទាមទារបំណុលត្រឡប់មកវិញពីអ្នកខ្ចី ក៏មិនមាននីតិវិធីស្តង់ដារត្រឹមត្រូវ ដែលអាចបណ្តលឱ្យខូចទំនាក់ទំនងរវាងអ្នកខ្ចី និងអ្នកផ្តល់កម្ចី។ ដូច្នេះ មុននឹងសម្រេចជ្រើសរើសហិរញ្ញប្បទានប្រភេទនេះ ម្ចាស់អាជីវកម្មត្រូវគិតគូរឱ្យបានល្អិតល្អន់អំពីហានិភ័យទាំងនេះ។

ជម្រើសហិរញ្ញប្បទានបំណុលមួយទៀត គឺកម្ចីតាមរយៈធនាគារ។ ការស្វែងយល់ និងការបំពេញបានតាមលក្ខខណ្ឌនៃ 5Cs (លក្ខណៈសម្បត្តិ, ដើមទុន, ទ្រព្យធានា, សមត្ថភាព, និងលក្ខខណ្ឌ) គឺជាកត្តាសំខាន់ក្នុងការទទួលបានកម្ចីផ្លូវការពីធនាគារ។ កម្ចីផ្លូវការតាមរយៈធនាគារ ត្រូវបានគ្រប់គ្រងនិងត្រួតពិនិត្យយ៉ាងដិតដល់ ស្របតាមច្បាប់និងបទប្បញ្ញត្តិក្នុងវិស័យធនាគារ ដែលត្រូវបានរៀបចំឡើង ដើម្បីការពារអតិថិជន និងរក្សាស្ថិរភាពក្នុងវិស័យធនាគារ។ CGCC គាំទ្រក្រុមហ៊ុនអាជីវកម្ម ដើម្បីទទួលបានកម្ចីផ្លូវការពីធនាគារ តាមរយៈការធានាឥណទានដែលអាចដើរតួជាទ្រព្យធានារបស់អ្នកខ្ចី។

បន្ទាប់ពីដំណើរការប្រកបដោយជោគជ័យ និងមានស្ថិរភាព (ជាធម្មតាក្រោយរយៈពេល ៣ឆ្នាំ ឬលើសពីនេះ) ក្រុមហ៊ុនអាជីវកម្មអាចពិចារណាកៀរគរទុនតាមរយៈការបោះផ្សាយមូលបត្របំណុល ឬសញ្ញាប័ណ្ណ។ សញ្ញាប័ណ្ណគឺជាឧបករណ៍បំណុលដែលអាចជំនួសកម្ចីធនាគារ។ អ្នកផ្តល់កម្ចី ផ្តល់កម្ចីដល់អ្នកខ្ចី តាមរយៈការទិញមូលបត្របំណុលដែលបោះផ្សាយដោយអ្នកខ្ចី ដែលសន្យាទូទាត់ប្រាក់ដើម បូកនឹងការប្រាក់ដល់អ្នកផ្តល់កម្ចី ក្នុងអំឡុងពេលកាលវសាននៃសញ្ញាប័ណ្ណ។ សញ្ញាប័ណ្ណមានភាពបត់បែនជាងកម្ចីធនាគារ ទៅលើទំហំកម្ចី, កាលវសាន, និងការបង់ការប្រាក់ជាដើម។ ការប្រៀបធៀបរវាងកម្ចីធនាគារនិងសញ្ញាប័ណ្ណ ត្រូវបានពន្យល់នៅក្នុងព្រឹត្តិប័ត្រព័ត៌មានលេខ៩ របស់ CGCC។ CGCC បានដាក់ឱ្យដំណើរការគម្រោងធានាឥណទានលើការបោះផ្សាយសញ្ញាប័ណ្ណកាលពីខែមករា ឆ្នាំ២០២៤ កន្លងទៅ ដើម្បីគាំទ្រក្រុមហ៊ុនអាជីវកម្មក្នុងការបោះផ្សាយសញ្ញាប័ណ្ណនៅកម្ពុជា។

២. ហិរញ្ញប្បទានភាគហ៊ុនកម្មសិទ្ធិ

ហិរញ្ញប្បទានភាគហ៊ុនកម្មសិទ្ធិ គឺជាវិធីសាស្ត្រនៃការកៀរគរទុន តាមរយៈការលក់ចំណែកនៃកម្មសិទ្ធិអាជីវកម្មទៅឱ្យវិនិយោគិន។ នៅពេលវិនិយោគិនវិនិយោគលើភាគហ៊ុនកម្មសិទ្ធិ វិនិយោគិននឹងក្លាយជាម្ចាស់ភាគហ៊ុននៃអាជីវកម្ម ហើយអាចនឹងមានឥទ្ធិពលលើការសម្រេចចិត្តសំខាន់ៗក្នុងអាជីវកម្ម។ ខណៈដែលវិនិយោគិនលើភាគហ៊ុនកម្មសិទ្ធិ មិនមានសិទ្ធទទួលបានការប្រាក់ថេរពីការវិនិយោគលើភាគហ៊ុនកម្មសិទ្ធិ ពួកគេមានសិទ្ធិក្នុងការទទួលបានការចែករំលែកប្រាក់ចំណេញ និងការខាតបង់ជាក់ស្តែងរបស់អាជីវកម្ម។ ហិរញ្ញប្បទានភាគហ៊ុនកម្មសិទ្ធិ អាចត្រូវបានកៀរគរ តាមរយៈការលក់ភាគហ៊ុនជាលក្ខណៈឯកជនទៅកាន់វិនិយោគិនជាបុគ្គល (Angel Investor) និងវិនិយោគិនស្ថាប័ន (Venture Capital)  ឬការលក់ភាគហ៊ុនជាសាធារណៈ តាមរយៈការបោះផ្សាយលក់មូលបត្រកម្មសិទ្ធិជាសាធារណៈលើកដំបូង (IPO)។

Angel Investment គឺជាការវិនិយោគរបស់វិនិយោគិនដែលជាបុគ្គលមានបទពិសោធអាជីវកម្ម និងមានទ្រព្យសម្បត្តិច្រើន តាមរយៈការទិញភាគហ៊ុនរបស់ក្រុមហ៊ុនអាជីវកម្មទើបចាប់ផ្តើម ឬអាជីវកម្មខ្នាតតូចដែលពួកគេយល់ថាមានសក្តានុពលក្នុងការរីកចម្រើន និងទទួលបានប្រាក់ចំណេញខ្ពស់នាពេលអនាគត។ ដើម្បីកៀរគរទុនពី Angel Investors ម្ចាស់អាជីវកម្មត្រូវមានផែនការ

អាជីវកម្មរឹងមាំ ដែលអាចទាក់ទាញ Angel Investor ឱ្យដាក់ទុនវិនិយោគលើអាជីវកម្ម។ ខុសគ្នាពី Angel Investor ដែលវិនិយោគដើមទុនផ្ទាល់ខ្លួនរបស់ពួកគេក្នុងអាជីវកម្មដែលពួកគេចាប់អារម្មណ៍, Venture Capital ប្រើប្រាស់មូលនិធិដែលមានមកពីការរួមបញ្ចូលគ្នារវាងវិនិយោគិនច្រើនរួមគ្នា  ដើម្បីវិនិយោគលើអាជីវកម្មដែលមានសក្តានុពល។ Venture Capital ធ្វើការសិក្សាល្អិតល្អន់និងស៊ីជម្រៅជាង Angel Investor មុននឹងសម្រេចចិត្តវិនិយោគលើអាជីវកម្មណាមួយ និងអាចផ្តល់ជំនួយបច្ចេកទេស ព្រមទាំងបទពិសោធន៏នៃការគ្រប់គ្រងអាជីវកម្ម ដើម្បីលើកម្ពស់ប្រសិទ្ធភាពប្រតិបត្តិការនៃអាជីវកម្មដែលពួកគេវិនិយោគ។

ជម្រើសមួយទៀតនៃការកៀរគរទុន គឺការបោះផ្សាយមូលបត្រកម្មសិទ្ធិជាលើកដំបូង (IPO) ដែលជាដំណើរការនៃការលក់ភាគហ៊ុនរបស់ក្រុមហ៊ុនទៅឱ្យវិនិយោគិនជាសាធារណៈជាលើកដំបូង។ ដោយសារដើមទុនត្រូវបានកៀរគរពីសាធារណជន ក្រុមហ៊ុនបោះផ្សាយមូលបត្រកម្មសិទ្ធិជាសាធារណៈ ត្រូវឆ្លងកាត់ការត្រួតពិនិត្យការតម្រូវតាមច្បាប់ និងបំពេញតាមលក្ខខណ្ឌនៃការបង្ហាញព័ត៌មានដ៏តឹងរឹង។ ដូច្នេះ IPO អាចលើកកម្ពស់កេរ្តិ៍ឈ្មោះ គណនេយ្យភាព និងលទ្ធភាពទទួលបានហិរញ្ញប្បទានសម្រាប់ការអភិវឌ្ឍរយៈពេលវែងរបស់ក្រុមហ៊ុននាពេលអនាគត។ ដំណើរការនៃការធ្វើ IPO ត្រូវបានគ្រប់គ្រងនិងត្រួតពិនិត្យ ដោយនិយ័តករមូលបត្រកម្ពុជា។

 

អាននិងទាញយកអត្ថបទជា PDF: ការស្វែងយល់អំពីជម្រើសហិរញ្ញប្បទានសម្រាប់អាជីវកម្ម