Tag: Credit Guarantee

នៅថ្ងៃទី០៩ ខែវិច្ឆិកា ឆ្នាំ២០២២ នៅទីក្រុង Daegu នៃសាធារណរដ្ឋកូរ៉េ ក្រោមការឯកភាពដ៏ខ្ពង់ខ្ពស់របស់ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ចនិងហិរញ្ញវត្ថុ CGCCC និង KODIT  បានចុះហត្ថលេខាជាផ្លូវការ លើអនុស្សរណៈនៃការយោគយល់ លើកិច្ចសហប្រតិបត្តិការដើម្បីលើកស្ទួយការអភិវឌ្ឍយន្តការធានាឥណទាន គាំទ្រដល់ការរីកចម្រើននៃសហគ្រាសខ្នាតតូច និងមធ្យម (SMEs) នៅក្នុងប្រទេសកម្ពុជា និងសាធារណរដ្ឋកូរ៉េ។

អនុស្សរណៈនៃការយោគយល់នេះ ត្រូវបានចុះហត្ថលេខាដោយលោក Wong Keet Loong អគ្គនាយក CGCC និង លោក Choi Won Mok ប្រធានក្រុមប្រឹក្សាភិបាល និងជានាយកប្រតិបត្តិនៃ KODIT ក្រោមវត្តមានជាអធិបតីភាពរបស់ ឯកឧត្តមបណ្ឌិត ម៉ី វ៉ាន់ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មាធិការគ្រប់គ្រងហានិភ័យរបស់ CGCC។

អនុស្សរណៈនៃការយោគយល់នេះ នឹងផ្តល់លទ្ធភាពដល់ CGCC និង KODITក្នុងការសហការផ្លាស់ប្តូរព័ត៌មាន ការប្រឹក្សាគោលនយោបាយ និងសម្រួបសម្រួលគ្នាទៅវិញទៅមកជុំវិញការធានាឥណទាន។

ចុចទីនេះស្វែងយល់បន្ថែម: សាជីវកម្មធានាឥណទានកម្ពុជា (CGCC) និង សាជីវកម្មធានាឥណទានម៉ាឡេស៊ី Berhad (Credit Guarantee Corporation Malaysia Berhad (CGC)) ចុះអនុស្សរណៈនៃការយោគយល់គ្នាដើម្បីអភិវឌ្ឍយន្តការធានាឥណទាន

CGCC មានសេចក្តីរីករាយដែលបានចូលរួមសហការឧបត្ថម្ភដល់ការរៀបចំវេទិកាបច្ចេកវិទ្យាហិរញ្ញវត្ថុនៃពិព័រណ៍បច្ចេកវិទ្យាកម្ពុជា ២០២២ និងសូមចូលរួមអបអរសាទរ ដែលវេទិកានេះត្រូវបានរៀបចំឡើងប្រកបដោយជោគជ័យ កាលពីថ្ងៃទី ១១ ដល់ ១៣ ខែវិច្ឆិកា ឆ្នាំ២០២២ នៅ​មជ្ឈមណ្ឌលសន្និបាត និងពិព័រណ៍កោះពេជ្រ ក្រោមការចូលរួមពីសំណាក់ភ្ញៀវជាតិ និងអន្តរជាតិយ៉ាងច្រើនកុះករ។ ពិព័រណ៍បច្ចេកវិទ្យាកម្ពុជា ២០២២នេះ គឺជាព្រឹត្តិការណ៍ដំបូង និងធំជាងគេបំផុតនៅកម្ពុជា ដែលត្រូវបានរៀបចំឡើង អមជាមួយកិច្ចប្រជុំកំពូលអាស៊ានលើកទី​ ៤០ និង៤១ ដែលកម្ពុជាធ្វើជាម្ចាស់ផ្ទះ។

វេទិកានេះត្រូវបានសហការរៀបចំឡើងដោយ ក្រសួងសេដ្ឋកិច្ចនិងហិរញ្ញវត្ថុ គណៈកម្មាធិការសេដ្ឋកិច្ច និង ធុរកិច្ចឌីជីថល , មជ្ឈមណ្ឌលបណ្តុះធុរកិច្ចថ្មី “តេជោ” និង សមាគមហិរញ្ញវត្ថុនិងបច្ចេកវិទ្យាកម្ពុជា ក្រោមប្រធានបទធំៗចំនួន៣៖  (១) ការអភិវឌ្ឍនវិស័យច្ចេកវិទ្យាហិរញ្ញវត្ថុ, (២) វិស័យ​ធនាគារ និងវិស័យមិនមែនធនាគារ , (៣) សន្តិសុខតាមប្រព័ន្ធអ៊ិនធឺណិត និងវិស័យហិរញ្ញវត្ថុទម្រង់វិមជ្ឈការ។

ឆ្លៀតក្នុងឱកាសនេះ​ CGCC បានដាក់តាំងបង្ហាញព័ត៌មានអំពីការធានាឥណទាន ដើម្បីលើកកម្ពស់់ការទទួលបានព័ត៌មានជំនួយហិរញ្ញវត្ថុ ពោលគឺការធានាឥណទានលើកម្ចីអាជីវកម្មដែលខ្វះទ្រព្យធានា ដែលជាគំនិតផ្តួចផ្តើមរបស់រាជរដ្ឋាភិបាលកម្ពុជា ក្នុងការគាំទ្រដល់ការអភិវឌ្ឍសហគ្រាសខ្នាតតូចនិងមធ្យម។

នាថ្ងៃទី២៨ ខែតុលា ឆ្នាំ២០២២​​ សាជីវកម្មធានាឥណទានកម្ពុជា (CGCC)​មានកិត្តិយសក្នុងការចូលរួមសិក្ខាសាលាជាមួយ សមាគមមីក្រូហិរញ្ញវត្ថុកម្ពុជា (CMA)​ក្រោមប្រធានបទ “ការពព្រឹងកំណើនប្រកបដោយការទទួលខុសត្រូវ ក្នុងបរិបទនៃការស្តារសេដ្ឋកិច្ចឡើងវិញក្រោយវិបត្តិជំងឺកូវីដ១៩” នៅឯ​មជ្ឍមណ្ឌលសន្និបាត និង សណ្ឋាគារ សុខា ខេត្តសៀមរាប​ ដែលក្នុងនោះ ក៏មានការចូលរួមជាអធិបតីដោយ ឯកឧត្តម រ័ត្ន សុវណ្ណនរៈ​ ឧបការីទេសាភិបាល និងជាអគ្គនាយកត្រួតពិនិត្យ ធនាគារជាតិនៃកម្ពុជា ​និងឯកឧត្តមបណ្ឌិត​ ហួត​​ ពុំ អនុរដ្ឋលេខាធិការ​ ក្រសួងសេដ្ឋកិច្ច និងហិរញ្ញវត្ថុ រួមទាំងការចូលរួមពីបណ្តាគ្រឹះស្ថានមីក្រូហិរញ្ញវត្ថុជាច្រើនទៀត។ 

ក្នុងសិ​ក្ខាសាលានេះលោក ណូ លីដា អគ្គនាយករង CGCC ក៏បានចូលរួមជាវាគ្មិនកិត្តិយសមួយរូប លើកិច្ចពិភាក្សាស្តីពី “ការអនុវត្តល្អបំផុត និងបទពិសោធន៍លើការគាំទ្រ សហគ្រាសធុនមីក្រូ តូចនិងមធ្យម (MSME) ដើម្បីរួមចំណែកស្តារសេដ្ធកិច្ចឡើងវិញ” ផងដែរ។ លោកបានលើកយកបទពិសោធន៏នៃការធានាឥណទានដែលទទួលបានការគាំទ្រ​ពី​ CGCC កន្លងមកទៅកាន់សហគ្រាសធុនមីក្រូ តូចនិងមធ្យម (MSMEs) និងសហគ្រិនស្ត្រី។ បន្ថែមពីនេះលោកក៏បានពន្យល់អោយកាន់តែច្បាស់ អំពីព័ត៌មាននៃអត្ថប្រយោជន៍ស្តីពីកម្ចីផ្លូវការ ឆ្លើយតបនឹងបញ្ហាខ្វះទ្រព្យធានាពេលស្នើសុំកម្ចីពីគ្រឹះស្ថានធនាគារ និងមីក្រូហិរញ្ញវត្ថុដៃគូ ក្រោមគម្រោងធានាឥណទាន​របស់ CGCC សម្រាប់យកទៅកែលម្អ និងស្តារអាជីវកម្មរបស់ខ្លួន បន្ទាប់ពីសហគ្រាសជាច្រើន បានរងការប៉ះពាល់ពីវិបត្តិកូវីដ១៩ នារយៈកាលកន្លងទៅ។ 

Click here to read more about: CGCC & Key Reflection of Covid-19 response and future perspective to accelerate the economic recovery

នៅថ្ងៃទី២១ ខែតុលា ឆ្នាំ២០២២ នៅទីក្រុងគួឡាឡាំពួរ ប្រទេសម៉ាឡេស៊ី CGCC និង CGC បានចុះហត្ថលេខាជាផ្លូវការ លើអនុស្សរណៈនៃការយោគយល់ លើកិច្ចសហប្រតិបត្តិការដើម្បីលើកស្ទួយការអភិវឌ្ឍការធានាឥណទាន និង ការរីកចម្រើននៃសហគ្រាសខ្នាតមីក្រូ តូច និងមធ្យម (MSMEs) នៅក្នុងប្រទេសកម្ពុជា និងមាឡេស៊ី​ ក៏ដូចជានៅក្នុងបរិបទនៃអាស៊ាន។

អនុស្សរណៈនៃការយោគយល់នេះ ត្រូវបានចុះហត្ថលេខាដោយលោក Wong Keet Loong អគ្គនាយក CGCC និង Datuk Mohd Zamree Mohd Ishak ប្រធាន/នាយកប្រតិបត្តិ CGC ក្រោមវត្តមានជាអធិបតីភាពរបស់ ឯកឧត្តមបណ្ឌិត ម៉ី វ៉ាន់ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មាធិការគ្រប់គ្រងហានិភ័យរបស់ CGCC និងលោក Anthony Lim Choon Eng អភិបាលឯករាជ្យមិនប្រតិបត្តិ និងជាប្រធានគណៈកម្មាធិការគ្រប់គ្រងហានិភ័យ របស់ CGC។

អនុស្សរណៈនៃការយោគយល់នេះ នឹងផ្តល់លទ្ធភាពដល់ CGCC និង CGC ក្នុងការសហការផ្លាស់ប្តូរព័ត៌មាន ការប្រឹក្សាគោលនយោបាយ និងសម្រួបសម្រួលគ្នាទៅវិញទៅមកជុំវិញការធានាឥណទាន។

ថ្ងៃទី២០ និង២១ ខែតុលា ឆ្នាំ២០២២ សាជីវកម្មធានាឥណទានកម្ពុជា ដឹកនាំដោយ ឯកឧត្តម បណ្ឌិត ម៉ី វ៉ាន់ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មាធិការគ្រប់គ្រងហានិភ័យរបស់ CGCC, Datuk Michael Lor ទីប្រឹក្សាក្រសួងសេដ្ឋកិច្ច និងហិរញ្ញវត្ថុ, លោក Wong Keet Loong អគ្គនាយក CGCC អមដំណើរដោយសហការីជាន់ខ្ពស់របស់ CGCC បានធ្វើដំណើរបេសកកម្មទៅកាន់ប្រទេសម៉ាឡេស៊ី ដើម្បីសិក្សាស្វែងយល់បន្ថែមលើប្រធានបទពាក់ព័ន្ធនឹងការធានាឥណទាន ពីស្ថាប័នចំនួន៣ គឺសាជីវកម្មធានាឥណទានប្រទេសម៉ាឡេស៊ី ស្ថាប័ន Danajamin Nasional Berhad និងធនាគារ Negara ម៉ាឡេស៊ី។

នេះជាលើកទីមួយ ដែល CGCC បានរៀបចំនូវដំណើរបេសកកម្មធុរកិច្ចក្រៅប្រទេស ក្រោយពីដំណើរការ២ឆ្នាំមកនេះ ដែលនេះគឺជាឱកាសសិក្សាស្វែងយល់បន្ថែមដល់ CGCC ទៅលើយុទ្ធសាស្រ្ត និងការអនុវត្តនានាពាក់ព័ន្ធនឹងការធានាឥណទាន ដើម្បីលើកស្ទួយ និងប្រតិបត្តិការ ពីស្ថាប័នដែលមានបទពិសោធន៍ និងដ៏សកម្មពាក់ព័ន្ធនឹងការធានាឥណទាន ហើយក៏ជាឱកាសសម្រាប់ CGCC ចែករំលែកអំពីគម្រោងធានាឥណទាន តំណាងឱ្យប្រទេសកម្ពុជាទៅកាន់ស្ថាប័នពាក់ព័ន្ធ​ នៅក្នុងកម្រិតបរិបទនៃអាស៊ានផងដែរ។

នាថ្ងៃសុក្រ ទី៣០ ខែកញ្ញា ឆ្នាំ២០២២ លោក ណូ លីដា អគ្គនាយករង CGCC បានចូលរួមចែករំលែកអំពីគម្រោងធានាឥណទានរបស់ CGCC នៅក្នុងសិក្ខាលាស្តីពី ការស្នើសុំអាជ្ញាបណ្ណទេសចរណ៍តាមថ្នាលបច្ចេកវិទ្យា CamDx អមជាមួយពិធីផ្សព្វផ្សាយបទដ្ឋានគតិយុត្រ និងវិធានការថ្មីៗរបស់ក្រសួងទេសចរណ៍ នៅឯខេត្តសៀមរាប ក្រោមអធិបតីភាព ឯកឧត្តម សុង តុងហាប់ រដ្ឋលេខាធិការក្រសួងទេសចរណ៍ ដោយមានការចូលរួមពីថ្នាក់ដឹកនាំ និងមន្រ្តីនៃក្រសួងទេសចរណ៍ ក៏ដូចជាសមាគមទីភ្នាក់ងារទេសចរណ៍ជាច្រើនផងដែរ។

លោកអគ្គនាយករង​ បានរំលេចអំពីតួនាទីនៃការធានាឥណទាន ដែលជាយន្តការដោះស្រាយបន្ថែមមួយ ផ្តួចផ្តើមដោយរាជរដ្ឋាភិបាល ដើម្បីសម្រួលការទទួលបានហិរញ្ញប្បទានផ្លូវការរបស់ក្រុមហ៊ុន/អាជីវកម្ម ដែលប្រឈមនឹងការខ្វះទ្រព្យបញ្ចាំសម្រាប់ដាក់ស្នើកម្ចីពីគ្រឹះស្ថានធនាគារ/មីក្រូហិរញ្ញវត្ថុ។ ទន្ទឹមនឹងនេះ ស្របតាម “ក្របខណ្ឌយុទ្ធសាស្រ្ត និងកម្មវិធីស្តារ និងជំរុញកំណើនសេដ្ឋកិច្ចកម្ពុជា ក្នុងការរស់នៅជាមួយកូវីដ-១៩ តាមគន្លងប្រក្រតីភាពថ្មី សម្រាប់ឆ្នាំ ២០២១-២០២៣” របស់រាជរដ្ឋាភិបាល CGCC ក៏បានដាក់ចេញនូវគម្រោងធានាឥណទានសម្រាប់សហហិរញ្ញប្បទាន ដែលមានគោលដៅគាំទ្រដល់ការស្តារ និងងើបឡើងវិញនៃអាជីវកម្មនៅក្នុងវិស័យទេសចរណ៍ ដែលរងការប៉ះពាល់ពីវិបត្តិជំងឺកូវីដ១៩ផងដែរ។

លោកអគ្គនាយករង ក៏បានលើកទឹកចិត្តដល់សមាគមទីភ្នាក់ងារទេសចរណ៍ និងសមាជិកអង្គសិក្ខាសាលា ចូលរួមចែករំលែកបន្តនូវព័ត៌មានអំពីគម្រោងធានាឥណទាន ជាពិសេសគម្រោងធានាឥណទានសម្រាប់សហហិរញ្ញប្បទានសម្រាប់វិស័យទេសចរណ៍ ដែលបានបង្កើតឡើងយ៉ាងពិសេស និងផ្តល់នូវលក្ខខណ្ឌអនុគ្រោះជាច្រើន ដើម្បីដោះស្រាយនូវបញ្ហាប្រឈមរបស់ម្ចាស់អាជីវកម្មដែលមានតម្រូវការកម្ចី​ក្នុងគោលដៅជួយជំរុញការស្តារវិស័យទេសចរណ៍ តែខ្វះខាតទ្រព្យបញ្ចាំ៕

(រាជធានីភ្នំពេញ ថ្ងៃទី២២ ខែកញ្ញា ឆ្នាំ២០២២)៖ សាជីវកម្មធានាឥណទានកម្ពុជា (CGCC) និងធនាគារឌីជីប៊ី បានរៀបចំពិធីចុះកិច្ចព្រមព្រៀងជាផ្លូវការ លើការធានាឥណទាន ដើម្បីបង្កើនការគាំទ្រដល់អាជីវកម្មនៅគ្រប់កម្រិតទាំងអស់នៅប្រទេសកម្ពុជា ចាប់តាំងពីខ្នាតមីក្រូ រហូតដល់ខ្នាតធំ ដែលមានតម្រូវការកម្ចីផ្លូវការប៉ុន្តែខ្វះខាតទ្រព្យបញ្ចាំ អាចទទួលបានកម្ចីដែលមានការធានាសម្រាប់អាជីវកម្ម។

ក្នុងនាមជាសហគ្រាសសាធារណៈ ដែលស្ថិតនៅក្រោមអាណាព្យាបាលបច្ចេកទេស និងហិរញ្ញវត្ថុរបស់ក្រសួងសេដ្ឋកិច្ច និងហិរញ្ញវត្ថុ CGCC បានដាក់ឱ្យដំណើរការ និងអនុវត្តនូវគម្រោងធានាឥណទានសម្រាប់លើកស្ទួយដល់ការទទួលបាននូវកម្ចីប្រកបដោយភាពងាយស្រួល និងបត់បែងជាមុន ទោះបីជាអាជីវកម្មខ្វះទ្រព្យបញ្ចាំក៏ដោយ ហើយ CGCC បាននិងកំពុងបន្តផ្តល់ការគាំទ្រច្រើនបំផុតដល់សហគ្រាសខ្នាតតូចនិងមធ្យម ស្របតាមយុទ្ធសាស្រ្តរបស់រាជរដ្ឋាភិបាលក្នុងការអភិវឌ្ឍដល់សហគ្រាសខ្នាតតូនិងមធ្យម។ ភាពជាដៃគូលើការធានាឥណទាននេះ នឹងធ្វើឱ្យធនាគារឌីជីប៊ី ក្លាយជាគ្រឹះស្ថានហិរញ្ញវត្ថុចូលរួមទី២៤របស់ CGCC ក្នុងការផ្តល់នូវកម្ចីដែលមានការធានាដល់ក្រុមហ៊ុន/អាជីវកម្ម ជាពិសេសសហគ្រាសខ្នាតតូចនិងមធ្យម ដែលខ្វះខាតទ្រព្យបញ្ចាំសម្រាប់ជាទុនបង្វិល និងពង្រីកអាជីវកម្ម។ 

លោក Wong Keet Loog អគ្គនាយក CGCC បានមានប្រសាសន៍ឱ្យដឹងថា៖ “ទំហំការធានាឥណទានរយៈពេល៦ខែចុងក្រោយនេះ បាននិងកំពុងមានការកើនឡើងគួរឱ្យកត់សម្គាល់​ ដែលអាចស្តែងឱ្យឃើញបានថា ការធានាឥណទានបានគាំទ្រដល់គាំទ្រដល់សហគ្រាសធុនតូចនិងមធ្យម ក្នុងការទទួលបានកម្ចីដើម្បីអភិវឌ្ឍអាជីវកម្ម។ គ្រឹះស្ថានហិរញ្ញវត្ថុចូលរួមរបស់យើង អាចមានលទ្ធភាពផ្តល់កម្ចីជាមួយនឹងការចែករំលែកហានិភ័យរបស់ CGCC”។ 

លោក Wong បន្ថែមថា៖ “កិច្ចសហការជាមួយនឹងធនាគារឌីជីប៊ី នឹងពង្រឹងបន្ថែមលើការផ្សព្វផ្សាយរបស់យើង ដើម្បីជួយគាំទ្រដល់សហគ្រាសខ្នាតតូច និងមធ្យម តាមរយៈបណ្តាញសាខារបស់ធនាគារឌីជីប៊ី។ យើងរីករាយដែល ធនាគារឌីជីប៊ី យល់ច្បាស់អំពីអត្ថប្រយោជន៍នៃការធានាឥណទាន ដើម្បីគាំទ្រដល់កំណើននៃការផ្តល់ប្រាក់កម្ចី និងទម្ងន់ហានិភ័យរបស់ធនាគារ”។ 

លោក អ៊ុល ដេតសុខុម ប្រធាននាយកប្រតិបត្តិ ធនាគារ ឌីជីប៊ី បានបញ្ជាក់ឱ្យដឹងដែរថា៖  “ ធនាគារ ឌីជីប៊ី ពិតជាមានក្តីសោមនស្សរីករាយដែលបានចុះហត្ថលេខាលើកិច្ចព្រមព្រៀងធានាឥណទានជាមួយ CGCC។ ពីព្រោះធនាគារអាចចូលរួមចំណែកក្នុងការគាំទ្រដល់ការរីកចម្រើនរបស់អាជីវកម្ម និងសេដ្ឋកិច្ចកម្ពុជានៅក្នុងថ្នាក់តំបន់អាស៊ីអាគ្នេយ៍។ 

លោក អ៊ុល ដេតសុខុម បានបន្ថែមទៀតថា៖ “ពួកយើងបានត្រៀមខ្លួនរួចជាស្រេចដើម្បីចូលរួមគម្រោងធានាឥណទានរបស់រាជរដ្ឋាភិបាល និងដើម្បីគាំទ្រដល់អាជីវកម្មខ្នាតតូច និងមធ្យម ដែលមិនអាចឬពិបាកទទួលបានប្រភពមូលធុនជាមួយនឹងទ្រព្យបញ្ចាំដែលមានកម្រិត”។  

កិច្ចសហការរួមគ្នារវាង CGCC និងធនាគារឌីជីប៊ី នឹងកាន់តែបង្កើននូវឱកាសដល់ក្រុមហ៊ុនអាជីវកម្ម ជាពិសេសសហគ្រាសខ្នាតតូចនិងមធ្យម ឱ្យទទួលបាននូវកម្ចីសម្រាប់ការអភិវឌ្ឍឆ្ពោះទៅកាន់ការរីកចម្រើនរបស់អាជីវកម្ម តាមរយៈការបង្កើនទំហំកម្ចី ជាមួយនឹងយន្តការចែករំលែកហានិភ័យនៃគម្រោងធានាឥណទាន។ ក្នុងន័យនេះ សហគ្រាសខ្នាតតូចនិងមធ្យម អាចស្នើកម្ចីទៅកាន់ធនាគារឌីជីប៊ី ដោយមិនចាំបាច់មានទ្រព្យបញ្ចាំ ឬអាចទទួលបានទំហំកម្ចីច្រើនជាងមុនជាមួយនឹងតម្លៃទ្រព្យបញ្ចាំដូចគ្នាដែលអាចទទួលបានពីកម្ចីដែលមិនមានការធានា។  

អំពី CGCC  

CGCC  គឺជាសហគ្រាសសាធារណៈ ស្ថិតនៅក្រោមអាណាព្យាបាលបច្ចេកទេស និងហិរញ្ញវត្ថុ របស់ក្រសួងសេដ្ឋកិច្ច និងហិរញ្ញវត្ថុ និងបានចុះបញ្ជីជាផ្លូវការ នៅខែវិច្ឆិកា ឆ្នាំ២០២០។ បេសកកម្មចម្បងរបស់ CGCC គឺផ្តល់ការធានាឥណទានលើកម្ចីដែលផ្តល់ឱ្យអាជីវកម្ម ដើម្បីចែករំលែកហានិភ័យជាមួយស្ថាប័នផ្តល់កម្ចី និងបង្កើនបរិយាបន្នហិរញ្ញវត្ថុ។  

គិតត្រឹមថ្ងៃចុងខែសីហា ឆ្នាំ២០២២នេះ CGCC បានផ្តល់ការធានាឥណទាន ដល់ក្រុមហ៊ុន/អាជីវកម្មសរុបចំនួន៦៦១ ក្នុងទំហំទឹកប្រាក់ប្រហាក់ប្រហែល ៦៤,៨ លានដុល្លារអាមេរិក ដែលក្នុងនោះ ៩៥% នៃចំនួនក្រុមហ៊ុន/អាជីវកម្មដែលទទួលការធានាសរុប បានផ្តល់ជូនទៅសហគ្រាសធុនតូចនិងមធ្យម (SMEs)។ 

 អំពីធនាគារឌីជីប៊ី 

ធនាគារឌីជីប៊ីត្រូវបានសម្ពោធជាធនាគារពាណិជ្ជនៅថ្ងៃទី០១ ខែកញ្ញា ឆ្នាំ២០២១ ដោយមានការចូលរួមពីប្រធាននាយកប្រតិបត្តិរបស់ធនាគារ Daegu និងថ្នាក់ដឹកនាំកំពូលរបស់ធនាគារ។ ក្នុងរយៈពេលមួយឆ្នាំមកនេះ ធនាគារបានបង្កើតផលិតផលមួយចំនួនដូចជា៖ ប្រាក់បញ្ញើ (CASA) ការផ្ទេរប្រាក់ (ក្នុងស្រុក និងក្រៅប្រទេស) កម្មវិធី DGB Mobile និងសេវា ATM។  

ធនាគារបានអនុលោមទៅតាមប្រកាសរបស់ធនាគារជាតិនៃកម្ពុជា​ បានផ្តល់ឥណទានដល់អតិថិជន ដោយអនុវត្តប្រកាសស្តីពីការរៀបចំឥណទានឡើងវិញ ដើម្បីបន្ធូរបន្ទុកដ៏ធ្ងន់ធ្ងររបស់អតិថិជន ក្នុងអំឡុងពេលមានវិបត្តិហិរញ្ញវត្ថុ 

ថ្ងៃទី២១ ខែកញ្ញា ឆ្នាំ២០២២ លោកស្រី ពិន​ ម៉ានីកា ប្រធានការិយាល័យទីផ្សារនិងអភិវឌ្ឍន៍អាជីវកម្មរបស់សាជីវកម្មធានាឥណទានកម្ពុជា​ (CGCC) បានចូលរួមជាវាគ្មិនកិត្តិយស នៅក្នុងជំនួបប្រចាំសប្តាហ៍របស់បណ្តាញ BNI Chapter Brilliant ដើម្បីចែករំលែកអំពីគម្រោងធានាឥណទាន ដល់ម្ចាស់អាជីវកម្មជាង ៣០រូប ដែលជាសមាជិក។ 

ការចែករំលែកនេះ ត្រូវបានរៀបចំឡើងដើម្បីផ្សព្វផ្សាយបង្កើនការយល់ដឹងអំពីអត្ថប្រយោជន៍នៃការធានាឥណទាន និងជាដំណោះស្រាយលើបញ្ហាប្រឈមខ្វះទ្រព្យបញ្ចាំពេលដាក់ស្នើកម្ចី សម្រាប់ម្ចាស់អាជីវកម្ម ជាពិសេសអាជីវកម្មខ្នាតតូចនិងមធ្យម។  

ម្ចាស់អាជីវកម្មដែលជាសមាជិកបណ្តាញ BNI ដែលបានចូលរួមកម្មវិធីនាព្រឹកនេះ មានការចាប់អារម្មណ៍ជាខ្លាំងលើគម្រោងធានាឥណទានរបស់ CGCC និងបានសាកសួរបន្ថែមអំពីចម្ងល់ទាក់ទងនឹងនីតិវិធីនៃការដាក់ស្នើកម្ចីដែលមានការធានា​ និងការបំពេញលក្ខខណ្ឌតម្រូវនានា ជាពិសេសក៏បានស្នើលើកទឹកចិត្តសមាជិកក្នុងក្រុមឱ្យទាក់ទងទៅកាន់គ្រឹះស្ថានធនាគារ/មីក្រូហិរញ្ញវត្ថុដៃគូរបស់ CGCC ដើម្បីដាក់ស្នើកម្ចីសម្រាប់អាជីវកម្មរបស់ខ្លួន បើសិនជាមិនមានទ្រព្យបញ្ចាំគ្រប់គ្រាន់។  

ថ្ងៃអង្គារ ទី១៣ ខែកញ្ញា ឆ្នាំ២០២២ សាជីវកម្មធានាឥណទានកម្ពុជា (ស.ធ.ក.) បានរៀបចំកិច្ចប្រជុំក្រុមប្រឹក្សាភិបាលអាណត្តិទី១ លើកទី១១ នៅឯការិយាល័យ ស.ធ.ក. ក្រោមវត្តមានដ៏ខ្ពង់ខ្ពស់របស់ ឯកឧត្តម រស់ សីលវ៉ា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាភិបាលរបស់ស.ធ.ក. ដោយមានការចូលរួមពីសំណាក់សមាជិកក្រុមប្រឹក្សាភិបាល ទាំងអស់របស់ ស.ធ.ក.។

របៀបវារៈនៃកិច្ចប្រជុំក្រុមប្រឹក្សាភិបាលលើកទី១១ នេះ រួមមាន (១) របាយការណ៍ស្តីពីវឌ្ឍនភាពការងាររបស់ ស.ធ.ក. , (២) ពាក្យស្នើសុំធ្វើជាស្ថាប័នហិរញ្ញវត្ថុចូលរួម (PFIs) , (៣) ផែនការអាជីវកម្ម និងផែនការថវិកាប្រចាំឆ្នាំ២០២៣, (៤) វិសោធនកម្មឯកសារណែនាំហិរញ្ញវត្ថុ, (៥) គោលនយោបាយហានិភ័យឥណទាន និង (៦) ផ្សេងៗ។

កិច្ចប្រជុំក្រុមប្រឹក្សាភិបាលរបស់ ស.ធ.ក. តែងតែត្រូវបានរៀបចំឡើងជាទៀងទាត់ ដើម្បីពិនិត្យ វាយតម្លៃ និងផ្តល់អនុសាសន៍ដល់ ស.ធ.ក. ក៏ដូចជាផ្តល់ការសម្រេចនានា ទៅលើសកម្មភាពការងារ ជាពិសេសទៅលើកិច្ចការងារអភិវឌ្ឍស្ថាប័ន  ដើម្បីធានានូវតម្លាភាព និងប្រសិទ្ធភាពរបស់ ស.ធ.ក.។

ចុចទីនេះស្វែងយល់បន្ថែមពី: How Private Finance Initiatives (PFIs) Work

ចុចទីនេះស្វែងយល់បន្ថែមពី : កិច្ចប្រជុំក្រុមប្រឹក្សាភិបាល សាជីវកម្មធានាឥណទានកម្ពុជា អាណត្តិទី១ លើកទី១២