Tag: Cambodia

(អត្ថបទចុះផ្សាយលើសារព័ត៌មានថ្មីៗ៖ សាជីវកម្មធានាឥណទានកម្ពុជា បង្ហាញពីការត្រៀមខ្លួន ដើម្បីទទួលបាននូវឥណទានដែលមានការធានា) 

សេវាធានាឥណទាន ត្រូវបានប្រើប្រាស់ក្នុងគោលដៅគាំទ្រក្រុមហ៊ុនអាជីវកម្ម ជាពិសេស អាជីវកម្មខ្នាតតូច និងមធ្យម ឱ្យទទួលបានហិរញ្ញប្បទានផ្លូវការ។ បច្ចុប្បន្ន សាជីវកម្មធានាឥណទានកម្ពុជា (CGCC) ផ្តល់ការធានាឥណទាន លើកម្ចីដែលបញ្ចេញដោយធនាគារ និងគ្រឹះស្ថានមីក្រូហិរញ្ញវត្ថុជាគ្រឹះស្ថានហិរញ្ញវត្ថុចូលរួម (ហៅថាកាត់ថា PFIs) របស់ CGCC ទៅកាន់អ្នកស្នើសុំកម្ចី ក្រោមគម្រោងធានាឥណទានដែលបានដាក់ចេញដោយ CGCC។ ដូច្នេះ ដើម្បីចាប់យកអត្ថប្រយោជន៍ពីការធានាឥណទាន ក្រុមហ៊ុនអាជីវកម្មត្រូវត្រៀមខ្លួនឱ្យបានរួចរាល់ដើម្បីស្នើសុំកម្ចីទៅកាន់ PFIs ជាមុនសិន។ ការស្វែងយល់អំពីលក្ខណៈវិនិច្ឆ័យដែល PFIs ប្រើប្រាស់ដើម្បីវាយតម្លៃលើសំណើសុំឥណទាន អាចជួយឱ្យក្រុមហ៊ុនអាជីវកម្មត្រៀមខ្លួនបានល្អប្រសើរជាមុន ក្នុងការទទួលបានកម្ចីដែលមានការធានាពី CGCC។

សាជីវកម្មធានាឥណទានកម្ពុជា បង្ហាញពីការត្រៀមខ្លួន ដើម្បីទទួលបាននូវឥណទានដែលមានការធានា

លក្ខខណ្ឌ (CONDITION)

មុនពេលអនុម័តកម្ចី ធនាគារត្រូវតែដឹងច្បាស់អំពីគោលបំណងនៃកម្ចី និងទំហំកម្ចីដែលសមស្របទៅនឹងគោលបំណងនៃកម្ចីនោះ។ តើក្រុមហ៊ុនអាជីវកម្មអាចបញ្ជាក់ជូនធនាគារ អំពីគោលបំណងនៃកម្ចី និងទំហំកម្ចីដោយរបៀបណា? ផែនការអាជីវកម្ម និងរបាយការណ៍ហិរញ្ញវត្ថុ ដែលមានភាពជឿទុកចិត្តបាន គឺជាមូលដ្ឋានដ៏សំខាន់ដែលអាចឱ្យធនាគារវាយតម្លៃលើទំហំកម្ចីដែលត្រូវការ និងគោលបំណងនៃកម្ចីរបស់អ្នកខ្ចីបាន។ ពិតណាស់ ផែនការអាជីវកម្ម និងរបាយការណ៍ហិរញ្ញវត្ថុច្បាស់លាស់ មិនត្រឹមតែអាចជួយក្រុមហ៊ុនអាជីវកម្មឱ្យស្នើសុំកម្ចីបានងាយស្រួលប៉ុណ្ណោះទេ ប៉ុន្តែថែមទាំងអាចជួយក្រុមហ៊ុនអាជីវកម្មវាយតម្លៃលើស្ថានភាពអាជីវកម្មរបស់ខ្លួន ដើម្បីរៀបចំផែនការ​សម្រាប់ភាពជោគជ័យនៃអាជីវកម្មនាពេលអនាគតផងដែរ។ ផែនការអាជីវកម្ម និងរបាយការណ៏ហិរញ្ញវត្ថុ អាចជួយកំណត់ទំហំកម្ចី​ និងលទ្ធភាពនៃការសងត្រឡប់ ឱ្យកាន់តែមានភាពសុក្រិត។​ ការកំណត់ទំហំកម្ចីឱ្យបានត្រឹមត្រូវ ពិតជាសំខាន់។ ការទទួលបានកម្ចីច្រើនហួស ធ្វើឱ្យអ្នកខ្ចីខាតបង់ការប្រាក់ ថ្លៃរដ្ឋបាល ថ្លៃពិន័យក្នុងការសងមុនកាលកំណត់ និងថ្លៃសេវាផ្សេងៗទៀត។ ផ្ទុយទៅវិញ ការទទួលបានកម្ចីមិនបានគ្រប់គ្រាន់រាំងស្ទះដល់ការរីកចម្រើនរបស់ក្រុមហ៊ុនអាជីវកម្មឱ្យអស់សក្តានុពល។ កត្តា “លក្ខខណ្ឌ (Condition)” គឺជាលក្ខណៈវិនិច្ឆ័យមួយ ក្នុងចំណោមលក្ខណៈវិនិច្ឆ័យទាំង៥ ដែលធនាគារប្រើប្រាស់ក្នុងការវាយតម្លៃសំណើសុំកម្ចី។

ទ្រព្យបញ្ចាំ​ (COLLATERAL)

នៅពេលកត្តា “លក្ខខណ្ឌ” ត្រូវបានបំពេញ​ ធនាគារក៏មានលក្ខខណ្ឌតម្រូវឱ្យក្រុមហ៊ុនអាជីវកម្មមាន “ទ្រព្យបញ្ចាំ” ដើម្បីការពារធនាគារពីការខាតបង់ ក្នុងករណីក្រុមហ៊ុនអាជីវកម្មមិនអាចសងត្រឡប់បាន។ ជាទូទៅ ធនាគារអាចផ្តល់កម្ចីទំហំត្រឹមប្រមាណ ៧០% នៃតម្លៃទ្រព្យបញ្ចាំ។ តម្រូវការទ្រព្យបញ្ចាំ បានក្លាយឧបសគ្គចម្បងមួយ សម្រាប់ក្រុមហ៊ុនអាជីវកម្មក្នុងការទទួលបានកម្ចីពីធនាគារ។ យោងលើសាជីវកម្មហិរញ្ញវត្ថុអន្តរជាតិ (IFC) ៦៦% នៃអាជីវកម្មខ្នាតតូច និងមធ្យម ដែលបានស្នើសុំកម្ចីទៅកាន់ធនាគារ ត្រូវបានបដិសេធ ដោយសារមូលហេតុខ្វះទ្រព្យបញ្ចាំ។​ CGCC ត្រូវបានបង្កើតឡើង ដើម្បីចូលរួមដោះស្រាយបញ្ហានេះ​។ CGCC​ ផ្តល់ការធានាឥណទានដែលដើរតួជំនួសឱ្យទ្រព្យបញ្ចាំរបស់ក្រុមហ៊ុនអាជីវកម្ម ទៅកាន់ធនាគារ។ នៅពេលមានការធានាពី CGCC ធនាគារអាចវាយតម្លៃសំណើសុំខ្ចីពីក្រុមហ៊ុនអាជីវកម្ម ដោយចាត់ទុកការធានាឥណទានរបស់ CGCC ជាទ្រព្យបញ្ចាំរបស់ក្រុមហ៊ុនអាជីវកម្ម។ ការអនុវត្តនេះ អាចកាត់បន្ថយតម្រូវការទ្រព្យបញ្ចាំ​ សម្រាប់ក្រុមហ៊ុនអាជីវកម្មនៅពេលស្នើសុំកម្ចី។

សមត្ថភាព (CAPACITY)

សមត្ថភាពសងត្រឡប់ គឺជាតម្រូវការជាមូលដ្ឋាន របស់ធនាគារក្នុងការអនុម័តកម្ចី។ ការបំពេញបាននូវកត្តា “លក្ខខណ្ឌ” និង “ទ្រព្យបញ្ចាំ” ខាងលើ មិនទាន់គ្រប់គ្រាន់ដើម្បីឱ្យធនាគារអនុម័តកម្ចី ហើយ CGCC ក៏មិនទាន់អាចផ្តល់ការធានាឥណទានជូននៅឡើយទេ ប្រសិនបើអ្នកខ្ចីមិនអាចបញ្ជាក់បានអំពីសមត្ថភាពគ្រប់គ្រាន់ក្នុងការសងត្រឡប់កម្ចីនោះវិញ។​ តើក្រុមហ៊ុនអាជីវកម្មអាចបញ្ជាក់អំពីសមត្ថភាពសងបានយ៉ាងដូចម្តេច? ជាថ្មីម្តងទៀត ផែនការអាជីវកម្ម និងរបាយការណ៏ហិរញ្ញវត្ថុ​ដែលអាចជឿទុកចិត្តបាន គឺជាភស្តុតាងដ៏ល្អ។ របាយការណ៏ហិរញ្ញវត្ថុ អាចបង្ហាញពីទ្រព្យសកម្ម បំណុល ដើមទុន ចំណូល និងលំហូរសាច់ប្រាក់ របស់ក្រុមហ៊ុនអាជីវកម្ម ដែលព័ត៌មានទាំងនេះ​ គឺជាភស្តុតាងដែលអាចជឿទុកចិត្តបាន ក្នុងការវាយតម្លៃអំពីសមត្ថភាពសងរបស់ក្រុមហ៊ុនអាជីវកម្ម។ ចំណែកឯ ផែនការអាជីវកម្ម អាចបង្ហាញពីសកម្មភាពអាជីវកម្ម និងចំណូលនាពេលអនាគត​ ដែលអាចត្រូវបានប្រើប្រាស់ដើម្បីបញ្ជាក់អំពីសមត្ថភាពសងត្រឡប់ផងដែរ។

ដើមទុន (CAPITAL)

នៅពេលផ្តល់កម្ចីអាជីវកម្ម ធនាគារតែងតែចង់ដឹងអំពីចំនួនដើមទុនដែលអ្នកខ្ចី​ បានដាក់វិនិយោគក្នុងក្រុមហ៊ុន។ កត្តា “ដើមទុន” មានសារៈសំខាន់ ព្រោះទំហំដើមទុនរបស់អ្នកខ្ចី បញ្ជាក់ពីការប្តេជ្ញាចិត្តរបស់អ្នកខ្ចីចំពោះក្រុមហ៊ុនអាជីវកម្មនោះ។ តើអ្នកខ្ចីអាចបញ្ជាក់ជូនធនាគារអំពីកត្តាដើមទុនដោយវិធីណា? របាយការណ៏​ហិរញ្ញវត្ថុដែលមានលក្ខណៈស្តង់ដា អាចបញ្ជាក់អំពីទំហំដើមទុនរបស់ម្ចាស់ក្រុមហ៊ុនក្នុងក្រុមហ៊ុនអាជីវកម្មនោះ។ ឯកសារផ្លូវការមួយចំនួនទៀត ដូចជា កិច្ចព្រមព្រៀងភាពជាដៃគូ និងការចុះបញ្ជីក្រុមហ៊ុន គឺជាភស្តុតាងដែលអាចជឿទុកចិត្តបាន ដើម្បីបញ្ជាក់អំពីទំហំវិនិយោគរបស់អ្នកខ្ចី​ ទៅក្នុងក្រុមហ៊ុនអាជីវកម្ម។ ជាធម្មតា ធនាគារមានភាពលំបាកក្នុងការវាយតម្លៃក្រុមហ៊ុនដែលមិនបានចុះបញ្ជី ដោយសារតែកង្វះឯកសារដែលអាចជឿទុកចិត្តបាន ដើម្បីវាយតម្លៃសំណើសុំខ្ចី។ នេះជាមូលហេតុនៃការជំរុញ និងការលើកទឹកចិត្ត ឱ្យក្រុមហ៊នអាជីវកម្ម គួរចុះបញ្ចីឱ្យបានត្រឹមត្រូវ ដើម្បីបង្កើនលទ្ធភាពនៃការទទួលបានហិរញ្ញប្បទាន។

ចរិតលក្ខណៈ (CHARACTER)

កត្តាមួយទៀតដែលបញ្ជាក់ពីលទ្ធភាពសងត្រឡប់ គឺចរិតលក្ខណៈរបស់អ្នកខ្ចី។ ជាការកត់សម្គាល់ ធនាគារពិនិត្យមើលប្រវតិ្តឥណទានរបស់អ្នកខ្ចី​ ដូចជា ប្រវត្តិនៃការសងត្រឡប់ ចំនួនកម្ចី និងទំហំកម្ចីដែលមានស្រាប់ក្នុងពេលបច្ចុប្បន្ន ជាដើម ដើម្បីវាយតម្លៃអំពីភាពជឿទុកចិត្តបានរបស់អ្នកខ្ចី។ បច្ចុប្បន្ន ក្រុមហ៊ុនក្រេឌីត ប្យួរ៉ូ (ខេមបូឌា) កត់ត្រា និងផ្តល់នូវរបាយការណ៏កម្ចីឥណទានរបស់បុគ្គល និងអាជីវកម្ម ដែលអាចគាំទ្រដល់ធនាគារ ក្នុងការវាយតម្លៃអំពីចរិតលក្ខណៈរបស់អ្នកខ្ចី។ យ៉ាងណាក៏ដោយ ក្នុងករណីមានប្រវត្តិឥណទានមិនល្អ អ្នកខ្ចីត្រូវតែពង្រឹងគុណភាពនៃកត្តាផ្សេងៗដូចបានរៀបរាប់ខាងលើ ដើម្បីគួបផ្សំនឹងកត្តាចរិតលក្ខណៈ។ ជាក់ស្តែង ក្នុងអំឡុងពេលនៃវិបត្តិជំងឺកូវីដ-១៩ ក្រុមហ៊ុនអាជីវកម្មជាច្រើនជួបប្រទះនូវបញ្ហាប្រឈម ដែលនាំឱ្យការសងត្រឡប់កម្ចីមានភាពយឺតយ៉ាវ ឬមិនអាចសងត្រឡប់កម្ចីទាំងស្រុងតែម្តង ដែលកត្តានេះជះឥទ្ធិពលអវិជ្ជមាន ដល់កត្តាចរិតលក្ខណៈ និងកត្តាដើមទុនរបស់ក្រុមហ៊ុនអាជីវកម្ម។ ក្នុងករណីនេះ ដើម្បីទទួលបានកម្ចី អ្នកខ្ចីត្រូវ បង្ហាញផែនការអាជីវកម្មដែលសក្តានុពល និងមានភាពច្បាស់លាស់ និងអាចប្រើប្រាស់សេវាធានាឥណទានរបស់ CGCC ដើម្បីបង្កើនគុណភាពនៃកត្តាទ្រព្យបញ្ចាំ។

ដូចបានរៀបរាប់ពីខាងលើលក្ខណៈវិនិច្ឆ័យទំាងប្រាំ (5Cs) ដែលរួមមាន លក្ខខណ្ឌ (Condition) ទ្រព្យបញ្ចាំ (Collateral) សមត្ថភាព (Capacity) ដើមទុន (Capital) និងចរិតលក្ខណៈ (Character) គឺជាកត្តាសំខាន់ ដែលធនាគារជាទូទៅប្រើប្រាស់ជាមូលដ្ឋានក្នុងការវាយតម្លៃអ្នកខ្ចី មុននឹងអនុម័តកម្ចីណាមួយ។ ដូច្នេះ ការពង្រឹងគុណភាពលក្ខណៈវិនិច្ឆ័យទំាងប្រាំ (5Cs) អាចជួយឱ្យអ្នកខ្ចីមានឱកាសខ្ពស់ជាងមុន ក្នុងការទទួលបានកម្ចីពីធនាគារ។ ក្នុងនោះ របាយការណ៍ហិរញ្ញវត្ថុ និងផែនការអាជីវកម្ម​ដែលមានភាពជឿទុកចិត្តបាន អាចត្រូវបានប្រើប្រាស់ សម្រាប់ការវាយតម្លៃលើលក្ខណៈវិនិច្ឆ័យទំាងប្រាំ ខណៈសេវាធានាឥណទាន អាចជួយបង្កើនគុណភាពនៃកត្តាទ្រព្យបញ្ចាំរបស់ក្រុមហ៊ុនអាជីវកម្ម៕

(ដកស្រង់ពីអត្ថបទដើមជាភាសាអង់គ្លេសនៅក្នុងព្រឹត្តិបត្រព័ត៌មានប្រចាំត្រីមាស លេខទី២ របស់សាជីវកម្មធានាឥណទានកម្ពុជា៖ ព្រឹត្តិបត្រព័ត៌មានលេខទី២ (ខែមករា-មីនា ឆ្នាំ២០២២)

សាជីវកម្មធានាឥណទានកម្ពុជា (ស.ធ.ក.) មានកិត្តិយសសូមជម្រាបជូនដំណឹងដល់ស្ថាប័នទាំងអស់ ព្រមទាំងបណ្តាគ្រឹះស្ថានហិរញ្ញវត្ថុចូលរួម (PFIs) និងសាធារណជន មេត្តាជ្រាបថា៖ សាជីវកម្មធានាឥណទានកម្ពុជា (ស.ធ.ក.) នឹងផ្លាស់ប្តូរទីតាំងទៅអគារការិយាល័យថ្មី ដែលស្ថិតនៅ អគារមជ្ឈមណ្ឌលអភិវឌ្ឍធុរកិច្ច ជាន់ទី១៩ អគារ S ផ្លូវ OCIC កែង ផ្លូវ អូរវែង ភូមិគៀនឃ្លាំង, សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ ព្រះរាជាណាចក្រកម្ពុជា ចាប់ពីថ្ងៃទី០១ ខែមេសា ឆ្នាំ២០២២ នេះតទៅ។

អាស្រ័យហេតុនេះ សូមស្ថាប័នទាំងអស់ ព្រមទាំងបណ្តាគ្រឹះស្ថានហិរញ្ញវត្ថុចូលរួម (PFIs) និងសាធារណជន មេត្តាជ្រាបជាព័ត៌មាន។

ផែនទីទីតាំងអគារការិយាល័យថ្មីរបស់ស.ធ.ក.៖ https://goo.gl/maps/GG1sR2gDWK6DEUXo6

ព័ត៌មានបន្ថែម សូមទំនាក់ទំនងលេខទូរសព្ទ ០២៣ ៧២២ ១២៣ ឬអ៊ីម៉េល [email protected]

(រាជធានីភ្នំពេញ ថ្ងៃទី០១ ខែមេសា ឆ្នាំ២០២២)៖ សាជីវកម្មធានាឥណទានកម្ពុជា (CGCC) មានកិត្តិយសដាក់ឱ្យដំណើរការជាផ្លូវការនូវ “គម្រោងធានាឥណទានសម្រាប់សហគ្រិនស្រ្តី” ដែលមានទំហំសរុប ៣០លានដុល្លារ ចាប់ពីថ្ងៃទី០១ ខែមេសា ឆ្នាំ២០២២ នេះតទៅ ដើម្បីគាំទ្រដល់សហគ្រិនស្រ្តី ជាពិសេស សហគ្រិនស្ត្រីដែលខ្វះទ្រព្យបញ្ចាំនៅពេលស្នើសុំកម្ចី ឲ្យមានលទ្ធភាពទទួលបានហិរញ្ញប្បទានផ្លូវការច្រើនជាងមុន និងងាយស្រួលជាងមុន សម្រាប់ទុនបង្វិល និងពង្រីកអាជីវកម្ម។

គម្រោងធានាឥណទានសម្រាប់សហគ្រិនស្រ្តី ត្រូវបានរៀបចំឡើងស្របតាម “ក្របខណ្ឌយុទ្ធសាស្រ្ត និងកម្មវិធីស្តារ និងជំរុញកំណើនសេដ្ឋកិច្ចកម្ពុជា ក្នុងការរស់នៅជាមួយកូវីដ-១៩ តាមគន្លងប្រក្រតីភាពថ្មី សម្រាប់ឆ្នាំ ២០២១-២០២៣” របស់រាជរដ្ឋាភិបាល ដើម្បីជំរុញឱ្យធនាគារពាណិជ្ជ និងគ្រឹះស្ថានមីក្រូហិរញ្ញវត្ថុបង្កើនការផ្តល់ឥណទានបន្ថែម តាមរយៈការកែសម្រួលលក្ខខណ្ឌធានាឥណទាន ដោយពង្រីកវិសាលភាពនៃការផ្តល់ការធានាភ្ជាប់ជាមួយលក្ខខណ្ឌអនុគ្រោះ។

គម្រោងធានាឥណទានសម្រាប់សហគ្រិនស្រ្តី មានគោលបំណងបង្រួមគម្លាតរវាងតម្រូវការ និងការផ្គត់ផ្គង់ហិរញ្ញប្បទានសម្រាប់សហគ្រិនស្ត្រី និងអាជីវកម្មដែលគ្រប់គ្រង និងដឹកនាំដោយស្ត្រី តាមរយៈការធានាឥណទានរបស់ CGCC លើកម្ចីរហូតដល់ ៨០% នៃទំហំកម្ចី និងកម្រៃធានាឥណទានទាប សម្រាប់គ្រប់វិស័យ ជាមួយនឹងលក្ខខណ្ឌអនុគ្រោះផ្សេងៗទៀត។ គម្រោងនេះផ្តល់ការធានាឥណទាន លើគ្រប់ប្រភេទកម្ចី រួមមានកម្ចីមានកាលកំណត់ ឥណទានវិបារូបរ៍ ឥណទានពាណិជ្ជកម្ម។ គម្រោងធានាឥណទានសម្រាប់សហគ្រិនស្រ្តីនេះ គឺជាគម្រោងធានាឥណទានទី៣ របស់ CGCC បានដាក់ឱ្យដំណើរការនាពេលកន្លងមក។  គិតត្រឹមចុងខែមីនា ឆ្នាំ២០២២ CGCC បានផ្តល់ការធានាឥណទានលើកម្ចីទៅកាន់ក្រុមហ៊ុនអាជីវកម្មជាង ៣០០ ដែលក្នុងនោះ អាជីវកម្មដែលគ្រប់គ្រងដោយស្រ្តីមានប្រមាណ ៣០% នៃអាជីវកម្មសរុបដែលទទួលបានការធានាឥណទាន។ លោកអ្នកអាចទាញយកលក្ខខណ្ឌលម្អិតនៃគម្រោងធានាឥណទានសម្រាប់សហគ្រិនស្ត្រី តាមរយៈ https://bit.ly/3iRftBu។

CGCC គឺជាសហគ្រាសសាធារណៈដែលផ្តល់ការធានាឥណទានមុនដំបូងបង្អស់នៅកម្ពុជា ហើយដែលត្រូវបានបង្កើតឡើងដោយ អនុក្រឹត្យរបស់រាជរដ្ឋាភិបាលកម្ពុជា កាលពីខែកញ្ញា ឆ្នាំ២០២០ ក្រោមអាណាព្យាបាលបច្ចេកទេស និងហិរញ្ញវត្ថុ របស់ក្រសួងសេដ្ឋកិច្ច និងហិរញ្ញវត្ថុ។ បេសកកម្មចម្បងរបស់ CGCC គឺផ្តល់ការធានាឥណទាន ដើម្បីជំរុញបរិយាបន្នហិរញ្ញវត្ថុ និងគាំទ្រការអភិវឌ្ឍរបស់សហគ្រាសធុនតូច និងមធ្យម។

សម្រាប់ព័ត៌មានបន្ថែម សូមទាក់ទង CGCC តាមលេខទូរស័ព្ទ 023 722 123 ឬ ចូលទៅកាន់គេហទំព័រផ្លូវការរបស់ CGCC តាមរយៈ www.cgcc.com.kh។

ទាញយកសេចក្តីប្រកាសព័ត៌មានជាភាសាខ្មែរ៖ Women Entrepreneurs Guarantee Scheme_PR_KH

រាជធានីភ្នំពេញ ថ្ងៃទី២៥ ខែមីនា ឆ្នាំ២០២២៖ ថ្ងៃនេះ​ កម្មវិធីអភិវឌ្ឍន៍សហប្រជាជាតិ (UNDP) និងសាជីវកម្មធានាឥណទានកម្ពុជា (CGCC) បានរួមគ្នារៀបចំសន្និបាតស្តីពីបរិយាបន្នហិរញ្ញវត្ថុ​សម្រាប់សហគ្រិនស្ត្រីកម្ពុជា នៅទីក្រុងភ្នំពេញ ដើម្បីពិភាក្សាអំពីបញ្ហាប្រឈមនានាទាក់ទិននឹងបរិយាបន្នហិរញ្ញវត្ថុ និងប្រមូលធាតុចូល និងចំណេះដឹងពីអ្នកចូលរួម ជុំវិញការលើកកម្ពស់លទ្ធភាពទទួលបានហិរញ្ញប្បទានសម្រាប់សហគ្រាសខ្នាតមីក្រូ តូច និងមធ្យម (MSMEs) ដែលដឹកនាំដោយស្ត្រី។

ក្នុងព្រឹត្តិការណ៍នេះ មានការបង្ហាញលទ្ធផលសំខាន់ៗដកស្រង់ចេញពីរបាយការណ៍របស់ UNDP ដែលនឹងត្រូវចេញផ្សាយនាពេលខាងមុខ​ ក្រោមប្រធានបទ កម្មវិធីធានាឥណទានសាធារណៈនៅកម្ពុជាសម្រាប់សហគ្រាសខ្នាតតូច និងខ្នាតមធ្យម និងសហគ្រាសខ្នាតតូច និងមធ្យមដែលមានអ្នកគ្រប់គ្រងជាស្ត្រី។ របាយការណ៍នេះរកឃើញថា បញ្ហាប្រឈមធំៗជាងគេដែល MSMEs ជួបប្រទះក្នុងការទទួលបានហិរញ្ញប្បទាន រួមមានដូចជា ការតម្រូវឱ្យមានការដាក់ទ្រព្យបញ្ចាំដើម្បីទទួលបានកម្ចី លក្ខខណ្ឌផ្តល់កម្ចីតឹងរ៉ឹងដោយពុំមានការពិចារណាពីប្រតិបត្តិការអាជីវកម្មរបស់ MSMEs អត្រាការប្រាក់ខ្ពស់ រយៈពេលសងកម្ចីខ្លី និងសមត្ថភាពគ្រប់គ្រងរបស់ MSMEs ព្រមទាំងកង្វះខាតឯកសារហិរញ្ញវត្ថុនិងឯកសារគាំទ្រដទៃទៀត ជាដើម។ ជំងឺកូវីដ-១៩ បានបណ្តាលឱ្យ MSMEs ជួបប្រទះនឹងការលំបាកបន្ថែមទៀត ដោយក្នុងនោះ ២១,៣% ក្នុងចំណោមសហគ្រាសដែលបានចូលរួមក្នុងការសិក្សារនេះ រាយការណ៍ថាបានជួបការលំបាកច្រើនក្នុងការទទួលបានធនធានហិរញ្ញវត្ថុ ជាពិសេស ក្រុមហ៊ុនខ្នាតតូច និងក្រុមហ៊ុនក្រៅប្រព័ន្ធ ដែលដឹកនាំដោយស្ដ្រី ក្នុងវិស័យកម្មន្តសាល សំណង់ អចលនទ្រព្យ និងបដិសណ្ឋារកិច្ច។

របាយការណ៍ UNDP ប៉ាន់ប្រមាណថា កម្មវិធីធានាឥណទានសាធារណៈ នឹងផ្តល់នូវផលជាវិជ្ជមានយ៉ាងច្រើនដល់ផលិតផលសរុបក្នុងស្រុក (ផ.ស.ស.) របស់កម្ពុជា និងការបង្កើតការងារសម្រាប់វិស័យធំៗចំនួន ២ គឺ វិស័យកសិកម្ម និងបដិសណ្ឋារកិច្ច (សណ្ឋាគារ និងភោជនីយដ្ឋាន)។  របាយការណ៍នេះប៉ាន់ប្រមាណថា រៀងរាល់ការវិនិយោគ ១០០ លានដុល្លារ ក្នុងវិស័យកសិកម្ម នឹងនាំឱ្យមានការផ្តល់នូវតម្លៃបន្ថែមប្រមាណ ២២១ លានដុល្លារ ដល់ ផ.ស.ស. ដែលត្រូវបានកែសម្រួលទៅតាមអត្រាអតិផរណាក្នុងប្រទេស ឬ ផ.ស.ស. ពិត និងមានការបង្កើតការងារចំនួន ៤៨.៧៣៧ កន្លែង (១៧.៣៤៨ ការងារសម្រាប់ស្ត្រី)។ ផលដែលបានពីការវិនិយោគក្នុងវិស័យបដិសណ្ឋារកិច្ច ត្រូវបានប៉ាន់ស្មានថា មានប្រមាណជា ២០១ លានដុល្លារ ជាមួយនឹងសក្ដានុពលបង្កើតការងារចំនួន ១៦.២២៦ កន្លែង (១.១៣០ ការងារសម្រាប់ស្រ្តី)។

លោកស្រី Alissar Chaker អ្នកតំណាង UNDP ប្រចាំកម្ពុជា បានគូសបញ្ជាក់ថា «សហគ្រិនជាស្ត្រីមិនទាន់ទទួលសេវាឱ្យបានគ្រប់គ្រាន់ពីប្រព័ន្ធហិរញ្ញវត្ថុនោះឡើយ។ បើទោះជា ៦១% នៃអាជីវកម្មទាំងអស់នៅកម្ពុជាមានម្ចាស់ជាស្ត្រីក៏ដោយ មានសហគ្រិនស្ត្រីត្រឹមតែ ៣% ប៉ុណ្ណោះ ដែលមានលទ្ធភាពទទួលបានឥណទានជាផ្លូវការ (របាយការណ៍ធនាគារពិភពលោក ឆ្នាំ ២០១៩)[1]។ សហគ្រាសខ្នាតមីក្រូ តូច និងមធ្យមដែលមានម្ចាស់ជាស្ត្រី គឺជាធនធានដ៏សំខាន់សម្រាប់ការស្ដារឡើងវិញក្រោយការរាតត្បាតជាសកល និងធានាបាននូវវិបុលភាពនាពេលអនាគត។ កម្មវិធីធានាឥណទានសាធារណៈដែលមានភាពឆ្លើយតប នឹងចូលរួមដោះស្រាយភាពបរាជ័យនៃទីផ្សារឥណទាន ព្រមទាំងបញ្ហាប្រឈមជុំវិញលទ្ធភាពទទួលបានឥណទាន ដោយភាគីទី ៣ ជាអ្នកជួយកាត់បន្ថយហានិភ័យឥណទានដែលផ្តល់ទៅឱ្យអ្នកដែលខ្ចីបំណុលជាស្ត្រី ក្នុងករណីដែលពួកគេមិនអាចសងកម្ចីនេះបាន។  កម្មវិធីបែបនេះ ក៏លើកកម្ពស់ប្រព័ន្ធហិរញ្ញវត្ថុប្រកបដោយបរិយាបន្ន និងពង្រីកលទ្ធភាពទទួលបានធនធានហិរញ្ញវត្ថុ ដោយមិនចាំបាច់មានវត្ថុធានា ដែលស្ត្រីមានការខ្វះខាត ឬពុំមានគ្រប់គ្រាន់។»

លោកស្រី Chaker មានប្រសាសន៍ថា «UNDP​ និងដៃគូអភិវឌ្ឍន៍ដ៏ទៃទៀត កំពុងគាំទ្រដល់កិច្ចខិតខំប្រឹងប្រែងរបស់ជាតិក្នុងការពន្លឿនការលើកកម្ពស់ផ្នែកសង្គម និងសេដ្ឋកិច្ចដល់ស្រ្តី។ សហគ្រិនជាស្ត្រី ត្រូវបានលើកទឹកចិត្តឱ្យតាមដានព័ត៌មានស្តីពីសេវាហិរញ្ញវត្ថុ និងសេវាមិនមែនហិរញ្ញវត្ថុដែលមាននៅក្នុងទីផ្សារ ដូចជា កម្មវិធីធានាជាសាធារណៈជាដើម ដើម្បីធ្វើការសម្រេចចិត្តឱ្យបានត្រឹមត្រូវ និងពង្រីកជម្រើស ដើម្បីទទួលបានធនធានហិរញ្ញវត្ថុសម្រាប់ខ្លួនឯង។»

លោក Wong Keet Loong ប្រធាននាយកប្រតិបត្តិនៃសាជីវកម្ម CGCC មានប្រសាសន៍ថា «CGCC ត្រូវបានបង្កើតឡើង កាលពីដើមឆ្នាំ ២០២១ ដោយមានបេសកកម្មផ្ដល់សេវាធានាឥណទាន និងលើកកម្ពស់ការទទួលបានហិរញ្ញប្បទានប្រកបដោយបរិយាបន្ន។ ផ្អែកតាមវឌ្ឍនភាពនៃការធានាឥណទានកន្លងមក សហគ្រាសភាគច្រើន ដែលទទួលបានកម្ចីមានការធានា គឺជាសហគ្រាសខ្នាតតូច និងមធ្យម  (៩៦%)។ ទោះជាយ៉ាងនេះក្ដី ក្នុងចំណោមអាជីវកម្មទាំងអស់ដែលបានទទួលបានកម្ចីមានការធានា មានត្រឹមតែ ២៥% ប៉ុណ្ណោះ ដែលគ្រប់គ្រងដោយស្ត្រី។ គម្រោងធានាឥណទានថ្មីរបស់ CGCC ដែលនឹងត្រូវប្រកាសផ្សព្វផ្សាយក្នុងសន្និបាតនៅថ្ងៃនេះ ត្រូវបានបង្កើតឡើងជាពិសេស សម្រាប់ម្ចាស់អាជីវកម្ម MSMEs ជាស្ត្រី ក្នុងគោលបំណងបង្រួមគម្លាតហិរញ្ញប្បទាន រវាងសហគ្រិនជាស្ត្រី និងគ្រឹះស្ថានហិរញ្ញវត្ថុផ្លូវការនានា។»

តាមរយៈសន្និបាតនេះ សហគ្រាសខ្នាតមីក្រូ តូច និងមធ្យម ដែលដឹកនាំដោយស្ត្រី បានចែករំលែកទស្សនៈយល់ឃើញ បញ្ហាប្រឈម និងបទពិសោធន៍របស់ពួកគេ ជុំវិញការទទួលបានហិរញ្ញប្បទាន។ អ្នកចូលរួមក៏មានឱកាសភ្ជាប់ទំនាក់ទំនងជាមួយនឹងម្ចាស់អាជីវកម្មដទៃទៀត ក៏ដូចជាគ្រឹះស្ថានហិរញ្ញវត្ថុដែលចូលរួមនៅក្នុងព្រឹត្តិការណ៍នេះ ដើម្បីចងក្រងបណ្ដាញទំនាក់ទំនងទៅវិញទៅមក ចែករំលែកព័ត៌មាន និងសហការគ្នានាពេលអនាគត។

UNDP ផ្តល់ការគាំទ្រដល់កិច្ចខិតខំប្រឹងប្រែងឆ្លើយតប និងស្ដារឡើងវិញពីវិបត្តិជំងឺកូវីដ-១៩ របស់រាជរដ្ឋាភិបាលកម្ពុជា តាមរយៈការលើកកម្ពស់ការអភិវឌ្ឍប្រកបដោយបរិយាបន្ន និងចីរភាព ការពង្រឹងសមត្ថភាពស្ថាប័នឲ្យមានភាពរឹងមាំ សេវាគាំពារសង្គម ការធ្វើឌីជីថលូបនីយកម្ម ការពន្លឿនការធ្វើពាណិជ្ជកម្មតាមប្រព័ន្ធអេឡិចត្រូនិក និងការលើកកម្ពស់ភាពធន់ទៅនឹងហានិភ័យអាកាសធាតុ ដោយមិនទុកនរណាម្នាក់ចោល។

អំពី UNDP

          UNDP  គឺជាទីភ្នាក់ងារអង្គការសហប្រជាជាតិបាននាំមុខគេ ក្នុងការប្រយុទ្ធប្រឆាំងដើម្បីបញ្ចប់ភាពអយុត្តិធម៌នៃភាពក្រីក្រ វិសមភាព និងការប្រែប្រួលអាកាសធាតុ។ តាមរយៈការធ្វើការងារជាមួយនឹងបណ្ដាអ្នកជំនាញនិងដៃគូយ៉ាងទូលំទូលាយរបស់ខ្លួនក្នុងប្រទេសចំនួន ១៧០ យើងជួយប្រទេសនានាក្នុងការកសាងនូវដំណោះស្រាយបែបរួមចម្រុះដែលមាននិរន្តរភាពយូរអង្វែងសម្រាប់មនុស្ស និងផែនដី។ សូមស្វែងយល់បន្ថែម តាម   រយៈ https://www.kh.undp.org/ ឬតាមដានព័ត៌មានពីយើងតាមរយៈ @UNDPCambodia។

អំពី CGCC

សាជីវកម្មធានាឥណទានកម្ពុជា (Credit Guarantee Corporation of Cambodia – CGCC) CGCC)  គឺជាសហគ្រាសសាធារណៈ ដែលបង្កើតឡើងដោយអនុក្រឹត្យលេខ ១៤០ អនក្រ.បក ចុះថ្ងៃទី ១ ខែ កញ្ញា ឆ្នាំ ២០២០។ សាជីវកម្ម CGCC ដំណើរការក្រោមអាណាព្យាបាលផ្នែកបច្ចេកទេស និងហិរញ្ញវត្ថុ ពីក្រសួងសេដ្ឋកិច្ច និងហិរញ្ញវត្ថុ។

[1] World Bank (2019). Exploring the Opportunities for Women-owned SMEs in Cambodia.

Click here to read about: CGCC and Access to Finance for Women Entrepreneurs

នាថ្ងៃអង្គារ ទី១៥ ខែមីនា ឆ្នាំ២០២២ លោក ណូ លីដា អគ្គនាយករង សាជីវកម្មធានាឥណទានកម្ពុជា បានចូលរួមជាវាគ្មិន នៅក្នុងសិក្ខាសាលាអនឡាញស្តីពី “ការណែនាំអំពីបច្ចេកវិទ្យាជីវឧស្ម័នខ្នាតធំ និងការប្រើប្រាស់” ក្រោមប្រធានបទ “ហិរញ្ញប្បទានសម្រាប់គម្រោងជីវឧស្ម័នខ្នាតធំ ដោយមានការធានាឥណទាន” ដែលរៀបចំឡើងដោយ មជ្ឈមណ្ឌលបច្ចេកវិទ្យា និងព័ត៌មានជីវឧស្ម័ន (BTIC)។ សិក្ខាសាលានេះ ផ្តោតសំខាន់លើការលើកកម្ពស់ការយល់ដឹងនៅក្នុងចំណោមសាធារណជន អំពីបច្ចេកវិទ្យាជីវឧស្ម័នខ្នាតធំ និងការទទួលបានហិរញ្ញប្បទាន ដើម្បីអនុវត្តគម្រោងបច្ចេកវិទ្យាជីវឧស្ម័នខ្នាតធំ។

លោក ណូ លីដា បានចូលរួមចែករំលែកអំពីសាជីវកម្មធានាឥណទាន គម្រោងធានាឥណទាន នីតិវិធីនៃការផ្តល់ការធានាឥណទាន និងអត្ថប្រយោជន៍នៃការធានាឥណទាន ព្រមទាំងកិច្ចសហការនានារវាង CGCC និងស្ថាប័នពាក់ព័ន្ធ រួមមាន ទាំងគ្រឹះស្ថានហិរញ្ញវត្ថុចូលរួម ដៃគូអភិវឌ្ឍន៍ និងសមាគមនានា។ លោកក៏បានជម្រាបជូនអំពីការប្តេជ្ញាចិត្តយ៉ាងមុតមាំរបស់ CGCC ក្នុងការធ្វើការរួមគ្នា ជាមួយភាគីពាក់ព័ន្ធផ្សេងទៀត ដើម្បីលើកកម្ពស់លទ្ធភាពទទួលបានហិរញ្ញប្បទានសម្រាប់គម្រោងថាមពលស្អាត។

គួរបញ្ជាក់ផងដែរថា កាលពីថ្ងៃទី២៤ ខែមករា ឆ្នាំ២០២២ កន្លងទៅ CGCC និង BTIC បានចុះហត្ថលេខាលើអនុស្សរណៈ​ នៃការយោគយល់គ្នា (MoU) ស្តីពីការបង្កើតកិច្ចសហប្រតិបត្តិការក្នុងគោលបំណងជំរុញការវិនិយោគលើបច្ចេកវិទ្យាជីវឧស្ម័នខ្នាតធំនៅកម្ពុជា ក្រោមគម្រោង ​“កាត់បន្ថយការបញ្ចេញឧស្ម័នផ្ទះកញ្ចក់ដោយជំរុញការវិនិយោគលើជីវឧស្ម័នខ្នាតធំ” ក្រោមកិច្ចគាំទ្រហិរញ្ញវត្ថុពីមូលនិធិបរិស្ថាន​ពិភពលោក (GEF) ដែលជាគម្រោងសំខាន់សម្រាប់កម្មវិធីដើម្បីភាពជាដៃគូប្រទេស (PCP) ដែលកំពុងអនុវត្តរបស់អង្គការ UNIDO នៅកម្ពុជា។

ស្វែងយល់បន្ថែមពីកិច្ចសហប្រតិបត្តិការនេះ៖ https://bit.ly/3fToLex

Click here to read about: CGCC & Cambodian Public Bank Plc. entered into Partnership on Credit Guarantee

នាថ្ងៃទី២៤ ខែកុម្ភៈ ឆ្នាំ២០២២ ពិធីចុះហត្ថលេខាលើកិច្ចព្រមព្រៀងធានាឥណទានរវាងធនាគារកម្ពុជាសាធារណៈ និងសាជីវកម្មធានាឥណទានកម្ពុជា (ស.ធ.ក.) បានប្រារព្ធឡើងជាផ្លូវការ នៅឯទីស្នាក់ការកណ្តាលធនាគារកម្ពុជាសាធារណៈ ។

គោលបំណងចម្បងនៃភាពជាដៃគូលើការធានាឥណទាននេះ គឺដើម្បីជម្រុញ និងផ្តល់ភាពងាយស្រួលដល់សហគ្រាសធុនតូច និងមធ្យម ក្នុងការទទួលបានហិរញ្ញប្បទាន ប្រើប្រាស់ជាទុនបង្វិល និងការវិនិយោគឬពង្រីកអាជីវកម្ម ក្នុងបរិបទនៃជំងឺកូវីដ១៩ ដែលស្របទៅនឹងគោលនយោបាយរបស់រាជរដ្ឋាភិបាលកម្ពុជា ក្នុងការជ្រោមជ្រែងដល់សហគ្រាសធុនតូចនិងមធ្យម ដើម្បីអភិវឌ្ឍអាជីវកម្មរបស់ពួកគេ។ ធនាគារកម្ពុជាសាធារណៈ នឹងធ្វើការយ៉ាងជិតស្និទ្ធជាមួយនឹង ស.ធ.ក. ក្នុងការលើកកម្ពស់គម្រោងធានាឥណទាន ដែលផ្តល់ដោយ ស.ធ.ក. រួមមានជាចម្បង គឺគម្រោងធានាឥណទានដើម្បីស្តារអាជីវកម្ម ដើម្បីឆ្លើយតបទៅនឹងតម្រូវការរបស់សហគ្រាសធុនតូចនិងមធ្យម។​

នៅក្នុងពិធីចុះហត្ថលេខានេះ លោក Ong Ming Teck នាយកប្រតិបត្តិធនាគារកម្ពុជាសាធារណៈ បានមានប្រសាសន៍ឱ្យដឹងថា “​សហគ្រាសធុនតូច និងមធ្យម (SMEs) ដើរតួនាទីយ៉ាងសំខាន់ក្នុងការកសាងប្រទេសជាតិ និងកំណើនសេដ្ឋកិច្ចកម្ពុជា តាមរយៈការផ្តល់ការងារ ប្រាក់ចំណូល និងការកាត់បន្ថយភាពក្រីក្រក្នុងរយៈពេលវែង។ ភាពជាដៃគូនេះនឹងពង្រឹងបន្ថែមទៀតនូវការជំរុញរបស់យើង ក្នុងការលើកកម្ពស់បរិយាបន្នហិរញ្ញវត្ថុ និងចំណេះហិរញ្ញវត្ថុដល់ SMEs និងប្រជាជនកម្ពុជា ជាពិសេសអ្នកដែលមានលទ្ធភាពនៅមានកម្រិតក្នុងការទទួលបានហិរញ្ញវត្ថុ និងសេវាធនាគារក្នុងតម្លៃទាប។”

លោក Ong បានបន្ថែមទៀតថា  “ការចុះហត្ថលេខាលើភាពជាដៃគូនេះ គឺស្របពេលជាមួយគ្នានឹងគម្រប់ខួបលើកទី៣០នៃការបង្កើតធនាគារកម្ពុជាសាធារណៈ នៅក្នុងឆ្នាំនេះ ហើយក្នុងនោះ ផលិតផល សេវា និងគំនិតផ្តួតផ្តើមឌីជីថលថ្មីៗបន្ថែមទៀត នឹងត្រូវបានដាក់ចេញដើម្បីផ្តល់អត្ថប្រយោជន៍ដល់អតិថិជនរបស់យើង ដែលជាផ្នែកមួយនៃការប្រារព្ធពិធីរបស់យើង ក្នុងការបង្ហាញអំពីវត្តមានដ៏រឹងមាំរបស់យើងនៅកម្ពុជា។ យើង​មាន​ទំនុក​ចិត្ត​ក្នុង​ការ​ដើរ​តួនាទី​ជាផ្នែកមួយនៃការឆ្ពោះ​ទៅ​រក​ការ​កសាង​ប្រទេស​ជាតិ និង​ការ​ផ្តល់​លទ្ធភាព​ហិរញ្ញវត្ថុ​ដល់​ SMEs នៅ​គ្រប់​សាខា​ទាំង ៣១ របស់​យើង”។​

ជាមួយគ្នានេះផងដែរ លោក Wong Keet Loong អគ្គនាយក ស.ធ.ក. ក៏បានគូសបញ្ជាក់ឱ្យដឹងដែរថា “សាជីវកម្មធានាឥណទានកម្ពុជា ពិតជាមានក្តីសោមនស្សរីករាយក្នុងការចាប់ដៃគូជាមួយធនាគារកម្ពុជាសាធារណៈ ដែលមានបណ្តាញសាខាយ៉ាងទូលំទូលាយ ក្នុងការពង្រីកទៅដល់អតិថិជនឱ្យកាន់តែច្រើន ដើម្បីបង្កើនការអភិវឌ្ឍសហគ្រាសធុនតូចនិងមធ្យម”។

លោកបានបន្ថែមទៀតថា “ពួកយើងពិតជាមានកម្លាំងចិត្ត​ ដោយឃើញនូវសមិទ្ធផលរយៈពេល២ខែដំបូង នៃឆ្នាំ២០២២នេះ ដែលការធានាឥណទានរបស់យើងមានកំណើនគួរឱ្យកត់សម្គាល់ ពោលគឺមានចំណែកប្រហែល៤៥%នៃការធានាឥណទានក្នុងឆ្នាំ២០២១។ ជាមួយនឹងកំណើនសកម្មភាពសេដ្ឋកិច្ច យើងជឿជាក់ថា តម្រូវការនៃការធានាឥណទានកាន់តែជួយបង្កើនការផ្តល់កម្ចីដល់ម្ចាស់អាជីវកម្មនៅប្រទេសកម្ពុជា ឱ្យកាន់តែច្រើនជាងមុន។ ពួកយើងសង្ឃឹមផងដែរថា ការចូលរួមពីគ្រឹះស្ថានហិរញ្ញវត្ថុ នឹងផ្តល់ ឱកាសកាន់តែច្រើន ដល់សហគ្រាសធុនតូច និងមធ្យម រួមទាំងអាជីវកម្មខ្នាតមីក្រូ ដើម្បីអភិវឌ្ឍអាជីវកម្មរបស់ពួកគេ”។

គួរបញ្ជាក់ផងដែរថា ស.ធ.ក. គឺជាសហគ្រាសសាធារណៈ ស្ថិតនៅក្រោមអាណាព្យាបាលបច្ចេកទេស និងហិរញ្ញវត្ថុ របស់ក្រសួងសេដ្ឋកិច្ច និងហិរញ្ញវត្ថុ និងបានចុះបញ្ជីជាផ្លូវការ នៅខែវិច្ឆិកា ឆ្នាំ២០២០។ បេសកកម្មចម្បងរបស់ ស.ធ.ក. គឺផ្តល់ការធានាឥណទានលើកម្ចីដែលផ្តល់ឱ្យអាជីវកម្ម ដើម្បីចែករំលែកហានិភ័យជាមួយស្ថាប័នផ្តល់កម្ចី និងបង្កើនបរិយាបន្នហិរញ្ញវត្ថុ។

គិតត្រឹមថ្ងៃទី២១ ខែកុម្ភៈ ឆ្នាំ២០២២នេះ ស.ធ.ក បានផ្តល់ការធានាឥណទាន ដល់អាជីវកម្មសរុបចំនួន ២៥៨  ក្នុងទំហំទឹកប្រាក់ជាង២៦លានដុល្លារអាមេរិក ដែលក្នុងនោះ ៩៦% នៃចំនួនអាជីវកម្មដែលទទួលការធានាសរុប បានផ្តល់ជូនទៅសហគ្រាសធុនតូចនិងមធ្យម (SME)។

Click here to read about: CGCC and CAB Signed on Credit Guarantee Agreement to Provide Loans to MSMEs and Large Businesses